Ap 18
18
Xt'anik li nimla tenamit Babilonia
1Chirix chik a'an kiwil jun chik li ánjel yo chaq chi kub'eek sa' choxa rik'in xnimal xwankil, ut kikutano'k li ruuchich'och' xb'aan li xnimal xloq'al.#18,1 Ez 43,2. 2Kixjap re chi kaw xyaab' xkux:
“Xt'ane'k, ak xt'ane'k li nimla tenamit Babilonia.#18,2 Is 21,9; Jr 51,8; Ap 14,8.
Xkanaak cho'q xna'ajeb' li maa'us,
cho'q xtz'alam chixjunileb' li tz'ajn aj musiq'ej,
xtz'alameb' chixjunil li xik'anel xul tz'ajeb' ru ut tz'eqb'eetaleb'.#18,2 Is 13,21; Jr 50,39; Bar 4,35.
3Xb'aan naq chixjunileb' li tenamit
xe'ruk' li xb'iinul ut xe'xb'aanu li maa'usilal rik'in;
eb' li awab'ej re li ruuchich'och' xe'xmux rib'eb',
ut eb' laj yakonel sa' ruuchich'och'
xe'b'ihomo'k rik'in li xjo'maajo'il aj maa'usilal”.
4Moqon kiwab'i jun chik xyaab' kuxej yo chi xyeeb'al sa' choxa:
“Elenqex chaq Babilonia, ex intenamit:
mare anchal tex'okenq sa' li xmaakeb'
ut toxexxtaw li xrahilaleb'.
5Xb'aan naq li xmaakeb' li tenamit a'an
ak xo'tub'laaq toj sa' choxa,
ut xnaqk sa' xch'ool li Yos li xmaa'usilaleb'.
6K'ehomaq re jo' naq a'an kik'ehok,#18,6 Sal 28,4; 137,8; Jr 50,29.
chek'e reeqaj li xb'aanuhom ka' sut chik xk'ihal.
Ut sa' li sek' kixkawresi wi' li uk'a',
chekawresi laa'ex li xka'wail re a'an.
7Jo'nimal xnimob'resi wi' rib' ut xrataw li maa'usilal,
jo'kan ajwi' k'ehomaq reeqaj rik'in rahilal ut yot'e'k.
Xb'aan naq kixye sa' xch'ool:
«K'ojk'ookin jo' xna' li tenamit,
maawa'in xmalka'an ut maajoq'e twil li rahil ch'oolej», chan.
8Jo'kan naq chiru jun kutan#18,8 Is 47,7-9.
talaje'chalq sa' xb'een chixjunileb' li xrahilal:
a' li rax kamk, rahil ch'oolej, we'ej,
ut taak'ate'q rik'in xam.
Xb'aan naq nim xwankil li Qaawa' Yos
li xteneb'ank tojb'amaak sa' xb'een”.
9Eb' li awab'ej re li ruuchich'och' li ke'xmux rib' rik'in ut sa naq ke'wank rik'in, te'yaab'aq ut huyhutqeb' chirix, naq te'ril li xsib'el li xk'atik; 10te'kanaaq chi najt xb'aan xxiweb' chiruheb' li xrahilal ut te'xye:
“Toq'ob' aawu, toq'ob' aawu, at Nimla Tenamit,
at kawil tenamit Babilonia!
Yal chiru jun k'amok
xk'ulunk li tojb'amaak teneb'anb'il sa' aab'een!”.
11Eb' laj yakonel sa' ruuchich'och' te'yaab'aq ut huyhutqeb' chirix, xb'aan naq maa'ani chik naloq'ok li xk'ayeb': 12a' li oor, plaat, tertookil pek ut lemtz'il q'ol, liino ut púrpura, seda ut kaqjorinkil t'ikr, jo'wi' chixjunil chik li k'iila paay chi sununkil che', chixjunil li k'a'aq re ru yiib'anb'il rik'in marfil, chixjunil li k'a'aq re ru yiib'anb'il rik'in chaab'il che', q'anch'iich', ch'iich' ut mármol; 13kaneel, amomo, sununkil b'an, miir, pom, b'iin, aseeyt, k'aj, triiw, xul aj iiqonel, karneer, kawaay ut b'eleb'aal ch'iich'; loq'b'il moos ut yalaq ani chik chi winqul. 14Ut te'xye re li tenamit:
“Eb' li ki'il q'een natzemtzot wi' aach'ool xe'sachk chawu;
chixjunil li xchaq'al ru ut li q'axal loq' ak xraqe'k cho'q aawe
ut maajoq'e chik taatawmanq”.
15Eb' laj yakol re a k'a'aq re ru a'in, eb' li xe'b'ihomo'k xb'aan a'an, te'kanaaq chi najt xb'aan xxiweb' chiru li xrahilal, huyhutqeb' chi yaab'ak:
16“Toq'ob' ru, toq'ob' ru li Nimla Tenamit,
tiqto rik'in liino, kaqjorinkil ut kaqmoqinkil t'ikr!
Toq'ob' ru li nalemtz'unk rik'in oor, tertookil pek ut lemtz'il q'ol!
17Yal chiru jun k'amok xsachk li nimla b'ihomal a'in!”, cha'qeb'.
Chixjunileb' laj jolominel re jukub' ut li jo'k'ihal wankeb' chisa', eb' li neke'b'eresink re ut chixjunileb' li neke'k'anjelak chiru ha' ke'kanaak chi najt 18ut japjookeb' re naq ke'ril li xsib'el li xk'atik: “Ani chanchan li Nimla Tenamit?”, chankeb'. 19Ke'xk'e pojtz' sa' xjolomeb', te'yaab'aq ut te'xten re xch'ooleb' naq ke'xjap re chi xyeeb'al:
“Toq'ob' ru, toq'ob' ru li Nimla Tenamit!
Chixjunileb' li wankeb' xjukub' sa' li palaw
xe'b'ihomo'k rik'in li xnimal b'ihomal,
ut anaqwan, yal chiru jun k'amok,
xkanaak chi nakirnak!”.
20Chatsaho'q xb'aan a'an, at choxa.
Chisaho'q sa' eech'ool, ex sant, apóstol ut propeet,
xb'aan naq rik'in xteneb'ankil li tojb'amaak sa' xb'een,
li Yos xraqok aatin sa' tiikilal.
21Toja' naq jun li ánjel kaw rib' kixchap jun li pek k'ajo' xnimal, jo' jun nimla sursuukil ke'leb' pek, ut kixkut sa' palaw, yo chi xyeeb'al:
“Jo'ka'in, sa' jun chiq'ok ajwi'
naq taakute'q li nimla tenamit Babilonia,
ut ink'a' chik taak'utunq.
22Ut li xyaab'eb' laj aarp, laj b'ichanel, laj xolb' ut laj tronpeet
ink'a' chik taa'ab'iiq aawik'in;
maajun chik aj pak'ol k'a'aq re ru taatawmanq wankat wi';
li xyaab' li sursuukil ke'leb' pek
ink'a' chik taa'ab'iiq aawik'in.
23Li xxamlel li saqenk ink'a' chik taasaqeno'q wankat wi',
ut li xyaab' xkuxeb' li b'eelomej ut li ixaqilb'ej
ink'a' chik taa'ab'iiq aawik'in.#18,22-23 Is 24,8; Jr 7,34; 25,10; Ez 26,13.
Xb'aan naq eb' laj yakonel ke'wank aawik'in
a'aneb' li xninqaleb' ru winq sa' ruuchich'och',
ut rik'in li tuulak xab'aanu
xab'alaq'i chixjunileb' li tenamit”.
24Aran, sa' li tenamit Babilonia, xtawe'k xkik'eleb' li propeet, xkik'eleb' li sant ut chixjunileb' li kilaje'kamsiik sa' ruuchich'och'.
Currently Selected:
Ap 18: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
