Ap 15

Eb' li wuqub' chi rahilal

1Chirix chik a'an kiwil sa' choxa jun chik nimla eetalil ut sachb'ach'oolej rilb'al: wuqub' chi ánjel yookeb' chaq chi xk'amb'al wuqub' chi rahilal te'chalq sa' roso'jik, xb'aan naq rik'ineb' a'an taatz'aqloq ru li xjosq'il li Yos.

2Kiwil ajwi' jo' jun li palaw nalemtz'unk ru, yuub'il rik'in xam; ut eb' li ke'xq'ax ru li josq' aj xul jo' ajwi' li ink'a' ke'xk'e xwankil li xjalam u ut li rajlil li xk'ab'a', xaqxookeb' chire li palaw nalemtz'unk ru, wankeb' li aarp k'eeb'il xb'aan li Yos sa' ruq'eb' 3ut yookeb' chi xb'ichankil li xb'ich laj Moisés, laj k'anjel chiru li Yos, jo'wi' li xb'ich li Karneer:

“Q'axal ninqeb' ut sachb'ach'oolej rilb'al laab'aanuhom,

at Qaawa', at Nimajwal Yos;

tiik ut tz'aqal yaal ru laab'e,

at xReyeb' li tenamit!

4Ani ink'a' tixxiwa ut ink'a' tixnima ru laak'ab'a', at Qaawa'?

Xb'aan naq ka'jat wi' laa'at santat,

ut chixjunileb' li tenamit talaje'chalq

ut te'xhupub' rib' chawe chawu,

xb'aan naq xe'kanaak chi kutankil laaninqal k'a'uxl”.

5Chirix chik a'an kiwil sa' choxa naq kixte rib' li santil ochoch wan wi' li xmuheb'aal li Sumwank, 6ut ke'elk chaq sa' li santil ochoch eb' li wuqub' chi ánjel li wan chaq li wuqub' chi rahilal rik'ineb', tiqtookeb' rik'in tz'aqal liino nalemtz'unk, ut b'ak'b'ookeb' li re xch'ool rik'in xk'aamal sa' oor. 7Moqon chik jun reheb' li kaahib' chi yo'yookeb' kixq'axtesi reheb' li wuqub' chi ánjel wuqub' chi sek' oor,#15,7 Eb' li sek' a'an reetalil li xninqal rahilal chalqeb' re (cf. eb' li tronpeet sa' Ap 8-9 jo' ajwi' li lajeeb' rahilal xk'ulumeb' chaq laj Ejiipt sa' Ex 7-10). nujenaqeb' rik'in xjosq'il li Yos li yo'yo chi junelik q'e kutan. 8Ut li santil ochoch kinujak rik'in xsib'el li xloq'al ut li xwankil li Yos: maa'ani naruhank chi ok sa' li santil ochoch toj te'raqe'q li wuqub' chi rahilal wankeb' rik'in li wuqub' chi ánjel.#15,8 Li sib' a'an reetalil li xloq'al li Yos (cf. Ex 19,18; 1 R 8; Is 6,4). Najter q'e kutan laj Moisés nasum'aatinak rik'in li Qaawa' sa' li Loq'laj Muheb'aal (cf. Ex 25,8-9.22; Nm 9,15). Ab'an anaqwan maa'ani naru taa'ok chisa' re tz'aamank ut elajink, toj reetal te'raqe'q li wuqub' chi rahilal.

Currently Selected:

Ap 15: QQC

Highlight

Copy

Compare