Mt 22
22
Li jaljookil ru aatin chirix xninq'ehinkil sumlaak
(Lk 14,15-24)
1Ki'ok wi' chik chi aatinak li Jesus ut kixye reheb' sa' jaljookil ru aatin:
2“Li xnimajwal wankilal li choxa chanchan jun li awab'ej li kixninq'ehi xsumlajik li ralal. 3Kixtaqlaheb' li xmoos chi xb'oqb'aleb' li rula', a'ut eb' a'an ink'a' ke'raj chalk. 4Toj kixtaqlaheb' jalan chik li xmoos: «Yehomaq reheb' li wula': Ak k'uub'k'u lintzekemq; eb' linwakax ut eb' linch'oolaninb'il xul ak xe'kamsiik. Ak kawresinb'il chixjunil. Kimqex chi xninq'ehinkil li sumlaak!». 5A'ut eb' a'an ink'a' ke'raj rab'inkil ut koheb': wan koho sa' xk'al, wan koho chi yakok; 6ut eb' li junch'ol chik ke'xchapeb' li xmoos li awab'ej, ke'xhob'eb' ut ke'xkamsiheb'.
7“K'ajo' naq kijosq'o'k li awab'ej, ut kixtaqlaheb' laj puub' chi xsachb'aleb' laj kamsinel a'an ut xk'atb'al li xtenamiteb'. 8Toja' naq kixye reheb' li xmoos: «Ak k'uub'k'u li ninq'e, ab'an eb' li wula' moko xk'ulub'eb' ta chalk. 9Ayuqex b'i' sa'atqeb' li xaalib'e, ut jo'k'ihaleb' teetaw, b'oqomaqeb' chaq sa' li ninq'e». 10Eb' a moosej a'an ke'elk sa'atqeb' li b'e, ke'xch'utub'eb' li jo'k'ihal ke'xtaw, jun chalikeb' li us jo'wi' li moko useb' ta. Ut kinujak xb'aaneb' li ula' li na'ajej wan wi' li kaxaar.
11“Naq ki'ok li awab'ej chi rilb'aleb' li rula', kiril jun li winq wank aran, ink'a' tiqto chi chaab'il jo' re xninq'ehinkil li sumlaak, 12ut kixye re: «At wamiiw, chanru naq xat-ok chaq arin chi ink'a' tiqtookat chi chaab'il jo' re xninq'ehinkil li sumlaak?». A'ut a'an ink'a' kichaq'ok. 13Toja' naq li awab'ej kixye reheb' li xmoos: «B'ak'omaq li roq ruq' ut kutomaq chirix kab'l sa' li aak'ab'; aran taawanq li yaab'ak ut li k'uxuxink ruuch e». 14Xb'aan naq naab'aleb' li b'oqb'ileb', ab'an ink'a' k'iheb' li sik'b'ileb' ru”.
Li toj cho'q re li awab'ej
(Mk 12,13-17; Lk 20,20-26)
15Toja' naq eb' laj Pariseey koheb' ut ke'xch'utub' rib' chi xk'uub'ankil chan raj ru naq te'xchap li Jesus sa' aatin. 16Ut ke'xtaqlaheb' li xtzolom rik'in, rochb'eeneb' li neke'okenk chirix laj Herodes, chi xyeeb'al:
—At Tzolonel, naqanaw naq tz'aqal yaal nakat-aatinak; nakak'ut chi yaal li xb'e li Yos ut maak'a' nakawaj wi' anihaq, xb'aan naq moko sik'so ta ru li nakawaatina. 17Ye b'i' qe k'aru nakak'oxla: Ma us xk'eeb'al li toj re li awab'ej, malaj ut ink'a'?
18Ab'anan li Jesus ak naxnaw li xmaa'usilal li xch'ooleb'; jo'kan naq kixye:
—Ex aj ka'pak'al u, k'a'ut naq nekeyal wix? 19K'utomaq chiwu xtuminal li tojleb'.
Eb' a'an ke'xk'ut chiru jun li tumin. 20Ut kixye reheb':
—Ani aj jalam u a'in ut ani aj tz'iib'ahom wank chiru?
21Ke'chaq'ok:
—Re li awab'ej, chankeb'.
Toja' naq li Jesus kixye reheb':
—Q'ajsihomaq b'i' re li awab'ej li k'aru re li awab'ej, ut re li Yos li k'aru re li Yos.
22Naq ke'rab'i a'in, ke'sachk xch'ool, ke'xkanab' ut koheb'.
Chirix li xwaklijikeb' chi yo'yo li kamenaq
(Mk 12,18-27; Lk 20,27-40)
23Sa' li kutan a'an wankeb' aj Saduseey ke'wulak rik'in li Jesus (eb' a'an neke'xye naq ink'a' te'wakliiq chi yo'yo eb' li kamenaq), ut ke'xpatz' re:
24—At Tzolonel, laj Moisés kixye: «Wi junaq taakamq chi maak'a' ralal xk'ajol, chik'ame'q wi' chik li rixaqil xb'aan li riitz'in re naq chiwanq ralal xk'ajol li asb'ej».#22,24 Dt 25,5-10; Gn 38,8. 25Ke'wank sa' qayanq wuqub' chi winq riitz'ineb' rib'. Li xb'een kisumlaak ut, naq kikamk, ink'a' kixkanab' ralal xk'ajol; jo'kan naq kixkanab' li rixaqil re li riitz'in. 26Jo'kan ajwi' kik'ulmank rik'in li xkab' ut li rox, toj rik'in li xwuq. 27Chirix chik a'an kikamk ajwi' li ixq. 28Us b'i', sa' xwaklijikeb' chi yo'yo eb' li kamenaq, anihaq tz'aqal aj ixaqil li ixq a'an? Xb'aan naq chixjunileb' ke'ixaqilink re.
29Kichaq'ok li Jesus ut kixye reheb':
—Tik sachenaqex xb'aan naq ink'a' neketaw ru li Santil Hu, chi moko neketaw ru li xwankil li Yos. 30Xb'aan naq sa' li xwaklijikeb' chi yo'yo li kamenaq ink'a' te'k'amoq li winq chi moko te'k'ame'q li ixq, jo'aqeb' b'an chik li ánjel sa' choxa. 31Ut chirix li xwaklijikeb' chi yo'yo li kamenaq, ma ink'a' eerilom sa' li Santil Hu li kixye li Yos eere: 32«Laa'in li xYos laj Abrahán, li xYos laj Isahak ut li xYos laj Jakob»#22,31-32 Ex 3,6.? Maawa' xYos li kamenaqeb', xYos b'an li yo'yookeb'.
33Ut naq ke'rab'i a'in li tenamit, ke'sachk xch'ool rik'in li naxtzoleb' wi'.
Li xnimal ru chaq'rab'
(Mk 12,28-34; Lk 10,25-28)
34Naq eb' laj Pariseey ke'rab'i naq li Jesus kixtz'ap xsa' reheb' laj Saduseey, ke'xch'utub' rib', 35ut jun reheb' a'an kixpatz' re yal re xyalb'al rix:
36—At Tzolonel, b'ar wank tz'aqal li xnimal ru qataqlankil sa' li Chaq'rab'?
37Kixye li Jesus re:
—Taara li Qaawa' laaYos chi anchal laach'ool, chi anchal laawaanm ut chi anchal laak'a'uxl.#22,37 Dt 6,5. 38A'an li xb'een ut xnimal ru chaq'rab'. 39Li xkab' chanchan ajwi' a'an: «Taara laawas aawiitz'in jo' naq nakara aawib' laa'at».#22,39 Lv 19,18. 40Sa' xb'eeneb' li wiib' chi chaq'rab' a'in k'ojob'anb'il chixjunil li Chaq'rab' ut eb' li Propeet.
Li Kriist a'an ralal ut xQaawa' laj David
(Mk 12,35-37; Lk 20,41-44)
41Naq ch'utch'uukeb' laj Pariseey, li Jesus kixpatz' reheb':
42—K'aru nekek'oxla chirix li Kriist? Ani aj alal?
Ke'chaq'ok eb' a'an ut ke'xye:
—Ralal laj David.
43Ut li Jesus kixye reheb':
—Chan put ru naq laj David chi eek'asinb'il xb'aan li Musiq'ej kixye Qaawa' re? Xb'aan naq kixye chi jo'ka'in:
44«Kixye li Qaawa' re linQaawa':
K'ojlan sa' linnim uq'
toj reetal tink'e rub'el laawoq
eb' li xik' neke'ilok aawe».#22,44 Sal 110,1.
45Wi laj David naxye Qaawa' re, chan put ru naq ralalaq?
46Ut maa'ani chik kiruhank chi sumenk re; ut chalen sa' li kutan a'an maa'ani chik kikawuuk xch'ool chi patz'ok re.
Currently Selected:
Mt 22: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
