Lv 6
6
K'ehok na'leb' chirix li mayejak chirix li b'alaq'ik
1Li Qaawa' kiraatina laj Moisés ut kixye re:
2“Wi ani taamaakob'q ut taak'utunq naq wank xmaak chi b'alaq'ik chiru li Qaawa' xb'aan naq xtik'ti'i li ras riitz'in rik'in k'aru kik'ehe'k chixk'uula malaj kixk'ul chi to'ninb'il, malaj xrelq'a malaj ut xmaq' k'a'aq re ru sa' josq'il, 3malaj xtaw k'a'aq re ru tz'eqb'il ut xtik'ti'ik, malaj ut xye jurament sa' b'alaq'il chirix li k'a'aq re ru li junelik namaakob'k wi' junaq, 4li poyanam a'an wanq xmaak. Jo'kan naq tento tixq'ajsi li k'aru relq'ahom malaj li xmaq'ahom sa' josq'il, malaj ut li k'aru k'eeb'il chixk'uula, malaj ut li k'a'aq re ru kixtaw, 5malaj li k'a'aq chik re ru li xtik'ti'ik wi'. Tento naq tixq'ajsi chixjunil re laj eechal re, ut tixk'e chik junqmay sa' xb'een li o'taqk'aal, naq jo'q'e tixq'axtesi li xmayej chirix li xmaak. 6Li xmayej chiru li Qaawa' a'anaq jun karneer li maak'a' reek' li tixsik' sa' xyanq li xketomq (ut li xtz'aq laa'at tento tatb'iroq rix). Tento tixchap chaq ut tixk'am chiru laj tij jo' mayej re xtojb'al rix li xmaak. 7Toja' naq laj tij taamayejaq chiru li Qaawa' re xtojb'al rix li xmaak li poyanam a'an, ut li maak taakuye'q, a' yaal k'aru chi maakil xb'aanu”.#6,1-7 Nm 5,5-8.
K'ehok na'leb' chirixeb' li k'atb'il mayej
8Li Qaawa' kiraatina laj Moisés ut kixye re:
9“Ch'olob' chiru laj Aharón ut chiruheb' li ralal xk'ajol li chaq'rab' a'in chirix li k'atb'il mayej: Li xul mayejanb'il tento taakanaaq sa' xb'een li ru xam re li artal chiru chixjunil li q'oqyink, re naq taak'atq. 10Laj tij tixlan rib' rik'in t'ikr ut tixk'e xta xwex malaj xyach'. Chirix chik a'an tixxok xchahil li xul li xk'atmank sa' xb'een li artal, ut tixk'e chi xk'atq li artal. 11Chirix chik a'an tixjal li raq' ut tixk'am li cha sa' junaq na'ajej saab'esinb'il chi us, najtaq rik'in li xmuheb'aaleb' li tenamit.
12“Li xtiqwal li xam sa' xb'een li artal ink'a' naru taachupq. Laj tij tento tixk'e xsi'il rajlal eq'la ut tixtuqub' chi us sa' xb'een li xam li xul taak'atmanq. Jo'kan ajwi' tixk'at sa' xb'een li artal li xxeeb'ul li mayej re k'amok ib' sa' usilal rik'in li Yos. 13Li xxamlel li artal tento naq lochlooq chi junelik. Maajun wa taachupmanq.
K'ehok na'leb' chirix li mayej k'aj
14“A'an a'in li chaq'rab' chirix li mayej k'aj. Eb' laj tij tento te'xyeechi'i sa' xb'een li artal, chiru li Qaawa'. 15Jun reheb' a'an tixchap jun mooch'aq li chaab'il k'aj li ak k'eeb'il cho'q mayej. Tixk'e ajwi' li aseeyt ut chixjunil li pom li na'ok rik'in li mayej, ut tixk'e chi k'atk sa' xb'een li artal cho'q sahil mayej li sununk xb'ook chiru li Qaawa'. 16Ut li mayej taa'ela'anq, te'xtzeka laj Aharón ut eb' li ralal xk'ajol, chi maak'a'aq xyu ut sa' junaq loq'laj na'ajej, chiru xneb'aalil li Loq'laj Muheb'aal. 17Ink'a' naru te'xk'uub' rik'in k'a'aq re ru nasipob'resink. A'an a'in li tink'e cho'q xtzekemqeb', xkomon li sahil mayej nak'atmank sa' ink'ab'a': a'an jwal loq', kama' ajwi' li mayej nak'eemank chirix li maak ut re xtojb'al rix li maak. 18Chixjunileb' li teelom sa' xyanqeb' li ralal xk'ajol laj Aharón te'ruuq xtzekankil li jo'k'ihal te'tz'aq rik'in li k'atb'il mayej chiru li Qaawa'. Yalaq k'aru taach'e'oq re li mayej a'in, osob'tesinb'il taakanaaq”.
Li xmayejeb' laj tij
19Li Qaawa' kiraatina laj Moisés ut kixye re:
20“A'an a'in li mayej te'xq'axtesi laj Aharón ut eb' li ralal xk'ajol chiru li Qaawa', naq te'osob'tesiiq cho'q aj tij: te'xk'e cho'q mayej k'aj kaahib' liib'r li xchaq'alil ru k'aj triiw. Ut te'xq'axtesi jun yiijach eq'la ut li jun yiijach chik te'xq'axtesi ewu. Tento te'xb'aanu a'in rajlal kutan. 21Tento naq te'xk'uub' li mayej sa' junaq xartin, te'xpuq' chi us rik'in aseeyt; chirix a'an te'xq'axtesi chi kok'setinb'il, jo' mayej sununk xb'ook cho'q re li Qaawa'. 22Jo'ka'in tento tixk'uub' li xmayej li xb'eenil aj tij, ralal k'ajol laj Aharón, a' li taaxaqab'aaq cho'q reeqaj. A'an a'in jun xchaq'rab' li Qaawa' wank xwankil chi junelik: tento taak'atmanq chixjunil. 23Chixjunil li xmayejeb' laj tij tento taak'atmanq. Ink'a' naru xtzekankil”.
Li mayejak chirix li maak
24Li Qaawa' kiraatina laj Moisés ut kixye re:
25“Ch'olob' chiru laj Aharón ut chiruheb' li ralal xk'ajol li chaq'rab' a'in chirix li mayejak chirix li maak, tento taasetmanq li xkux chiru li Qaawa', sa' li na'ajej b'arwi' neke'kamsiik li xul li te'k'atmanq. Q'axal loq' li mayej a'in. 26Laj tij li taayeechi'inq mayej chirix li maak, naru tixtzeka b'ayaq re, ab'an tento tixtzeka chaq sa' junaq loq'laj na'ajej, chiru xneb'aalil li Loq'laj Muheb'aal. 27Yalaq k'aru taach'e'oq re xtib'el li xul taakanaaq chi osob'tesinb'il. Ut wi li aq'ej taanaq kik' chiru, tento taapuch'manq sa' junaq santil na'ajej. 28Li ch'och' uk'al b'arwi' xchiqmank li tib' re li mayej, tento xjorb'al. Ab'an wi xchiqmank sa' junaq uk'al q'anch'iich', tz'aqal rik'in naq te'xji' xsa' ut te'xch'aj chi us.
29“Li mayej a'in, a'an jwal loq'. Ka'ajwi' eb' laj tij naru te'tzekanq b'ayaq re. 30Ab'an ink'a' naru xtzekankil junaq xul li xmayejamank chirix li maak, wi li xkik'el xk'ame'k sa' Loq'laj Muheb'aal re xtz'aamankil xkuyb'al li maak sa' li Santil Na'ajej. Li mayej a'an tento taak'atmanq chixjunil.
Currently Selected:
Lv 6: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
