Lv 21
21
Li xsantilaleb' laj tij
1Li Qaawa' kixye re laj Moisés:
“Aatinan rik'ineb' laj tij ralal xk'ajoleb' laj Aharón ut ye reheb' naq me'xmux rib'eb' rik'in xch'e'b'al junaq kamenaq sa' li xkomoneb'. 2Ka'ajwi' naru te'xch'e' wi a'an li xna', xyuwa', ralal malaj xrab'in, li ras malaj riitz'in; 3jo'kan ajwi' naru te'xch'e' li ranab' tuq'ixq li toj wank rik'in xb'aan naq toj maji' nasumlaak. Rik'ineb' a'an naru te'xmux rib'eb' rik'in xch'e'b'al li kamenaq. 4Ab'anan me'xmux rib' sa' xk'ab'a' junaq rech'alal ixq sumsu. Ink'a' naru te'xtz'ajni rib'eb'.
5“Ink'a' naru te'xb'es rismaleb' li xjolom, chi moko te'xk'os li xmacheb', chi moko te'xlet'exi xcha'aleb' li xjunxaqalil,#21,5 Lv 19,27-28; Dt 14,1. 6te'xq'axtesi b'an rib' chi junajwa re li xYoseb' ut ink'a' te'xmux li xk'ab'a', xb'aan naq a'aneb' neke'q'axtesink li k'atb'il mayej ut li xmayej wa li xYoseb'; jo'kan naq tento santaqeb'.
7“Ink'a' naru te'sumlaaq rik'in junaq ixq aj yumb'eet, chi moko rik'in junaq maakoninb'il malaj ut kanab'anb'il ixq, xb'aan naq laj tij q'axtesinb'il chik cho'q re li xYos. 8A'anaq sant cho'q aawe, xb'aan naq laj tij naq'axtesink li xmayej wa laaYos. A'anaq sant cho'q aawe, xb'aan naq laa'in, li Qaawa', santin ut laa'in ninsantob'resink eere.
9“Wi li xrab'in junaq aj tij tixmux rib' ut taa'ok cho'q aj yumb'eet, tixmux xwankil li xyuwa' ut tento taak'atmanq chi yo'yo.
10“Li xyuwa'il aj tij ak xk'ulum xwankilal re naq tixtiqib' rib' rik'in loq'laj aq'ej, sa' xk'ab'a' li osob'tesinb'il aseeyt kik'ehe'k sa' xjolom. Jo'kan naq ink'a' naru helhookaq li rismal xjolom chi moko tixq'ich li raq', reetalil naq ra sa' xch'ool; 11chi moko naru taa'ok b'arwi' wanq junaq kamenaq: us ta xna' xyuwa', ink'a' naru tixmux rib' sa' xk'ab'a'eb' a'an. 12Ink'a' naru taa'elq chaq sa' li Loq'laj Na'ajej, chi moko tixmux xloq'al li xLoq'laj Na'aj li xYos, xb'aan naq a'an yulb'il rik'in aseeyt re taak'anjelaq chiru li xYos. Laa'in li Qaawa'.
13“Tento tixsik' junaq tuq'ixq cho'q rixaqil. 14Maajun wa taasumlaaq rik'in junaq ixq xmalka'an chi moko rik'in junaq ixq kanab'anb'il, chi moko rik'in junaq ixq maakoninb'il malaj ut rik'in junaq aj yumb'eet. Li rixaqil tento naq tuq'ixqaq ut xkomonaq li ralal xk'ajol laj Leví, 15re naq ink'a' tixmux ruheb' li ralal xk'ajol sa' li xtenamiteb', xb'aan naq laa'in li Qaawa', li ninsantob'resink re”.
Li k'aru naramok re li k'anjelak cho'q aj tij
16Li Qaawa' kiraatina wi' chik laj Moisés ut kixye re:
17“Ye re laj Aharón naq, chalen anaqwan ut chi junelik, wi wankeb' ralal xk'ajol ink'a' tz'aqaleb' re ru, ink'a' naru te'xyeechi'i li xmayej wa li xYos. 18Relik chi yaal naq maajun winq li ink'a' tz'aqal li ink'a' tz'aqal re ru taa'ok chi k'anjelak: ink'a' taak'anjelaq li mutz' malaj li yeq, chi moko li ink'a' tz'aqal re ru li ru'uj ut li xik, 19li tiq'ilk ut li toqol xtel ut ra', 20li k'utzk'u rix, li sik, li wank xyajel xsa' ru, li xox rix, li napoxkenk ha' sa' xtz'uumal, chi moko li kapun. 21Maajun li ralal xk'ajol laj Aharón laj tij li ink'a' tz'aqal li xjunxaqalil naru taaq'axtesinq k'atb'il mayej chiru li Qaawa': a'an ink'a' tz'aqal re ru; jo'kan naq moko naru ta tixq'axtesi li xmayej wa li xYos. 22Naru tixtzeka li wa a'an jo'wi' li k'a'aq chik re ru loq' ut santob'resinb'il, 23ab'anan ink'a' naru taa'ok junpak'al li t'ilkem chi moko chinach'oq rik'in li artal, re naq ink'a' tixmux ru li Loq'laj Na'ajej. Laa'in li Qaawa', li ninsantob'resink reheb'”.
24Ut laj Moisés kixye chixjunil a'in re laj Aharón, reheb' li ralal xk'ajol ut reheb' chixjunil laj Israel.
Currently Selected:
Lv 21: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
