Lv 2
2
Li mayej k'aj
1“Wi junaq tixk'am chaq xmayej k'aj chiru li Qaawa', tento tixk'am chaq li xchaq'alil ru k'aj triiw, tixk'e aseeyt ut pom sa' xb'een. 2Chirix a'an tixk'am rik'ineb' laj tij li ralaleb' laj Aharón, ut jun reheb' a'an tixchap jun mooch'aq li k'aj triiw rochb'een aseeyt ut pom, ut tixk'at sa' xb'een li artal cho'q k'atb'il mayej, sahil mayej, sununk xb'ook chiru li Qaawa'. 3Li rela' li mayej taakanaaq cho'q re laj Aharón ut eb' li ralal xk'ajol, cho'q loq'laj tzekemq, xkomon li mayej jwal loq' li nak'atmank sa' xk'ab'a' li Qaawa'.
4“Wi laamayej a'an k'aj chiqb'il sa' ru xam, chaq'axtesi chi pixtunil yiib'anb'ilaq rik'in chaab'il k'aj, ink'a' yuub'il ut yoq'b'ilaq, malaj chaq'axtesi chi jayil wa ink'a' yuub'il ut chiqb'ilaq sa' aseeyt.
5“Wi laamayej a'an chiqb'il sa' k'il, tento naq yiib'anb'ilaq rik'in chaab'il k'aj triiw, yoq'b'ilaq ut ink'a' yuub'il. 6Taakok'jachi ut taat'aqresi chi aseeyt, xb'aan naq a'an mayej k'aj.
7“Wi laamayej a'an chiqb'il sa' uk'al ch'iich', tento naq yiib'anb'ilaq rik'in chaab'il k'aj triiw ut aseeyt. 8Naq akaq xayiib' chik laamayej rik'ineb' a k'a'aq re ru a'in, tento naq taak'am chiru li Qaawa' ut taaq'axtesi sa' ruq' laj tij, ut a'an toxkanab' chaq sa' xb'een li artal. 9Aran laj tij tixchap b'ayaq li mayej re naq tixk'at sa' xb'een li artal jo' sahil mayej li sununk xb'ook chiru li Qaawa'. 10Ut li rela' li mayej taakanaaq cho'q re laj Aharón ut eb' li ralal xk'ajol, cho'q loq'laj tzekemq, xkomon li mayej li nak'atmank sa' xk'ab'a' li Qaawa'.
11“Meek'e xyu junaq leemayej yiib'anb'il rik'in k'aj triiw li teeq'axtesi chiru li Qaawa'. Maajun paay ru xyu li xq'emal li kaxlan wa chi moko li xya'al kab' taak'atmanq jo' mayej chiru li Qaawa'. 12Naru teeq'axtesi chiru li Qaawa' li xyu xq'emal li kaxlan wa jo'wi' xya'al li kab' cho'q eemayej, jo' xb'een ru leerawimq; ab'anan ink'a' naru xyeechi'inkil jo' k'atb'il mayej sununk xb'ook chiru li Qaawa'.
13“Chixjunil laamayej k'aj, tento naq taak'e ratz'amil#2,13 Mk 9,49-50. ut maak'ulub'a naq sa' laamayej k'aj triiw maak'a'aq li atz'am. Sa' chixjunil laamayej tento naq taayeechi'i li atz'am, xb'aan naq li atz'am a'an reetalil li xSumwank laaYos.
14“Wi taak'am chiru li Qaawa' junaq laamayej k'aj ut a'an xb'een ru laawawimq, tento naq cheekaq chi us, joranb'ilaq sa' xam malaj a' li toj rax taamayeja chi poch'b'il. 15Sa' xb'een laamayej tento taak'e li aseeyt ut li pom, xb'aan naq a'an mayej k'aj. 16Chirix chik a'an laj tij tixk'at kach'inaq xkomon li ak poch'b'il triiw ut li aseeyt, rochb'een chixjunil li pom, ut a'anaq jun k'atb'il mayej, sahil mayej, sa' xk'ab'a' li Qaawa'.
Currently Selected:
Lv 2: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
