Lv 16
16
Li xkutankil li kuyuk sachok maak
1Li Qaawa' ki'aatinak rik'in laj Moisés naq ak xek'am li wiib' chi ralal laj Aharón. Eb' a'in ke'kamk xb'aan naq jwal ke'nach'ok rik'in li Qaawa'. 2Ut li Qaawa' kixye re laj Moisés:
“Ye re laj Aharón laawas naq ink'a' chi'ok yalaq jo'q'e sa' li tijob'aal li wank junpak'al li t'ilkem,#16,2 Heb 6,19. chi moko chiru li xtz'apb'al xb'een li Loq'laj Kaax, re naq ink'a' taakamq; xb'aan naq laa'in tink'utb'esi wib' sa' jun li choql sa' xb'een li artal. 3Laj Aharón tento taa'ok sa' li tijob'aal rochb'eenaq junaq saaj wakax jo' mayej chirix li maak ut junaq karneer re taayeechi'imanq jo' k'atb'il mayej.#16,3 Heb 9,7. 4Tento tixk'e li loq'laj jut-aq' chirix, a' li yiib'anb'il rik'in liin, wanq li xyach' yiib'anb'il rik'in liin; tixk'e ajwi' xk'aamal xsa' ut xb'ak'b'al xjolom liin. Li aq'ej a'in a'an loq'; jo'kan naq toj xb'enwa taa'atinq, toja' naq tixk'e chirix.
5“Li xkomonileb' laj Israel te'xk'e re laj Aharón tixchap chaq wiib'aq chib'aat cho'q mayej chirix li maak ut junaq karneer jo' k'atb'il mayej. 6Toja' naq tixyeechi'i li saaj wakax jo' tz'aqal xmayej chirix li maak, re naq taakuye'q xmaak jo'wi' xmaakeb' li xjunkab'al. 7Chirix chik a'an tixchapeb' li wiib' chi chib'aat ut tixyeechi'iheb' chiru li Qaawa', sa' rokeb'aal li Loq'laj Na'ajej b'arwi' na'uxk li ch'utam. 8Toja' naq tixb'uuli rix li wiib' chi chib'aat: jun taakanaaq cho'q re li Qaawa' ut li jun chik cho'q re laj Asasel. 9Ut naq ak xb'uuli rixeb' li chib'aat, laj Aharón tixyeechi'i li xkanaak cho'q re li Qaawa', jo' mayej chirix li maak. 10Ab'an li chib'aat li xkanaak cho'q re laj Asasel, taaq'axtesiiq chi yo'yo chiru li Qaawa', re naq twanq xkuyb'aleb' li maak, ut chirix a'an tixtaqla sa' li chaqich'och', cho'q re laj Asasel.
11“Laj Aharón tixyeechi'i li saaj wakax jo' tz'aqal xmayej chirix li maak, re naq taakuye'q xmaak jo'wi' xmaakeb' li xjunkab'al. 12Chirix a'an tixxok jun li sansaar sa' li artal chiru li Qaawa', nujenaqaq rik'in ru ram; tixxok ajwi' wiib' moch'olaq li k'ajpom li jwal sununk ut tixk'am chirix li t'ilkem; 13tixk'e li k'ajpom sa' ru xam chiru li Qaawa', ut li xsib'el taanujaq chirix li xtz'apb'al xb'een li Loq'laj Kaax re naq ink'a' taakamq. 14Tixchap ajwi' kach'inaq xkik'el li saaj wakax ut rik'in ru'uj ruq' tixrachrachi sa' xb'een li tz'apleb', sa' xjayal releb'l saq'e. Chirix a'an wuqub'aq sut tixrachrachi chi kik' li xtz'apleb' li Loq'laj Kaax. 15Toja' naq tixkamsi li chib'aat jo' mayej chirix xmaakeb' li tenamit ut tixk'am li kik' chirix li t'ilkem;#16,15 Heb 9,12. aran chisa' tixrachrachi chaq sa' xb'een ut chiru li tz'apleb', kama' xb'aanu rik'in xkik'el li saaj wakax. 16Chi jo'kan tixsaab'esi li Santil Na'ajej, taarisi chixjunil li tz'ajn, q'etb'a aatin ut xmaakeb' laj Israel. Jo'kan ajwi' tixb'aanu rik'in li Loq'laj Muheb'aal li wank sa' xyanqeb', sa' chixjunil li xtz'ajnileb'.
17“Naq wanq chaq laj Aharón sa' li Santil Na'ajej chi mayejak chirix xtojb'al rix li maak, maajun truuq taawanq sa' li Loq'laj Muheb'aal, toj taa'elq chaq laj Aharón. Naq ak xk'ul chaq li xkuyb'al li xmaak a'an ut li xjunkab'al jo'wi' chixjunil li xkomonileb' laj Israel, 18taa'elq chaq re xch'ajob'resinkil li artal wank chiru li Qaawa'. Tixchap b'ayaq xkik'el li saaj wakax ut xkik'el li chib'aat, ut tixyul chi xxuk ut chi xsutam li artal, 19ut rik'in ru'uj ruq' tixrachrachi li kik' wuqub'aq sut. Chi jo'kan tixch'ajob'resi li xtz'ajnileb' laj Israel ut taarosob'tesi li artal.
20“Naq ak xraqe'k laj Aharón chi xch'ajob'resinkil li Santil Na'ajej, li Loq'laj Muheb'aal ut li artal, tixtaqla xk'amb'al li chib'aat li toj yo'yo, 21tixk'e li ruq' sa' xb'een xjolom li xul ut tixxooto chixjunil li xmaakeb' laj Israel, chixjunil li xyib'aleb' ru xna'leb' ut li xnimob'resinkil rib'eb'. Chi jo'kan tixk'eheb' li maak sa' xb'een xjolom li chib'aat, ut tixxaqab' jun poyanam re xk'amb'al ut xkoq'b'al sa' li chaqich'och'. 22Chi jo'kan li chib'aat tixk'am chixjunil li xyib'al ru xna'leb'eb' sa' junesal na'ajej, b'arwi' taa'ach'ab'aaq xb'aan li poyanam. 23Chirix chik a'an laj Aharón taa'ok sa' li Loq'laj Muheb'aal, taarisi li raq' liin chirix, li xk'e chirix re ok sa' li Santil Na'ajej, ut tixkanab' aran.#16,23 Ez 44,19. 24Aran ajwi', sa' li Santil Na'ajej, taa'atinq ut naq ak xjalok, taaxik chi xmayejankil li xk'atb'il xul jo'wi' li tento tixyeechi'i sa' xk'ab'a' li tenamit. Chi jo'kan tixtoj rix li xmaak jo'wi' li xmaakeb' li tenamit. 25Li xeeb'ul li mayej chirix li maak, tixk'at sa' li artal; 26ut li ani xk'amok re li chib'aat re xkanab'ankil chaq re laj Asasel, tixpuch' li raq' ut taa'atinq; toja' naq taaruuq taa'ok sa' li na'ajej.
27“Li saaj wakax ut li chib'aat li xe'mayejamank chirix li maak (li xkik'eleb' xk'ame'k sa' li Santil Na'ajej re xtojb'al rix li maak) taak'amanq toj chirix li na'ajej,#16,27 Heb 13,11. ut taak'atmanq li xtz'uumaleb', li xtib'eleb' ut li xk'oteb'. 28Li poyanam li taak'atoq re a'in, tento tixpuch' li raq' ut taa'atinq; toja' naq taaruuq chi ok sa' li na'ajej.
29“A'an a'in jun chaq'rab' xaqxooq xwankil chi junelik cho'q eere: sa' xlaje xb'e li xwuq li po, tento naq teeb'aanu ee'ayuun; maajun li k'anjel teeb'aanu, jo'keb' laj Israel, jo'keb' ajwi' laj ab'l tenamit li wankeb' sa' eeyanq, 30xb'aan naq sa' li kutan a'an taawanq xtojb'al rix leemaak,#16,29-34 Lv 23,26-32; Nm 29,7-11. ut saqaq chik eeru chiru li Qaawa'. 31A'an a'in jun chaq'rab' xaqxooq xwankil chi junelik: a'anaq hilob'aal kutan cho'q eere, q'axtesinb'ilaq re li ayuun. 32Laj tij sik'b'il ru ut xaqab'anb'il xwankil re naq taa'ok sa' xna'aj li xyuwa' cho'q aj tij, a'an li taamayejaq re xtojb'al rix li maak: tixtiqib' rib' rik'in osob'tesinb'il aq'ej re liin 33ut tixch'ajob'resi li Santil Na'ajej, li Loq'laj Muheb'aal ut li artal, ut tixtoj rix xmaakeb' laj tij jo'wi' li xmaakeb' chixjunil li komonil.
34“A'an a'in jun li chaq'rab' xaqxooq xwankil chi junelik cho'q eere: jun sut sa' li chihab' taawanq li mayejak re xtojb'al rix chixjunileb' li xmaakeb' laj Israel”.
Ut ki'uxmank jo' chanru kixye li Qaawa' re laj Moisés.
Currently Selected:
Lv 16: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
