Jr 37
37
Laj Jeremías kitz'ape'k sa' tz'alam
1Laj Nabukodonosor, li awab'ej re Babilonia, kixxaqab' laj Sedesías, ralal laj Josías, chi x'awab'ejinkil Judá, cho'q reeqaj laj Jekonías, ralal laj Johakín.#37,1 2 R 24,17; 2 Kr 36,10. 2Ab'anan chi moko laj Sedesías, eb' laj k'anjel chiru ut eb' li tenamit ke'xpaab' li raatin li Qaawa' kixye laj Jeremías.
3Laj Sedesías, li awab'ej, kixtaqla laj Jukal, ralal laj Selemías, ut laj Sofonías, ralal laj Mahasías laj tij, re xtz'aamankil a'in chiru laj Jeremías, li propeet: “Tijon chiqix chiru li Qaawa' li qaYos”, chankeb' re. 4Chiruheb' li kutan a'an laj Jeremías toj sa nab'eek sa' xyanqeb' li poyanam, xb'aan naq maji' nak'ehe'k sa' tz'alam.
5Naq eb' li xsoldaad laj Parahón ke'elk chaq Ejiipt re xtenq'ankil laj Sedesías, eb' laj Kaldeha li yookeb' chi yalok rik'ineb' laj Jerusalén, ke'rab'i resil a'an ut ke'elelik. 6Toja' naq li Qaawa' ki'aatinak rik'in laj Jeremías ut kixye re: 7“Jo'ka'in xye li Qaawa', xYos laj Israel: Yehomaq re li awab'ej re Judá, li xtaqlank chaq eere chi patz'ok wik'in, naq eb' li xsoldaad laj Parahón, li xe'chalk raj chetenq'ankil, xe'sutq'iik wi' chik Ejiipt. 8Eb' laj Kaldeha te'chalq wi' chik chi yalok rik'ineb' laj Jerusalén, te'reechani li tenamit ut te'xk'at. 9Laa'in, li Qaawa', ninye eere naq meek'ojob' leech'ool chi xk'oxlankil naq eb' laj Kaldeha te'eleliq chi junajwa, xb'aan naq moko te'xik ta. 10Us ta texnumtaaq sa' xb'eeneb' laj Kaldeha li yookeb' chi yalok eerik'in, ut yal wiib' oxib'eb' aj chik te'kole'q chi tiq'ilkaqeb', ab'an eb' a'an chixjunqaleb' raj te'wakliiq wi' chik sa' li xmuheb'aaleb' ut te'xk'e xxamlel li tenamit a'in”.
11Naq eb' laj puub' aj Kaldeha ke'xkanab' xsutb'al Jerusalén xb'aan xxiweb' chiruheb' li xsoldaad laj Parahón, 12laj Jeremías ki'elk sa' li tenamit Jerusalén re xik sa' xteepaleb' li ralal xk'ajol laj Benjamín, re tz'aqonk sa' li jachink na'ajej rik'ineb' li ras riitz'in. 13Ab'an naq kiwulak sa' Rokeb'aal laj Benjamín, kichape'k xb'aan jun aj k'aak'alenel, aj Irías xk'ab'a', ralal laj Selemías ut ri laj Ananías: “Laa'at taawaj q'axonk sa' xyanqeb' laj Kaldeha”, chu'uxk re.
14Kichaq'ok laj Jeremías ut kixye: “Tik'ti' a'an, laa'in ink'a' ninq'axonk sa' xyanqeb' laj Kaldeha”, chan. Ab'an laj Irías ink'a' kixpaab' li kiyehe'k re; kixchap li propeet ut kixk'am rik'ineb' laj k'amol b'e. 15Ut eb' a'an k'ajo' naq ke'josq'o'k rik'in laj Jeremías: ke'xrapi chi tz'uum ut ke'xtz'ap sa' tz'alam, sa' rochoch laj Jonatán, laj tz'iib'. 16Laj Jeremías kik'ehe'k sa' jun li jul ut aran kiwank chiru k'iila kutan.
17Moqon laj Sedesías, li awab'ej, kixtaqla xk'amb'al laj Jeremías sa' li rochoch, ut aran kixpatz' re sa' muqmu: “Ma wank junaq raatin li Qaawa' cho'q we?”, chan re. Kichaq'ok laj Jeremías ut kixye: “Wank, at awab'ej. A'an a'in: Laa'at tatq'axtesiiq sa' ruq' li awab'ej re Babilonia”. 18Tikto laj Jeremías kixpatz' re laj Sedesías, li awab'ej: “K'aru xinmaakon chawu laa'at, chiruheb' laj k'anjel chawu malaj ut chiru li tenamit a'in naq xinaatz'ap sa' tz'alam? 19B'ar xkoheb' leepropeet li xe'yehok naq li awab'ej re Babilonia ink'a' tolyaloq eerik'in chi moko taareechani li tenamit a'in? 20Ab'i anaqwan li tinye aawe, at awab'ej; chak'e taxaq li nintz'aama chawu: minaataqla chik sa' rochoch laj Jonatán, laj tz'iib', re naq ink'a' tinkamq aran”.
21Toja' naq laj Sedesías, li awab'ej, kixye naq laj Jeremías taakanaaq sa' tz'alam, chiru xneb'aalil li rochocheb' laj k'aak'alenel, ut chik'eemanq junaq xwa rajlal kutan, xkomon eb' li neke'yiib'aak sa' li B'e reheb' laj yiib'ahom wa. Ut a'an tz'aqal ki'uxmank toj reetal kilajk li wa sa' li tenamit. Jo'ka'in naq kikanaak laj Jeremías chi tz'apam, chiru li xneb'aalil li rochocheb' laj k'aak'alenel.
Currently Selected:
Jr 37: QQC
Highlight
Share
Compare
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
