Jr 22
22
1Jo'ka'in kixye we li Qaawa': “Ayu sa' rochoch li awab'ej ut toxaaye li aatin a'in 2chiru li awab'ej re Judá, li k'ojk'o sa' xk'ojarib'aal laj David, chiruheb' laj k'anjel chiru ut chiru chixjunileb' li tenamit; taaye reheb': «Ab'ihomaq li raatin li Qaawa'. 3B'aanuhomaq li tiikilal ut li k'ulub'ej, kolomaqeb' li yookeb' chi rahob'tesiik, meemajewa chi moko cherahob'tesi laj ab'l tenamit, li neb'a'yox ut li xmalka'an. Meekamsi li maak'a'eb' xmaak, sa' li na'ajej a'in. 4Wi nekeb'aanu li yookin chi xyeeb'al eere, junelik wanqeb' li awab'ej sa' li xk'ojarib'aal laj David, ut te'ok chaq sa' b'eleb'aal ch'iich' ut chirixeb' kawaay sa' li rokeb'aal li ochoch a'in, rochb'eeneb' laj k'anjel chiruheb' ut eb' li poyanam. 5Ab'anan, wi' ink'a' nekepaab' leeq'usb'al inb'aan, li xchaq'alil ru ochoch a'in po'lem taakanaaq wi'»”, chan li Qaawa'.
6Jo'ka'in kixye li Qaawa' chirix li rochoch li awab'ej re Judá:
“Chanchanat li tzuul Galahad cho'q we laa'in,
ut kama'at li tzuul Líbano;
ab'anan ninye tz'aqal aawe naq joxk' ch'och' tatinkanab' wi',
jo'qat jun na'ajej li maajun nawank chisa'.
7Tintaqlaheb' chaq jun ch'uuteb' aj sachonel aawik'in,
wanqeb' chaq xmaal sa' ruq'eb' re aasachb'al.
Te'xt'ani chixjunileb' li chaab'il yaw
ut te'xrumi sa' xam re te'k'atq.
8“Naab'aleb' li poyanam te'nume'q chi xk'atq li tenamit a'in, ut te'xye chirib'ileb' rib': «K'a'ut naq li Qaawa' xb'aanu chi jo'kan re li xnimal ru tenamit a'in?», cha'qeb'. 9Ut te'sumeeq chi jo'ka'in: «Xb'aan naq xe'xsach xwankil li Sumwank li kixk'ojob' li Qaawa', li xYoseb', ut xe'ok chi xloq'oninkileb' li jalanil yos»”.
Li rahilal tixk'ul laj Johakás
10Mexyaab'ak chirix li awab'ej Josías,
miraho'k leech'ool chirix li ak xq'ajk xsutq'iik;
yaab'anqex b'an chirix laj Salún#22,10-11 2 R 23,31-34; 2 Kr 36,1-4. li toj kamk re,
xb'aan naq maajoq'e chik taasutq'iiq chaq
chi moko taaril ta chik li na'ajej kiyo'laak wi'.
11Xb'aan naq jo'ka'in kixye li Qaawa' chirix laj Salún, li ralal laj Josías, awab'ej re Judá, li xkanaak sa' xna'aj li xyuwa' ut x'isiik sa' li na'ajej a'in: “Ink'a' chik taasutq'iiq chaq, 12taakamq b'an sa' li tenamit xk'ame'k wi' chi preexil, ut ink'a' tolril li tenamit a'in.
Li rahilal tixk'ul laj Johakín
13“Ra chaalel sa' aab'een li nakatkab'lak rik'in maa'usilal
ut nakayiib' laawochoch rik'in b'alaq'ik;
nakatawasiheb' laawas aawiitz'in chi k'anjelak
ut ink'a' nakatoj li xk'anjeleb'.
14Nakaye: «Tinyiib' junaq li wochoch jwal nim,
ninq xsa' li junq raqal li wanq taqe'q», chankat.
Nakak'e xninqal b'entaan,
nakatahi ru li ochoch rik'in yaw
ut nakab'on rik'in kaqib'on.
15Ma nakak'oxla naq li reetalil li wank chi awab'ejil
a'an xyiib'ankil laawochoch rik'in junes yaw?
Il laayuwa': kiwa'ak, ki'uk'ak;
ab'an kixb'aanu li xk'anjel rik'in tiikilal ut usilal,
jo'kan naq us ki'elk rik'in chixjunil li kixb'aanu.
16Kixkol rixeb' li neb'a' ut eb' li rahob'tesinb'ileb',
ut chi jo'kan sa kiwank chiru li xyu'am.
Ma maawa' tab'i' a'an linpaab'ankil laa'in?
-chan li Qaawa'-.
17“A'ut laa'at a' li tumin naxik wi' laach'ool
ut maak'a' nakawaj wi' chanru naq taataw;
nakak'eheb' chi kamk li maak'a'eb' xmaak,
ut nakarahob'tesi ut nakasacheb' laatenamit”.
18Jo'kan utan, a'an a'in li aatin naxye li Qaawa' chirix laj Johakín,#22,13-19 2 R 23,36-24,6; 2 Kr 36,5-7; Jr 36,30-31. ralal laj Josías, li awab'ej re Judá:
“Maajun taayaab'aq chirix naq taakamq,
chi moko te'xye: «Toq'ob' ru li qas qiitz'in.
Toq'ob' ru li awab'ej: ak xq'ajk xsutq'iik».
19Taamuqmanq jo' junaq b'uur:
chi jukunb'il te'risi sa' li tenamit
ut toxe'xtz'eq chaq chirix xsuttz'akil Jerusalén”.
Li rahilal tixk'ul Jerusalén
20“Taqen sa' xb'een li tzuul Líbano
ut jap aawe chi yaab'ak!
Chi'ab'iiq xyaab' laakux toj sa'eb' li tzuul re Basán,
aatinan chalen chaq Abarín,
xb'aan naq ak xe'sache'k ru eb' li neke'rahink aawu!
21Kin'aatinak aawik'in naq toj sa wankat chaq,
ab'an laa'at kaye: «Ink'a' nawaj aawab'inkil», chankat.
Jo'kan nakab'aanu chalen chaq sa' laasaajilal:
maajun sut nakawaj xpaab'ankil li waatin.
22Li iq' taacha'cha'inq reheb' laj jolominel,
ut eb' li neke'rahink aawu te'k'ame'q sa' jalanil tenamit.
Ut laa'at xutaanal tatkanaaq ut taasachq aana'leb'
xb'aan chixjunil li maa'usilal xlajaab'aanu.
23Anaqwan sa nakathilank sa' laawochoch
li yiib'anb'il rik'in yaw li chalenaq Líbano;
ab'anan tatyaab'aq naq tolatxtaw li rahilal,
jo' naxk'ul li ixq ok re chi alank”.
Li rahilal tixk'ul laj Jekonías
24Li Qaawa' kixye re laj Jekonías,#22,24-26 2 R 24,8-15; 2 Kr 36,9-10. ralal laj Johakín, li awab'ej re Judá: “Ninye li waatin chi tz'aqal yaal: Wi ta laa'at matq'ab' re kaaxtink, li wank ta chi ru'uj wuq', tatwisi raj b'arwi' wankat 25re aaq'axtesinkil sa' ruq'eb' li te'raj aakamsinkil, a'eb' li jwal nakaxiwa ruheb'. Tatinq'axtesi sa' ruq' laj Nabukodonosor, li awab'ej re Babilonia, ut sa' ruq'eb' laj Kaldeha. 26Tatink'e chi k'ame'k, aawochb'een laana', sa' jun tenamit b'arwi' ink'a' yo'lajenaqex, ut aran texkamq eekab'ichal. 27Ink'a' chik texsutq'iiq chaq sa' li tenamit li naxik wi' leech'ool”, chan li Qaawa'.
28Ma jo' tab'i' junaq jorol kuk li maak'a' na'ok wi' laj Jekonías,
jo' junaq q'eel k'anjelob'aal li maajun na'ajok re?
K'a'ut naq xe'aanilasiik a'an, rochb'eeneb' li ralal xk'ajol,
sa' jun tenamit li ink'a' xnawomeb' ru?
29Chejunilex li wankex sa' ruuchich'och',
ab'ihomaq li raatin li Qaawa'.
30A'an a'in li raatin li Qaawa':
“Tz'iib'ahomaq xk'ab'a' li winq a'in
jo' li maajun ralal xk'ajol,
jo' junaq winq li maajun sut x'elk chi us chiru li xyu'am.
Xb'aan naq maajun reheb' li ralal xk'ajol
toxk'ojlaaq sa' li xk'ojarib'aal laj David
re x'awab'ejinkil wi' chik eb' laj Judá”.
Currently Selected:
Jr 22: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
