Jue 21
21
Ke'sik'e'k rixaqileb' laj Benjamín
1Eb' laj Israel ke'xye sa' jurament aran Mispá naq ink'a' te'xk'e li xrab'ineb' chi sumlaak rik'ineb' laj Benjamín. 2Ab'anan chirix a'an koheb' Betel ut aran ke'wank chiru li Qaawa' toj ki'ewuuk, yookeb' chi yaab'ak ut tz'uyink: 3“At Qaawa', at xYos laj Israel, k'a'ut naq xk'ulmank a'in Israel? K'a'ut naq xsachk anaqwan jun xteepaleb' laj Israel?”, chankeb'.
4Sa' li kutan jun chik eb' laj Israel ke'wakliik eq'la, ke'xyiib' jun li artal ut ke'xyeechi'i k'atb'il mayej ut ke'mayejak re xk'amb'al wi' chik rib' sa' usilal rik'in li Yos. 5Ke'xye chirib'ileb' rib': “Ani sa' xyanqeb' chixjunileb' li xteepal laj Israel ink'a' xwulak Mispá, naq xqach'utub' qib' sa' xk'ab'a' li Qaawa'?”. Xb'aan naq ak yeeb'il sa' jurament naq te'kamsiiq li ink'a' te'wulaq sa' li loq'laj ch'utam.
6Raheb' sa' xch'ool eb' laj Israel xb'aan chixjunil li ke'xk'ul laj Benjamín rech aj Israelil, ut yookeb' xyeeb'al: “Sa' li kutan a'in xtochmank jun xteepal laj Israel. 7K'aru tqab'aanu re xk'eeb'al rixaqileb' laj Benjamín li xe'kanaak? Xb'aan naq laa'o xqaye sa' xk'ab'a' li Qaawa' naq ink'a' tqasumub' li qarab'in rik'ineb'. 8Ma wankeb' arin, sa' xyanqeb' laj Israel, li ink'a' xe'taqe'k Mispá chiru li Qaawa'?”.
Ut ke'xk'e reetal naq maajun reheb' laj Yabés re Galahad kiwulak sa' li loq'laj ch'utam, 9xb'aan naq ke'patz'e'k xk'ab'a'eb' ut maajun reheb' laj Yabés re Galahad ke'chaq'ok. 10-11Toja' naq sa' komonil ke'xtaqlaheb' kab'laju mil chi winq kaweb' rib' ut ke'xchaq'rab'iheb' chi jo'ka'in: “Ayuqex ut kamsihomaq chaq chi ch'iich' eb' laj Yabés re Galahad. Teekamsi ajwi' eb' li ixq ak wanjenaqeb' rik'in winq ut li kok'al”. Ut jo'kan ke'xb'aanu. 12Sa' xyanqeb' laj Yabés re Galahad ke'xtaw jun o'q'ob' (400) chi tuq'ixq li ink'a' wanjenaqeb' rik'in winq, ut ke'xk'ameb' sa'eb' li muheb'aal re Siló, sa' xteepal Kanahán. 13Chixjunil li komonil ke'xtaqlaheb' aj esil rik'ineb' laj Benjamín li wankeb' sa' li Saqoonak re Rimón, re naq te'xk'am wi' chik rib' sa' usilal. 14Ke'sutq'iik chaq eb' laj Benjamín ut ke'k'ehe'k reheb' jo'k'ihaleb' li ixq aj Yabés re Galahad ke'kanaak chi yo'yo. Ab'anan ink'a' ke'tz'aqlok xb'aan naq naab'aleb' li winq.
15Li tenamit Israel ke'xtoq'ob'a ruheb' laj Benjamín, xb'aan naq li Qaawa' kixpa ru li junajil sa' xteepaleb' laj Israel. 16Ut li xcheekelaleb' li komonil ke'xye chirib'ileb' rib': “K'aru truuq tqab'aanu re xk'eeb'al rixaqileb' li xe'kanaak, xb'aan naq sachb'ileb' chik li rixaqileb' laj Benjamín? 17Chanru naq tqak'eheb' ralal xk'ajol laj Benjamín re naq ink'a' taasachq junaq xteepal laj Israel? 18Ab'an laa'o ink'a' naru tqak'eheb' li qarab'in cho'q rixaqileb', xb'aan naq chiqajunilo laa'o aj Israel xqaye sa' jurament naq tz'eqtaananb'ilaqeb' li te'xk'e xrab'ineb' cho'q rixaqileb' laj Benjamín”.
19Chirix chik a'an ke'jultiko'k reheb' naq nach' chik wank li xninq'e li Qaawa' li nab'aanumank rajlal chihab' Siló,#21,19 1 S 1,3.21. li wank sa' xjayal releb'l iq' re Betel, sa' xjayal releb'l saq'e re li nimb'e na'elk Betel ut naxik Sikem ut sa' xjayal rokeb'l iq' re Leboná.
20Jo'kan naq ke'xchaq'rab'iheb' laj Benjamín chi jo'kan: “Ayuqex aran Siló ut muqumaq eerib' sa' xyanq li awimq uub'. 21Q'esaq eeru, ut naq eb' li ixqa'al aj Siló te'elq chi xajok chi ch'utch'u, laa'ex tex'elq chaq sa'eb' li awimq ut teerelq'a chaq junjunqaq leerixaqil sa' xyanqeb' li ixqa'al aj Siló, ut xikaqex chi junpaat sa' leetenamit. 22Wi eb' li xna' xyuwa'eb' malaj li ras riitz'ineb' te'chalq chi jitok qik'in, tqaye reheb': «B'aanuhomaq usilal, kuyumaqeb' xmaak, xb'aan naq ink'a' xoruuk xtawb'al rixaqileb' chixjunil naq xooyalok, chi moko laa'ex xexk'ehok reheb'. Wi ta jo'kan, laa'ex raj wank eemaak»”.
23Jo'ka'in ke'xb'aanu eb' laj Benjamín: jo' chanru xk'ihaleb', jo'kan ajwi' xk'ihaleb' laj xajonel ke'relq'a. Chirix chik a'an koheb', ke'sutq'iik sa' li xna'ajeb', ke'xwaklesi wi' chik eb' li tenamit ut aran ke'na'ajunk.
24Jo'kan ajwi' ke'xb'aanu eb' laj Israel junch'ol: ke'elk aran ut ke'sutq'iik sa' li xch'och'eb' ut xteepaleb', li junjunq sa' li xna'aj.
25Sa'eb' li kutan a'an maak'a'eb' chaq awab'ej aran Israel ut li junjunq naxb'aanu li k'aru naraj xb'aanunkil.#21,25 Jue 17,6.
Currently Selected:
Jue 21: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
