Gn 41
41
Li xmatk' laj Parahón
1Wiib' chihab' chik xnumik a'an, laj Parahón kimatk'ek: kiril naq xaqxo chire li nima'. 2Tikto ke'elk chaq sa' li nima' wuqub' chi wakax ch'ina'us rilb'aleb' ut ninqeb' xtib'el, ut ke'ok chi ichajib'k sa' xyanq li kaxlan aj. 3Ab'anan xaqaamileb' wuqub' chik chi wakax, q'axal yib'ru neke'ilok ut b'aqeb'. Ke'elk chaq sa' li nima' ut koxe'xaqliiq chi xk'atqeb' li xb'een, chire li nima'. 4Ut li wuqub' chi wakax li yib'ru neke'ilok ut b'aqeb' ke'xt'upi li wuqub' chik li ch'ina'useb' ut ninqeb' xtib'el.
Toja' naq ki'ajk ru laj Parahón, 5ab'anan kikub'eek wi' chik xwara ut kimatk'ek wi' chik: kiril wuqub' chi och yookeb' chi elk sa' jun ajwi' xtoonal, q'axal ninqeb' ru ut chaab'ileb'. 6Ak te'eelunq chaq wuqub' chik chi och sipotz'eb' ut chaqiheb' xb'aan li tiqwal iq', ke'yo'laak moqon chik chirixeb' li xb'een; 7ut eb' li chaqi och ke'xk'ux li wuqub' chaab'ileb' ut ninqeb' ru. Toja' naq ki'ajk ru laj Parahón ut kixk'e reetal naq a'an yal jun matk'.
8Naq kisaqewk, k'ajo' xk'a'uxl laj Parahón. Kixtaqla xb'oqb'al chixjunileb' laj q'e ut laj k'ehol na'leb' li wankeb' Ejiipt: kixseeraq'i li xmatk' reheb', ab'an maajun kiruhank chi xtawb'al xyaalal. 9Toja' naq laj jolominel reheb' laj k'ehol uk'a' ki'aatinak rik'in laj Parahón ut kixye re: “Anaqwan najultiko'k we jun li maak kinb'aanu. 10Naq laa'at, at awab'ej, katjosq'o'k sa' xb'eeneb' laj k'anjel chawu, kinaak'e sa' tz'alam wochb'een laj jolominel reheb' laj yiib'ahom kaxlan wa, sa' rochoch li xb'eenil laj k'aak'alenel tz'alam. 11Toja' naq koomatk'ek chi qakab'ichal sa' jun q'oqyink, jalan jalanq li qamatk' ut jalan jalanq ajwi' li xyaalalil. 12Wank aran qochb'een jun li al aj Hebreo, aj k'anjel chiru li najolomink reheb' laj k'aak'alenel. Kiqaseeraq'i li qamatk' re ut a'an kixch'olob' chiqu xyaalalil li junjunq. 13Ut tz'aqal kik'ulmank jo' kixtaw ru a'an: laa'in kinaak'e wi' chik sa' link'anjel, at awab'ej, ut li jun chik kit'uyub'aak”.
14Toja' naq laj Parahón kixtaqla xb'oqb'al laj José ut sa' junpaat ki'isiik sa' jul. Laj José kixjo rib', kixjal li raq' ut koxk'ut rib' chiru laj Parahón. 15Ut a'in kixye re laj José: “Xinmatk'ek ut maajun natawok xyaalal linmatk'. Ab'anan xwab'i resil naq, wi laa'at nakawab'i junaq matk', nakataw xyaalal chi junpaat”. 16Kichaq'ok laj José ut kixye re laj Parahón: “Moko laa'in ta, a' b'an li Yos taasumenq aawe chi chaab'il, at awab'ej”.
17Ut laj Parahón kixseeraq'i li xmatk' re laj José:
“Kiwil naq xaqxookin chire nima', 18ut tikto ke'elk chaq sa' li ha' wuqub' chi wakax ch'ina'us rilb'aleb' ut ninqeb' xtib'el: ke'ok chi ichajib'k sa' xyanq li kaxlan aj. 19Ab'anan xaqaamileb' wuqub' chik chi wakax: ke'elk chaq sa' li ha' chirixeb' li xb'een. Eb' a'in yajeb', yib'ru neke'ilok ut b'aqeb'. Maajun wa wilomeb' jo'keb' a'an, sa' xteepal chixjunil Ejiipt: k'ajo' xyib'aleb' ru. 20Eb' li wuqub' wakax b'aqeb' ut yib'eb' ru, ke'xt'upi li wuqub' ninqeb' xtib'el; 21ut naq ak ke'xnuq', juntaq'eet neke'ilok: q'axal yib'eb' ajwi' ru jo' xb'enwa. Toja' naq ki'ajk wu 22ut kin'ok wi' chik chi matk'ek: kiwil wuqub' chi och sa' jun ajwi' li xtoonal; ke'k'iik chi q'axal ninqeb' ru ut chaab'ileb'. 23Ak te'eelunq chaq wuqub' chik och, ink'a' chaab'ileb', sipotz'eb' ut chaqiheb' xb'aan xtiqwal li iq': ke'yo'laak moqon chik chirixeb' li xb'een, 24ut eb' li och chaqiheb' ke'xk'ux li wuqub' li chaab'il. Xinseeraq'i a'in reheb' laj q'e, ab'anan maajun xtawok ru xyaalal”.
25Toja' naq laj José kixye re laj Parahón:
“At awab'ej, laamatk' laa'at junaj ajwi' ru: li Yos kixk'ut chawu li k'aru ok re chi xb'aanunkil. 26Li wuqub' chi chaab'il wakax a'aneb' wuqub' chihab'. Jo'kan ajwi' li wuqub' chi chaab'il och a'aneb' wuqub' chihab' xb'aan naq laamatk' jun ajwi' chirib'il. 27Ut eb' li wuqub' chi wakax b'aqeb' ut yib'ru neke'ilok, li xe'elk chaq sa' li ha' chirixeb' li xb'een, a'aneb' wuqub' chihab'. Jo'kan ajwi' eb' li wuqub' chi och sipotz'eb' ut chaqiheb' xb'aan xtiqwal li iq', a'aneb' wuqub' chihab': reetalil li wuqub' chihab' chi we'ej te'wanq moqon. 28A'an a'in li xinye aawe: li Yos xk'ut chawu li ok re chi xb'aanunkil. 29Te'chalq wuqub' chihab' chi q'axal xk'ihal ru li awimq, sa' chixjunil li tenamit Ejiipt. 30Ab'anan moqon te'chalq wuqub' chihab' taawanq wi' we'ej, ut taasachq sa' xch'ooleb' laj Ejiipt chixjunil li xk'ihal xsahilal li awimq, xb'aan naq li we'ej taasachoq re li tenamit: 31ink'a' chik taa'ilmanq li xk'ihal xsahilal li awimq sa' li tenamit, xb'aan naq k'ajo'aq li we'ej. 32Ka' sut xatmatk'ek: naraj naxye naq ak teneb'anb'il a'in xb'aan li Yos ut li Yos tixseeb'a xb'aanunkil.
33“Jo'kan b'i', at awab'ej, chasik'aq ru junaq winq seeb' xch'ool ut wank xna'leb', re tixk'e chi xjolominkil li tenamit Ejiipt. 34Jo'ka'in naq taab'aanu, at awab'ej: chaxaqab'eb' aj jolominel reheb' li poyanam ut chapatz'aq x'o'otqil ru li awimq reheb' laj Ejiipt chiru li wuqub' chihab' taawanq wi' xk'ihal sahilal a'an. 35Eb' laj jolominel te'xxok chixjunil li ru li awimq chiruheb' li chaab'il chihab' chalkeb' re, ut sa' laak'ab'a' te'xtam li triiw sa'atqeb' li tenamit ut te'xk'uula. 36Chi jo'kan taakanaaq chi k'uulanb'il li triiw ut taak'anjelaq cho'q re li tenamit re naq ink'a' te'kamq chiru li wuqub' chihab' taawanq wi' li we'ej Ejiipt”, chan laj José.
Laj José kixaqab'aak cho'q ruuchil li awab'ej
37Laj Parahón ut eb' laj k'anjel chiru ke'xk'ul xch'ool eb' li aatin a'in, 38ut laj Parahón kixye reheb' laj k'anjel chiru: “Ma tqataw tab'i' junaq winq kama' a'in li wank xmusiq' li Yos rik'in?”. 39Ut kixye re laj José: “Maajun seeb' xch'ool chi moko wank xna'leb' kama' laa'at, xb'aan naq li Yos xk'e chanaw chixjunil a'in. 40Laa'at tatjolominq re linjunkab'al#41,40 Hch 7,10. ut chixjunileb' lintenamit te'xpaab' laawaatin. Ka'ajwi' link'ojarib'aal ink'a' tink'e aawe”, chan. 41Kixye ajwi' laj Parahón re laj José: “K'e reetal: xatinxaqab' chi xjolominkil chixjunil li tenamit Ejiipt”.
42Chirix chik a'an laj Parahón kirisi li xmatq'ab' chi ruq', kixk'e chi ruq' laj José, kixtiqib' chi q'axal chaab'il rik'in liin ut kixk'e li q'ol yiib'anb'il rik'in oor chi xkux laj José. 43Kixk'e ajwi' chi taqe'k sa' li xkab' xb'eleb'aal ch'iich' ut kixtaqlaheb' winq chi xik chiru laj José, japjo'qeb' re chi xyeeb'al: “Wiq'lanqex”. Jo'ka'in naq laj Parahón kixxaqab' laj José chi xjolominkil chixjunil li tenamit Ejiipt.#41,14-43 Sab 10,13-14; 1 Mak 2,53. 44Moqon chik laj Parahón kixye re laj José: “Laa'in laj Parahón; ab'anan maajun naru tixb'aanu li k'a'aq re ru sa' chixjunil li tenamit Ejiipt wi ink'a' taaye laa'at”, chan.
45Laj Parahón kixk'e aj Safnat-Panéhaj cho'q xk'ab'a' laj José, ut cho'q rixaqil kixk'e lix Asnat, xrab'in laj Poti Fera, aj tij aran On. Jo'ka'in naq laj José kixaqab'aak xwankil sa' xb'een li tenamit Ejiipt. 46Lajeeb' xka'k'aal chihab' wank re laj José naq ki'ok chi k'anjelak chiru laj Parahón, awab'ej re Ejiipt.
Naq laj Parahón kiraqe'k chi aatinak, laj José ki'elk rik'in ut kixsuti chixjunil Ejiipt. 47Q'axal chaab'il ki'elk ru li rawimq li ch'och' chiru li wuqub' chi chaab'il chihab', 48ut laj José kixch'utub' chixjunil li ru li awimq chiru li wuqub' chihab' a'an: sa' li junjunq chi tenamit kixk'uula li ru li awimq li ki'elk sa' li ch'och' wank chi xsutam. 49Laj José kixb'uyub' li triiw jo' xk'ihal li samahib' chire li palaw: q'axal naab'al ut ink'a' kixchoy xb'isb'al xb'aan xk'ihal.
Eb' li ralal laj José
50Rub'elaj chaq li we'ej laj José kiwank wiib' li ralal rik'in lix Asnat, xrab'in laj Poti Fera, aj tij aran On. 51Laj José aj Manasés kixk'e cho'q xk'ab'a' li xb'een ralal, xb'aan naq kixye sa' xch'ool: “Li Yos xsachok sa' inch'ool chixjunil linrahilal jo' ajwi' chixjunileb' li wankeb' sa' rochoch linyuwa'”. 52Li xkab' ralal, aj Efraín kik'ehe'k cho'q xk'ab'a', xb'aan naq laj José kixye sa' xch'ool: “Li Yos xinxk'e chi k'ihank sa' li tenamit xink'ul wi' li rahilal”.
53Naq ke'raqe'k li wuqub' chihab' kiwank wi' xnimal sahilal aran Ejiipt, 54ke'xtikib' chalk li wuqub' chihab' chik re li we'ej,#41,54 Hch 7,11. jo' yeeb'il chaq xb'aan laj José. Kiwank we'ej sa' chixjunileb' li tenamit, ab'an sa' xsutam Ejiipt wank li wa. 55Naq kichalk xtz'okajikeb' chixjunileb' laj Ejiipt, ke'xpatz' xwaheb' re laj Parahón, ut laj Parahón kixye reheb' laj Ejiipt: “Ayuqex rik'in laj José: b'aanuhomaq li tixye chaq eere”,#41,55 Jn 2,5. chan reheb'.
56Li we'ej kisutunk sa' chixjunil li ruuchich'och'. Toja' naq laj José kirisi chixjunil li xk'uulahom ut kixk'ayi li triiw reheb' laj Ejiipt xb'aan naq q'axal numtajenaq li we'ej. 57Yalaq b'ar sa' ruuchich'och' neke'chalk Ejiipt re xloq'b'al li triiw rik'in laj José, xb'aan naq yo chi numtaak li we'ej sa' chixjunil li ruuchich'och'.
Currently Selected:
Gn 41: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
