Ex 37
37
Li Loq'laj Kaax
(Ex 25,10-22)
1Laj Besalel kixyiib' li Loq'laj Kaax rik'in akasya, oob' k'utub' xnimal roq, oxib' k'utub' xnimal ru ut oxib' k'utub' xteram. 2Kixletzi tz'aqal oor chisa' ut chirix, ut kixk'e ajwi' xsahob' ru yiib'anb'il rik'in oor chi xsutam. 3Kixyiib' kaahib' chi argoya rik'in oor cho'q re xkaahichaleb' li roq: wiib' te'ok chi xk'atq li Loq'laj Kaax ut wiib' sa' li junpak'al chik. 4Kixyiib' ajwi' rik'in akasya eb' li che' li te'k'anjelaq re xpaqonkil; kixletziheb' rix rik'in oor 5ut kixch'ikeb' sa'eb' li argoya li wankeb' chi xka'pak'alil li Loq'laj Kaax re xpaqonkil.
6Chirix chik a'an kixyiib' li xtz'apb'al xb'een li kaax rik'in tz'aqal oor, oob' k'utub' xnimal li roq ut oxib' k'utub' xnimal li ru. 7Kixyiib' ajwi' wiib' kerubín rik'in kawil oor, junjunq sa' xjunqpak'alil: 8kixk'e li xb'een kerubín sa' xb'een, chi nim, ut li xkab' chi tz'e; chapcho li xtz'apb'al xb'een li Loq'laj Kaax rik'ineb' li kerubín chi xka'pak'alil. 9Eb' li kerubín helhookeb' li xxik' sa' xb'een re xmuheelankil li xtz'apb'al, neke'xka'ya rib' chirib'ileb' rib' naq yookeb' chi ilok sa' xjayal li xtz'apb'al xb'een li kaax.
Li loq'laj meex
(Ex 25,23-30)
10Laj Besalel kixyiib' ajwi' li meex rik'in akasya, kaahib' k'utub' xnimal li roq, wiib' k'utub' xnimal li ru ut oxib' li xteram. 11Kixletzi rix rik'in tz'aqal oor ut kixk'e chi xsutam jun xsahob' ru yiib'anb'il rik'in oor. 12Kixyiib' ajwi' jun k'utub' xb'oolil li re, rochb'een xsahob' ru junqre a'an, yiib'anb'il rik'in oor. 13Kixyiib' kaahib' x'argoya, ut kixk'eheb' sa' li junjunq chi xuk wankeb' wi' li kaahib' chi roq li meex. 14Wankeb' li argoya tz'aqal chi xk'atq li re, re naq chisa'eb' a'an te'oksiiq li che' li taapaqooq wi' li meex.
15Kixyiib' rik'in akasya li wiib' chi che' a'an, ut kixletziheb' rix rik'in oor. 16Jo'kan ajwi' kixyiib' rik'in tz'aqal oor eb' li xk'anjelob'aal li meex: a'eb' li pulaat, li sek', li kuk ut eb' li uk'leb' sek' li te'k'anjelaq re mayejak.
Li xna'aj kanteel
(Ex 25,31-40)
17Laj Besalel kixyiib' li xna'aj kanteel rik'in tz'aqal oor. Rik'in kawil oor kixyiib' li xna'aj kanteel, li xtoonal jo' ajwi' li roq; xchapomeb' rib' li xsahob' ru rik'in a'an, chanchaneb' uutz'u'uj. 18Waqib' li ruq' li neke'elk chi xk'atq: oxib' ruq' chi nim ut oxib' chi tz'e. 19Li xb'een ruq' wank oxib' xsahob' ru rik'in xtux ut ruutz'u'uj, chanchan ratz'um li almeendr; jo'kan ajwi' li xkab' li ruq' wank oxib' li xsahob' ru, kama' li ratz'um li almeendr, rik'in xtux ut ruutz'u'uj. Jo'kaneb' ajwi' li waqib' chi ruq' li xna'aj kanteel. 20Sa' ajwi' li xna'aj kanteel a'an wankeb' kaahib' chi xsahob' ru kama' li ratz'um li almeendr, rik'in xtuxeb' ut ruutz'u'ujeb': 21jun xtux rub'el wiib' ruq' li xna'aj kanteel, jun xtux rub'el wiib' chik ut jun xtux rub'el li wiib' chik li ruq'. Jo'kan naq kixyiib' li waqib' chi ruq' li xna'aj kanteel. 22Eb' li xtux ut eb' li ruq' junajeb' ru rik'in li xna'aj kanteel naq ke'yiib'amank, rik'in kawil oor q'axal chaab'il. 23Kixyiib' ajwi' rik'in chaab'il oor eb' li wuqub' xna'aj li saqenk rochb'eeneb' li xna'aj li xya'al kanteel ut li xk'ulb'al li cha. 24O'k'aal liib'r chi tz'aqal oor ki'oksimank re xyiib'ankil li xna'aj kanteel jo'wi' chixjunileb' li xk'anjelob'aal.
Li artal re li ensens, li loq'laj aseeyt ut li sununkil ensens
(Ex 30,1-5)
25Laj Besalel kixyiib' ajwi' rik'in akasya li artal re li ensens: kaaxukuut, wiib' k'utub' li xnimal li roq ut jo'kan ajwi' li xnimal li ru, kaahib' k'utub' li xteram, junaj ru li artal rik'ineb' li xxukub'. 26Kixletzi rik'in tz'aqal oor, jo' li xb'een jo' ajwi' li xk'atq ut eb' li xxukub', ut kixk'e chi xsutam jun xsahob' ru oor; 27ut chi xk'atq, rub'el li xsahob' ru kixyiib' wiib' x'argoya re xch'ikb'al chisa'eb' li che' li taapaqooq wi' li artal. 28Kixyiib' eb' li che' a'in rik'in akasya, ut kixletziheb' rix rik'in oor.
29Kixyiib' ajwi' li aseeyt re li loq'laj yuluk ut li sununkil ensens jwal chaab'il, jo' tz'aqal naxb'aanu laj yiib'ahom re.#37,29 Ex 30,22-38.
Currently Selected:
Ex 37: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
