Ex 25
25
IV. CHIRIX XYIIB'ANKIL ROCHOCH LI YOS (25-31)
Li mayej cho'q re li Santil Na'ajej
(Ex 35,4-9)
1Li Qaawa' kiraatina laj Moisés ut kixye re:
2“Ye reheb' laj Israel naq te'xyeechi'i xmayejeb' we. Laa'ex teexok cho'q we jo'ch'inal jo'nimal li na'alaak sa' xch'ooleb'. 3A'an a'in li mayej teeyeechi'i we: oor, plaat ut q'anch'iich'; 4tuuxnoq', kaqinoq' jo' ajwi' moraad, kaqpuq'inkil t'ikr, chaab'il liin, rismal chib'aat, 5xtz'uumal karneer kaq xb'onol, chaab'il tz'uum ut li che' akasya xk'ab'a'; 6aseeyt re xya'al li saqenk, sununkil b'an li na'ok sa' li aseeyt re yuluk ut sa' li sununkil ensens; 7li pek ónice xk'ab'a' jo' ajwi' li pek li na'ok cho'q xsahob' ru li efod ut cho'q xsahob' ru li b'ools wank chire xmaqab' laj tij. 8Taayiib' jun inSantil Na'ajej re naq tinhilanq sa' xyanqeb'. 9Taayiib' a'an jo' ajwi' li k'a'aq re ru taak'anjelaq chisa', jo' chanru li tink'ut chawu.
Li Loq'laj Kaax
(Ex 37,1-9)
10“Taayiib' jun li Loq'laj Kaax rik'in akasya wank oob' k'utub' xnimal li roq, oxib' k'utub' xnimal li ru ut oxib' k'utub' xteram. 11Taaletzi tz'aqal oor chisa' ut chirix; jo'kan ajwi' taak'e xsahob' ru yiib'anb'il rik'in oor chi xsutam. 12Taayiib' kaahib' chi argoya rik'in oor ut taak'eheb' sa' xkaahichal li roq, wiib' chi xk'atq li Loq'laj Kaax ut wiib' sa' li junpak'al chik. 13Taayiib' ajwi' rik'in akasya li che' li te'k'anjelaq re xpaqonkil; taaletziheb' rix rik'in oor 14ut taach'ikeb' sa'eb' li argoya li wankeb' chi xka'pak'alil li Loq'laj Kaax re xpaqonkil a'an. 15Eb' li che' a'in tento te'kanaaq sa'eb' li x'argoya li Loq'laj Kaax, ut ink'a' chik te'isiiq aran. 16Ut sa' li Loq'laj Kaax taawoksi li reetalil li Sumwank li tink'e aawe.
17“Taayiib' ajwi' jun xtz'apb'al xb'een li kaax rik'in tz'aqal oor, wank oob' k'utub' xnimal roq ut oxib' k'utub' xnimal ru. 18Taayiib' ajwi' wiib' kerubín rik'in kawil oor, junjunq sa' xjunqpak'alil. 19Taak'e li xb'een kerubín sa' xb'een, sa' xnim, ut li xkab' sa' xtz'e; chapchooqaq li xtz'apb'al xb'een li Loq'laj Kaax rik'ineb' li kerubín chi ka'pak'al. 20Ut helhooqaqeb' li xxik' sa' xb'een. Rik'ineb' a'an te'xmuheela li xtz'apb'al, ut te'xka'ya rib' chirib'ileb' rib' naq yooqeb' chi ilok sa' xjayal li xtz'apb'al xb'een li kaax. 21Taak'e li xtz'apb'al sa' xb'een li Loq'laj Kaax, ut taak'e chisa' li reetalil li Sumwank li tinq'axtesi aawe. 22Aran tink'utb'esi wib' chawu: sa' xb'een li Loq'laj Kaax, sa' xyiheb' li wiib' chi kerubín li wankeb' sa' xb'een li xLoq'laj Kaaxil li Sumwank, laa'in tinye aawe chixjunil laataqlankil cho'q reheb' laj Israel.
Li loq'laj meex
(Ex 37,10-16)
23“Taayiib' jun li meex rik'in akasya, kaahib' k'utub' xnimal li roq, wiib' k'utub' xnimal li ru ut oxib' li xteram. 24Taaletzi rix rik'in li tz'aqal oor ut taak'e chi xsutam jun xsahob' ru yiib'anb'il rik'in oor. 25Taayiib' ajwi' jun k'utub'aq xb'oolil li re, rochb'een xsahob' ru junqre a'an, yiib'anb'ilaq rik'in oor. 26Taayiib' kaahib' x'argoya rik'in oor, ut taak'eheb' sa' li junjunq chi xuk wankeb' wi' li kaahib' chi roq li meex. 27Eb' li argoya te'wanq tz'aqal chi xk'atq li re, re naq chi sa'eb' a'an te'oksiiq li che' li taapaqooq wi' li meex. 28Taayiib' rik'in akasya li wiib' chi che' ut taaletziheb' rix rik'in oor; rik'ineb' li che' a'an taapaqooq li meex. 29Taayiib' ajwi' eb' li pulaat, li sek', li kuk ut eb' li uk'leb' sek' li te'k'anjelaq re mayejak. Rik'in li tz'aqal oor taayiib'eb' a'an. 30Ut sa' xb'een li meex taak'eheb' li mayejanb'il wa, re naq junelik wanqeb' chiwu.#25,30 Lv 24,5-8.
Li xna'aj kanteel
(Ex 37,17-24)
31“Taayiib' ajwi' jun xna'aj kanteel rik'in tz'aqal oor. Rik'in kawil oor taayiib' li xna'aj kanteel, li xtoonal jo' ajwi' li roq; xchapomaqeb' rib' li xsahob' ru rik'in a'an, chanchanaqeb' uutz'u'uj. 32Waqib' ruq' te'elq chi xk'atq: oxib' ruq' chi nim ut oxib' chi tz'e. 33Li xb'een ruq' taawanq oxib' xsahob' ru rik'in xtux ut ruutz'u'uj, chanchan ratz'um li almeendr. Jo'kan ajwi' li xkab' taawanq oxib' xsahob' ru kama' li ratz'um li almeendr, rik'in xtux ut ruutz'u'uj. Jo'kanaqeb' ajwi' li waqib' chi ruq' li xna'aj kanteel. 34Sa' ajwi' li xna'aj kanteel a'an te'wanq kaahib' chi xsahob' ru kama' li ratz'um li almeendr, rik'in xtuxeb' ut ruutz'u'ujeb': 35jun xtux rub'el wiib' ruq' li xna'aj kanteel, jun xtux rub'el wiib' chik ut jun xtux rub'el li wiib' chik ruq'. Jo'ka'in taayiib' li waqib' chi ruq' li xna'aj kanteel. 36Eb' li xtux ut eb' li ruq' junajaqeb' ru rik'in li xna'aj kanteel naq te'yiib'amanq, rik'in kawil oor li q'axal chaab'il. 37Taayiib' ajwi' wuqub' xna'aj li saqenk ut taak'eheb' sa' xb'een, re naq chiru taak'utunq li xsaqenkil. 38Li xna'aj li xya'al kanteel ut li xna'aj li cha yiib'anb'ilaqeb' rik'in tz'aqal oor. 39O'k'aal liib'r chi tz'aqal oor taa'oksimanq re xyiib'ankil li xna'aj kanteel jo'wi' chixjunileb' li xk'anjelob'aal. 40K'e reetal re naq taayiib' a'an jo' chanru kik'ute'k chawu sa' li tzuul.#25,40 Hch 7,44; Heb 8,5.
Currently Selected:
Ex 25: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
