Dt 4
4
“Chepaab' li Chaq'rab'”
1“Anaqwan, at Israel, ab'i li aatin ut eb' li chaq'rab' tink'ut cheru. Chek'anjela ruheb', re naq wanq eeyu'am ut tex'ok chi reechaninkil li ch'och' tixk'e eere li Qaawa', xYoseb' leena' leeyuwa'. 2Maak'a' teetiq re li texintaqla wi', chi moko wank ta teerisi;#4,2 Ap 22,18-19. teepaab' b'an chixjunileb' li xchaq'rab' li Qaawa' leeYos, jo' chanru tinye eere. 3Laa'ex xeril tz'aqal rik'in leeru li k'aru xb'aanu li Qaawa' rik'in laj Bahal-Pehor, jo'ch'inal jo'nimal xe'xk'ul chixjunileb' li xe'taaqenk re a'an: li Qaawa' leeYos xsacheb' ru chixjunileb', ut maak'a'eb' chik anaqwan sa' eeyanq.#4,3 Nm 25,1-9. 4A'ut laa'ex li tiik eech'ool chirix li Qaawa' leeYos, toj yo'yookex anaqwan. 5Chek'e reetal: jo' chanru li Qaawa' linYos xye we, jo'kan ajwi' laa'in tink'ut cheru li chaq'rab' tento teepaab' sa' li na'ajej ok eere chi reechaninkil. 6Paab'omaq ut k'anjelahomaq ru, xb'aan naq a'an leechoxahil na'leb' ut leeseeb'al k'a'uxl chiruheb' li tenamit. Naq eb' a'in te'rab'i resil chixjunil li chaq'rab' a'in, te'xye: «Yaal naq li nimla tenamit a'in wank xchoxahil na'leb' ut xseeb'al xk'a'uxl», cha'qeb'. 7Relik chi yaal, ma wank ta junaq nimla tenamit li wank li xyoseb' chi jwal nach' chi xk'atq jo' naq wank li Qaawa' li qaYos rajlal naq naqayaab'a xk'ab'a'? 8Ut k'a' chi tenamitul q'axal nim, wank xchaq'rab' tz'aqal tiik jo' ta chixjunil li chaq'rab' li yookin chi xq'axtesinkil eere anaqwan? 9Ab'anan k'ehomaq reetal ut ilomaq chi us. Misachk sa' eech'ool li k'a' re ru a'in li xeril; meetz'eq chirix leech'ool chiru chixjunil leeyu'am, k'utomaq b'an xpaab'ankil chiruheb' leeralal eek'ajol ut chiruheb' leeri eemam.
10“Laa'ex kexwank chiru li Qaawa' leeYos chi xtoon li tzuul Horeb ut aran li Qaawa' kixye we: «Ch'utub'eb' chiwu li tenamit re naq te'rab'i li waatin ut tine'xpaab' naq toj wanqeb' sa' li ruuchich'och' a'in, ut te'xk'ut ajwi' li aatin a'in chiruheb' li ralal xk'ajoleb'». 11Toja' naq kexnach'ok ut kexwank chi xtoon li tzuul li yo chi k'atk; toj sa' wi' li choxa nawulak li raq' xxamlel, sa' xyanq q'eqi choql ut xnimal aak'ab'. 12Aran li Qaawa' kexraatina chaq toj sa' xyi li xam.#4,11-12 Ex 19,16-18; Heb 12,18-19. Laa'ex kerab'i xyaab' li raatin, ab'an maak'a' keril, ka'ajwi' xyaab' kuxej kerab'i. 13Li Qaawa' kixk'e chenaw li Sumwank ut kixye eere naq tento xk'anjelankil ru li lajeeb' chi aatin li kixtz'iib'a chiru wiib' perpookil pek.#4,13 Ex 31,18. 14Moqon kinxtaqla li Qaawa' chi xk'utb'al cheru li raatin ut li xchaq'rab',#4,14 Ex 21,1. re naq teepaab' sa' li ch'och' teereechani laa'ex.
15“K'oxlahomaq chi us li teeb'aanu: maak'a' keril ru naq kexraatina li Qaawa' sa' li tzuul Horeb sa' xyi li xam. 16Jo'kan naq meepo' leena'leb': meeyiib' junaq eepech'b'il yos jo' rilb'al junaq winq malaj ixq,#4,16 Ex 20,4; Lv 26,1; Dt 5,8; 27,15. 17chi moko jo' rilb'al junaq xul li wankeb' sa' ruuchich'och', malaj ut junaq xik'anel xul li neke'rupupik chiru choxa. 18Ma toja' ta chik jo' junaq k'anti' li neke'xjukuki rib' chiru ch'och', chi moko jo' junaq kar li neke'wank sa' ha' rub'el li ch'och'.#4,14-18 Ro 1,23. 19Naq taawil li choxa, li saq'e, li po, eb' li chahim ut chixjunil li wank chiru choxa, maak'e aawib' chi b'alaq'iik chi moko taawiq'ib' aawib' chiruheb' chi xloq'oninkileb' ru, xb'aan naq li Qaawa' laaYos kixyiib' eb' a'an re naq te'k'anjelaq chiruheb' chixjunil li tenamit wankatqeb' junsut junrub'el choxa.
20“Naq kexchap li Qaawa' ut kexrisi chaq sa' li nimla rahilal aran Ejiipt, kixb'aanu chi jo'kan re naq laa'exaq tz'aqal li xtenamit jo' naq wankex anaqwan.#4,20 Ex 19,5; Dt 7,6; 14,2; 26,18; 1 R 8,51; Jr 11,4; Tit 2,14; 1 P 2,9. 21Eemaak laa'ex kijosq'o'k li Qaawa' wik'in ut kixye naq ink'a' tinnume'q junpak'al li nima' Jordán chi moko tin'ok sa' li xchaq'alil ru na'ajej li tixk'e li Qaawa' leeYos chereechani.#4,21 Nm 20,12; 27,12-14. 22Jo'kan naq laa'in tinkamq sa' li na'ajej a'in ut ink'a' tinq'ax Jordán. Ab'an laa'ex texnume'q junpak'al ut teereechani li chaab'il ch'och' a'an. 23Chek'e b'i' reetal, misachk sa' leech'ool li Sumwank li kixk'ojob' eerik'in li Qaawa' leeYos ut meeyiib' junaq reetalil chixjunil li k'aru xram cheru li Qaawa' leeYos, 24xb'aan naq li Qaawa' leeYos a'an jun xam nasachok ut jun Yos aj sowen.#4,24 Heb 12,29.
25“Naq akaq xe'wank eeralal eek'ajol ut eeri eemam ut akaq xextixk sa' li tenamit a'in, wi teepo' leena'leb' ut teeyiib' yalaq k'a' chi eetalil ramro cheru, wi teeb'aanu li ink'a' nawulak chiru li Qaawa' leeYos toj reetal teeyoob' xjosq'il, 26ch'olch'o ru naq tex'oso'q sa' junpaat sa' li na'ajej toxeereechani naq teeq'ax li nima' Jordán: li choxa ut li ruuchich'och' te'xch'olob' leemaak. Moko najt ta texwanq aran xb'aan naq texsache'q chi junajwa. 27Li Qaawa' texxcha'cha'i sa' xyanqeb' li tenamit ut yal ink'a' chik k'i texkanaaq sa' xyanqeb' li tenamit texxk'am wi' li Qaawa'. 28Aran teeloq'oni ruheb' li yos xyiib'ahomeb' li winq rik'in che' ut pek,#4,27-28 Dt 28,36; 2 R 17,4-6; 25,8-12; Is 4,3. li ink'a' neke'ilok chi moko neke'ab'ink, ink'a' neke'tzekank ut maak'a' neke'reek'a. 29Ab'an wi aran teesik' li Qaawa' leeYos chi anchal leech'ool ut chi anchal leeraanm, relik chi yaal naq teetaw.#4,29 2 Kr 15,2-15; Jr 29,13; Mt 7,7-8. 30Naq wanqex sa' rahilal ut sa' chixjunileb' li ch'a'ajkilal a'in sa' roso'jikeb' li kutan, wi texsutq'iiq chaq rik'in li Qaawa' leeYos ut teerab'i xyaab' xkux, 31ink'a' texxkanab' eejunes chi moko texxsach chi junajwa, xb'aan naq li Qaawa' leeYos a'an jun Yos aj uxtaan, ut ink'a' taasachq sa' xch'ool li Sumwank kixk'ojob' rik'ineb' leena' leeyuwa'.
“Sik'b'il aawu xb'aan li Qaawa'”
32“Patz'on reheb' li kutan ak xe'nume'k, tz'ili rix chalen naq li Qaawa' kixyoob'tesi li winq sa' xb'een li ruuchich'och': ma wanjenaq malaj ab'inb'il jun sutaq rub'el choxa junaq k'aru kama' ta a'in? 33Ma wank junaq tenamit xrab'i ta jo' naq xawab'i laa'at li xyaab' xkux li yo'yookil Yos chi aatinak sa' xyi li xam, ut kikanaak ta chi yo'yo? 34Ma wank junaq yos xolxsik' ta xtenamit sa' xyanqeb' jalan chik tenamit rik'in xyalb'al rix ut xninqal eetalil, sachb'ach'oolej ut yalok u, rik'in xkawilal li ruq' ut li xtel, jo'wi' rik'in xninqal rahilal, jo' kixb'aanu sa' xnaq' eeru li Qaawa' leeYos eerik'in aran Ejiipt?
35“Aawe laa'at xk'e rilb'al chixjunil a'an re naq taanaw naq li Qaawa' a'an tz'aqal Yos, ut maak'a' chik junaq chiru A'an.#4,35 Ex 20,2-3; Is 43,10-13; Mk 12,32. 36Toj sa' choxa katraatina chaq re aatzolb'al; sa' xb'een li ruuchich'och' kixk'ut chawu li xnimal xxam, ut sa' xyi li xam kawab'i li raatin. 37A'an kixraheb' laana' laayuwa'; jo'kan naq kixsik'eb' ru li ralal xk'ajoleb' ut katrisi chaq Ejiipt rik'in xnimal xwankil, 38kiraanilasiheb' li numtajenaqil tenamit li q'axal kaweb' rib' chawu, ut katroksi sa' li xch'och': kixk'e chaweechani jo' naq wank aawe anaqwan.
39“Jo'kan utan, wanq sa' aach'ool sa' li kutan a'in ut chak'oxla chi junelik naq li Qaawa' a'an Yos jo' sa' choxa jo' sa' ruuchich'och', ut maak'a' chik junaq chiru. 40Paab' li xchaq'rab' ut li xtaqlahom li yookin chi xyeeb'al aawe anaqwan, re naq sahaq aach'ool laa'at ut eb' laawalal aak'ajol, ut taanajto'q roq laayu'am sa' li ch'och' tixk'e aawe chi junajwa li Qaawa' laaYos.
Oxib' chi tenamit b'arwi' naru te'xmuq rib' eb' laj Israel
41“Toja' naq laj Moisés kixxaqab' oxib' chi tenamit sa' releb'l saq'e junpak'al li nima' Jordán 42re naq aran tixmuq rib' yalaq ani xkamsink junaq ras riitz'in chi ink'a' rajom xch'ool chi moko xik' ta naril; chi jo'kan taakole'q wi tixmuq rib' sa' junaq reheb' li tenamit a'an. 43A'aneb' a'in li tenamit: cho'q reheb' laj Rubén, kixxaqab' Béser, li wank sa' li chaqich'och' sa' xb'een li tzuul; cho'q reheb' laj Gad kixxaqab' Ramot re Galahad, ut cho'q reheb' laj Manasés: Golán re Basán.#4,41-43 Jos 20,8-9.
Laj Moisés ki'aatinak xka' sut
44“A'an a'in li chaq'rab' kixye laj Moisés reheb' laj Israel. 45A'aneb' a'in li aatin ut li chaq'rab' kixye laj Moisés reheb' laj Israel naq ke'elk chaq Ejiipt, 46junpak'al chaq li nima' Jordán, sa' li taq'a, nach' rik'in Bet-Pehor, sa' li xna'aj laj Sijón, awab'ej re Amor, a' li kiwank chaq Jesbón ut kiq'axe'k ru xb'aan laj Moisés ut xb'aaneb' laj Israel sa' li relikeb' chaq Ejiipt. 47Li xch'och' a'an ki'eechaniik xb'aaneb' laj Israel. Jo'kan ajwi' kixk'ul laj Og, awab'ej re Basán, a'an ajwi' awab'ej re Amor kama' laj Sijón, junpak'al li nima' Jordán: 48chalen chaq Aroher li wank chire li nima' Arnón, toj sa' li tzuul Sirión, Hermón ajwi' nayeemank re, 49rik'in chixjunil Arabá li wank sa' xjayal releb'l saq'e junpak'al li nima' Jordán, toj chire li palaw re Arabá, sa' xtoon li tzuul Piská.
Currently Selected:
Dt 4: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
