Dt 19
19
Eb' li tenamit tixkol wi' rib' li nakamsink ras riitz'in
(Nm 35,9-28; Jos 20,1-9)
1“Naq li Qaawa' laaYos akaq xsacheb' ru li tenamit li tixk'e chaweechani ut naq akaq xawisiheb' sa' li xna'ajeb' ut wanqat sa' li xtenamiteb' ut sa' li rochocheb', 2taajek' oxib'aq tenamit sa' li na'ajej tixk'e aawe li Qaawa' laaYos. 3Teetooq li b'e re wulak sa'eb' li tenamit a'an chi junelik, ut taajachi sa' oxib' jachal chixjunil li ch'och' tixk'e aawe li Qaawa' laaYos: taab'aanu a'in re naq yalaq ani taakamsinq junaq ras riitz'in, truuq tixkol chaq rib' aran. 4Li ani tixkamsi ras riitz'in chi ink'a' rajom xch'ool ut chi ink'a' xik' naril junxilaj chaq, taaruuq taaxik chi xkolb'al chaq rib' aran. 5Qayehaq, junaq winq taaxik chi si'ib'k sa' k'iche' rochb'een li ras riitz'in. Wi sa' xtaqsinkil li maal re xyok'b'al li che', taakoq'e'q li maal chiru li roq ut toxkamsi li ras riitz'in, li winq a'in taaruuq taaxik sa' junaq reheb' li tenamit a'an ut tixkol li xyu'am. 6Mare anchal, wi jwal najt wank li tenamit, laj eeqajunel re li kamenaq toxsik' li xkamsink naq toj yooq xjosq'il, toxtaw ut tixk'e reeqaj, us ta a'an moko xk'ulub' taraj kamk, xb'aan naq junxil moko xik' ta neke'ril rib' chirib'ileb' rib'. 7Jo'kan naq nink'e aataqlankil a'in: «Taajek' oxib'aq aatenamit». 8Ut naq li Qaawa' laaYos tixyu' ru laana'aj, kama' kixye chaq reheb' laana' laayuwa', ut tixk'e aawe chixjunil li ch'och' li kixyeechi'i reheb' laaxe'toonil yuwa', 9wi nakapaab' ut nakak'anjela ru chixjunil li chaq'rab' li ninye aawe anaqwan, wi nakara li Qaawa' laaYos ut nakataaqe li xb'e chiru chixjunil laayu'am, taatiq chik oxib'aq chi tenamit chirix li ak wankeb'. 10Chi jo'kan ink'a' taahoye'q kik'elej maak'a' xmaak sa' li na'ajej tixk'e chaweechani li Qaawa' laaYos ut ink'a' taateneb'aaq sa' aab'een xtojb'al rix li kik'.
11“Ab'anan wi junaq winq xik' naril li ras riitz'in, taaxik chi xramb'al sa' b'e ut tixkut rib' sa' xb'een, tixsak' ut tixkamsi, ut chirix a'an tixmuq chaq rib' sa' junaq reheb' li tenamit a'an, 12eb' li cheekel winq re li tenamit a'an te'xtaqla xchapb'al aran ut te'xq'axtesi sa' ruq' laj eeqajunel kik', ut taakamsiiq. 13Ink'a' taawil xtoq'ob'aal ru. Taawisi chi junajwa sa' xyanqeb' laj Israel li maak a'an, ut chi jo'kan us tat-elq sa' chixjunil.
14“Maajiq xnub'ajlil xna'aj laawas aawiitz'in li xaqab'anb'il aran xb'aaneb' li xxe'toon, sa' li ch'och' tixk'e aawe li Qaawa' laaYos.#19,14 Dt 27,17; Job 24,2; Pr 22,28; Os 5,10.
Eb' li testiiw
15“Li raatin jun chi testiiw moko tz'aqal ta re xraqb'al aatin chirix xmaak malaj ink'a' us xb'aanu junaq winq; ka'ajwi' rik'in raatineb' wiib' malaj oxib' chi testiiw naru xraqb'al aatin chirix.#19,15 Nm 35,30; Dt 17,6; Mt 18,16; Jn 19,31; 2 Ko 13,1; 1 Ti 5,19; Heb 10,28.
16“Wi junaq testiiw aj tik'ti' taawakliiq chi xjitb'al junaq winq chirix q'etok chaq'rab', 17chi xkab'ichaleb' li winq li wankeb' xch'a'ajkilal chirib'ileb' rib' tento toxe'xq'axtesi rib' chiru li Qaawa', chiruheb' laj tij ut chiruheb' laj raqol aatin wankeb' sa' xk'anjel sa'eb' li kutan a'an. 18Eb' laj raqol aatin te'xtz'il rix chi us, ut wi taak'utunq naq li testiiw a'an jun aj tik'ti' li xq'ab'a chaq li ras riitz'in, 19toja' naq te'xb'aanu re li k'aru raj kiraj xb'aanunkil re li ras riitz'in. Chi kama'an taak'e chi sachk li yib'eetal sa' eeyanq.#19,19 1 Ko 5,13. 20Ut naq eb' li komon te'rab'i resil, te'ok xxiw ut ink'a' chik te'xb'aanu junaq maa'usilal kama' a'an sa' eeyanq. 21Ink'a' tat-iloq xtoq'ob'aal ru. Kamsinb'ilaq li xkamsink re li ras riitz'in; isinb'ilaq xsa' ru li x'isink xsa' aawu; isinb'ilaq ruuch re li x'isink ruuch aawe;#19,21 Ex 21,23-25; Lv 24,19-20; Mt 5,38. yok'b'ilaq ruq' li xyok'ok aawuq' ut yok'b'ilaq roq li xyok'ok aawoq.
Currently Selected:
Dt 19: QQC
Highlight
Copy
Compare
Share
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.
