DANIEL (dc) 8
8
Jun chik li moy u: li karneer ut li chib'aat
1“Oxib'aq chihab' rokik chi awab'ejink laj Baltasar, laa'in laj Daniel kinmatk'ek wi' chik ut kiwil jun chik li moy u. 2Kinmatk'e naq wankin aran Susa, li xnimal tenamit sa' xteepal Elam, chire li nima' Ulay. 3Naq kintaqsi li wilob'aal, kiwil jun karneer xaqxo chire li nima', wank wiib' xninqi xukub'. Ab'an jun jwal nim chiru li jun chik; ut li nim, a'an li kiyo'laak moqon. 4Kink'e reetal naq li karneer ki'ok chi xeq'ok sa' xjayal rokeb'l li saq'e, sa' xjayal releb'l li iq' ut sa' xjayal xsak'leb' li iq'. Maajun li xul nakuyuk xsumenkil ut maa'ani na'elelik chiru li xwankil: naxb'aanu li k'aru naraj ut q'axal nanumtaak sa' xb'een chixjunil.
5“Toj yookin ajwi' chi k'oxlak chirix a'in, naq kiwil jun teelom chib'aat kichalk chaq sa' xjayal rokeb'l li saq'e, chi ak xb'eeni chaq li ruuchich'och' sa' iq'. Li teelom chib'aat a'in wank jun xnimal xxukub' chiru li xpeekem. 6Kijilok chi xk'atq li karneer wiib' xxukub' li kiwil chire li nima', ut sa' aanil kixkut rib' sa' xb'een rik'in chixjunil li xmetz'ew. 7Kiwil chanru naq ki'ok chi xxeq'b'al xb'aan xjosq'il: kixtoqi li xxukub' li karneer, chi ink'a' kiruhank chi xkolb'al rib' chiru, kixkut chiru ch'och' ut kixyeq'i sa' roq, chi maajun kikolok re li karneer sa' ruq' li teelom chib'aat. 8Li teelom chib'aat ki'ok chi nimank li xtib'el ut q'axal chik kikawuuk li xmetz'ew; ab'anan naq ak kaw chik rib' chi us, kitoqe'k li xnimla xukub' ut sa' xna'aj a'an ke'elk chaq kaahib' chi xukub', li yookeb' chi ilok sa' xkaaxukuutil li ruuchich'och'.
9“Sa' jun chi xukub' ki'elk chaq jun chik kach'in, li kik'iik chi us sa' xjayal xsak'leb' iq', sa' xjayal releb'l li saq'e ut sa' xjayal li xchaq'alil ru na'ajej.#8,9 A'an li tenamit Israel. Cf. Jr 3,19; Ez 20,6. 10Q'axal kik'iik toj reetal koxtaweb' li chahim chiru choxa; ut jun yiijach reheb' a'an kixt'aneb' chiru ch'och'#8,10 Ap 12,4. ut kixyeq'iheb' sa' roq. 11Li xukub' a'an q'axal kinumtaak toj reetal koxtoch' li xjolomileb' li chahim, kixsach xwankil li mayejak na'uxmank rajlal kutan ut kixb'eki li rub'elankil li xsantil ochoch li Yos. 12Kixxaqab' aran xwankil li maa'usilal, kixk'ojob' li jo'maajo'il na'leb' cho'q ruuchil li mayejak ut kixk'e chi ch'och'el li yaal. Jo'ch'inal jo'nimal li kixb'aanu, us ki'elk chiru.
13“Toja' naq kiwab'i jun li ánjel yo chi aatinak, ut li jun chik kixpatz' re: «Jo' najtil taawanq xk'utb'esinkil li moy u a'in? Jo' najtil taawanq li mayejak rajlal kutan, li jo'maajo'il na'leb' ut li loq'laj Muheb'aal? Jo' najtil chik yooq xtawasinkileb' laj paab'anel?». 14Ut li jun chik ánjel kichaq'ok ut kixye: «Chiru wan xka chihab'; toja' naq li loq'laj Muheb'aal taasantob'resiiq wi' chik».
Li xyaalalil li moy u
15“Naq toj yookin chi rilb'al li moy u ut yookin xk'oxlankil rix, k'utaamil chiwu jun kama' li winq, 16ut kiwab'i jun xyaab' kuxej chire li nima' Ulay li kixjap re chi xyeeb'al: «At Gabriel,#8,16 Lk 1,19.26. ch'olob' chiru a'an k'aru xyaalal li moy u li xril», chan. 17Toja' naq kijilok chink'atq ut laa'in kint'ane'k chi hupu chiru ch'och' xb'aan inxiw. A'an kixye we: «At winq, tento taataw ru naq li moy u xawil, a'an reetalil li k'aru taak'ulmanq sa' roso'jikeb' li kutan».
18“Naq li ánjel yo chi waatinankil, kisachk linna'leb', chi hupuukin chiru ch'och'; ab'an a'an kinxwaklesi ut kinxxaqab'. 19Moqon kixye we: «Tinch'olob' chawu li taak'ulmanq naq taaraqe'q li xjosq'il li Qaawa', xb'aan naq ak xaqxo li xkutankil li roso'jik. 20Li karneer wiib' xxukub' li xawil, a'an reetalileb' li awab'ej re Media ut Persia. 21Li teelom chib'aat, a'an reetalil li awab'ej re Grecia, ut li nimla xukub' li xawil chiru peekem, a'an reetalil li xb'een awab'ej. 22Eb' li kaahib' chi xukub' li xe'elk sa' xna'aj li xtoqe'k, a'aneb' reetalil li kaahib' chi awab'ej li te'wakliiq aran Grecia, us ta ink'a' jwal kaweb' rib'. 23Ut sa' xraqik li x'awab'ejihomeb', naq numtajenaqaq li maa'usilal, taawakliiq chaq jun chik awab'ej q'axal wi' chik q'etq'et ut aj b'alaq'. 24Taanimanq li xwankil, q'axal kawaq rib' chi sachok ut us taa'elq sa' chixjunil li taaraj xb'aanunkil. Tixjuk'eb' li ninqeb' xwankil ut tixsacheb' ajwi' li sik'b'ileb' ru xb'aan li Yos. 25Sa' xk'ab'a' li xlab'alil taanumtaaq li xyib'al ru xna'leb', tixnima xwankil xjunes rib' ut naab'aleb' li poyanam tixsach chi maak'a'aq sa' xch'ooleb'. Taaq'apliiq ajwi' sa' xb'een li xnimal ru Awab'ej, ab'anan sa' junpaat taasache'q ru. 26A'an a'in li xyaalalil li k'aru taak'ulmanq chiru wan xka chihab'. Ak xinch'olob' chawu, ut a'an tz'aqal yaal; ab'anan k'uula sa' laach'ool xb'aan naq moko ak k'ulmank ta re a'in», chan we li ánjel.
27“Laa'in laj Daniel kinlub'k ut kinyajerk xb'aan, chiru naab'al kutan. Chirix chik a'an kinwakliik re k'anjelak wi' chik chiru li awab'ej. Ab'anan toj sachso linch'ool chirix li moy u, xb'aan naq ink'a' ninruhank chi xtawb'al xyaalal.
Currently Selected:
DANIEL (dc) 8: QQC
Highlight
Share
Copy
Want to have your highlights saved across all your devices? Sign up or sign in
Q'eqchi DC Bible © Bible Society in Guatemala, 2005.