Romanos 1
1
Paonori imapisopita yonquiaton, ninshitërinsoꞌ
1Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Quisocristoíchin natërahuë. Ina acorinco paato nanamën aꞌchinaꞌhuaso marëꞌ. Yosë nohuanton, noya nanan aꞌchinárahuë.
2Coꞌhuara Quisocristo oꞌmayatërasohuëꞌ, ina nanan chachin Yosë shaꞌhuitërinpoaꞌ. Quiricanën quëran anitotërinpoaꞌ, iráca ninshitopisoꞌ. Ina nohuanton, naꞌa pënëntonaꞌpiroꞌsaꞌ ninopi. 3“Huiꞌnahuë aꞌpaimarahuë,” tënin Yosë. Napoaton Quisocristo isoroꞌpaquë oꞌmarahuaton, piyapi chachin nasitimarin. Tapi shiin inasoꞌ. 4Yosë pochachin niꞌton, noyasáchin ninin. Chiminpirinhuëꞌ, Yosëri ananpitaantarin. “Inasoꞌ tëhuënchachin Yosë huiꞌnin. Chini chiníquën nanantarin,” tënëhuaꞌ. Ananpitaantarin niꞌton, nitotërëhuaꞌ. Quisocristo chachin huaꞌanëntërinpoaꞌ niꞌton, “Sinioro” itërëhuaꞌ.
5Ina nosoroatonco, acorinco nisha nisha piyapiꞌsaꞌ aꞌchintaꞌhuaso marëꞌ. Inapitantaꞌ nanamën natëcaiso marëꞌ pënënarahuë. Natëhuachinaꞌ, “Quisocristosoꞌ noya noya,” tosapi. 6Canpitantaꞌ nisha piyapinquëmaꞌ nipomarahuëꞌ, Quisocristo imaramaꞌ. Yosë nohuanton, imaramaꞌ. 7Napoaton Nomaquë yaꞌhuëramasopita ninshitaranquëmaꞌ. Yosë paꞌpi nosororinquëmaꞌ. Nani acorinquëmaꞌ piyapinënpita nicacamasoꞌ. Niꞌton, inasáchin yonquicasoꞌ yaꞌhuërin. Tata Yosë inaora nohuanton, catahuainquëmaꞌ. Asanocancainquëmaꞌ. Quisocristontaꞌ inapochachin catahuainquëmaꞌ. Inasoꞌ huaꞌanëntërinpoaꞌ.
Inapita marëꞌ Yosë nontërinsoꞌ
8Canpitasoꞌ noya Yosë natëramaꞌ, natantërahuë. Yaꞌipi piyapi napopi. Ina natantato, “Yosparinquën Sinioro,” itërahuë Yosë. Inaꞌton napotërahuë. Quisocristo catahuarinco ina pochin Yosë nontaꞌhuaso marëꞌ. 9Yosë niꞌsárinco, noꞌtëquën nontaranquëmaꞌ. Yaꞌipi cancanëhuë quëran huarëꞌ Yosë imarahuë. Huiꞌnin nanamën aꞌchinárahuë. Nani tahuëriya canpita yonquiatënquëmaꞌ, 10Yosë nontarahuë. “Noya catahuaquëꞌ,” itërahuë. Iráca quëran huarëꞌ nicapënquëmaꞌ yapaꞌpirahuëꞌ, co nanitërahuëꞌ. Ipora huantaꞌ pacaꞌhuasoꞌ yonquiarahuë. “Quëma nohuantohuatan, Sinioro, catahuaco onpopiontaꞌ paꞌi,” tënahuë, Yosë nontato. 11Yaniꞌnanquëmaꞌ. Yacatahuaranquëmaꞌ chiníquën cancantamaso marëꞌ. Ina quëran noya noya imasaramaꞌ. 12Canpitantaꞌ noya imapatamaꞌ, achinicancanaramaco cantaꞌ. Noya ninontatëhuaꞌ, noya noya cancantarihuaꞌ.
13Tëhuënchachin iyaroꞌsaꞌ, iráca quëran huarëꞌ nicapënquëmaꞌ yapaꞌpirahuëꞌ. Ipora huantaꞌ co nanitërahuëꞌ pacaꞌhuasoꞌ. Nisha nisha parti aꞌchinpatëra, piyapiꞌsaꞌ natëtonaꞌ, Quisocristo imasapi. Canpitantaꞌ yaaꞌchintëranquëmaꞌ noya noya imacamaso marëꞌ. 14Yaꞌipi piyapiꞌsaꞌ pënënaꞌhuasoꞌ yaꞌhuërin. Quisocristo shaꞌhuitërinco. “Huaꞌanoꞌsaꞌ, topinan piyapiꞌsaꞌ, yaꞌipi nananquë nonpisopita aꞌchintëquëꞌ. Quirica nitotoroꞌsaꞌ, co nitotoroꞌsahuëꞌ, yaꞌipiya pënënquëꞌ,” itërinco. 15Napoaton canpitantaꞌ yaaꞌchintëranquëmaꞌ. Nomaquë yaꞌhuëramasopitantaꞌ Quisocristo nanamën aꞌchinchinquëmaꞌ tënahuë.
Quisocristo nanamën
16Co casoꞌ tapanahuëꞌ Quisocristo nanamën aꞌchinaꞌhuaso marëꞌ. Piyapiꞌsaꞌ natëhuachinaꞌ, Yosëri anoyacancantarin. Inaíchin nanitaparin nichaꞌëinpoasoꞌ. Cotioroꞌsariꞌton natëhuachinaꞌ, anoyacancantarin. Iporasoꞌ nisha nisha piyapiꞌsantaꞌ anoyacancantarin. Napoaton paꞌyatërahuë nanamën shaꞌhuicaꞌhuasoꞌ. 17“Yosëíchin anoyacancantërinpoaꞌ,” topatëhuaꞌ, Yosë noya niꞌsarinpoaꞌ. Oshanënpoaꞌ inquitatonpoaꞌ, co huachi inapita yonquiarinhuëꞌ. Quiricanën quëran ina anitotërinpoaꞌ. “Cancanënpoa quëran huarëꞌ Yosë natëhuatëhuaꞌ, noya niꞌsarinpoaꞌ niꞌton, noya nanpimiatarihuaꞌ,” tënin Yosë quiricanënquë. Co canpoara nanitërëhuahuëꞌ noya cancantacasoꞌ.
Iráca quëran huarëꞌ oshahuanpisoꞌ
18Yosë inápaquë yaꞌhuaponahuëꞌ, cancanënpoa quëran anitotërinpoaꞌ. “Piyapiꞌsaꞌ co noyahuëꞌ nipi. Co ca pochin cancantopihuëꞌ. Ina marëꞌ noꞌhuito, anaꞌintarahuë huachi,” tënin Yosë. Noꞌtën nanan nitotaponaraihuëꞌ, co nohuantopihuëꞌ natëcaisoꞌ. 19Cancanëna quëran Yosë nohuitochinachin acopirinhuëꞌ, co yanohuitopihuëꞌ. 20Isoroꞌpaꞌ ninin quëran huarëꞌ piyapiꞌsaꞌ nitotopi. Yosësoꞌ co quënanpirëhuahuëꞌ, nani maꞌsha ninin. Ina nicatonaꞌ, “Tëhuënchachin Yosë yaꞌhuërin. Yaꞌipiya nanitaparin niꞌton, ina chinotahuaꞌ,” taꞌcaso nipirinhuëꞌ, co nohuantopihuëꞌ. Napoaton naꞌinpi. 21Yosë yaꞌhuërinsoꞌ nitotaponaraihuëꞌ, co ina chinotopihuëꞌ. Ina nohuanton, nani maꞌsha yaꞌhuëtopirinahuëꞌ, co ina marëꞌ “Yosparinquën Sinioro,” co itopihuëꞌ. Nisha nisha yonquiatonaꞌ, chihuërinso pochin nipi. Tashi pochin cancantopi. 22“Yaꞌipiya nitotërai,” topirinahuëꞌ, co noya yonquipihuëꞌ. 23Yosësoꞌ noyasáchin ninin. Co onporontaꞌ chiminaponhuëꞌ. Inaso nipirinhuëꞌ, co ina yonquipihuëꞌ. Ina naniantatonaꞌ, mamanshi nipi moshacaiso marëꞌ. Mamanshi piyapi nonanpisoꞌ moshapi. Co piyapi yaꞌhuëmiatopirinhuëꞌ, ina yamoshapi. Nisha nisha maꞌsharoꞌsantaꞌ moshapi. Aꞌnaquën anpiantëhuanoꞌsaꞌ, aꞌnaquën noꞌpaquë niohuaratërinsopita, inapita moshapi.
24Napoaton Yosëri tananpitërin co noyahuëꞌ yonquipisopita nicacaiso marëꞌ. Aꞌporin. Aꞌpohuachina, paꞌpi co noyahuëꞌ nipi. Taparosáchin yonquiatonaꞌ, nisëꞌhuapi. Co ina pochin nisëꞌhuacasohuëꞌ nipirinhuëꞌ. 25Yosëri noꞌtëquën anitotopirinhuëꞌ, ina aꞌporahuatonaꞌ, nonpin nanan natëpi. Maꞌsha isoroꞌpaquë yaꞌhuërinsopita moshatonaꞌ, chinotopi. Yosëriáchin yaꞌipiya ninin nipirinhuëꞌ, co inasoꞌ chinotopihuëꞌ. Tëhuënchachin inasáchin chinotacasoꞌ yaꞌhuërin, tënahuë. Amen.
26Napoaton Yosëri tananpitërin paꞌpi co noyahuëꞌ cancantacaiso marëꞌ. Sanapiꞌsaꞌ co huachi soꞌinaꞌ nohuantopihuëꞌ. Sanapi capini nisëꞌhuacaisoꞌ nohuantopi. Co ina pochin nicacasohuëꞌ nipirinhuëꞌ. 27Quëmapiꞌsantaꞌ co huachi saꞌinaꞌ nohuantopihuëꞌ. Quëmapi capini nisëꞌhuapi. Ina marëꞌ naꞌinpi niꞌton, Yosëri anaꞌintarin. Co noꞌtëquën yonquiatonaraihuëꞌ, nitapicancanpi. Nonënantaꞌ tapipi.
28Co Yosë yanatëpihuëꞌ niꞌton, inari aꞌporin co noyahuëꞌ nicacaiso marëꞌ. Nitapicancamiatopi. 29Paꞌpi co noyahuëꞌ nipi. Nimonshitacaisoráchin yonquipi. Naꞌcon oshahuanpi. Aꞌna piyapi maꞌshanënpita nohuantapapi. Piyapi chinotopi. Niapiratopi. Aꞌnaquën tëpatopi. Ninoꞌhuipi. Nonpinápi. Noꞌhuitápi. Aꞌnapita nonpinapipi. 30Nipinopi. Yosë inimicotopi. Maꞌtona maꞌtona nonpi. “Casoꞌ noya noyaco,” taꞌtonaꞌ, aꞌnapita nocanpi. Yonquirápi co noyahuëꞌ nicacaiso marëꞌ. Paꞌpinaꞌ, aꞌshinaꞌ, co inapita tërantaꞌ natëpihuëꞌ. 31Co huachi noya yonquipihuëꞌ. Nonpinápi. Co quëmopinënpita tërantaꞌ nosoropihuëꞌ. Noꞌhuitochinachin cancantopi. 32“Co noyahuëꞌ nipisopita chiminpachinara, anaꞌintacasoꞌ yaꞌhuërin,” tënin Yosë. Ina nitotaponaraihuëꞌ, inachachin niantapi. Naporahuatonaꞌ, aꞌnapitantaꞌ co noyahuëꞌ nipachinara, paꞌyatopi.
Currently Selected:
Romanos 1: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.