Juan 9
9
Somaraya anoyatërinsoꞌ
1Quisoso paꞌsahuaton, aꞌna quëmapi quënanconin, somaraya nininsoꞌ. Huaꞌhuatërin quëran huarëꞌ co mantaꞌ niꞌtërinhuëꞌ. 2Caꞌtanoꞌsanënpitacoi imarai niꞌton, quiyantaꞌ niꞌnai.
—¿Onpoatontaꞌ Maistro iso quëmapi somaraya nasitërin? ¿Inaora oshanën marëꞌ nica? ¿Aꞌshin, paꞌpin, inapita oshanëna marëꞌ nica? Shaꞌhuitocoi nitochii, itërai.
3—Co inso oshanën marëꞌ ina pochin nasitërinhuëꞌ. Yosë nohuanton, ina pochin huaꞌhuatërin. Anoyatacaso marëꞌ naporin. Piyapiꞌsaꞌ niꞌpachinaꞌ, naꞌcon naꞌcon Yosë yonquiapi. “Ma noyacha Yosësoꞌ nanitaparin paya,” tosapi. 4Ipora chachin catahuarahuë. Yosë natëto, ina marëꞌ sacatarahuë. Co huaꞌquiꞌ isoroꞌpaquë yaꞌhuarëhuahuëꞌ. Aꞌna tahuëriáchin pochin yaꞌhuërëhuaꞌ. Shiarahuaton tashihuachin, co huachi nanitarihuahuëꞌ maꞌsha nicacasoꞌ. 5Isoroꞌpaquë yaꞌhuasoco, aꞌpintërinso pochin yaꞌipi piyapiꞌsaꞌ noꞌtëquën anitotërahuë, itërincoi.
6Ina quëran noꞌpaquë ipirahuaton, ashipirotërin. Ina quëran ina masahuaton, somaraya pashirayatërin.
7—Paaton Siroiquë nipaꞌmorayaquëꞌ, itërin. Siroisoꞌ: “Aꞌparinsoꞌ,” tapon naporin.
Itohuachina, paꞌnin. Inaquë nipaꞌmorayahuachina, noya niꞌtërin. Noya niꞌtahuaton, yaꞌhuërinꞌpaꞌ paꞌnin huachi. 8Yaꞌcariya yaꞌhuëpisopitari quënanahuatonaꞌ, paꞌyanpi. Nani huaꞌquiꞌ huënsëaton, coriqui maꞌpatërin. Somaraya niꞌton, topinan quëtopi. Napoaton naꞌa piyapiꞌsari nohuitopi. Inapitari quënanahuatonaꞌ, ninontopi.
—¿Isona quëmapi iꞌhua coriqui maꞌpatërinsoꞌ ti? nitopi.
9—Ina mini, tënin aꞌnaquën.
—Ina pochin yaꞌnopirinhuëꞌ co inahuëꞌ topiraihuëꞌ, topi aꞌnaquëontaꞌ.
—Ca mini, co nishacohuëꞌ, tënin quëmapisoꞌ.
10—¿Onporahuatontaꞌ iporasoꞌ noya niꞌtëran? itopi.
11—Aꞌna quëmapi Quisoso itopisoꞌ noꞌpa ipitahuaton, shipiroꞌ ninin quëran, pashirayatërinco. Ina quëran shaꞌhuitërinco: “Paaton Siroiquë nipaꞌmorayaquëꞌ,” itërinco. Inaquë paꞌsahuato, nipaꞌmorayahuatëra, niꞌtërahuë, itërin.
12—¿Intohuataꞌ ipora inasoꞌ? itopi.
—Ahuën. Co casoꞌ nitotërahuëꞌ, tënin.
Huaꞌanoꞌsari natanpisoꞌ
13Napohuachina, Parisioroꞌsataquë quëpapi. 14Chinoto tahuëri nipirinhuëꞌ Quisosori noꞌpa ipitahuaton, shipiro nininquë pashirayatahuaton, anoyarayatërin niꞌton, inaquë quëpapi. 15Parisioroꞌsari quënanahuatonaꞌ, itopi:
—¿Onpotahuatënquëntaꞌ anoyarayatërinquën? itopi.
—Shipiroquë pashirayatërinco. Nipaꞌmorayarahuatëra, noya niꞌtërahuë, itërin.
16—Niꞌquëchi. Chinoto tahuëri nipirinhuëꞌ, co Quisoso chinotërinhuëꞌ. Napoaton co Yosë quëran oꞌmarinhuëꞌ, topi aꞌnaquën.
—¿Onporahuatontaꞌ nipachin nanitërin somaraya aꞌnaroáchin anoyatacasoꞌ? Oshahuan naporini, co nanitapaitonhuëꞌ, topi aꞌnaquëontaꞌ. Nisha nisha yonquipi. 17Napoaton quëmapi itantaponaꞌ:
—Nani anoyarayatërinquën niꞌquëhuarëꞌ, ¿maꞌtaꞌ quëma yonquiran? itopi.
—Yosëri acorin pënëntacaso marëꞌ tënahuë, itërin.
18Huaꞌanoꞌsaso nipirinhuëꞌ co natëpihuëꞌ. “Iso quëmapi co somaraya huaꞌhuataponahuëꞌ, nonpiámara,” topi. Napoaton aꞌshin, paꞌpin, inapita amatopi natanacaiso marëꞌ. 19-20Huëꞌpachinara, natanpi:
—¿Isoꞌ huiꞌnan, somaraya huaꞌhuatërinsoꞌ? itopi. Itohuachinara:
—Ina mini huiꞌnahuë. Somaraya huaꞌhuatërin, itërin.
—¿Onporahuatontaꞌ iporasoꞌ noya niꞌtërin? itopi.
21—Co quiyasoꞌ nitotëraihuëꞌ. ¿Incarisoꞌ anoyarayatomara? Nani mashotërin. Ina natancoꞌ shaꞌhuichinquëmaꞌ, tënin paꞌpin.
22Cotio huaꞌanoꞌsaꞌ tëꞌhuataton, napotërin. Iꞌhua chachin huaꞌanoꞌsa capini ninontopi Quisoso imarinsopita anaꞌintacaiso marëꞌ. “Quisososoꞌ Cristo chachin,” topachinaꞌ, ocoiaꞌahuaꞌ. Ocoihuatëhuaꞌ, co huachi nanitapihuëꞌ niyontonpiso pëiquë huëcacaisoꞌ, nitopi. 23Napoaton: “Nani mashotërin. Ina natancoꞌ,” itërin paꞌpini.
24Ina quëran huiꞌnin amatantapi.
—Yosë niꞌsarinquën niꞌquëhuarëꞌ, noꞌtëquën shaꞌhuitocoi. Quisososoꞌ co noyahuëꞌ niꞌton, oshahuanin, tënai, itopi.
25—Ahuën. Oshahuamara. Co ina nitotërahuëꞌ. Nipirinhuëꞌ, anoyarayatërinco. Iꞌhua co mantaꞌ quënantopirahuëꞌ, nani noya niꞌtërahuë. Inaíchin nitotërahuë, itërin.
26—¿Maꞌtaꞌ onpotahuatënquën, anoyarayatërinquën? itaantapi.
27—Nani shaꞌhuitopiranquëmahuëꞌ, co yanatëramacohuëꞌ. ¿Onpoatomataꞌ naquëranchin yanatantaramaco? ¿Canpitantaꞌ Quisoso yaimaramaꞌ ti? itërin.
28Napohuachina, chiníquën noꞌhuipi.
—Quëmari imasaran. Co quiyasoꞌ nohuantëraihuëꞌ. Moisësë imarai. 29Yosëri iráca Moisësë nontërin. Quisososo nipirinhuëꞌ intohua quëransoꞌ huëꞌmara. Co nitotëraihuëꞌ, itopi.
30—¡Maꞌpitacha tënama paya! Intohuaransona huëꞌninso canpitaso co nitotopiramahuëꞌ, casoꞌ anoyarayatërinco. 31Oshahuanoꞌsari Yosë nontohuachina, co natanatonhuëꞌ, co catahuarinhuëꞌ. Nipirinhuëꞌ, Yosë chinotohuatëhuaꞌ, noya natëhuatëhuaꞌ, natanarinpoaꞌ. Ina nitotërëhuaꞌ. 32Somaraya huaꞌhuatohuachina, co onporontaꞌ anoyarayatochinpihuëꞌ. 33Co Yosë quëran oꞌmarinhuëꞌ naporini, co anoyarayachitoncohuëꞌ, tënahuë, itërin.
34—Quëmasoꞌ huaꞌhuatapon quëran huarëꞌ oshahuanaponahuëꞌ, ¿yaaꞌchintërancoi ti? itopi. Ina quëran ocoirahuatonaꞌ, aꞌpapi huachi.
Somaraya pochin nipisoꞌ
35Huaꞌanoꞌsari ocoirinsoꞌ natantahuaton, Quisoso paꞌnin yonípon. Quënanconahuaton, itërin:
—Quëmapi Yosë quëran oꞌmarinsoꞌ ¿natëran ti? itërin.
36—¿Intaꞌ Sinioro inasoꞌ? Yanatëpirahuëꞌ, itërin.
37—Nani niꞌnanco. Ca mini, nontaranquënsoꞌ, itërin.
38—Natëranquën Sinioro, itahuaton, isonin quëran Quisoso chinotërin. 39Napotohuachina, Quisosori itërin:
—Isoroꞌpaquë oꞌmarahuë piyapiꞌsaꞌ noꞌtëquën shaꞌhuitaꞌhuaso marëꞌ. Somarayaroꞌsa nipisopita anoyarayatarahuë. Napoaponahuëꞌ: “Quiyaso noya niꞌtërai topisopitasoꞌ, asomarayatë pochin nitarahuë,” itërin.
40Aꞌnaquën parisioroꞌsaꞌ inaquë huanirahuatonaꞌ, Quisoso natanapi.
—¿Napoahuarë quiyanta somarayacoi? itopi.
41—Somarayanquëma naporini, co oshahuaintomahuëꞌ. Nipirinhuëꞌ, “co quiyaso somarayacoihuëꞌ,” tënamaso marëꞌ oshahuanamaꞌ. Ina marëꞌ Yosë anaꞌintarinquëmaꞌ, itërin.
Currently Selected:
Juan 9: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.