Juan 10
10
Ohuicaroꞌsa pochin nininsoꞌ
1Ina quëran Quisosori aꞌchintaantarin.
—Ohuicaroꞌsa naporin quëran aꞌchinchinquëmaꞌ natancoꞌ. Ohuicaroꞌsaꞌ aꞌpaicaiso marëꞌ pairapipi. Aꞌnaíchin yaꞌcoana yaꞌhuërin. Aꞌnaquën huëcaton, co yaꞌcoana quëran yaꞌconinhuëꞌ. Nanpërahuaton, yaꞌconin. Inasoꞌ co huaꞌanënhuëꞌ. Ihuatëꞌ, matararo, inapita ina pochin yaꞌconpi ohuica ihuatacaiso marëꞌ. 2Huaꞌanënso nipirinhuëꞌ yaꞌcoana quëran yaꞌconahuaton, ohuicanënpita aꞌpairin. 3Ina huëꞌpachina, yaꞌcoana aꞌpainaꞌpiri nohuitaton, iꞌsoatërin. Ohuicanënpitarintaꞌ natanahuatonaꞌ, nohuianantopi. Aꞌnaya aꞌnaya nininën përapachina, co tëꞌhuatatonahuëꞌ, aꞌnaroáchin huëꞌpi. Huëꞌpachinara, quëparin panpatëroꞌ capacaiso marëꞌ. 4Ohuicanënpita quëpahuachina, quëchitërarin. Noninsoꞌ nohuianantatonaꞌ, imapi huachi. 5Nisha piyapiri yaquëpahuachina, co yaimapihuëꞌ. Co noninsoꞌ nohuianantatonahuëꞌ, taꞌananpipi, itërin Quisosori.
6Iso pënënto nanan shaꞌhuitopirinhuëꞌ, co nitotopihuëꞌ.
—¿Maꞌtaꞌ tapon naporin? itopi.
Quisososoꞌ ohuica huaꞌanën pochin ninin
7Napoaton itaantarin:
—Tëhuënchachin casoꞌ yaꞌcoana pochin ninahuë. Ohuica pairapipiquë yayaꞌconpatëra, yaꞌcoana quëran yaꞌconëꞌ. 8Coꞌhuara huëꞌshatërasocohuëꞌ, naꞌa piyapiꞌsaꞌ aꞌchinpirinahuëꞌ, inapitasoꞌ ihuatëroꞌsa pochin nipi. Anishacancantacaiso marëꞌ aꞌchinpi. Imarinacosopitaso nipirinhuëꞌ, co inapita natëpihuëꞌ. 9Casáchin yaꞌcoana pochin ninahuë. Ca quëran yaꞌconpatamaꞌ, chaꞌësaramaꞌ. Ohuicaroꞌsaꞌ pipirahuatonaꞌ, noya coshatopi. Ina quëran yaꞌcoantapi. Inapochachin imarinacosopita noya paꞌsapi.
10Ihuatëroꞌsaꞌ co noyahuëꞌ yonquipi. Ihuatacaisoꞌ, tëpatacaisoꞌ, ataꞌhuantacaiso inapita nicacaisoráchin yonquipi. Caso nipirinhuëꞌ oꞌmarahuë imarinacosopita Yosë nohuitacaiso marëꞌ. Noya noya nanpicaiso marëꞌ oꞌmarahuë. 11Casoꞌ ohuica huaꞌanën pochin ninahuë. Imarinacosopita noya aꞌpairahuë. Huaꞌanën noya nipachina, ohuicanënpita aꞌpaiton, co chiminacasoꞌ tëꞌhuatërinhuëꞌ. Inapochachin cantaꞌ imarinacosopita marëꞌ chiminarahuë. 12Inpriatoso nipirinhuëꞌ, paꞌpiniꞌ huëꞌpachina, ohuicaroꞌsaꞌ taꞌananpirin. Paꞌpiniri aꞌnaraꞌ macasoꞌ, yaꞌipi ohuicaroꞌsaꞌ yanquëëpi. Inpriatosoꞌ co huaꞌanënhuëꞌ niꞌton, co ohuicaroꞌsaꞌ paꞌpoyatërinhuëꞌ. 13Canacaso marëáchin sacatërin niꞌton, co inapita yonquiatonhuëꞌ, taꞌananpirin.
14Caso nipirinhuëꞌ noya huaꞌanën pochin ninahuë. Imarinacosopita nohuitërahuë. Cantaꞌ nohuitërinaco. 15Tatahuërëꞌco ninohuitëraiso pochin nohuitërahuë. Nosoroato, inapita marëꞌ chiminarahuë. 16Aꞌnapita piyapiꞌsantaꞌ oshaquëran imasarinaco. Nisha piyapiroꞌsaꞌ niponaraihuëꞌ, yaimarinaco. Inapitantaꞌ nohuantërahuë imainacoso marëꞌ. Aꞌchintacasoꞌ yaꞌhuërin. Nanamëhuë natanpachinaꞌ, natëarinaco. Yaꞌipi imarinacosopita aꞌna huëntoínchin nisapi. Carisachin huaꞌanëntarahuë.
17Imarinacosopita yonquiato, casoꞌ chiminarahuë noya noya nanpiantaꞌhuaso marëꞌ. Napoaton Tatahuë nosororinco. 18Caora nohuanto, imarinacosopita marëꞌ chiminarahuë. Co nohuantërahuëꞌ naporini, co tëpainacosoꞌ nanichitonahuëꞌ. Tatahuë shaꞌhuitërinco niꞌton, chiminaꞌhuasoꞌ nohuantërahuë. Ina nohuanton, nanpiantararahuë huachi, itërin.
19Ina natanahuatonaꞌ, cotioroꞌsaꞌ nisha nisha yonquipi.
20—Sopairi nani yaꞌcoancantërin niꞌton, huaꞌyantërin. ¿Maꞌmarëta natanamaꞌ? topi aꞌnaquën.
21Aꞌnaquëniso nipirinhuëꞌ noya natanpi.
—Co sopairi yaꞌcoancantërinhuëꞌ. Noya aꞌchintërinpoaꞌ. Huaꞌyantonaꞌpisoꞌ co ina pochin noninhuëꞌ. ¿Sopaintaꞌ taꞌmaꞌ somaraya anoyarayatacasoꞌ nanichitonhuëꞌ ti? topi.
Cotioroꞌsaꞌ co Quisoso nohuantopisohuëꞌ
22Ina quëran aꞌna cotio niyontonpiso tahuëri naniantarin. Naporoꞌ Yosë chinotopisoꞌ pëiꞌ iráca anoyataantapisoꞌ yonquiatonaꞌ, “Yosparinquën Sinioro,” itopi. Ina marëꞌ naꞌa piyapiꞌsaꞌ Quirosarinquë paꞌsapi. Quisosontaꞌ Yosë chinotopisoꞌ pëiquë paꞌnin. Oꞌnapi tahuëri niꞌton, 23ishpanamën pochin nininquë paꞌsarin, inaso “ishpana, Saromon ishpananën,” itopi nohuitatonaꞌ. 24Naꞌa cotioroꞌsaꞌ canquirahuatonaꞌ, Quisoso ahuancanapipi.
—Naꞌaroꞌ natanpirainquënhuëꞌ, ¿onporo huarëtaꞌ shaꞌhuitaponcoi? Quëmasoꞌ Cristonquën nipatan, noꞌtëquën shaꞌhuitocoi nitochii, itopi.
25—Nani shaꞌhuitopiranquëmahuëꞌ, co yanatëramacohuëꞌ. “Tata Yosë chachin catahuarinco,” taꞌto, sacaiꞌ nininsoꞌ ninahuë canpita nohuitamacoso marëꞌ. 26Nipirinhuëꞌ, canpitasoꞌ co ohuicanëhuë pochin ninamahuëꞌ niꞌton, co natëramacohuëꞌ. 27Casoꞌ ohuica pëꞌtahuanaꞌpi pochin ninahuë. Imarinacosopita ohuicanëhuëpita pochin niꞌnahuë. Nohuitërahuë. Noya nataninaco. Nontohuatëra, natëtonaco, imarinaco. 28Ca nohuanto, nanpimiatapi. Co parisitopiquë paꞌsapihuëꞌ. Noya aꞌpaiarahuë. Co insontaꞌ osërëtarinacohuëꞌ. 29Tata Yosë nohuanton, imarinaco. Inasoꞌ chini chiníquën nanantërin. Co insontaꞌ nanitërinhuëꞌ Yosë quëran osërëcaisoꞌ. 30Caso Tatahuëroꞌco napopináchin cancantërahuë, itërin Quisosori.
31Ina natanahuatonaꞌ, naquëranchin naꞌpiroꞌsaꞌ maantapi. Tëpacaiso marëꞌ maantapirinahuëꞌ, 32Quisosori itaantarin:
—Tata Yosë shaꞌhuitërinco niꞌton, naꞌa piyapiꞌsaꞌ anoyatërahuë: ¿Insota anoyatërahuëso marëꞌ naꞌpiquë yatëparamaco? itërin.
33—Co ina marëꞌ naꞌpiquë yatëparainquënhuëꞌ. Yosë pinoranso marëꞌ napotarainquën. Quëmasoꞌ piyapinquën niponahuëꞌ, “Casoꞌ Yosëco,” toconan. Ina pochin nonan niꞌton, Yosë yayaꞌhuërëtëran, itopi.
34Napotohuachinara, itantarin:
—Yosë pënëntërinsoꞌ quiricaquë nani ninshitopi: “Canpitasoꞌ aꞌnaya aꞌnayanquëmaꞌ Yosë pochin ninamaꞌ,” tëninsoꞌ nontëramaꞌ. 35Yosëri chachin huaꞌanoꞌsaꞌ acorinsoꞌ yonquiaton, napotërin. Yaꞌipi Yosë quiricanënsoꞌ noꞌtëquën. Co piꞌpisha tërantaꞌ nonpininhuëꞌ. 36Tata Yosë chachin acorinco nanamën aꞌchinaꞌhuaso marëꞌ. Ina marëꞌ isoroꞌpaquë aꞌpaimarinco. “Casoꞌ Yosë huiꞌninco,” topatëra, ¿onpoatontaꞌ ina marëꞌ pinoramaco? tënahuë. 37Co tatahuë pochin nipatohuëꞌ, ama natëcosohuëꞌ 38Co yanatëpiramacohuëꞌ, nani maꞌsha Yosë pochin ninahuë niꞌton, natëco. Ina quëran nitotarama Tata Yosë pochachin ninahuësoꞌ. Tata Yosëntaꞌ ca pochachin ninin, itërin.
39Ina natanahuatonaꞌ, naquëranchin tashinan pëiquë poꞌmocaiso marëꞌ yamaantapirinahuëꞌ, chaꞌërin.
40Ina quëran Cortaniiꞌ aquëtëran paantarin. Iꞌhua Coansha piyapiꞌsaꞌ aporintërinquë yaꞌhuërarin. 41Naꞌa piyapiꞌsaꞌ ina nicaponaꞌ paꞌpi. Ina niꞌsahuatonaꞌ, ninontopi.
—Coanshasoꞌ co piyapiꞌsaꞌ aꞌnaroáchin anoyatopirinhuëꞌ, noꞌtëquën shaꞌhuitërinpoaꞌ. “Quisososoꞌ Yosëri aꞌpaimarinsoꞌ,” itohuachinpoara, noꞌtëquën nonin, nitopi. 42Naꞌa piyapiꞌsaꞌ inaquë paatonaꞌ, Quisoso natërapi.
Currently Selected:
Juan 10: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.