Juan 11
11
Nasaro chimininsoꞌ
1-2Pitaniaquë aꞌna caniaꞌpi yaꞌhuërin, Nasaro itopisoꞌ. Catoꞌ oshinpita yaꞌhuëtërin, Maria, Marta inapita itopisoꞌ. Ina Maria aꞌna tahuëri Quisoso paꞌmorantëarin. Huaꞌsaiꞌ paꞌton nininsoquë paꞌmorantërahuaton, ainën quëran amirantërarin. Coꞌhuara inapoyátërasohuëꞌ, yoꞌin chiníquën caniorin. 3Caniohuachina, oshinpitari piyapi aꞌpapi Quisoso shaꞌhuitacaso marëꞌ:
—Nosororansoꞌ Sinioro, chiníquën caniorin. Huëcaton niꞌquiquëꞌ, itërin.
4Ina natanahuaton, caꞌtanoꞌsanënpita itapon:
—Tëhuënchachin yoꞌin chiníquën canioponahuëꞌ, co chiminacaso marëꞌ caniorinhuëꞌ. Noyatohuachin, naꞌa piyapiꞌsari nicatonaꞌ, naꞌcon naꞌcon Yosë yonquiapi. “Ma noyacha Yosësoꞌ niꞌton, anoyatërin paya,” tosapi. Cantaꞌ ina huiꞌninco niꞌton, noya niꞌsarinaco. Ina marëꞌ caniorin, itërin.
5Nasaro, Marta, Maria, inapita paꞌpi nosororin. 6Napoaponahuëꞌ, Nasaro caniorinsoꞌ natantaponahuëꞌ, catoꞌ tahuëri inaquë chachin iꞌhuataantarin. 7Ina quëran caꞌtanoꞌsanënpitacoi itaponcoi:
—Huëcoꞌ iyaroꞌsaꞌ Cotia parti paantaꞌahuaꞌ, itërincoi.
8—Iꞌhuamiáchin Maistro, inaquë yaꞌhuëpisopita tëpainënquënso marëꞌ naꞌpiquë yatëꞌyarapirinënquënhuëꞌ, ¿inatohua chachin yapaantaran ti? itërai.
9Napotohuatoira, Quisoso itaponcoi:
—Shonca catoꞌ ora quëran iꞌhuarin. Tahuëri iratohuatëra, co iꞌparëhuëꞌ. Noya quënantatëꞌ, noya paꞌnëꞌ. 10Tashiso nipirinhuëꞌ iratohuatëra, iꞌparëꞌ. Capa aꞌpininsoꞌ niꞌton, iꞌparëꞌ, itërincoi.
11Ina quëran itaantarincoi:
—Iya Nasaro huëꞌërin. Nipirinhuëꞌ, paato ochinanconapo, itërincoi.
12—Huëꞌërin niꞌquëhuarëꞌ Sinioro, noyatapon, itërai.
13Topinan huëꞌërin, topiraihuëꞌ. Nani chimininsoꞌ nitotaton, naporin. 14Napoaton noꞌtëquën shaꞌhuitërincoi:
—Nasaro nani chiminin. 15Iꞌhuara aquëtëran co paatorahuëꞌ, co anoyatërahuëꞌ. Canpita naꞌcon naꞌcon natëamacoso marëꞌ isëquë ninarahuë. Inasoꞌ noya tënahuë. Iporaso nipirinhuëꞌ, huëcoꞌ inatohuaꞌ paꞌahuaꞌ, itërincoi.
16—Huëcoꞌ iyaroꞌsaꞌ paꞌahuaꞌ canpoantaꞌ inarëꞌquënpoaꞌ chiminacaso marëꞌ, itërincoi Tomasë, catopiaꞌhua nininsoꞌ.
Quisosori ananpitaantacasoꞌ yonquirinsoꞌ
17Napotohuachincoira, Pitaniaquë paꞌnai. Inaquë canconpiraihuëꞌ, nani Nasaro chiminin quënanconai. Nani catapini tahuëri naꞌpi naninquë yaꞌhuërin. 18Pitaniasoꞌ Quirosarin yaꞌcariya yaꞌhuërin. Cara quiromitro pochin aquërin. 19Naꞌa cotioroꞌsaꞌ nani huëꞌpi Marta, Maria, inapita achinicancanaponaꞌ. Yoꞌinaꞌ chimininso marëꞌ nontapi ama aquëtëꞌ sëtacaiso marëhuëꞌ. 20“Quisoso nani huëꞌsarin,” topachinara, Marta paꞌnin nacapiapon. Mariaso nipirinhuëꞌ pëinënquë yaꞌhuarin. 21Quisoso nacapirahuaton, Martari itapon:
—Iꞌhua Sinioro isëquë yaꞌhuëran naporini, co yoꞌyohuë chimiintonhuëꞌ. 22Chiminpirinhuëꞌ, natëranquën Sinioro. Maꞌsona Yosë nipatan, acotarinquën, tënahuë, itërin.
23—Yoꞌyoparin nanpiantararin, itërin Quisosori.
24—Nanpiantacaso tahuëri nanihuachin, nanpiantararin, nitotërahuë, tënin Marta.
25—Cari ananpitaantarahuë. Casáchin nanpicasoꞌ quëtërahuë. Insopitasona natëhuachinaco, chiminaponaraihuëꞌ, nanpiantarapi. 26Natërinacosopita chiminpachinaꞌ, co parisitomiatapihuëꞌ. Co onporontaꞌ taꞌhuantapihuëꞌ. Noꞌtëquën nontaranquën. ¿Natëranco ti? itërin Quisosori.
27—Natëranquën mini Sinioro. Tëhuënchachin quëmasoꞌ Cristo. Yosë huiꞌninquën. Isoroꞌpaquë aꞌpaimarinquënsoꞌ, itërin.
Quisoso naꞌnërinsoꞌ
28Ina tosahuaton, Marta paꞌnin cain shaꞌhuitapon. Canconahuaton, sacaro quëran shaꞌhuitërin.
—Nani Maistro huëꞌnin. Yanontërinquën, itërin.
29Ina natanahuaton, Maria aꞌnaroáchin huanirahuaton, nontapon paꞌnin. 30Quisososoꞌ co ninanoquë canshatërarinhuëꞌ. Martari nacapirinquë quëparitërin. 31Maria manorahuachina, cotioroꞌsaꞌ huëꞌpisopitari niꞌsapi. “Naꞌpi naninquë naꞌnëapon paꞌsamara,” taꞌtonaꞌ imapi.
32Mariasoꞌ Quisosoquë canconahuaton, nantën pirayan isonconin.
—Iꞌhua Sinioro isëquë yaꞌhuëran naporini, yoꞌyohuë co chimiintonhuëꞌ, itërin.
33Ina tosahuaton, naꞌnërárin. Cotioroꞌsantaꞌ naꞌnërápi. Ina niꞌsahuaton, Quisoso chiníquën sëtaton, co napion cancantërin. 34—¿Insëquëtaꞌ poꞌmopi? itërin.
—Huëquëꞌ Sinioro niꞌquiquëꞌ, itopi.
35Quisosontaꞌ naꞌnërin. 36Ina niꞌsahuatonaꞌ, cotioroꞌsaꞌ nitaponaꞌ:
—Niꞌcoꞌ. Naꞌnërin antaꞌ. Paꞌpi nosororin inarintaꞌ, itopi.
37—Somaraya aꞌnaroáchin anoyarayatërin niꞌquëhuarëꞌ, ¿ina nohuanton Nasaronta co chimiintonhuëꞌ nimara ti? topi aꞌnaquën.
Nasaro ananpitaantarinsoꞌ
38Quisoso sëtaton, naꞌpi naninquë Nasaro poꞌmopiquë paꞌnin. Pancaraꞌpiquë nani paꞌcopitopi.
39—Naꞌpi chiꞌhuincacoꞌ, itërin Quisosori.
—Coꞌ, Sinioro. Nani anarotarin. Nani catapini tahuëritërin, itërin oshini, Marta itopisoꞌ.
40—Ama imoya ina pochin yonquiquësohuëꞌ. Yosë yaꞌipiya nanitaparin. Natëhuatanco, Yosë nóya nininsoꞌ niꞌsaran, itërin. 41Ina quëran naꞌpi chiꞌhuincatopi. Quisoso inápaquë nëꞌpëtahuaton, Yosë nontërin:
—Nani Tata nontëranquën catahuancoso marëꞌ. Natanatonco, catahuaranco mini. Ina marëꞌ “Yosparinquën,” itëranquën. 42Nani tahuëri natanatonco, catahuaranco noya nicaꞌhuaso marëꞌ. Quëma chachin isoroꞌpaquë aꞌpaimaranco. Casoꞌ nitotopirahuëꞌ, isopitasoꞌ co nitotopihuëꞌ. Inapita natëinacoso marëꞌ aꞌninquëchin nontaranquën, tënin.
43Ina tosahuaton, chimipi chiníquën itapon:
—¡Iya Nasaro, pipirahuaton huëquëꞌ! itërin.
44Napotohuachina, chimipi nanpiantarahuaton, pipirin. Paꞌon, imirin, inapita nëꞌmëtërinquë yaꞌipi soꞌpinpinan pipirin. Yaꞌpiriontaꞌ panioquë tonporayatopinan. Cotioroꞌsaꞌ inachintopisoꞌ niꞌton, ina pochin poꞌmopi.
—Iꞌquiritocoꞌ paꞌin, itërin Quisosori. Napotohuachina, iꞌquiritopi.
Quisoso macacaiso marëꞌ chinotopisoꞌ
(Mateo 26.1-5; Marcos 14.1-2; Lucas 22.1-2)
45Cotioroꞌsaꞌ huëꞌpisopitantaꞌ niꞌpi. Ananpitaantarinsoꞌ niꞌsahuatonaꞌ, naꞌa natëpi. “Tëhuënchachin Yosëri catahuarin niꞌton, naporin,” topi. 46Aꞌnaquënso nipirinhuëꞌ paatonaꞌ, parisioroꞌsaꞌ shaꞌhuitonpi. 47Ina natanahuatonaꞌ, parisioroꞌsaꞌ, corto huaꞌanoꞌsaꞌ, inapita napopianáchin yonquiatonaꞌ, yaꞌipi cotio huaꞌanoꞌsaꞌ ayontonpi ninontacaiso marëꞌ.
—¿Maꞌtaꞌ onpotahuaꞌ? Ina quëmapi naꞌa piyapiꞌsaꞌ aꞌnaroáchin anoyatarin. Iporantaꞌ aꞌna piyapi chiminpirinhuëꞌ, ananpitaantarin. “Yosëri chachin catahuarin,” topi. 48Tananpitohuatëhuaꞌ, yaꞌipi piyapiꞌsari natërapi. Napohuachinaꞌ, Noma copirno noꞌhuitaton, sontaroꞌsaꞌ aꞌpaiarin. Huëꞌpachinaꞌ, Yosë chinotërëhuaso pëiꞌ ohuatahuatonaꞌ, yaꞌipi cotioroꞌsanpoaꞌ ataꞌhuantarinënpoaꞌ nimara, nitopi.
49Ina quëran aꞌna corto huaꞌan Caihuasë itopisoari nontërin. Naporo piꞌiquë inasoꞌ, chini chiníquën nanantërin. Inaso huanirahuaton, tapon:
—Canpitasoꞌ co mantaꞌ nitotëramahuëꞌ. 50Chiminacasoꞌ yaꞌhuërin, tënahuë. Ama yaꞌipinpoaꞌ chiminacaso marëhuëꞌ ina chimiꞌin. Ina noya noya canpoa marëꞌ, itërin.
51Napoaponahuëꞌ, co inaora yonquinën quëran naporinhuëꞌ. Corto huaꞌan niꞌton, Yosë nohuanton, ninorin. Tëhuënchachin Quisoso cotioroꞌsa marëꞌ chiminarin. 52Nipirinhuëꞌ, co cotioroꞌsa marëáchin chiminarinhuëꞌ. Yaꞌipi piyapiꞌsaꞌ yaꞌhuërënamën chiminarin. Natëhuachinaꞌ, Yosëri huiꞌninpita pochin niꞌsarin. Aꞌnaquën aquë yaꞌhuëpirinahuëꞌ, imapachinaꞌ, aꞌna huëntoíchin pochin nisapi. 53Naporo tahuëri quëran huarëꞌ cotio huaꞌanoꞌsaꞌ yonquipi Quisoso tëpacaiso marëꞌ.
54Napoaton Quisoso co huachi nohuantërinhuëꞌ aꞌninquëchin cotio ninanoroꞌsaquë paacasoꞌ. Inotëro parti pirayan paaton, Iprainquë yacapatarin. Inaquë caꞌtanoꞌsanënpitacointaꞌ yacapatonai.
55Pascoa tahuëri naniriahuachina, naꞌa piyapiꞌsaꞌ Quirosarinquë paꞌpi. Coꞌhuara Pascoa naniyátërasohuëꞌ, Yosë chinotopiso pëiquë paꞌpi. “Moisësë camaitërinsoꞌ nipatëhuaꞌ, Yosë noya niꞌsarinpoaꞌ,” taꞌtonaꞌ, paꞌpi. 56Inatohuaꞌ paꞌsahuatonaꞌ, Quisoso yonisápi. Chinotopiso pëiquë yaꞌconahuatonaꞌ, ninontápi.
—Pascoa naꞌhuëcaso marëꞌ ¿Quisoso huëcapon to? topi aꞌnaquën.
57Corto huaꞌanoꞌsaꞌ, parisioroꞌsaꞌ, inapitasoꞌ nani piyapiꞌsaꞌ shaꞌhuitopi: “Quisoso quënanpatamaꞌ, shaꞌhuitocoi maii,” itopi. Tashinan pëiquë poꞌmocaiso marëꞌ napotopi.
Currently Selected:
Juan 11: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.