Romanos 9

Yosëri israiroꞌsaꞌ huayoninsoꞌ

1Quisocristo imato, noꞌtëquën nonahuë. Co nonpinahuëꞌ. Ispirito Santo yaꞌcoancantërinco niꞌton, noꞌtëquën nontaranquëmaꞌ, tënahuë. 2Tëhuënchachin israiroꞌsaꞌ yonquiato, sëtërahuë. Cancanëhuë quëran huarëꞌ sëtárahuë. 3Inapitasoꞌ quëmopinëhuëpita. Co Quisocristo imapihuëꞌ niꞌton, anaꞌintacasoꞌ yaꞌhuërin. Nanitërahuë naporini, inapita yaꞌhuërënamën parisitopiquë paꞌitohuëꞌ. Chaꞌëcaiso marëꞌ inaquë parisichitohuëꞌ. 4Piyapinënpita nicacaiso marëꞌ Yosëri acorin. Israiro shinpita nipi. Iráca quëran huarëꞌ Yosëri nohuantërin niꞌton, huiꞌninpita pochin nicacaiso marëꞌ acorin. Huënaráchin huënaráchin aꞌpintohuachina, shimashonënpitari quënanpi. Iráca chachin piyapinënpita nicacaiso marëꞌ inapitarëꞌ anoyatërin. Naporahuaton, pënëntërinso nanan shaꞌhuitërin. Noya chinotacaiso marëntaꞌ aꞌchintërin. Naꞌcon shaꞌhuitërin nichaꞌëcaso marëꞌ. 5Shimashonënpitasoꞌ Yosëri chachin huayonin. Ina quëran Cristo isoroꞌpaquë oꞌmahuachina, Israiro sanapi quëran nasitërin. Inasoꞌ Yosë chachin. Yaꞌipiya huaꞌanëntërinpoaꞌ. ¡Ma noyacha inaso paya! tënëhuaꞌ. Amen.

6Naꞌcon nitotaponaraihuëꞌ, notohuaroꞌ israiroꞌsaꞌ co Yosë natëpihuëꞌ. Napoaponahuëꞌ, Yosëri co topinan quëran shaꞌhuitërinhuëꞌ nichaꞌëcaso marëꞌ. Co yaꞌipi israiroꞌsaꞌ piyapinënpita pochin niꞌninhuëꞌ. 7Apraan catoꞌ huiꞌninpita yaꞌhuëtopirinhuëꞌ, aꞌnaíchin Yosëri acorin Apraan yaꞌhuërëtacaso marëꞌ. “Isaco huayonahuë. Shinpitantaꞌ piyapinëhuëpita pochin niꞌsarahuë,” tënin Yosë. 8Napoaton co yaꞌipi Apraan huiꞌninpita Yosë piyapinënpita nipihuëꞌ. Yosëri shaꞌhuitërinso chachin nasitohuachina, piyapinën pochin niꞌnin. 9Iráca Yosëri Apraan itapon: “Aꞌna piꞌipi quëran nicaponquën huëantarahuë. Naporoꞌ ca nohuanto, saꞌan huaꞌhuanarin,” itërin. Naporinso chachin tahuëri nanihuachina, Isaco nasitërin, Yosëri acorinsoꞌ.

10Naporahuaton, Tata Isacontaꞌ catoꞌ huiꞌnahuanin. Saꞌin Nipica itopisoꞌ yahuaihuachina, Yosëri itapon: 11-13“Huaꞌhua nininsoꞌ chini chiníquën nanantarin. Paninansoꞌ co onpopinchin chiníquën nanantaponhuëꞌ,” itërin. Ina quëran itantarin: “Cacopo nosoroato, huayonahuë. Isaoso nipirinhuëꞌ co onpopinchin nohuantërahuëꞌ,” tënin Yosë quiricanënquë. Coꞌhuara nasichátërasoihuëꞌ, naporin. Co yaꞌhuëyátërasoihuëꞌ, yonquiaton, huayonin. “Noya nininso marëꞌ Yosëri huayonin,” topiramahuëꞌ, co ina marëꞌ huayoninhuëꞌ. Inaora nohuanton, huayonin.

14Naporin niꞌquëhuarëꞌ ¿maꞌtaꞌ tëcarihuaꞌ? “Yosësoꞌ co napopináchin niꞌninpoahuëꞌ,” ¿tëcarihua ti? ¡Co naporinhuëꞌ! 15Iráca Yosëri Moisësë itërin: “Caora nohuanto, nosororahuë. Insosona nohuantohuato, huayonahuë,” itërin. 16Napoaton co canpoara nohuanton, Yosë huëntonënquë yaꞌconëhuahuëꞌ. Noya nipirëhuahuëntaꞌ, co canpoara nanitërëhuahuëꞌ yaꞌconacasoꞌ. Inaora nohuanton, Yosë ayaꞌconinpoaꞌ. Nosoroatonpoaꞌ, ayaꞌconinpoaꞌ. 17Iráca Iquipito copirnosoꞌ co noyahuëꞌ cancantopirinhuëꞌ, Yosëri huayonin huaꞌanëntacaso marëꞌ. “Piyapinëhuëpita huaꞌanëntopiranhuëꞌ, nichaꞌësarahuë noya pipicaiso marëꞌ. Ina quëran naꞌa piyapiꞌsaꞌ nicatonaꞌ, ‘Ma noyacha Yosësoꞌ nanitaparin paya. Copirno co nohuantopirinhuëꞌ, piyapinënpita nichaꞌërin,’ tosapi,” tënin. Quiricanën quëran shaꞌhuitërinpoaꞌ. 18Inaora nohuanton, aꞌnaquën nosororin. Aꞌnaquënso nipirinhuëꞌ tananpitërin. Tananpitohuachina, co natantochináchinhuëꞌ cancantopi.

19Ina natanatomaꞌ, aꞌnaquëmaꞌ co noyahuëꞌ yonquiramaꞌ: “Yosë nohuanton, aꞌnaquën natëpi. Co yaꞌipiya natëpihuëꞌ. Maꞌsona Yosë nohuantërinsoichin nipirëhuahuëꞌ. ¿Onpoatontaꞌ nipachin anaꞌintarinpoaꞌ? ¡Co insontaꞌ nanitërinhuëꞌ Yosë nohuantërinsoꞌ canpiacasoꞌ!” toconamaꞌ. 20¿Maquëma cháchintaꞌ niꞌtomaꞌ, nanitëramaꞌ Yosë chachin pinocamasoꞌ? Niꞌcoꞌ. Piyapi tëshitohuachina, minëꞌ, huëꞌëta, inapita ninin. Nipachina, co tëshiri huaꞌanën noꞌhuirinhuëꞌ. “¿Onpoatontaꞌ naponin ninanco?” co itërinhuëꞌ. 21¡Coꞌta tëshitonaꞌpi noꞌpaꞌ mapachina, maꞌsona nohuantohuachina, ninin! Nohuantohuachina, aꞌnaquën ninshirayarin. Aꞌnaquënsoꞌ topinanaya. Inapochachin Yosësoꞌ yonquirinpoaꞌ.

22Aꞌnaquën co natëpihuëꞌ niꞌton, Yosëri noꞌhuirin. Noꞌhuipiroꞌ nipirinhuëꞌ, co aꞌnaroáchin anaꞌintërinhuëꞌ, ninararin. Co aꞌnaroáchin anaꞌintohuachinahuëꞌ, co ina marëꞌ Yosë noꞌhuicasoꞌ yaꞌhuërinhuëꞌ. Oshaquëran anaꞌintarin. Ina niꞌpachinaꞌ, “Tëhuënchachin Yosë noꞌtëquën yonquirin. Huaꞌquiꞌ tananpitopirinhuëꞌ, iporasoꞌ noꞌtëquën anaꞌintërin. Chini chiníquën nanantërin inasoꞌ,” tosapi. 23Aꞌnaquënpoaso nipirinhuëꞌ, nosoroatonpoaꞌ nichaꞌësarinpoaꞌ. Inaora nohuanton, nosororinpoaꞌ. Iráca chachin yonquirinpoaꞌ nichaꞌëinpoaso marëꞌ. Anoyacancantohuachinpoaꞌ, piyapiꞌsaꞌ naꞌcon Yosë yonquiapi. “Ma noyacha catahuarin paya,” tosapi. 24Aꞌnaquën cotio piyapiꞌsacoi huayonincoi. Aꞌnaquëmaꞌ nisha piyapiꞌsanquëmantaꞌ Yosë nohuanton, imaramaꞌ canpitantaꞌ. 25Inapochachin iráca Osiasë ninshitërin.

“Aꞌnaquën iráca co piyapinëhuëpitahuëꞌ nipirinahuëꞌ, iporasoꞌ piyapinëhuëpita pochin niꞌnahuë.

Iráca co nosoropirahuëꞌ, iporasoꞌ nosororahuë huachi,” tënin Yosë, itërin.

26Ina quëran itantarin: “Canpitasoꞌ co piyapinëhuëpitanquëmahuëꞌ,” itopirinhuëꞌ,

iporasoꞌ inaquë itaponaꞌ: “Inapitasoꞌ Yosë huiꞌninpita chachin nisapi. Inasoꞌ nanpimiatarin,” tosapi.

27Isaiasëntaꞌ ninoton, ninshitërin. “Huaꞌhuayatërahuëꞌ israiroꞌsaꞌ yaꞌhuëpirinahuëꞌ, co yaꞌipiya chaꞌësapihuëꞌ. Marë yonsanquë inotëraꞌhuaya yaꞌhuërinso nápoꞌ yaꞌhuëpirinahuëꞌ, caraíchin Yosëri nichaꞌësarin. 28Co huaꞌquiya quëranhuëꞌ naꞌa piyapiꞌsaꞌ noꞌtëquën anaꞌintarin,” tënin. 29Coꞌhuara ina ninshichatërasohuëꞌ, Isaiasë ninoton, tapon:

“Sinioro yaꞌipinpoaꞌ huaꞌanëntërinpoaꞌ. Iráca ina nohuanton, yaꞌipi Sotomaquë yaꞌhuëpisopita taꞌhuantopi huachi. Comoraquë yaꞌhuëpisopitantaꞌ taꞌhuantopi.

Canpoantaꞌ caraíchin nipirëhuahuëꞌ nosoroatonpoaꞌ, nichaꞌërinpoaꞌ. Co nosororinpoahuëꞌ naporini, canpoantaꞌ yaꞌipinpoaꞌ taꞌhuanchitërihuahuëꞌ,” tënin.

Israiroꞌsantaꞌ noya nanan natëcasoꞌ yaꞌhuërinsoꞌ

30Napoahuarëꞌ ¿maꞌtaꞌ tëcarihuaꞌ? tënahuë yonquiato. Nisha piyapiꞌsaꞌ huaꞌquiꞌ co Yosë yonquipirinahuëꞌ, inari anoyacancantërin. “Yosë noꞌtëquën nonin,” taꞌtonaꞌ natëpi. Napoaton noya niꞌnin. 31Israiroꞌsaso nipirinhuëꞌ taponaꞌ: “Moisësë pënëntërinsoꞌ natëhuatëhuaꞌ, Yosë noya niꞌsarinpoaꞌ,” topirinahuëꞌ. Co nanitopihuëꞌ noꞌtëquën natëcaisoꞌ niꞌton, co Yosëri noya niꞌninhuëꞌ. 32¿Onpoatontaꞌ co noya niꞌninhuëꞌ? “Pënëntërinsoꞌ nanan noꞌtëquën natëhuatëhuaꞌ, nóya cancantarëhuaꞌ,” topirinahuëꞌ, co nanitopihuëꞌ. “Yosëíchin nanitërin anoyacancantinpoasoꞌ,” taꞌcaiso nipirinhuëꞌ, co Quisocristo nohuantopihuëꞌ. Inapoatonaꞌ, pancaraꞌpi iꞌpatërëso pochin niꞌpi. Ina marëꞌ Yosëri co noyahuëꞌ niꞌnin. 33Yosë quiricanën quëran naporin:

“Sionquë Cristo aꞌpapirahuëꞌ, co nohuantopihuëꞌ.

Inapoatonaꞌ pancaraꞌpiquë iꞌparëso pochin niꞌpi. Co nohuantopihuëꞌ niꞌton, anotërëso pochin nipi.

Nipirinhuëꞌ, insosona Cristo nohuantohuachin, co onporontaꞌ atapanarahuëꞌ. Noya niꞌsarahuë huachi,” tënin Yosë.

Currently Selected:

Romanos 9: cbt

Highlight

Copy

Compare