Romanos 4

Apraan natëtërinsoꞌ

1Apraan naporinsoꞌ shaꞌhuichinquëmaꞌ. Inasoꞌ shimashonënpoaꞌ. ¿Onporahuatontaꞌ Yosëri noya niꞌnin? 2Apraan inaora co nanitërinhuëꞌ noꞌtëquën Yosë natëcasoꞌ. Inaora nanitërin naporini, “Casoꞌ noyaco. Noꞌtëquën natërahuë,” chitonhuëꞌ. Napoaponahuëꞌ, co ina pochin Yosëri niꞌninhuëꞌ. 3Yosë quiricanënquë naporin: “ ‘Yosë noꞌtëquën nontërinco. Inasáchin catahuarinco,’ topachina, Yosëri noya niꞌnin. Oshanën inquitaton, noya niꞌnin,” tënin quiricanënquë. 4Niꞌcoꞌ. Piyapiꞌsaꞌ sacatohuachinara, pahuërëcasoꞌ yaꞌhuërin. Inapochachin noꞌtëquën natërëhuaꞌ naporini, Yosë noya nicainpoasoꞌ yaꞌhuëꞌitonhuëꞌ. 5Yosëso nipirinhuëꞌ, inaora nohuanton nosororinpoaꞌ. “Co caora noya nipirahuëꞌ, Yosë chachin anoyacancantarinco,” topatëhuaꞌ, oshanënpoaꞌ inquitatonpoaꞌ noya niꞌninpoaꞌ. 6Co noyahuëꞌ nipirëhuahuëꞌ, inaora nohuanton, Yosë anoyacancantërinpoaꞌ niꞌton, noya niꞌninpoaꞌ. Ina marëꞌ nóya cancantërëhuaꞌ. Iráca Tapi inachachin naporin. 7Quiricanënquë ninshitërin:

“Oshanënpoaꞌ Yosë inquitohuachinpoaꞌ, noya cancantarihuaꞌ. Yaꞌipi oshanënpoaꞌ ayatarinpoaꞌ.

8¡Co huachi oshanënpoa marëꞌ anaꞌintarinpoahuëꞌ!

Napoaton noya cancantarihuaꞌ,” tënin.

9¿Inpitataꞌ ina pochin noya cancantapi? Co cotioroꞌsaráchin ina pochin noya cancantacasoꞌ yaꞌhuëtopihuëꞌ. Co marca niacotopirinahuëntaꞌ noya cancantapi. Apraan yonquicoꞌ. “Yosë noꞌtëquën nontërinco. Inasáchin catahuarinco,” topachina, Yosëri noya niꞌnin. Nani shaꞌhuitëranquëmaꞌ. 10¿Onporotaꞌ noya niꞌnin? ¿Marca niacotërin piquëran noya niꞌnin? Co naporoꞌ naporinhuëꞌ. Coꞌhuara marca niacochatërasohuëꞌ, noya niꞌnin. 11Yosë natërin niꞌton, inari noya niꞌnin. Coꞌhuara marca niacochatërasohuëꞌ, piyapinën pochachin niꞌnin. Ina piquëran marca niacotërin imarinsoꞌ anitotacaso marëꞌ. “Noꞌtëquën nontërinco,” topachina, noya niꞌnin. Nisha piyapiꞌsantaꞌ ina pochachin natëtohuachinara, Apraan pochin cancantopi. Co marca niacotopirinahuëꞌ, Apraan huiꞌninpita pochin nipi. 12Cotioroꞌsantaꞌ Apraan pochin natëtohuachinara, huiꞌninpita pochin nipi antaꞌ. Co marca niacotopiso marëꞌ noya cancantopihuëꞌ. Coꞌhuara marca niacochatërasohuëꞌ, Apraansoꞌ natëtërin. Aꞌnapitantaꞌ ina pochin cancantohuachinara, Yosëri noya niꞌsarin.

Yosëri Apraan shaꞌhuitërinsoꞌ

13Iráca Yosëri Apraan itapon: “Nosoroatënquën, páncaroꞌpaꞌ quëchinquën. Piyapinëhuë pochin niꞌsaranquën. Quëma shinparinpitantaꞌ noya catahuaarahuë. Aꞌna tahuëri yaꞌipiroꞌpaꞌ huaꞌanëntaponaꞌ,” itërin. “Yosë co onporontaꞌ nonpintarincohuëꞌ,” tëninso marëꞌ Yosëri noya niꞌnin. Co naporoꞌ Moisësë pënënchátërarinhuëꞌ. Napoaton co ina natërinso marëꞌ Apraan noya niꞌninhuëꞌ. 14Pënëntërinsoꞌ natëpisopitaráchin noya niꞌnin naporini, topinan cancanënpoa quëran natërëhuasopitasoꞌ co noya nicainpoasoꞌ yaꞌhuëꞌitonhuëꞌ. Topinan quëran Yosëri Apraan shaꞌhuichitonhuëꞌ. 15Moisësë pënëntërinsoꞌ co natëhuachinarahuëꞌ, anaꞌintacasoꞌ yaꞌhuërin. Co pënëntërinsoꞌ yaꞌhuërinhuëꞌ naporini, co natëcasoꞌ yaꞌhuëꞌitonhuëꞌ. Co ina marëꞌ oshahuaintërihuahuëꞌ.

16Napoaton Apraaniso natëton: “Yosë noꞌtëquën nontërinco,” topachina, Yosëri itërin: “Oshahuanpiranhuëꞌ, caora nohuanto, nosoroatënquën catahuaranquën. Huiꞌnanpitantaꞌ catahuarahuë,” itërin Yosëri. Co cotioroꞌsaráchin nosororinhuëꞌ. Yaꞌipi Apraan pochin cancantopisopitantaꞌ nosororin. Ina huiꞌninpita pochin ninëhuaꞌ. 17Iráca Yosëri Apraan itërin: “Ca nohuanto, notohuaroꞌ shiparinpita yaꞌhuëtarinquën. Naꞌa nisha nisha piyapiꞌsantaꞌ quëma pochachin cancantapi,” tënin Yosë. Quiricanënquë naporin. “Yosë noꞌtëquën nontërinco. Yaꞌipiya nanitaparin. Chiminpisopitantaꞌ nanitërin ananpitacasoꞌ. Co maꞌsha yaꞌhuëpirinhuëꞌ, nani yaꞌhuërinso pochin shaꞌhuichanin,” taꞌton, Apraan natëtërin.

18“Quëma shiparinpita notohuaroꞌ naꞌasapi,” itërin Yosëri. Huaꞌquiꞌ co aꞌna huiꞌnin tërantaꞌ yaꞌhuëtërinhuëꞌ. Sacaiꞌ natëtacaso nipirinhuëꞌ, Apraan natëtërin. “Yosë nohuanton, oshaquëran huiꞌnahuë yaꞌhuëtarinco. Shihuëpitantaꞌ naꞌasapi,” tënin Apraan. 19Pasa piꞌipitaponahuëꞌ, co huiꞌnin yaꞌhuëchatërarinhuëꞌ. Co huachi chinirinhuëꞌ. Saꞌiontaꞌ co huaꞌhuanaꞌpihuëꞌ. Nani paiya. Napoaponahuëꞌ, Yosë natërin. 20“Yosë nonpintërinco,” co tëninhuëꞌ. Co nisha nisha yonquirinhuëꞌ. “Noꞌtëquën nontërinco,” taꞌton, chiníquën cancantërin. “Ma noyacha Yosësoꞌ niꞌton, co naniantarincohuëꞌ. 21Yosë yaꞌipiya nanitaparin. Sacaiꞌ niponahuëꞌ, nani shaꞌhuitërinco niꞌton, catahuarinco. Shaꞌhuitërincoso chachin yaꞌhuapon,” tënin. 22Ina pochin yonquirinso marëꞌ Yosëri nóya niꞌnin.

23Apraan naporinsopita Yosë quiricanënquë ninshitopi. Canpoantaꞌ nitotacaso marëꞌ ninshitopi. 24Ina pochin cancantohuatëhuaꞌ, Yosë noya niꞌsarinpoaꞌ. Quisocristo chiminpirinhuëꞌ, Yosëri ananpitaantarin. Ina huaꞌanëntërinpoaꞌ, tënëhuaꞌ. Ina marëꞌ Yosë noya niꞌsarinpoaꞌ canpoantaꞌ. 25Yosë nohuanton, oshanënpoa marëꞌ chiminin. Inari chachin ananpitaantarin oshanënpoaꞌ inquitatonpoaꞌ, noya nicainpoaso marëꞌ.

Currently Selected:

Romanos 4: cbt

Highlight

Copy

Compare