Marcos 10
10
Saꞌahuanoꞌsaꞌ pënëninsoꞌ
(Mateo 19.1-12; Lucas 16.18)
1Capinaomo quëran pipirahuaton, Cotia parti paantarin. Naporahuaton, Cortaniiꞌ aquëtëran paꞌnin. Inaquë naquëranchin naꞌa piyapiꞌsari huëcapaipi. Quisosori aꞌchintantarin. Nani tahuëri huëꞌpachinara, noya aꞌchintarin. 2Parisioroꞌsantaꞌ Quisoso yaꞌcarirahuatonaꞌ, atëhuëcaiso marëꞌ natanquipi:
—¿Noya ipora saꞌanpoꞌ tëꞌyatacasoꞌ ti? itiipi.
3—¿Maꞌtaꞌ iráca Moisësë pënëntërin? itërin Quisosori.
4—“Saꞌanpoꞌ yatëꞌyatohuatëra, coisëquë aninshitërëꞌ: ‘Nani saꞌahuë tëꞌyatarahuë,’ taꞌcasoꞌ aninshitërëꞌ. Ina quëran noya tëꞌyatacaso huachi,” tënin Moisësë, itopi.
5—Co tëꞌyatacasoꞌ pënëninquëmahuëꞌ. Canpitasoꞌ co natantochináchinhuëꞌ cancantëramaꞌ niꞌton, Moisësë napopënëninquëmaꞌ. 6Napoaponahuëꞌ yaꞌnan piyapi nicapon, catoꞌ piyapiíchin Yosëri ninin. Aꞌna quëmapi, aꞌna sanapi, inaíchin ninin. 7Napoaton quëmapi saꞌapachin, paꞌpin, aꞌshin, inapita patahuaton, saꞌinëꞌ nichinpitacasoꞌ yaꞌhuërin. 8Catoꞌ piyapi nipirinhuëꞌ, aꞌnaíchin pochin nipi. Catoyaꞌpi nipirinhuëꞌ, aꞌnaíchin pochin Yosëri niꞌnin. 9Nani Yosëri asëꞌquërin niꞌquëhuarëꞌ, co onporontaꞌ saꞌamaꞌ tëꞌyatamasoꞌ yaꞌhuërinhuëꞌ, itërin Quisosori.
10Nani pëiquë yaꞌconpachina, naquëranchin caꞌtanoꞌsanënpitari itaponaꞌ:
—Achin naporansoꞌ aꞌchintantacoi nitochii, itopi.
11—Saꞌamaꞌ tëꞌyatatomaꞌ, aꞌna sanapi mapatamaꞌ, inasoꞌ co saꞌama chachinhuëꞌ niꞌton, monshitëramaso pochin Yosëri niꞌnin. Ina marëꞌ oshahuanaramaꞌ. 12Inapochachin sanapiꞌsantaꞌ, soꞌin taꞌananpirahuaton, aꞌna quëmapi soꞌyatohuachin, inasoꞌ co soꞌinhuëꞌ. Monshin pochin Yosëri niꞌsarin. Ina marëꞌ oshahuanarin, itërin.
Huaꞌhuaroꞌsa marëꞌ Yosë nontërinsoꞌ
(Mateo 19.13-15; Lucas 18.15-17)
13Ina quëran huaꞌhuaroꞌsaꞌ quëpi Quisosori sëꞌhuamotocaso marëꞌ. Inapotahuaton, inapita marëꞌ Yosë nontërin. Huaꞌhuaroꞌsaꞌ quëpisopita caꞌtanoꞌsanënpitari yaaꞌpapirinahuëꞌ. 14Ina niꞌsahuaton, Quisosori co noyahuëꞌ niꞌnin.
—Tananpitocoꞌ iyaroꞌsaꞌ huaꞌhuaroꞌsantaꞌ huëꞌinaꞌ. Ama aꞌpacosohuëꞌ. Huaꞌhuaroꞌsa pochin cancantopisopita Yosë huaꞌanëntërinquë yaꞌconapi. 15Tëhuënchachin carinquëmaꞌ itaranquëmaꞌ, huaꞌhuaroꞌsaꞌ aꞌnaroáchin yaimarinaco. Coꞌsoꞌ inapita pochin cancantohuatamahuëꞌ, co onporontaꞌ Yosë huaꞌanëntërinquë yaꞌconaramahuëꞌ, itërin.
16Ina quëran huaꞌhuaroꞌsaꞌ iporin. Sëꞌhuamotorahuaton, inapita marëꞌ Yosë nontërin noya yaꞌhuëcaiso marëꞌ.
Maꞌhuan yaimarinsoꞌ
(Mateo 19.16-30; Lucas 18.18-30)
17Ina quëran Quisoso yapaantarapirinhuëꞌ. Aꞌnara quëmapi taꞌaquirahuaton, isonquirin.
—Quëmasoꞌ Maistro noyanquën. ¿Maꞌtaꞌ casoꞌ onpoꞌi nanpimiataꞌhuaso marëꞌ? Shaꞌhuitoco cantaꞌ noya nii, itiirin. 18—¿Maꞌmarëtaꞌ “Quëmasoꞌ noyanquën” itëranco? Yosëíchin noyasoꞌ. 19Iráca pënëntërinsoꞌ nani nitotëran. “Ama piyapi tëpacosohuëꞌ. Ama nitëhuananpitocosohuëꞌ. Ama ihuatocosohuëꞌ. Ama ninonpinapicosohuëꞌ. Ama nonpincosohuëꞌ. Tatamaꞌ natëcoꞌ. Mamamantaꞌ natëcoꞌ,” tënin Yosë pënëntaton, itërin Quisosori.
20—Co mantaꞌ Maistro onporahuëꞌ. Huaꞌhuatapo quëran huarëꞌ yaꞌipi inapita natërahuë, itërin.
21Ina natanahuaton, nirayarin. “Tëhuënchachin noya yonquirin,” taꞌton nosororin.
—Isontaꞌ iyasha Yosë nohuantërin taꞌa. Paquëꞌ. Yaꞌipi maꞌshanënpita paꞌanahuaton, coriqui canaransoꞌ saꞌahuaroꞌsaꞌ quëtëquëꞌ. Ina quëran huëquëꞌ imaco huachi. Inapohuatan, aꞌna tahuëri Yosëꞌpaꞌ canamiataran, itërin.
22Ina natanahuaton, co huachi noyahuëꞌ cancantërin. “Huaꞌhuayatërahuëꞌ maꞌsha yaꞌhuëtërinco,” taꞌton sëtërin. Sëtaton, paꞌnin huachi.
23Ina quëran Quisosori caꞌtanoꞌsanënpita niꞌsahuaton, itapon:
—Paꞌpi sacai maꞌhuanoꞌsaꞌ Yosë huaꞌanëntërinquë yaꞌconacaisoꞌ, itërin.
24Ina natanahuatonaꞌ: “¡Maꞌpitacha naporin paya!” nitopi caꞌtanoꞌsanënpita.
—Tëhuënchachin iyaroꞌsaꞌ maꞌsharáchin yonquihuatëra, sacaiꞌ Yosë huaꞌanëntërinquë yaꞌconacasoꞌ. 25Niꞌcoꞌ. Nahuan huëratën piꞌpiraꞌhuaya naninën yaꞌhuëtërin. Camiyoso panca masho niꞌton, co piꞌpisha tërantaꞌ nanitërinhuëꞌ inaquë yaꞌconacasoꞌ. Ina quëran saca sacaiꞌ maꞌhuanoꞌsasoꞌ Yosë huaꞌanëntërinquë yaꞌconacaisoꞌ, itaantarin.
26Ina natanahuatonaꞌ, paꞌyanpi:
—Napoahuarëꞌ, ¿incha nica chaꞌërëꞌpoya? nitopi. 27Yaꞌipiya notëërahuaton, Quisosori itapon:
—Co insontaꞌ inaora nanitërinhuëꞌ chaꞌëcasoꞌ. Yosëíchin nanitërin anoyacancantinquëmasoꞌ. Yaꞌipiya nanitaparin, itërin.
28—Niꞌquëꞌ Maistro. Quiyasoꞌ nani yaꞌipi maꞌshanëhuëi huëshirahuatoi, imarainquën, itërin Pitrori.
29—Tëhuënchachin iyaroꞌsaꞌ imamacoso marëꞌ nani maꞌsha patohuatamaꞌ, naꞌcon naꞌcon Yosë catahuarinquëmaꞌ, tënahuë. Aꞌnaquëmaꞌ mini nanamëhuë aꞌchinacamaso marëꞌ co huachi yaꞌhuëmiataramahuëꞌ. Aꞌnaquëmaꞌ pëinëmaꞌ, iyaparimaꞌ, oshiparimaꞌ, tatamaꞌ, mamamaꞌ, huiꞌnamaꞌ, noꞌpanëmaꞌ, inapita patëramaꞌ. 30Ca imamacoso marëꞌ napohuatamaꞌ, Yosë naꞌcon naꞌcon quëtantarinquëmaꞌ. Isoroꞌpaquë chachin pasaroꞌ aquëtë pochin pëiroꞌsaꞌ, iyaroꞌsaꞌ, oshiroꞌsaꞌ, mamaroꞌsaꞌ, huaꞌhuaroꞌsaꞌ, noꞌparoꞌsaꞌ inapita quëtarinquëmaꞌ. Noya cancantaramaꞌ. Napoaponahuëꞌ, aparisitarinënquëma antaꞌ. Aꞌna tahuëriso huachi Yosëꞌpaꞌ nanpimiataramaꞌ. 31Aꞌnaquën ipora chiníquën nanantopirinahuëꞌ, aꞌna tahuëri topinan piyapi pochin nisapi. Aꞌnaquënso nipirinhuëꞌ, ipora topinan piyapi pochin nicaponahuëꞌ, aꞌna tahuëri chiníquën nanantapi, itërin Quisosori.
Chiminacasoꞌ shaꞌhuiantarinsoꞌ
(Mateo 20.17-19; Lucas 18.31-34)
32Ina quëran ira paꞌtahuatonaꞌ, Quirosarinꞌpaꞌ paantarapi niꞌton, caꞌtanoꞌsanënpita paꞌyanpi. Imapisopitantaꞌ tëꞌhuatopi. Quisososo nipirinhuëꞌ, quëchitërarin. Naquëranchin caꞌtanoꞌsanënpita amashamiachin quëparahuaton, maꞌsona onpocasoꞌ shaꞌhuitaantarin. 33“Noya iyaroꞌsaꞌ natancoꞌ. Iporasoꞌ Quirosarinꞌpaꞌ paꞌsarëhuaꞌ. Inatohuaꞌ nani maꞌsha onpotarinaco. Yosë quëran quëmapico nipirahuëꞌ, inaquë shaꞌhuirapiarinaco. Corto huaꞌanoꞌsaꞌ, cotio maistroꞌsaꞌ, inapita masahuatonaco, ‘Tëpacasoꞌ yaꞌhuërin,’ tosapi. Ina tosahuatonaꞌ, nisha piyapiꞌsaquë yoꞌcoaninaco tëpainacoso marëꞌ. 34Inapita tëhuarahuatonaco, ipitarinaco. Chiníquën huihuiarinaco, pëꞌshararinaco. Ina quëran tëpararinaco. Chiminaporahuëꞌ, cara tahuëri quëran nanpiantarahuë,” itantarin.
Santiaco, Coansha, inapita nohuantopisoꞌ
(Mateo 20.20-28)
35Ina quëran Santiaco, Coansha, inapita Quisoso huëcapaipi. Sipitio huiꞌninpita inahuasoꞌ.
—Piꞌpian Maistro natainquën, topiraihuëꞌ, itopi.
36—¿Maꞌtaꞌ iyaroꞌsaꞌ nohuantëramaꞌ? itërin.
37—Aꞌna tahuëri noya noya huaꞌanëntaran. Huaꞌan yaꞌconpatan, chiníquën nanan quëtocoi. Aꞌnasoꞌ quëma inchinan quëran ahuënsëquëꞌ, aꞌnantaꞌ ahuënan quëran ahuënsëquëꞌ, topiraihuëꞌ, itopi.
38—Canpitasoꞌ co noꞌtëquën yonquiátëraramahuëꞌ. Co yaꞌipi nitochátëraramahuëꞌ. Chiníquën iyaroꞌsaꞌ parisitarahuë. Main oꞌorëso pochin paꞌpi parisitarahuë. Iꞌquë yaꞌcoitërëso pochin aparisitarinaco. Canpitantaꞌ aparisitohuachinënquëmaꞌ, ¿ahuantapomaꞌ ti? itërin.
39—Ahuantarai, itopi cato chachin.
—¡Naporinchi paya! Ca pochin mini canpitantaꞌ main oꞌorëso pochin parisitaramaꞌ. Iꞌquë yaꞌcoitërëso pochin parisitaramaꞌ. 40Napoaponahuëꞌ, co casoꞌ nanitërahuëꞌ chiníquën nanan quëtaꞌhuanquëmasoꞌ. Tata Yosëíchin nanitërinsoꞌ. Inari nohuantërinsopita inchinanëhuë quëran ahuënsëarin. Nani inapita marëꞌ taparin huachi, itërin.
41Chiníquën nanan nohuantopisoꞌ natanahuatonaꞌ, aꞌnapitarisoꞌ noꞌhuipi. 42Quisososo nipirinhuëꞌ, yaꞌipi caꞌtanoꞌsanënpita përasahuaton, pënënin.
—Co Yosë imapisopitahuëꞌ chiníquën nanantacaisoꞌ paꞌyatopi. Huaꞌan yaꞌconpachinara, chiníquën nanantatonaꞌ, yacamaitopi. Piyapinënpitantaꞌ aparisitopi. 43Canpitaso nipirinhuëꞌ, ama inapita pochin cancantocosohuëꞌ. Yosë huaꞌanëntërinquë yaꞌconpatëra, co chiníquën nanantacasoꞌ nohuantërëhuëꞌ. Noya noya yanipatamaꞌ, yaꞌipi piyapiꞌsaꞌ catahuacoꞌ. 44Topinan piyapi pochin cancantocoꞌ. Catahuacasoáchin yonquihuatamaꞌ, Yosë noya nicatënquëmaꞌ, chiníquën nanan quëtarinquëmaꞌ. 45Cantaꞌ Yosë quëran quëmapico niporahuëꞌ, co aꞌnapita camaicaꞌhuaso marëꞌ oꞌmarahuëꞌ. Piyapiꞌsaꞌ catahuacaꞌhuaso marëꞌ oꞌmarahuë. Chiminarahuë naꞌa piyapiꞌsaꞌ nichaꞌëcaꞌhuaso marëꞌ, itërin Quisosori.
Somaraya anoyatërinsoꞌ
(Mateo 20.29-34; Lucas 18.35-43)
46Ina quëran paantarahuatonaꞌ, Quiricoquë canconpi. Caꞌtanoꞌsanënpitarë chachin pipihuachinara, naꞌa piyapiꞌsarintaꞌ imasapi. Naporoꞌ aꞌna somaraya ira yonsanquë huënsëarin quënanconpi. Timio huiꞌnin niꞌton, Partimio itopi. Somaraya niꞌton, nani tahuëri coriqui topinan maꞌpatárin. 47“Quisoso Nasaritoquë yaꞌhuërinsoꞌ huëꞌsarin,” topi, natantërin. Ina natantaton:
—¡Nosoroco Sinioro! Quëmasoꞌ Tapicoꞌ shinquën niꞌton, nosoroco cantaꞌ, itërin chiníquën nontaton.
48Aꞌnapitari natanahuatonaꞌ, noꞌhuipi.
—Taꞌtëquëꞌ, itopirinahuëꞌ, aquë aquëtë chachin chiníquën nontantarin.
—¡Nosoroco cantaꞌ! Quëmasoꞌ Tapicoꞌ shinquën niꞌton, onpopiontaꞌ nosoroco, itantarin. 49Quisososoꞌ natanahuaton, chiniconin:
—Shaꞌhuitocoꞌ huëꞌin, itërin. Napotohuachina, shaꞌhuitopi.
—Noya cancantëquëꞌ iyasha. Nani përarinquën niꞌton, Quisoso nontiiquëꞌ, itopi. 50Aꞌmorinsoꞌ tëꞌyatahuaton, aꞌnaroáchin Quisosoquë paꞌnin.
51—¿Maꞌtaꞌ iyasha, onpochinquën? itërin Quisosori.
—Anoyarayatoco Maistro cantaꞌ noya niꞌtantaꞌi, itërin.
52—Inta nipachin, noya paquëꞌ. Natëranco niꞌton, carinquën anoyataranquën, itërin. Napotohuachina, noya niꞌtërin. Noyatahuaton, Quisoso imarin.
Currently Selected:
Marcos 10: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
