Mateo 11

Coansha Paotistari piyapi aꞌparinsoꞌ

(Lucas 7.18-35)

1Nani caꞌtanoꞌsanënpita shaꞌhuitahuaton, aꞌchinacaso marëꞌ paꞌnin huachi. Nisha nisha ninanoquë paꞌsahuaton, aꞌchinaꞌpiarin. Pënënaꞌpiarin.

2Coansha Paotistaso nipirinhuëꞌ, naporoꞌ tashinan pëiquë yaꞌhuárin. Inaquë yaꞌipi Quisoso naporinsoꞌ natantërin. Ina natantaton, catoꞌ imarinsopita aꞌparin Quisoso natanacaiso marëꞌ. 3Canconpachinara, Quisoso natanatonaꞌ:

—Coansha Paotista aꞌparincoi niꞌton, natanaꞌhuainquënso marëꞌ huëꞌnai. Iꞌhuá chachin inasoꞌ, naꞌcon shaꞌhuitërincoi. “Aꞌna tahuëri Cristo oꞌmararin, Yosëri aꞌpaimarinsoꞌ,” itërincoi. ¿Quëmasoꞌ inanquën nimara, ti? ¿Pahuanarin oꞌmacasoꞌ nica? Co nitotatoihuëꞌ, natanapoinquën huëꞌnai. Shaꞌhuitocoi quiyantaꞌ Coansha shaꞌhuitoantaꞌii, itopi.

4-5Napotohuachinara, Quisosori itërin:

—Nani maꞌsha niꞌnamaꞌ, natanamaꞌ. Somaraya nininsopita huëꞌpachinara, ca nohuanto, niꞌtopi. Apiaroꞌsantaꞌ aꞌnaroáchin anoyatërahuë. Noya iratopi niꞌnamaꞌ. Aꞌnaquëontaꞌ chana caniori maninsopita anoyatërahuë. Nëꞌhuëroꞌsantaꞌ ca nohuanto, noya natantopi. Chiminpisopitantaꞌ ananpitaantarahuë. Notohuaroꞌ piyapiꞌsaꞌ co Yosë nohuitatonaraihuëꞌ, nosorotápirinahuëꞌ, iporaso huachi noya nanan aꞌchintarahuë natanamaꞌ. Paatomaꞌ, yaꞌipiya Coansha shaꞌhuitoncoꞌ noꞌtëquën nitochin. 6Insosona yaꞌipi cancanëna quëran natëmiatohuachinaco, nóya cancantapi, itërin Quisosori.

7Ina natanahuatonaꞌ, Coansha shaꞌhuitaponaꞌ paꞌpi. Nani paꞌpachinara, Quisosori piyapiꞌsaꞌ aꞌchintantarin.

—Natanco iyaroꞌsaꞌ Coansha yonquiato aꞌchinchinquëmaꞌ. Iꞌhua inotëro parti ina nicapomaꞌ paꞌpatamara, inaso Yosë marë chiníquën huanirin quënanconamaꞌ. Co piquira ihuani onororinso pochin niconinhuëꞌ. 8Co inaso maꞌhuanoꞌsaꞌ pochin noyápiachin aꞌmorinhuëꞌ. Noyápiachin aꞌmopisopitasoꞌ, copirnoroꞌsaꞌ pëinënaquë yaꞌhuëpi. Coanshaso nipirinhuëꞌ, co nani maꞌsha yaꞌhuëtërinhuëꞌ. 9Pënëntërinsoꞌ natanacamaso marëꞌ paꞌnamaꞌ, tënahuë. Coansha tëhuënchachin nóya pënëntërin. Co topinan quëran pënëntërinhuëꞌ. Yosëri chachin aꞌparin pënëntacaso marëꞌ. 10Iráca quiricanënquë ninoton Yosëri huiꞌnin shaꞌhuitërin.

“Coꞌhuara paꞌshamátërasënquënhuëꞌ, comisionëhuëꞌton aꞌpararahuë piyapiꞌsaꞌ ayonquicaso marëꞌ,” itërin.

Coansha ninoton, naporin.

11“Iráca quëran huarëꞌ naꞌa piyapiꞌsaꞌ pënëntopirinahuëꞌ, Coansha Paotistasoꞌ noya noya pënëntërin. Pënëntërinsoꞌ noya, nipirinhuëꞌ, inso tërantaꞌ imapachinaco, noya noya nisarin. Yosë huaꞌanëntërinquë chachin yaꞌconarin huachi, tënahuë.

12Coansha pënëntërin quëran huarëꞌ naꞌa piyapiꞌsaꞌ huëꞌsapi natanacaiso marëꞌ. Aꞌnaquënso nipirinhuëꞌ co nohuantopihuëꞌ Yosë huaꞌanëntërinquë yaꞌconacaisoꞌ. Co nohuantatonaraihuëꞌ, nohuantopisopita aparisitopi. Chiníquën cancantopisopitaso nipirinhuëꞌ, onpopiontaꞌ yaꞌconapi. 13Iráca quëran huarëꞌ Moisësë, pënëntonaꞌpiroꞌsaꞌ, inapita ninopi. ‘Yosë yahuaꞌanëntërinpoaꞌ. Aꞌna tahuëri ina marëꞌ acorinsoꞌ aꞌpaimararin,’ topi. Coanshantaꞌ ninotonaꞌ, ninshitopi: ‘Coꞌhuara Sinioro tahuërinën naniyatërasohuëꞌ, Iniasë huëantarin pënëntacaso marëꞌ,’ topi. 14Napopiso chachin Coansha pënëntarin huachi. Iniasë pochin cancantaton, pënëntarin, tënahuë. Nohuantohuatamaꞌ, natëcoꞌ. 15Huëratëhuanpatamaꞌ, noya natanatomaco, yonquicoꞌ.

16Iporasoꞌ piyapiꞌsaꞌ nisha nisha yonquipi. Huaꞌhuaroꞌsa pochin cancantopi. Huaꞌhuaroꞌsaꞌ cachiquë yaꞌnipihuachinara, aꞌnaquën taponaꞌ: ‘Huëcoꞌ pita pochin niꞌtëhuaꞌ, yaꞌnipiahuaꞌ,’ taꞌtonaꞌ, 17quinatapirinahuëꞌ, co aꞌnapita nohuantopihuëꞌ nansacaisoꞌ. Ina quëran co nohuantohuachinarahuëꞌ, tantaponaꞌ: ‘Inta nipachin, huëcoꞌ chimipi paꞌpitopiso pochin niꞌtëhuaꞌ, yaꞌnipiahuaꞌ,’ nitantapi. Naꞌnëpirinahuëꞌ, co aꞌnapita nohuantopihuëꞌ naꞌnëcaisoꞌ. Inapochachin canpitantaꞌ ipora nisha nisha yonquiramaꞌ. 18Coansha Paotistasoꞌ pënëntapon, co aquëtëꞌ cosharoꞌ yonquirinhuëꞌ. Co noya coshatërinhuëꞌ. Co piꞌpian tërantaꞌ huino oꞌorinhuëꞌ. Napopirinhuëꞌ: ‘Inasoꞌ Sopairi ahuaꞌyantërin niꞌton naporin,’ tënamaꞌ. 19Caso nipirinhuëꞌ, Yosë quëran quëmapico niporahuëꞌ coshatërahuë, oꞌorahuë. Ina marëꞌ pinoramaco cantaꞌ. ‘Quisoso coshatárin, oꞌopatárin. Oshahuanoꞌsarëꞌ nipayarin. Copirno marëꞌ coriqui maꞌpatonaꞌpiroꞌsarëntaꞌ nipayarin,’ toconamaꞌ. Nisha nisha yonquiconamaꞌ. Aꞌnaquënso nipirinhuëꞌ noya yonquiatonaꞌ, Yosë natëapi huachi. Noꞌtëquën pënënahuë niꞌton, noꞌtëquën yonquiapi huachi,” tënin Quisoso.

Nisha nisha ninanoquë yaꞌhuëpisopita pënëninsoꞌ

(Lucas 10.13-15)

20Nisha nisha ninanoroꞌsaquë nani pënëntërin. Inaquë naꞌa caniaꞌpiroꞌsaꞌ aꞌnaroáchin anoyatërin. Yaꞌhuëhuanoꞌsasoꞌ nicaponaraihuëꞌ, inachachin inachachin yonquiantapi. Co oshanënaꞌ yaaꞌpopihuëꞌ. Napoaton chiníquën pënënin. 21Corasinoquë yaꞌhuëpisopita, Pitsaitaquë yaꞌhuëpisopita, inapita yonquiaton, itapon:

“¡Maꞌhuántacha canpitasoꞌ nisarama paya! Naꞌcon pënënpiranquëmahuëꞌ, co natëramacohuëꞌ. Ina marëꞌ parisitaramaꞌ. Naꞌcon nitotopiramahuëꞌ, co yaimaramacohuëꞌ. Tiroquë, Sitonquë, inaquëpitaso nipirinhuëꞌ co pënëntërahuëꞌ. Co inaquë caniaꞌpiroꞌsaꞌ aꞌnaroáchin anoyatërahuëꞌ. Inaquë naporahuë naporini, oshanëna marëꞌ sëchitonahuëꞌ. Saꞌcatën nininso aꞌmotonaꞌ, huarianoquë nipashimotochitonahuëꞌ. Co noyahuëꞌ yonquipisopitantaꞌ, nanianchitonahuëꞌ. 22Napoaton ayaroꞌ tahuëri nanihuachin, canpitasoꞌ Yosë chini chiníquën anaꞌintarinquëmaꞌ. Inapitasoꞌ co onpopinchin anaꞌintarinhuëꞌ. 23Capinaomoquë yaꞌhuëramasopitantaꞌ co noꞌtëquën yonquiramahuëꞌ. ‘Noyacoi niꞌtoi, Yosëꞌpaꞌ paꞌsarai,’ ¿topiramahuëꞌ ti? Co ina marëꞌ inatohuaꞌ paꞌsaramahuëꞌ. Parisitopiquë paꞌmiatarama huachi. Huaꞌquiꞌ aꞌchintëranquëmaꞌ. Naꞌa caniaꞌpiroꞌsaꞌ aꞌnaroáchin anoyatërahuë. Nani nicapomarahuëꞌ, co yaimaramacohuëꞌ. Sotomaquë naporahuë naporini, inapitaso natëitonacohuëꞌ. Co oshanëna marëꞌ Yosëri ataꞌhuanchitonhuëꞌ. Ipora huantaꞌ yaꞌhuaꞌitonahuëꞌ. 24Ayaroꞌ tahuëri nanihuachin, canpitasoꞌ chini chiníquën anaꞌintarinquëmaꞌ. Sotomaroꞌsaso nipirinhuëꞌ, co onpopinchin anaꞌintarinhuëꞌ, tënahuë,” itërin Quisosori.

Quisoso asanocancaninpoasoꞌ

(Lucas 10.21-22)

25Naporoꞌ noya cancantaton, Yosë nontërin:

“¡Ma noyacha Tata yonquiran paya! Quëmasoꞌ chini chiníquën nanantëran. Inápaquë yaꞌhuërinsopita, isoroꞌpaquë yaꞌhuërinsopita, yaꞌipiya huaꞌanëntëran. Aꞌnaquën Tata nani maꞌsha nitotaponaraihuëꞌ: ‘Quiyaora noya noya nitotarai,’ topiso marëꞌ, co nanamën anitotëranhuëꞌ. Imarinacosopitaso nipirinhuëꞌ, co onpopinchin nitotaponaraihuëꞌ: ‘Catahuaco Sinioro co caora nanitërahuëꞌ,’ topachinara, quëma nanamën chachin anitotëran. Ina marë: ‘Yosparinquën,’ itëranquën. 26Quëmaora nohuanton Tata naporan,” itërin.

27Ina quëran piyapiꞌsaꞌ aꞌchintantarin.

“Tata Yosë nohuanton, pënëntarahuë. Yaꞌipi nanamën anitotërinco piyapiꞌsaꞌ aꞌchintacaꞌhuaso marëꞌ. Huiꞌninco niꞌton, inasáchin noya nohuitërinco. Inapochachin Tata Yosë nohuitërahuë. Casáchin noya nohuitërahuë. Aꞌnaquëontaꞌ cari anohuitohuato, nohuitapi antaꞌ. 28Huëcoꞌ casáchin imaco catahuainquëmaꞌ. Isoroꞌpaquë maꞌsha onporamaꞌ niꞌton, sëtaramaꞌ. Naporahuaton, nisha nisha yanatëpiramahuëꞌ, co canpitaora nanitëramahuëꞌ noya cancantacamasoꞌ. Pëꞌpëto quëquën quëparamaso pochin ninatanama niꞌton, napion cancantëramaꞌ. Napoaton huëcoꞌ catahuainquëmaꞌ sano cancantacamaso marëꞌ. 29Co carinquëmaꞌ nocananquëmahuëꞌ. Sanoanan quëran pënënanquëmaꞌ. Casáchin natanco aꞌchinchinquëmaꞌ. Nani tahuëri catahuaranquëmaꞌ noya cancantacamaso marëꞌ. Ina pochin imapatamaco, sano cancantarama huachi. 30Maꞌsona nicacaso shaꞌhuitohuatënquëmaꞌ, catahuaranquëmaꞌ noya nicacamasoꞌ. Catahuaranquëmaꞌ niꞌton, co sacaihuëꞌ imasaramaco huachi,” itërin Quisosori.

Currently Selected:

Mateo 11: cbt

Highlight

Copy

Compare