Lucas 1

Maꞌmarësona ninshitërinsoꞌ

1Quisocristo isoroꞌpaquë oꞌmaton, nóya ninin. Naꞌa piyapiꞌsari ina naporinsoꞌ nani ninshitopi. 2Caꞌtanoꞌsanënpitasoꞌ iráca quëran huarëꞌ imatonaꞌ, naporinsoꞌ niꞌpi. Nani yaꞌipi noꞌtëquën shaꞌhuitërinacoi. 3Cantaꞌ yaꞌipi nanamën nitotërahuë. Huaꞌquiꞌ natanato, nani noyá nitotërahuë. Napoaton, iya Tiohuiro ninshichinquën, tënahuë. Quëmasoꞌ paꞌpi noya piyapinquën niꞌton, ninshitaranquën. Yaꞌnan nininso quëran huarëꞌ yaꞌipiya ninshitaranquën. 4Naꞌa piyapiꞌsaꞌ nani shaꞌhuitopirinënquënhuëꞌ, iporasoꞌ cariontaꞌ ninshitaranquën noꞌtëquën nitotamaso marëꞌ.

Coansha Paotista nasitacasoꞌ ninorinsoꞌ

5Iráca Irotisë Cotia parti huaꞌanëntasoꞌ, aꞌna corto huaꞌan yaꞌhuërin, Sacariasë itopisoꞌ. Ina huëntoaꞌhuanënsoꞌ, Apiasë huëntoaꞌhua, itopi. Saꞌinsoꞌ Isapira itopi. Inantaꞌ Aaron shiin, iráca corto huaꞌan yaꞌconinsoꞌ. 6Cato chachin noya Yosë imapi. Yaꞌipi pënëntërinsoꞌ noꞌtëquën natëpi. 7Saꞌinso nipirinhuëꞌ co huaꞌhuanaꞌpihuëꞌ. Co aꞌnaya tërantaꞌ huaꞌhuin yaꞌhuëtërinhuëꞌ. Nani paiya. Soꞌiontaꞌ nani mashoya.

8Aꞌna tahuëri Sacariasë huëntoaꞌhuanën Yosë chinotopiso pëiquë paꞌpi sirihuitacaiso marëꞌ. Naporoꞌ tahuëri sirihuitacaisoꞌ yaꞌhuërin. 9Cotioroꞌsaꞌ inachintopisoꞌ imatonaꞌ, Sacariasë huayonpi yonarin pochin nininsoꞌ aꞌpëcaso marëꞌ. Acohuana yaꞌconahuaton, pimóton nininsoꞌ aꞌpërin Yosë yonquicaiso marëꞌ. 10Aꞌpësoꞌ, naꞌa piyapiꞌsaꞌ aipiran huanirahuatonaꞌ, Yosë nontapi. 11Naporoꞌ acohuana Sinioro anquëninëni yaꞌnotimarin. Misaꞌhuaya inchinan quëran huanitimarin. 12Anquëni quënanahuaton, paꞌyanin. Paꞌpi tëꞌhuarin. 13Anquëniriso nipirinhuëꞌ noya nontërin.

—Ama paꞌyanquësohuëꞌ. Quëmasoꞌ Sacariasënquën, nohuitëranquën. Huaꞌquiꞌ huiꞌnahuanacasoꞌ nohuantopiranhuëꞌ. Ina marëꞌ Yosë nontëransoꞌ nataninquën. Saꞌan huaꞌhuanarin. Huaihuachin, nininën cari shaꞌhuitaranquënsoꞌ acotëquëꞌ. Coansha itëquëꞌ. 14Nasitohuachin, noya cancantaran. Naꞌa piyapiꞌsari paꞌyatapi. 15Inasoꞌ nóya quëmapi nipon. Yosëri catahuaarin niꞌton, noya noya nisarin. Naporahuaton, co piꞌpian tërantaꞌ main oꞌoponhuëꞌ. Coꞌhuara nasichátëraponhuëꞌ, Ispirito Santori yaꞌcoancantarin. Inasáchin natëarin. 16Mashotohuachin, pënëntapon. Pënëntohuachin, naꞌa israiroꞌsaꞌ Yosë yonquiantapi. 17Iráca Iniasë pënëntërinso pochin nóya pënëntarin. Ina pochin chiníquën nanantarin inantaꞌ. Sinioro yaoꞌmahuachin, pënëntapon. Pënëntohuachin, quëmapiꞌsaꞌ huiꞌninpitarëꞌ noya ninontantaponaꞌ. Iporasoꞌ aꞌnaquën co Yosë natëpirinahuëꞌ. Ina natanahuatonaꞌ, noꞌtëquën yonquiaponaꞌ. Inari aꞌchintohuachin, Sinioro nohuantapona huachi, itërin anquëniri.

18—Casoꞌ mashoyaco. Saꞌahuëntaꞌ nani paiya. ¿Inaporoꞌpocoitaꞌma nica? ¿Onporahuatotaꞌ noꞌtëquën nitochi? tënin Sacariasë.

19—Casoꞌ Capirico. Yosë yaꞌhuërin quëran oꞌmarahuë. Ina aꞌpaimarinco nontaꞌhuanquënso marëꞌ. Noya nanan shaꞌhuitopiranquënhuëꞌ. 20Co natërancohuëꞌ niꞌquëhuarëꞌ, huaꞌquiꞌ co nonsaranhuëꞌ. Huiꞌnan nasitaquë huarëꞌ co nonacamasoꞌ nanitaranhuëꞌ. Napoaponahuëꞌ, noꞌtëquën nontëranquën. Huiꞌnahuanaran. Tahuërinën nanihuachin, saꞌan huaiarin, itërin anquëniri.

21Piyapiꞌsaso nipirinhuëꞌ Sacariasë ninatonaꞌ: “¿Onpoatontaꞌ huaꞌquiarin?” topi. 22Ina quëran acohuana quëran pipipirinhuëꞌ, co huachi nanitërinhuëꞌ nonacasoꞌ. Imirin quëran anquitaponahuëꞌ, co nanitërinhuëꞌ piyapiꞌsaꞌ nontacasoꞌ. “Acohuana yaꞌconin quëran, Yosë nohuanton, huaꞌnarëso pochin quënamara,” topi.

23Nani Yosë chinotopiso pëiquë sirihuitohuachina, Sacariasësoꞌ yaꞌhuërinꞌpaꞌ paantarin. 24Ina quëran co huaꞌquiya quëranhuëꞌ saꞌin cayorin huachi. Aꞌnatërápo yoqui pochin co intoasoꞌ paꞌninhuëꞌ. Pëinënquë yaꞌhuárin. 25“Ma noyacha Yosë catahuarinco niꞌton, huaꞌhuanarahuë paya. Ina nohuanton, co huachi tapan yaꞌhuëtarincohuëꞌ,” tënin yonquiaton.

Anquëniri Maria nontërinsoꞌ

26Nani saota yoquitohuachina, naquëranchin anquëni isoroꞌpaquë oꞌmantarin, Capiri itopisoꞌ. Nasaritoquë Yosëri aꞌpaimarin, Cariria parti yaꞌhuërinsoꞌ. 27Inaquë aꞌnara nanon yaꞌhuërin, Maria itopisoꞌ. Cosiri nani nontërin macacaso marëꞌ. Tata masho Tapi shiin inasoꞌ. 28Anquëni oꞌmarahuaton, Maria itapon:

—Iꞌhuata Maria. Sinioro noya niꞌninquën. Ina chachin catahuarinquën, itërin.

29Ina natanahuaton, Maria paꞌyanin: “¿Maꞌmarëtaꞌ napotërincosoꞌ?” tënin yonquinënquë.

30—Ama Maria, paꞌyanquësohuëꞌ. Yosë noya niꞌninquën. 31Natanco shaꞌhuichinquën. Quëmasoꞌ huaꞌhuanaran. Quëmapiaꞌhuaya huaihuatan, Quisoso itëquëꞌ. 32-33Mashotohuachin, chiníquën nanantarin. Inasoꞌ Yosë huiꞌnin. Yosë nohuanton, copirno yaꞌconarin. Iráca Tata masho Tapi israiroꞌsaꞌ noya huaꞌanëntopirinhuëꞌ. Ina quëran chiminin. Iporaso nipirinhuëꞌ huaꞌhuani huaꞌanëntomiatarin. Co onporontaꞌ pipirarinhuëꞌ, itërin anquëniri.

34—¿Onporahuatotaꞌ huaꞌhuanapo? Co casoꞌ quëmapi sëꞌhuayátërarincohuëꞌ, itërin Mariari.

35—Ispirito Santo nohuanton, quëmaora huaꞌhuanaran. Yosë topinan yonquiarapirinquënhuëꞌ, cayoaran. Napoaton huaꞌhuan, Yosë huiꞌnin chachin nisarin. Co piꞌpisha tërantaꞌ oshahuanaponhuëꞌ. 36Niꞌquëꞌ. Quëmopinën Isapira itopisoꞌ paiya niponahuëꞌ, Yosë nohuanton nani cayorin. Co huaꞌhuanaꞌpihuëꞌ niponahuëꞌ, nani saota yoquitarin. Quëmapiaꞌhuaya huaipon. 37Yosë yaꞌipi nanitaparin, itërin anquëniri.

38—Inta nipachin. Yosëíchin casoꞌ natëarahuë. Ina nohuanton, huaꞌhuahuë yaꞌhuëꞌin nipachin, tënin Maria.

Napotohuachina, anquëni paꞌnin.

Isapira nicapon paꞌninsoꞌ

39Ina quëran manorahuaton, Mariasoꞌ Cotia motopiroꞌsa parti paꞌnin quëmopinën nicapon. Inaquë canconahuaton, 40Sacariasë pëinënquë yaꞌconconin. Isapira quënanconahuaton, —Iꞌhuata aꞌshacha, itërin. 41Ina natanahuaton, huaꞌhuin yoꞌnamënquë toꞌmo toꞌmótarin. Isapirantaꞌ nóya cancantërin. Ispirito Santori noyá yaꞌcoancantërin niꞌton, 42paꞌyataton, chiníquën itapon:

—Iꞌhuata huaꞌhuataꞌhua. ¡Ma noya Yosë catahuarinquën! Aꞌnapita sanapiꞌsa quëran noya noya niꞌninquën. Huaꞌhuaontaꞌ noya noya niꞌsarin. 43Inasoꞌ yaꞌipiya huaꞌanëntarinpoaꞌ. Co casoꞌ chiníquën nanantopirahuëꞌ, ¡ma noyacha ina aꞌshinquën nipiranhuëꞌ, nicaponco huëꞌnan paya! 44Quëma nontohuatancora, aꞌnaroáchin huaꞌhuahuëntaꞌ yoꞌnamëhuëquë toꞌmo toꞌmótarin. Noya cancantaton, naporin. 45“Yosë noꞌtëquën nontërinco,” tënanso marëꞌ inasoꞌ noya niꞌninquën. Shaꞌhuitërinquënso chachin acotarinquën, itërin Isapirari.

46Ina quëran Maria tapon:

“Ma noyacha Tata Yosëso paya, tënahuë cantaꞌ.

47Anoyacancantërinco niꞌton, nóya cancantërahuë.

48Topinan piyapico nipirahuëꞌ, yonquirinco.

Ipora quëran huarëꞌ naꞌa piyapiꞌsaꞌ nohuitarinaco. ‘Ma noyacha Yosëri catahuarin paya,’ tosapi.

49Yosësoꞌ yaꞌipi nanitaparin. Inasoꞌ nóya catahuarinco.

Noya noya ninin.

50Iráca chinotopisopitantaꞌ nosororin.

Ipora huantaꞌ ina chinotohuatëhuaꞌ, nosoroarinpoaꞌ.

51Chiníquën nanantaton, nani maꞌsha ninin.

Nocantopisopita atapanin.

52Copirnoroꞌsantaꞌ co noyahuëꞌ nipachinara, ocoirin.

Topinan piyapiꞌsaꞌ yaꞌhuërëꞌ noya acorin.

53Pahuantërinsopita catahuarin nóya yaꞌhuëcaiso marëꞌ.

Maꞌhuanoꞌsaso nipirinhuëꞌ, topinan aꞌparin.

54Israiroꞌsaꞌ naꞌcon catahuarin.

Piyapinënpita niꞌton, nosororin.

55Iráca Apraan nontaton, ‘Nosororanquën. Quëma shiparinpitantaꞌ nosoroato, catahuaarahuë,’ itërin Yosëri.

Ina yonquiaton, ipora catahuarinpoa huachi,” tënin Maria.

56Cara yoqui pochin inaquë yacapatërin. Ina quëran yaꞌhuërinꞌpaꞌ paantarin.

Coansha Paotista nasitërinsoꞌ

57Isapira nani tahuërinën nanihuachina, huairin. Quëmapiaꞌhuaya huairin. 58Quëmopinënpita, yaꞌcariya yaꞌhuëpisopita, inapita natantopi. “¡Ma noya Yosëri catahuarin niꞌton, noya huairin! taꞌtonaꞌ,” nóya cancantopi. 59Huaꞌhuasha posa tahuëritohuachina, marca yaacotopi.

“Niapoquëꞌ. Sacariasë itëquëꞌ,” itopi aꞌnaquëni. 60Aꞌshinso nipirinhuëꞌ, co nohuantërinhuëꞌ.

—Coansha itarai, tënin.

61—Ama nisha nininën acotëquësohuëꞌ. Quëmopinënáchin apoquëꞌ. Ina noya, itopi.

62Ina quëran paꞌpin ipora huantaꞌ nëꞌhuë niꞌton, imirin quëran tasatopi nininën nitotacaiso marëꞌ. 63Paꞌpinsoꞌ quirica maꞌpatahuaton, ninshitërin. “Coansha itarahuë,” tënin ninshitaton. Ina nicatonaꞌ: “¡Maꞌpitacha yonquirin paya!” topi. 64Naporoꞌ nëꞌhuërinsoꞌ inquirahuaton, aꞌnaroáchin noantarin huachi. “¡Ma noyacha Tata Yosësoꞌ niꞌton, catahuarinco paya!” tënin. 65Ina niꞌsahuatonaꞌ, piyapiꞌsaꞌ paꞌyanpi. Yaꞌipi Cotia parti nanan nahuinin. 66Ina natanatonaꞌ, yonquiapi. “¿Maꞌtaꞌ onpoapon iso huaꞌhuasha niꞌton, ipora quëranchin Yosëri naꞌcon naꞌcon catahuararin?” topi.

Sacariasë ninorinsoꞌ

67Ina quëran Ispirito Santori noyá yaꞌcoancantohuachina, Sacariasëntaꞌ tapon:

68“¡Ma noyacha Tata Yosësoꞌ huaꞌanëntërinpoa paya!

Piyapinënpitanpoaꞌ yonquiatonpoaꞌ, nichaꞌësarinpoaꞌ.

69Ina nohuanton, Tata masho Tapi shiin chachin nichaꞌësarinpoaꞌ.

Inasoꞌ chini chiníquën nanantapon.

70Iráca quëran huarëꞌ pënëntonaꞌpiroꞌsaꞌ ninopi.

Yosë nohuanton, shaꞌhuitërinënpoaꞌ:

71‘Aꞌna tahuëri nichaꞌësaranquëmaꞌ. Co huachi inimicoroꞌsaꞌ minsëarinënquëmahuëꞌ.

Noꞌhuipirinënquëmahuëꞌ, nichaꞌësaranquëmaꞌ,’ tënin Yosë, topi.

72Iráca shimashonënpoapita nosoroaton, naporin. Ipora huantaꞌ nosororinpoaꞌ.

Shaꞌhuitërinsoꞌ co Yosëri naniantërinhuëꞌ.

73Tata masho Apraan shaꞌhuitërinsoꞌ yonquirárin.

74Napoaton nichaꞌësarinpoaꞌ. Co huachi inimiconënpoapitaꞌ minsëarinënpoahuëꞌ.

Ina quëran co tëꞌhuatatëhuahuëꞌ, Yosë chinotarihuaꞌ.

75Ina pochin cancantatëhuaꞌ, inasáchin chinotarihuaꞌ.

Chiminaquë huarëꞌ nóya nisarihuaꞌ.

76Quëmantaꞌ, conpa, Yosë aꞌpaarinquën piyapinënpita pënënacaso marëꞌ.

Sinioro isoroꞌpaquë yaoꞌmarin niꞌton, pënëntaran piyapiꞌsari natëcaiso marëꞌ.

77Yosë piyapinënpita itapon:

‘Oshanëmaꞌ inquitatënquëmaꞌ,

Sinioro anoyacancantarinquëmaꞌ,’ itaran.

78Yosë nosoroatonpoaꞌ, inápa quëran aꞌpintimarinpoaꞌ.

Piꞌi aꞌpintërinpoaso pochin noꞌtëquën anitotërinpoaꞌ.

79Tashinan pochin cancantopirëhuahuëꞌ,

aꞌpintatë pochin nitarinpoaꞌ noya nanpicaso marëꞌ.

Anoyacancantohuachinpoaꞌ, sano cancantarihuaꞌ,” tënin Sacariasë.

80Ina quëran huiꞌninsoꞌ soꞌsorahuaton, huiꞌnapitarin huachi. Yosë yonquiarin niꞌton, chiníquën cancantarin. Inotëro parti yaꞌhuëárin. Ina quëran oshaquëran Yosëri shaꞌhuitërin israiroꞌsaꞌ pënënacaso marëꞌ.

Currently Selected:

Lucas 1: cbt

Highlight

Copy

Compare