Joel 1
1
Israiroꞌsa sëquërëꞌ quëran parisitopisoꞌ
1Caso Coiroco. Tatahuësoꞌ, Pitoiro itopi. Iporasoꞌ Sinioro huaꞌnarëso pochin anitotërincosoꞌ, ninshitaranquëmaꞌ.
2Cota huëntonquë mashoyanquëma yaꞌhuëramasopita,
yaꞌipi ina huëntonquë yaꞌhuëramasopitantaꞌ,
noya natanco shaꞌhuichinquëmaꞌ:
¡Tëhuënchachin co onporonta niꞌnamasohuëꞌ niꞌsaramaꞌ!
Shimashonëmapitanta yaꞌhuëaponaꞌ,
¡tëhuënchachin co onporonta ina pochin niꞌchinpihuëꞌ!
3Ipora niꞌsaramasoꞌ, canpitanta huiꞌnamapita shaꞌhuitocoꞌ.
Inapitantaꞌ, huiꞌninapita shaꞌhuichinaꞌ.
Shiparimapita piquëran huaꞌhuatopisontaꞌ, shaꞌhuichinaꞌ.
4Yaꞌhuërëhuaso noꞌpaquë sëquërëꞌ huëꞌsahuaton,
yaꞌipi cosharo pëꞌyatërinpoaꞌ.
Nisha nisha nipisopitari niyaꞌhuërëton huëcatonaꞌ, napotërinënpoaꞌ.
5Noꞌpirahuëtënquëmaꞌ, ¡huënsëco huachi!
Huino paꞌyatëramasopita, sëtatoma naꞌnëcoꞌ.
Oparoroꞌsa sëquërëri pëꞌyarin niꞌton,
co huachi huino nicacaiso yaꞌhuërinhuëꞌ.
6Sëquërëroꞌsasoꞌ chiníquën sontaroꞌsa huënton pochin nicatonaꞌ,
yaꞌhuërëhuaso noꞌpaquë yaꞌconpi.
Yaꞌipi yanquërahuatonaꞌ, naramëroꞌsa pëꞌyarin.
Paꞌpiniꞌ natëquën quëran mápinën pëꞌyarinso pochin nipi.
7Yaꞌipi oparonënpoapita pëꞌyapi.
Yaꞌipi iquiraroꞌsanta pëꞌyapi.
Shaꞌhuëtën quëran huarëꞌ capatonaꞌ, ironantërin.
Sëꞌpainpitantaꞌ, huirinantaquë huarëꞌ aꞌporin.
8Nasha soꞌyahuan soꞌin chiminpachina,
co napion ancantaton, naꞌnërin.
9Inapochachin corto huaꞌanoꞌsanta naꞌnëpi.
Co huachi Yosë marëꞌ tëranta
cosharoꞌ, huino, inapita quëpihuëꞌ niꞌton, napopi.
10Iminoꞌsaquë capa cosharo huachi.
Nichimiyantohuachinara sëtopiso pochin noꞌpantaꞌ, tanahuantárin.
Triconta capa ninin.
Oparoroꞌsaꞌ, oriporoꞌsaꞌ, inapitanta yanirin.
11Imin camayonquëmaꞌ, shaꞌtëramasopita tapitërinënquëmaꞌ.
Trico, sipata, inapita shaꞌpiramahuëꞌ,
co huachi nitërinsoꞌ masaramahuëꞌ.
Napoaton co napion ancantatomaꞌ, naꞌnëcoꞌ.
12Oparoroꞌsaꞌ, iquiraroꞌsaꞌ, cranata huayoroꞌsaꞌ,
inapitanta yanipi.
Mansanaroꞌsaꞌ, palmeraroꞌsaꞌ,
nisha nisha nararoꞌsa nipisopita, yanirin.
¡Inapoatëhua Cota huëntonquë yaꞌhuërëhuasopitasoꞌ,
co napion cancantacaso yaꞌhuërin!
13Corto huaꞌanoꞌsanquëmaꞌ:
Canpitasoꞌ Sinioro artaronënquë sacatëramaꞌ.
Yosënënpoa chinotërëhuaso pëiquë,
co huachi Sinioro marëꞌ cosharoꞌ, huino, inapita quëpihuëꞌ.
Napoaton sëtonëmaquë saꞌcatën aꞌmosahuatomaꞌ,
yaꞌipi tashi naꞌnëcoꞌ.
14Yaꞌipi Cota huëntonquë piyapiꞌsa ayontonahuatomaꞌ,
ayono nicacaiso camaicoꞌ.
Sinioronënpoa chinotërëhuaso pëiquë
yaꞌipi ansianoꞌsantaꞌ, niyontoinaꞌ.
Niyontonahuatonaꞌ, catahuainpoaso marëꞌ Sinioro nonchinaꞌ.
15Anaꞌintacaso tahuëri nani naniriarin.
Ina tahuëri nanihuachin, ¡maꞌhuántacha nisarëhua paya!
Naporoꞌ Siniorosoꞌ ataꞌhuatarinpoaꞌ.
Yaꞌipi nanitapaton inapotarinpoa huachi.
16Canpoara yaꞌpiranpoa quëran chachin
sharoꞌsa osërëtërinënpoasoꞌ niꞌnëhuaꞌ.
Napoaton co huachi Sinioro pëinënquë capa cancantërëhuahuëꞌ.
17Noꞌpaꞌ taparopiquë yaꞌpirin shaꞌpirinahuëꞌ,
co oꞌnaninhuëꞌ niꞌton, inaquëranchin chiminin.
Napoaton co huachi trico macacaso yaꞌhuëaponhuëꞌ.
Cosharo tapacaiso pëiroꞌsantaꞌ, capanantësáchin quëparitërin.
18Pëꞌtahuaroꞌsanta tanatonaꞌ, yamorotonaꞌ, noncarorápi.
Ohuacaroꞌsa pasto yonípirinahuëꞌ, co quënanpihuëꞌ.
Ohuica huëntonoꞌsantaꞌ, tanatonaꞌ, yamorotonaꞌ, taquirapi.
19Inapoatoi Sinioro nontarainquën.
Inotëroquë pastoroꞌsa yaꞌhuërinsoꞌ,
pëni ahuiquitëraꞌpiarin.
Yaꞌipi nararoꞌsanta yaꞌhuërinso napotërin.
20Tanan maꞌsharoꞌsa quëran huarëꞌ noncarotonaꞌ,
nontatë pochin nitarinënquën.
Iꞌshanaroꞌsa yaniraꞌpiapi,
pastoroꞌsa yaꞌhuërinquëntaꞌ, pëni ahuiquitërantararin.
Napoaton inahuanta napopi.
Currently Selected:
Joel 1: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
