Job 5
5
1Chiníquën: ‘Oo,’ tëquëꞌ. Tapona aꞌpanirinën.
¡Catahuainquënso marëꞌ
co aꞌna anquëni tëranta yaꞌhuërinhuëꞌ!
2Co yonquinahuanhuëꞌ nipatëra, noꞌhuitomiatërëꞌ.
Inapohuatëra chimirin yonitë pochin ninëꞌ.
3Aꞌnaquën piyapiꞌsa co noya
yonquiaponahuëꞌ, maꞌhuanarin.
Naporapirinhuëꞌ, co huaꞌquiya quëranhuëꞌ
yaꞌipi yaꞌhuëtërinso ataꞌhuantaponaꞌ.
4Inaponaꞌpi huiꞌninpitasoꞌ, co incari catahuaarinhuëꞌ.
Coisëroꞌsarinta naꞌcon naꞌcon anaꞌintohuachinaꞌ,
co inso tëranta ina marëꞌ nonsarinhuëꞌ.
5Shaꞌtërinsopita nitërinsontaꞌ,
tanarotopisopitari pëꞌyapon.
Nahuanoꞌsa huáncana ocoiatonaꞌ, pëꞌyaponaꞌ.
Maꞌsharáchin cancantopisopitari,
maꞌshanëna noyapaponaꞌ.
Inapotatona osërëtaponaꞌ.
6Pacatorosoꞌ inaora paporin.
Co noyahuëꞌ nicacasoso nipirinhuëꞌ,
co inaora nohuanton yaꞌhuërinhuëꞌ.
Inapochachin parisitacasonta
co topinan naporinhuëꞌ.
7Pën noꞌhuitohuachina,
chocaca chocaca chararin.
Inapochachin piyapinpoantaꞌ,
canpoara tëhuënënpoaquë parisirëhuaꞌ.
8Quëma pochin nisarahuë naporini,
Yosëíchin tahuërëtaantaꞌitohuëꞌ.
Catahuaincoso marëꞌ maꞌsha onporahuësoꞌ,
yaꞌipi shaꞌhuichitohuëꞌ.
9Inasoꞌ, nani maꞌsha paꞌpi huëhuëpiro
nininsopita ninin. ¡Naꞌaro naporin!
Naporinsopita
co insonta nanitërinhuëꞌ nitotacasoꞌ.
10Ina nohuanton isoroꞌpaquë oꞌnanin.
Napohuachina sharoꞌsa nipaꞌquirin.
11Sano piyapiroꞌsanta catahuahuachina,
noya noya acorin huachi.
Sëtopisopitantaꞌ,
sëto inquitaton acapacancanin.
12Aꞌnaquën yonquínahuan niꞌton,
aꞌnapita maꞌsha onpotacaisoꞌ yonquipi.
Napopipirinahuëꞌ,
Yosëso yonqui yonquínahuan niꞌton,
yonquipiso tapitarin.
Inapotohuachin,
co huachi yonquipiso chachin nisapihuëꞌ.
13Yonquinahuanoꞌsasoꞌ, yamonatopi.
Napopirinahuëꞌ,
Yosëso yonqui yonquínahuan niꞌton,
minsëaton atapanarin.
Piyapiꞌsa maꞌsha onpotacaisoꞌ yonquipirinahuëꞌ,
Yosëri yonquipiso tapiarin.
14Huaꞌyantërëso pochin cancantatonaꞌ,
tahuëri nipirinhuëꞌ, tashi pochin paꞌsapi.
Tashiri noyá iꞌcopitërinso pochin nisapi.
15Co noyahuëꞌ nipisopitari
saꞌahuaroꞌsa aparisitërin.
Napoaponahuëꞌ,
Yosëri inapita quëran nichaꞌësarin.
16Co chinipisopitahuëntaꞌ,
Yosëri catahuacaso ninapi.
Co noyahuëꞌ nipisopitaso nipirinhuëꞌ,
sëꞌcopianantatë pochin, maꞌsha onpotaton, acopitarin.
17Yosë pënënaponquën poꞌtërinquën.
Napoaton tëhuënchachin noya cancantëquëꞌ.
Inasoꞌ, yaꞌipi nanitaparin.
Ina nohuanton maꞌsha onpohuatan,
ama noꞌhuitëquësohuëꞌ.
18Ina nohuanton caniohuatan,
ina nohuanton chachin noyatapon.
Ina nohuanton parisitohuatan,
ina chachin inquitapënquën.
19Naquëranchin naquëranchin huëhuëpiro
ninin quëran nichaꞌësarinquën.
Ina nohuanton co nosorotáponhuëꞌ.
20Tanaro tahuëriꞌsa nipachin,
co chiminaponhuëꞌ.
Quira tahuëriꞌsantaꞌ,
co tëpaponënhuëꞌ.
21Yanonpinapihuachinën,
ina paꞌpoyarinquën.
Nonapitënën maꞌsha onpotochináchin
nitopirinënhuëꞌ, co tëꞌhuataranhuëꞌ.
22Tanaro tahuëriꞌsanta noya cancantaran.
Nisha nisha maꞌsha onpohuataontaꞌ,
noya chinitaran.
Maton maꞌsharoꞌsa
tërantaꞌ, co tëꞌhuataranhuëꞌ.
23Naꞌpiroꞌsanta co iminënpitaquë,
yaꞌcopiarinquënhuëꞌ.
Maton maꞌsharoꞌsanta payapënën.
Napoaton co sacai quëranhuëꞌ,
iminënquë sacataran.
24Pëinënquë yaꞌhuëpisopitanta
maꞌhuanaponaꞌ.
Pëꞌtahuanënpita pichihuatan,
co pahuanaponhuëꞌ.
25Paꞌpi notohuaroꞌ shiparinpita
yaꞌhuëtarinquën.
Iminquë pacatoro yaꞌhuërinso
pochin naꞌaponaꞌ.
26Sharoꞌsa cayahuachina, manëꞌ.
Inapochachin quëmantaꞌ,
máshoya nipiranhuëꞌ, chinirápon.
27Nani huaꞌqui tahuëri
nicato inapita nitotërahuë.
Yaꞌipi shaꞌhuitëranquënsoꞌ,
noꞌtëquënáchin ninin.
Nani shaꞌhuitëranquën niꞌton,
quëmarinta tëniriquëꞌ,” itërin Irihuasëri.
Currently Selected:
Job 5: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
