Job 38
38
Yosëri chachin Copo noꞌtëquën ayonquirinsoꞌ
(Coposoꞌ cara aminconënpita chachin aꞌpaniraꞌpiaton acopitëraꞌpiarin. Naporoꞌ aꞌna huiꞌnapi yaꞌhuërëꞌ, noantarin. Cara chachin Copo amiconënpita pënënin. Copori acopitëraꞌpiarinso marëꞌ pënënaꞌpiarin. Ina quëran Copo yaꞌhuërë tahuërëtahuaton, pënënin. Chiníquën pënënpirinhuëꞌ, inaso co insoari tëranta aꞌpanirinhuëꞌ.)
1Naporoꞌ Siniorori chachin panca ihuan quëran, Copo nontërin:
2“Chiníquën nanantërahuësoꞌ, co noꞌtëquën nitotatonhuëꞌ,
¡co manta nitotëransohuë pochin quëmasoꞌ nonan!
3Iporaso chiníquën cancantëransoꞌ, aꞌnotoco niꞌi.
Natanpatënquën: ¡Aꞌpanicona!
4Isoroꞌpaꞌ yaꞌhuëcaso marëꞌ
simintonën pochin nininsoꞌ acoasoco,
¿insëquëta naporo quëmasoꞌ nisaran?
‘¡Naꞌcon nitotërahuë!’ tënan niꞌquëhuarëꞌ,
¡Shaꞌhuitoco insëquësona naporo nisaransoꞌ!
5Inso napapisona isoroꞌpaꞌ acocasoꞌ, ¿inta ina yonquirin?
¿Inso pichinantonaꞌpirita pichinantërin?
6Isoroꞌpaꞌ achinicaso marëꞌ ¿maquëta simintonën acotopi?
Noya noya naꞌpinën nininsoꞌ, ¿macarita acotërin?
¡Cari mini inapita acotërahuë!
7Tahuëri yaꞌcari tayoraroꞌsa yaꞌnopisoꞌ,
piyapiꞌsa pochin cantasoiꞌ, cari inapita acotërahuë.
Anquëninëhuëpitanta capa cancantasoiꞌ, acotërahuë.
8Aꞌshin yoꞌnamën quëran huaꞌhuasha pipirin.
Inapochachin marëntaꞌ, acoporo quëran pipirin.
Ama taꞌhuëaton isoroꞌpaꞌ imotacaso marëhuëꞌ,
¡cari yaꞌcoananën oncotërëso pochin nitërahuë!
9Canopiaꞌhuasoꞌ, soꞌnashitëquë soꞌquëtërëꞌ.
Inapochachin marënta soꞌquëtërëso pochin nitamarëꞌ, chitoro acotërahuë.
10Insëquësona marë nanicasoꞌ, cari acotërahuë.
Yaꞌcoananën niahuitërëso pochin nitërahuë.
Ama ina aquëtë pacacaso marëhuëꞌ napotërahuë.
11Marë camaiato shaꞌhuitërahuë:
‘Isëquë huarëꞌ naniaran. Isëranso co naꞌhuëaranhuëꞌ.
Coꞌsacainënpita, co panorohuanhuë paꞌpiso pochin huëꞌpi.
Yonsaiquë huëncahuachina sanoapona huachi,’ itërahuë.
12Huënihuantacaso camaihuatana:
¡Co onporonta natëarinquënhuëꞌ!
¡Co quëma nohuanton tahuëririnhuëꞌ!
13Piꞌisoꞌ, yaꞌipi parti aꞌpinin.
Aꞌpinpachina, co noyahuëꞌ nipisopita naꞌpipi.
¡Co quëma camaitëran quëran aꞌpininhuëꞌ!
14Nisha sichoquë chipiroꞌ sichotohuatëra,
aꞌnaroáchin nonanpisoꞌ yaꞌnorin.
Inapochachin piꞌi aꞌpinpachina motopiroꞌsa yaꞌnorin.
Anconën quëran aꞌshitopinan aꞌmorëso pochin
isoroꞌpaꞌ yaꞌnorin.
15Co noyahuëꞌ nipisopitasoꞌ,
piꞌi aꞌpininso tëꞌhuatopi.
Napohuachina,
piyapiꞌsa maꞌsha onpotacaisoꞌ co huachi nanitopihuëꞌ.
16Acoporo quëran marë pipirinsoꞌ,
co insonta niꞌchininhuëꞌ.
¡Co quëmanta niꞌnanhuëꞌ!
17Piyapiꞌsa chiminpachinara,
tashinanquë paꞌsahuatona yaꞌhuëpi.
¡Inaquë yaꞌconpitaëchin co quëmaso niꞌchinanhuëꞌ!
18Isoroꞌpaꞌ onpo mitrosona pancanatërinsoꞌ,
co quëmasoꞌ nitotëranhuëꞌ.
Yaꞌipi nitotëranso pochin nonan niꞌquëhuarëꞌ:
¡Inta ina shaꞌhuitërico!
19Tahuëri, tashiꞌ, inapita
niquë niquë taparahuë.
¡Insëquësona taparahuësoꞌ,
co quëmasoꞌ nitotëranhuëꞌ!
20Tahuërihuachina yaꞌipi parti aꞌpinin.
Tashihuachinantaꞌ, yaꞌipi parti tashirin.
¡Ca nitotërahuë quëran inapitantaꞌ,
sacatoroꞌsa niyaꞌhuërëtopiso pochin nipi!
21Iráca nasitaton nitotërëso pochin
nonan niꞌquëhuarëꞌ:
¡Nani ipora yaꞌipi inapita nitotëran!
22Ocaiꞌ, ocai tachitërinsoꞌ,
inapitaso taparahuëquë yaꞌhuëárin.
Inapita taparahuëquë:
¡Co onporonta quëmasoꞌ niꞌconanhuëꞌ!
23Quira nicatona piyapiꞌsa niaparisitopi.
Napohuachinara,
ca nohuanton ocai anotohuachina, copi topi.
24Oꞌcori huënshaꞌ, topachina niosërarin.
Inapoaton ira pochin paꞌtërin.
¡Ina paꞌtërinsoꞌ, co quëmasoꞌ nohuitëranhuëꞌ!
Piꞌi pipirinso parti quëran ihuan huëcaton,
yaꞌipi isoroꞌpaquë yanquëërin.
¡Onpo paꞌninsona co quëmasoꞌ nitotëranhuëꞌ!
25Noꞌpaꞌ cashahuatëra, iꞌsha paꞌirinso pochin,
panca oꞌnaonta canquirin.
Huiraitohuachinantaꞌ, ira huëꞌshitë pochin ninin.
Incarisona inapita ira aꞌnotatë pochin nitërinsoꞌ,
¡co quëma nitotëranhuëꞌ!
26Cari mini inapita ira aꞌnotërëso pochin nitërahuë.
Inotëro parti oꞌnanacaso marëꞌ napotërahuë.
Inaquëso co piyapi yaꞌhuëpirinhuëꞌ, ca nohuanton oꞌnanapon.
27Ca nohuanton oꞌnanpachina,
tomaroꞌtë nipirinhuëꞌ, panpatoro papopon.
28Oꞌnan, poroncayoꞌ, inapitasoꞌ,
co piyapiꞌsa pochin paꞌpina yaꞌhuëtopihuëꞌ.
¡Ca nohuanton inapitaso yaꞌhuëpi!
29Ocaiꞌ, iꞌ tachitërinsoꞌ, inapitaso
co piyapi pochin aꞌshina yaꞌhuëtopihuëꞌ.
¡Ca nohuanton inapitaso yaꞌhuëpi!
30Iꞌshanta sëhuënquë naꞌpi pochin tachitërin.
Inapoaton marë aipintaꞌ, tachitërin.
¡Ca nohuanton inapitanta napopi!
31Tayoraroꞌsa huënton Priyatisë itopiquësoꞌ,
tayoraroꞌsa sësëshin yamopi.
Orion itopiquëso#38.31 Orionsoꞌ: Tayoraroꞌsa huënton ina pochin nohuitopi. nipirinhuëꞌ, tayoraroꞌsa aquë aquë yaꞌnopi.
¡Ca nohuanton inapitanta inapopi!
32Huëniosoꞌ, aꞌcayan yaꞌnorin.
¡Ca nohuanton inanta naporin!
Tocani paya#38.32 Tocani paya itopisosoꞌ: Tayoraroꞌsa huënton ina pochin nohuitopi. itopisosoꞌ tahuërinënquë yaꞌnorin.
Tocaniaꞌhua itopisonta#38.32 Tocaniaꞌhuasoꞌ: Tayoraroꞌsa huënton ina pochin nohuitopi. naporin.
¡Co quëma nohuanton yaꞌnopihuëꞌ!
33Tayoraroꞌsaso piꞌiroꞌtëquë, camaipinan pochin paꞌsapi.
¡Co quëmari camairan quëran napoapihuëꞌ!
¡Napoaton co quëma nohuanton
isoroꞌpa aꞌpintopihuëꞌ!
34Cari chitoro camaihuatora, oꞌnan anotërin.
Quëmasoꞌ oꞌnanacaso marëꞌ camaihuatan,
¡co onporo natëarinquënhuëꞌ!
35Oꞌcori camaihuatora, nohuantërahuëquë paꞌsarin.
¡Quëmarisoꞌ camaihuatan, co onporo natëarinquënhuëꞌ!
36Yoꞌhuin tamë, huaꞌantëꞌ, inapitaso
yonquínahuan pochin nipi.
Co quëmari ina pochin acoranhuëꞌ.
37-38Onposona chitoro yaꞌhuërinsoꞌ, ¿inta nanitërin pichicasoꞌ?
Noꞌpaꞌ yaniton huëncharopachina,
ina shipirotacaso marëꞌ:
¿Inta nohuanton inápa quëran oꞌnan anotërin?
39Paꞌpiniꞌ payaroꞌsa huaꞌhuinpita aꞌcacaiso marëꞌ
cari mapinën yonítërahuë.
Napotohuatëra, amiaquë huarëꞌ caꞌpi.
Co quëmari mapinën yonítëranhuëꞌ.
40Yaꞌhuërinquëhuë nipon, niquihuinanquëhuë nipon,
mapintacaiso marëꞌ yaꞌchorantapi.
Maꞌsha naꞌhuëhuachina,
pashitaꞌpatonaꞌ, tëpaquë huarëꞌ, nitopi.
41Itatanaꞌhuaroꞌsa tanahuachina noncaropi.
Aꞌshinari aꞌcacaiso marëꞌ maꞌsha yonípachinara,
cari quëtërahuë.
¡Co quëmari quëtëranhuëꞌ!
Currently Selected:
Job 38: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
