Job 14
14
Piyapinpoa co huaꞌqui nanpiarëhuasohuëꞌ
(Irihuasëri nontohuachina, Coposoꞌ aꞌpaniantarin. Tonitohuachina, Piritatori yaꞌhuërëꞌ Copo nontaantarin. Inanta Copori aꞌpaniantarin. Ina quëran Sohuarori yaꞌhuërëꞌ, Copo nontaantarin. Inanta aꞌpaniantarin. Ina aꞌpanirinso tiquiapon pochin Yosë nontaton, tapon.)
1Piyapicoisoꞌ,
sanapi quëran huaꞌhuatatoi,
co chiniraihuëꞌ.
Co huaꞌqui nanpipiraihuëꞌ,
naꞌcon parisitërai.
2Yanco huësohuatochina ahuiantarin.
Inapochachin piyapicointaꞌ,
aꞌnaroáchin capa nisarai.
Huaꞌyanëhuëi piꞌiquë,
aꞌnaroáchin naꞌhuërinso pochin ninai.
3Ina pochinco niꞌto,
¡co yonquiancoso yaꞌhuërinhuëꞌ!
¡Co coisë pochin nitancoso yaꞌhuërinhuëꞌ!
4Piyapicoi co aꞌnayacoi tëranta
noyápiachin cancantëraihuëꞌ.
Ina pochin nininso huiꞌnarinco niꞌton,
nëꞌhuëtërahuëso pochin cancantërahuë.
5Onposona nanpicaꞌhuaisoꞌ,
quëma isoroꞌpaquë quëtërancoi.
Chiminaꞌhuaiso nanihuachin,
co piꞌpisha tëranta naꞌhuëarinhuëꞌ.
6Inapoarai niꞌton,
ama yonquicoisohuëꞌ.
Quiyaora yaꞌhuëatoi sano cancanchi.
Pahuërë marëꞌ sacatëraiso pochin
nicatoi noya ancanchi.
7Nara aꞌnëhuatëra,
papoyantacasoꞌ ninarëꞌ.
Papoyantohuachina naꞌantarin.
8Itënsoꞌ nani aꞌshiitë masho.
Namënëonta chiminaton mocasarin nipirinhuëꞌ,
9oꞌnani masápachina papotaantararin.
Nasha shaꞌpinan nara pochin sëꞌpahuantarin.
10Piyapiso napoaponahuëꞌ chiminpachina,
co aso inapoyátërarinhuëꞌ.
¡Inapohuachina copi tochaanin!
11Sonoroꞌsanta tomoitaton yanirin.
Iroꞌsanta inapohuachina yanirin.
Ina pochin piyapicointa chiminpatoira,
capa nisarai.
12Napohuatoisoꞌ,
co piꞌiroꞌtëꞌ taꞌhuanchátërasohuëꞌ,
paꞌpitërinacoi quëran co yaꞌnoaraihuëꞌ.
Huëꞌërai pochin ninaisoꞌ,
co capayatëraiso pochin nisaraihuëꞌ.
13Chimipiroꞌsa yaꞌhuërin quëran
huënantacaso nanitërai naporini,
chiminacaso nohuanchitohuëꞌ.
Inapoasoco, noꞌhuitëranso
asanorahuaton yonquiantaꞌitoncohuëꞌ.
14Napoaponahuëꞌ piyapi chiminpachina,
co huachi nanpiantaponhuëꞌ.
Sontaroꞌsasoꞌ, sirhuitopi quëran
pipicaisoꞌ ninapi.
Nanpiantacaso yaꞌhuërin naporini,
ina pochin cantaꞌ,
nanpiantaꞌhuaso ninaitohuëꞌ.
15Tahuëri nanihuachin përaitoncohuëꞌ.
Nanpiantarahuato, aꞌpaniitënquënhuëꞌ.
Quëma ninanco niꞌton, nosoroꞌitoncohuëꞌ.
16Iporaso mini
oshahuanahuëso marëꞌ anaꞌintëranco.
Naporoso co huachi
oshanëhuë yonquiꞌitonhuëꞌ.
17Tëhuërahuësopita naniantaton,
yaꞌipi oshanëhuë inquichitoncohuëꞌ.
18Motopiroꞌsa notarintopi.
Natëtëroꞌsanta nopoatatonaꞌ, nohuatopi.
19Chiniiri naꞌpiroꞌsa asoquirin.
Oꞌnaninta amocan quiquirin.
Inapochachin quëmantaꞌ,
piyapi noya yaꞌhuëcaso ninarinso osërëtëran.
20Canamiatahuaton, noꞌpanën quëran tëꞌyatëran.
Inapotohuatan, nishinahuën niꞌtahuaton paꞌsarin huachi.
21Huiꞌninpita piyapiꞌsari noya niꞌpachinaꞌ,
co nitotarinhuëꞌ.
Taparo nitohuachinantaꞌ, co nitotarinhuëꞌ.
22Nanpiraiquëáchin iquitaꞌhuaisoꞌ,
sëtatoi co napion ancantaꞌhuaisoꞌ, inapita yaꞌhuërin, itërin.
Currently Selected:
Job 14: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
