Jueces 9
9
Apimirico copirno yaꞌconinso marëꞌ Cotamo pënënto nanan shaꞌhuirinsoꞌ
1Shaꞌhuitëranquëmaso chachin Apimiricosoꞌ, Quiropaaro huiꞌnin. Aꞌshinso Siquimo sanapi niꞌton, naꞌa quëmopinënpita inaquë yaꞌhuërin. Napoaton Apimiricosoꞌ, inaquë paꞌnin inapita nontapon:
2—Canpoaso quëmopinpoa ninëhuaꞌ. Napoaton maꞌsona nicacasoꞌ shaꞌhuitaranquëmaꞌ. Iporasoꞌ canchisë shonca yaꞌpi tata huiꞌninpitaráchin huaꞌanëntarinquëmaꞌ. Siquimo yaꞌhuëhuanoꞌsa canpitari nontocoꞌ: “Aꞌnaíchin Quiropaaro huiꞌnin huaꞌanënchinpoaꞌ,” taꞌcaiso marëꞌ anohuantocoꞌ, itërin. 3Apimiricoso quëmopinëna niꞌton, nohuantopi catahuacaisoꞌ. Napoatona ina imacaiso marëꞌ yaꞌhuëhuanoꞌsa anohuantopi. 4-5Naporahuaton canchisë shonca coriqui prata quëran nininsoꞌ quëtopi. Paaro-piri moshapiso pëi quëran, macatona quëtopi. Ina coriquiquë inasoꞌ, imacaiso marëꞌ tëpatoroꞌsa pahuërërin. Inapitarë chachin Opraquë paꞌnin. Paꞌpincoꞌ yaꞌhuërinquë paꞌsahuaton, saota shonca iscon iin mashonënpita tëparin. Aꞌnara pancaraꞌpi aipi tëparin. Cotamo itopisoíchin naꞌpirahuaton chaꞌërin. Inaso Quiropaaro huiꞌnin huaꞌhua nininsoꞌ. 6Ina piquëran Siquimoroꞌsaꞌ, Piti-miroroꞌsaꞌ, inapita niyontonpi. Insina nara yaꞌcariꞌ niyontonpi. Ina pirayan naꞌpi moshacaiso marëꞌ acopiso yaꞌhuërin antaꞌ. Inaquë niyontonahuatonaꞌ, Apimirico copirno nicacaso marëꞌ acopi.
7Ina nitotaton Cotamosoꞌ, Quirisin motopi itopiquë nanpëontarin. Inatohua quëran yaꞌipi Siquimoroꞌsari natanacaiso marëꞌ chiníquën nonin:
“Siquimoquë yaꞌhuëramasopita yaꞌipinquëma noya natanco ayonquiꞌinquëmaꞌ. ¡Inapochachin canpitantaꞌ, Yosë noya nataꞌinquëmaꞌ! 8‘Aꞌnarora nararoꞌsantaꞌ, copirno nohuantopi. Napoaton oripo nara natanpi: “Quëma copirnonëhuëi niquë topiraihuëꞌ,” itopi. 9Oriporiso nipirinhuëꞌ, itapon: “Co nanitërahuëꞌ. Copirno yaꞌconpatosoꞌ, co huachi cá quëran toma ocoiyapihuëꞌ. Ina quëran piyapiroꞌsa Yosë noya nicatona chinotopi. Inahuara capinintaꞌ, noya ninicatona nipashitopi,” itërin.
10-11Napotohuachina nararoꞌsasoꞌ, iquira nara yaꞌhuërëꞌ inachachin natanpi. Natanpirinahuëꞌ, inanta tapon: “Co nanitërahuëꞌ. Copirno yaꞌconpatosoꞌ, co huachi cashi cashin nininsopita nitapohuëꞌ,” tënin.
12-13Napotohuachina nararoꞌsasoꞌ, opa nara yaꞌhuërëꞌ inachachin nataantapi. Natanpirinahuëꞌ, inanta tapon: “Co nanitërahuëꞌ. Copirno yaꞌconpatosoꞌ, co huachi cá quëran huino nisapihuëꞌ. Ina oꞌotona piyapiroꞌsa capa cancantopi. Yosënta capa cancantërin,” itërin.
14Napoin quëran nararoꞌsasoꞌ, nahuanton nara sarsa itopisoꞌ yaꞌhuërëꞌ natanpi. 15Napotohuachinara, nahuanso tapon: “Tëhuënchachin copirnonëma nicaꞌhuasoꞌ nohuantohuatamaꞌ, yaꞌipinquëma huanirahuësoanaquë naꞌicoꞌ. Napoaponahuëꞌ, co copirnonëma nicaꞌhuaso nohuantohuatamahuëꞌ, cá quëran pën pipiarin. Yaꞌipi Nipano motopiroꞌsaquë nonara yaꞌhuërinso ataꞌhuantacaso marëꞌ pipiarin,” tënin inasoꞌ.’
16Iporasoꞌ carima shaꞌhuichinquëmaꞌ: Apimirico copirnonëma nicacaso marëꞌ acoatomaꞌ, co noyahuëꞌ ninamaꞌ. Nisha nisha cancantatoma naporamaꞌ. Tatahuësoꞌ iráca noya catahuapirinquëmahuëꞌ, canpitarisoꞌ co nosororamahuëꞌ. Quëmopinënpitantaꞌ, co inapotëramahuëꞌ. 17Matianoꞌsa quëran nichaꞌëinquëmaso marëꞌ, inaso chiminchináchin ahuëtërin. 18Canpitaso nipirinhuëꞌ, tatahuë huiꞌninpitacoi, aꞌporamacoi. Saota shonca iscon yaꞌpi pancaraꞌpi aipi tëparaꞌpiaramaꞌ. Casáchin chaꞌërahuë. Naporahuaton cosonanënquë huiꞌnahuaninsoꞌ, copirno nicacaso marëꞌ acoramaꞌ. Inaso Apimirico itëramaꞌ. Quëmopinëma nininso marëáchin acoramaꞌ. 19Napoaton carima ipora itaranquëmaꞌ. Tëhuënchachin tatahuë, huiꞌninpita, inapita noya nicatoma Apimirico copirno acohuatamaꞌ, Sinioro catahuainquëma inarëꞌquëma noya yaꞌhuëcoꞌ. Inanta canpitarë noya yaꞌhuëꞌin. 20Coꞌsoꞌ ina pochin cancantatomarahuë acohuatamasoꞌ, Apimirico quëran pën pipiꞌin. Pën pipirahuaton yaꞌipi Siquimoquë yaꞌhuëramasopita ataꞌhuanchinquëmaꞌ. Piti-miroquënta yaꞌhuëpisoꞌ, inapochin. Siquimo, Piti-miro, inaquëranpitanta pën pipirahuaton Apimirico ataꞌhuanchin,” tënin Cotamo.
21Ina tosahuaton Piiri ninanoquë taꞌarin. Iin mashonën tëꞌhuataton, inaquë yaꞌhuëcaso marëꞌ paꞌnin. 22Apimiricosoꞌ, israiroꞌsa cara piꞌipi huaꞌanëntërin. 23-57(-)
Currently Selected:
Jueces 9: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
