Jueces 5
5
Tipora, Paraco, inapita cantapisoꞌ
1Inimicoroꞌsa minsërahuatona Tipora, Paraco, inapitaso iso pochin cantapi.
2Yaꞌipinquëma Sinioro chinotocoꞌ.
Israiro nacionquë quëmapi nipisopita yaꞌhuërarin niꞌton, chinotocoꞌ.
Quëmapiꞌsa niꞌtonaꞌ, ipora huanta yaahuëtapi.
Huaꞌanëni ina marëꞌ përapachina: “Noyapaꞌ. Huëco paꞌahua nipachin,” topi.
3Copirno ninamasopita natanco. Chirinchi ninamasontaꞌ, natanco:
Sinioro cantanën cantarahuë. Israiroꞌsacoi Yosë chinotëraisoꞌ, cantanën cantarahuë.
4Sëir parti quëran Sinioro pipihuatana, isoroꞌpaꞌ nacontërin.
Piꞌiroꞌtënta nipaꞌtanin. Chitoro quëranpita oꞌnan huiꞌshirin.
Itomo noꞌpa quëran pipihuatana, naporin.
5Quëma notënanquë Sinioro, motopiroꞌsa nacontërin.
Sinai motopinta nacontërin. Israiroꞌsacoi Yosë chinotëraiso notënanquë, naporin.
6Anato huiꞌnin Samacaro itopi.
Ina nanpiso tahuëriꞌsaꞌ, Cairi nanpiso tahuëriꞌsanta isopopi:
Israiroꞌsa iratohuachinara, co tëquën iraroꞌsa paꞌtopihuëꞌ.
Huëhuëpiro iranatëroꞌsa paꞌtopi.
Ama inimicoroꞌsari quënanacaiso marëhuëꞌ napopi.
7Israiro ninanoaꞌhuaroꞌsasoꞌ patopi.
Co pairahuanoꞌsahuëꞌ niꞌton, patopi. Naporoꞌ caso huanirahuë huachi.
Ca Tiporaco huanirahuë. Israiro nacion aꞌshin pochin niꞌto, huanirahuë.
8Naní quëran israiroꞌsasoꞌ mamanshiroꞌsa mosharapi.
“Nasha yosëroꞌsaꞌ,” taꞌtona moshapi.
Aꞌnapita israiroꞌsaso inimico ahuëasoi naporapi.
Ninano yaꞌcoanaroꞌsaquë huëꞌpachinara, ahuëasoi naporapi.
Catapini shonca huaranca Israiro sontaroꞌsa yaꞌhuëpi.
Yaꞌhuëaponaraihuëꞌ, iscoto nipaꞌshintacaisoꞌ capa.
Co nansa tëranta yaꞌhuëtopihuëꞌ.
9Israiro huaꞌanoꞌsa napopiso marëꞌ: “Yosparinquën,” itërahuë.
Israiro sontaroꞌsanta ahuëtai marëꞌ përapatoira:
“Noyapaꞌ. Huëco paꞌahua nipachin,” topi.
Napopiso marëntaꞌ: “Yosparinquën,” itërahuë.
¡Yaꞌipinquëma Sinioro chinotocoꞌ!
10-11Aꞌnaquëmasoꞌ, huiri moraroꞌsaquë paꞌnamaꞌ.
Noya huënsënanoꞌsaquë aꞌnaquëmanta huënsëramaꞌ.
Aꞌnaquëmaso nipirinhuëꞌ, topinan ira paꞌtëramaꞌ.
Naporamasopita yaꞌipinquëma shaꞌhuicoꞌ.
Pëꞌtahuaroꞌsa iꞌsha oꞌopiquë huaꞌna shari shari piꞌniatomaꞌ:
“Ma noyacha Siniorosoꞌ minsëtërin paya,” tocoꞌ.
Israiro ninanoaꞌhuaroꞌsaquë minsëtërinsoꞌ yonquiatomaꞌ, inapocoꞌ.
12Capayatërëso pochin cancantëquë Tipora.
Capayatërëso pochin cancantaton cantaquëꞌ.
Quëmanta Paraco Apinoamo huiꞌninquën.
¡Huaniton inimicoroꞌsa manansoꞌ quëpaquëꞌ!
13Naporoꞌ Israiro sontaroꞌsaꞌ, motopi quëran nohuaramapi.
Chini chiníquënoꞌsa nipisopita ahuëcaiso marëꞌ napopi.
Përarahuë niꞌton, Sinioro sontaronënpita niyontonpi.
Inimico sontaroꞌsa ahuëcaiso marëꞌ niyontonpi.
14Aꞌnaquën Iprain huënton sontaroꞌsanta oꞌmapi.
Mincamin huënton sontaroꞌsantaꞌ, inahua piquëran canquipi.
Maquiri shinpita huaꞌanoꞌsantaꞌ, huëꞌpi.
Saporono huënton chirinchiroꞌsanta huëꞌpi.
Ahuëtai marëꞌ motopianaquë paꞌmapi.
15-16Isacaro huënton huaꞌanoꞌsantaꞌ, Tipora caꞌtanpi.
Inapitanta Paraco catahuacaiso marëꞌ paꞌpi.
Motopianaquë Paraco imamapi.
Nopino huënton sontaroꞌsa huaꞌanënpitasoꞌ: “Quiyasoꞌ quëmapicoi,” topi.
Noꞌtëquën naporini, co ohuica huëntonoꞌsa pirayan quëparichitonahuëꞌ.
Ohuica aꞌpairoꞌsa ohuicanëna përapisoꞌ natanápatonaꞌ, co noyahuëꞌ nipi.
17-18Carata parti yaꞌhuëpisontaꞌ, Cortaniiꞌ aquëtëranchin quëparitopi.
Tano huënton sontaroꞌsanta nancha nonshinanoꞌsa pirayan quëparitopi.
Asiri huënton sontaroꞌsantaꞌ, yaꞌhuëpiquëranchin quëparitopi.
Marë yonsan parti quëparitopi.
Saporono, Nipitari, inapita huëntonoꞌsantaꞌ:
“Chiminapoi nimara,” taponaraihuëꞌ, ahuëtacaiso marëꞌ oꞌmapi.
19Naporoꞌ copirnoroꞌsaꞌ, Tanaco ninanoquë huëꞌpi.
Miquito iꞌsharoꞌsa pirayan paꞌmapi.
Canaan copirnoroꞌsa ahuëtai marëꞌ huëꞌpirinahuëꞌ, co prata mapihuëꞌ.
Co manta paꞌton nininsoꞌ mapihuëꞌ.
20Tayoraroꞌsa piꞌiroꞌtëquë yaꞌhuëpi.
Inapitanta catahuainpoaso marëꞌ Sisara ahuëimatë pochin nipi.
Sinioro catahuarinpoa niꞌton, napopi.
21Quison iꞌsha itopisori yaꞌipi motoꞌ pama huëcaton, inimicoroꞌsa quiquirin.
Yapëntonpirinahuëꞌ, amocan huitërëso pochin nitërin.
Inaso iꞌsha, iráca yaꞌhuërinsoꞌ.
Inari chiníquën nanantopisopita sëꞌcopiconotërëso pochin nitërin.
22Cahuarioroꞌsa yancopisontaꞌ, irin irinchararin.
Chiníquën cahuarioroꞌsa niꞌtonaꞌ, taꞌa taꞌacharapi.
23Sinioro anquëninën naporin:
“Mirosi ninanoquë yaꞌhuëpisota paꞌpi co noyahuëꞌ nicato, ama huachi noya yaꞌhuëcaiso marëhuëꞌ shaꞌhuitarahuë.
Sinioro catahuacaiso marëꞌ naꞌa chiníquën cancantopisopita huëꞌpi.
Inahuaso co huëpihuëꞌ niꞌton, napotarahuë,” tënin.
24Cairiso nipirinhuëꞌ, aꞌnapita sanapiꞌsa quëran noya noya ninin.
Inaporin niꞌton, noya yaꞌhuëcaso marëꞌ shaꞌhuitarahuë.
Inasoꞌ, Ipiri saꞌin. Ipirinta Quini piyapi.
Israiro nëꞌmëtë pëiroꞌsaquë naꞌa sanapiꞌsa yaꞌhuërin.
Inapita quëran naꞌcon naꞌcon Cairisoꞌ, noya yaꞌhuëcaso marëꞌ shaꞌhuitarahuë.
25Iꞌshaíchin Sisararisoꞌ natanin.
Inariso nipirinhuëꞌ, ohuaca shoꞌshoiꞌ quëtërin.
Toma tomaiton, noya tasonquë chachin quëtërin.
26Inapotaponahuëꞌ, ahuënan quëran tachinara paintopinan manin.
Inchinan quëraontaꞌ, panca marticho manin.
Inaquë huëratëanain pirayan paquëëtahuaton, canca cancatarin.
27Cairi nantën pirayan Sisarasoꞌ, nianapitarin.
Iquitaton naporarin quëran chiminin huachi.
28Sisara aꞌshinsoꞌ, co napion cancantërin.
Huintana quëran notëtahuaton tapon:
“¡Huaꞌhuahuë toronanënquë canquicasoꞌ,
naꞌcon naꞌcon huaꞌquiarin!
¿Onpoatoncha napoca nicaya?” tënin.
29Aꞌnaquën yonqui yonquínahuan sanapiꞌsari itaponaꞌ:
Inaora chachinta naporin:
30“Ahuëtatona mapisoꞌ nipatomatapi ipora.
Cosonaroꞌsa aꞌnaya aꞌnayahuë nipon, cato catohuë nipon niquëtapi.
Sisara marësoꞌ, nisha nisha piꞌshi quëran paꞌtopinan nëꞌmëtëroꞌsaꞌ:
Aꞌnahuë nipon, catohuë nipon nisha nisha quëran ninshipisoꞌ nëꞌmëtë.
Minsëtonaꞌpi niꞌton, apëꞌpëconotacaso marëꞌ quëtapi,” tosapi.
31Ina pochin mini Sinioro yaꞌipi inimiconënpita taꞌhuanchinaꞌ.
Nosororinënquënsopitaso nipirinhuëꞌ, huënaráchin huënaráchin yaꞌnoinaꞌ.
Camotëchin piꞌi huënaratërinso pochin yaꞌnoinaꞌ, topi cantatonaꞌ.
Naporo quëran huarëꞌ israiroꞌsa catapini shonca piꞌi noya yaꞌhuëantapi.
Currently Selected:
Jueces 5: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.