Jueces 4
4
Tipora, Paraco, inapita napopisoꞌ
(Israiroꞌsasoꞌ, Yosë aꞌporahuatona co noyahuëꞌ nipi. Naporahuatona nisha nisha mamanshiroꞌsa moshapi. Napoaton Aran piyapiroꞌsariꞌton, posa piꞌipi aparisitopi. Inapitasoꞌ naꞌcon parisitatona Yosëri catahuacaso marëꞌ nontopi. Napohuachinara Sinioro nohuanton Otoniro itopisoꞌ huanirin. Inari nichaꞌësahuaton, catapini shonca piꞌipi catahuarin. Ina chiminpachina, israiroꞌsaso co noyahuëꞌ niantapi. Nisha nisha mamanshiroꞌsa moshaantapi. Napoaton Siniorori moaporoꞌsa yaꞌhuërëꞌ israiroꞌsa aparisitacaiso marëꞌ aꞌpatiintarin. Shonca posa piꞌipi aparisitopi. Naꞌcon parisitatona catahuacaiso marëꞌ Yosë nontopi. Napohuachinara Sinioro nohuanton loto itopisoꞌ huanirin. Inari nichaꞌësahuaton, posa shonca piꞌipi catahuarin. Ina piquëran co noyahuëꞌ niantahuachinara, huiristinoꞌsari yaꞌhuërëꞌ aparisitaantarin. Inapotohuachinara, Siniorori inapita nichaꞌëcaso marëꞌ Samacaro itopisoꞌ ahuaniantarin.)
1Ioto chimininso piquëran, israiroꞌsaso co noyahuëꞌ niantapi. Siniorori chachin niꞌsápirinhuëꞌ, napoantapi. 2Napohuachinara, Sinioro nohuanton Canaan copirno Capin itopisori huëꞌsahuaton, canairin. Capinsoꞌ, Asoro ninanoquë huaꞌanëntërin. Yaꞌipi sontaronënpita camairinsosoꞌ, Sisara itopi. Inasoꞌ, Arosi-coimo ninano itopiquë yaꞌhuërin. 3Capinsoꞌ, iscon pasa toronanoꞌsa huaꞌnamia quëran nipisoꞌ yaꞌhuëtërin. Naporahuaton cato shonca piꞌipi israiroꞌsa huaꞌanëntaton, paꞌpi aparisitërin. Nápo piꞌipi quëran huachi, catahuacaiso marëꞌ Yosë nontopi.
4Naporo tahuëriꞌsa israiroꞌsasoꞌ, aꞌna sanapiri huaꞌanëntërin. Inasoꞌ, Tipora itopi. Inaso sanapi, Yosëri anitotërinso shaꞌhuinaꞌpi. Soꞌinsoꞌ, Napito itopi. 5Inasoꞌ sanapi aꞌnara palmera tashinantërinquë yáhuënsërin. Huënsëyantërinquë niꞌton: “Tipora palmeranën,” itopi nohuitatonaꞌ. Iprain huënton israiroꞌsa noꞌpanën motopitontarinꞌpaꞌ yaꞌhuërin. Pitiri quëran Nama ninanoꞌpaꞌ ira paꞌninsoꞌ huáncana yaꞌhuërin. Israiroꞌsa nanan yaꞌhuëtohuachinara anoyatacaiso marëꞌ inaquë paapapi.
6Aꞌna tahuëri Tiporasoꞌ, Apinoamo itopisoꞌ huiꞌnin amatërin. Inasoꞌ, Paraco itopi. Quitisë ninanoquë yaꞌhuërin. Inaso ninanoꞌ, Nipitari israiroꞌsa huënton noꞌpaꞌ mapiquë yaꞌhuërin. Canquihuachina, itapon:
—Israiroꞌsanpoa chinotërëhuaso Yosë, iso pochin camairinquën: “Taporo motopiquë paꞌsahuaton, shonca huaranca Israiro sontaroꞌsa ayontonquëꞌ. Saporono, Nipitari, inapita huëntonoꞌsa quëran ayontonquëꞌ. 7Ca nohuanto Sisara huëcapayarinquën. Inasoꞌ, Capin copirno sontaronënpita camairinsoꞌ. Quison iꞌsha itopiquë huëcapayarinquën. Toronanënpita, sontaronënpita inapitarë chachin huëꞌsapi. Huëcapaipirinënquënhuëꞌ, carinquën catahuaranquën inapita minsëamasoꞌ,” tënin, itërin. 8Napotohuachina Paracosoꞌ tapon:
—Carëꞌquën paꞌpatan, naporo huarëꞌ paꞌsarahuë. Coꞌsoꞌ paꞌpatanhuëꞌ, co canta paꞌsarahuëꞌ, itërin.
9—Paꞌsarahuë mini. Napoaponahuëꞌ, Sinioro nohuanton aꞌnara sanapi Sisara tëpapon. Napoaton co quëmasoꞌ naꞌcon naꞌcon nahuinaponhuëꞌ: “Paraco ahuëtacaso caniaritaton, minsëtaquë huarëꞌ ninin,” co tëcaponahuëꞌ, itërin Tiporari.
Napotahuaton inarë Quitisë ninanoquë paꞌnin. 10Inaquë Paracosoꞌ sontaroꞌsa ayontonin. Saporono, Nipitari, inapita huëntonoꞌsa quëran, ayontonin. Niyontonpachinara, shonca huaranca sontaroꞌsa camaicaso marëꞌ ananirin. Tiporanta inarë chachin paꞌsarin. 11Quitisë ninano yaꞌcariꞌ, aꞌnara insina nara yaꞌhuërin. Saanain itopiquë yaꞌhuërin. Inaquë aꞌnara Quini piyapi Ipiri itopiso yaꞌhuërin. Nëꞌmëtë pëinënpita ótënahuaton, inaquë yaꞌhuërin. Inasoꞌ quëmopinënpitarëꞌ yaꞌhuëpirinhuëꞌ, huëshirahuaton inaquë yaꞌhuërin. Inapitasoꞌ, Opapo shinpita. Opaposoꞌ, Moisësë saꞌin yoꞌin. 12Paraco sontaronënpitarë chachin Taporo motopiquë niyontopisoꞌ, Sisara natantërin. 13Ina nitotaton sontaronënpita ayontonin. Iscon pasa huaꞌnamia toronanoꞌsanta yontonin. Yaꞌipi inapitarë chachin Arosi-coimo ninano quëran pipipi. Pipirahuatonaꞌ, Quison iꞌsha itopiquë huarëꞌ paꞌpi. 14Naporoꞌ Tiporari Paraco itapon:
—Pashi tëquë huachi. Ipora mini Sinioro catahuararinquën. Sisara sontaronënpitarë chachin minsëcamaso marëꞌ napotarinquën. Sinioro chachin quëchitaton quëma sontaronënpita maꞌsona nicacaisoꞌ anitotarin, itërin.
Naporoꞌ Paracosoꞌ, Taporo motopi quëran nohuaramarin. Shonca huaranca sontaronënpitarë chachin oꞌmarin. 15Sisara sontaronënpitarëꞌ niquënanpi huachi. Niahuëhuachinara, Siniorori Sisara sontaronënpita aꞌpayamiatërin. Toronanoꞌsaquë paꞌnapiroꞌsanta inapotërin. Sisara quëran huarëꞌ paꞌyanënquë toronanën quëran nohuararin. Nohuararahuaton noꞌpaꞌ taꞌatërin. 16Inapoaso Paracontaꞌ, sontaronënpitarë chachin inimico sontaroꞌsa imapi. Toronanoꞌsaquë paꞌnapiroꞌsanta Arosi-coimo ninanoquë huarëꞌ imapi. Naporo tahuëri Sisara sontaronënpita yaꞌipi tiquipi.
17Naporo tahuëriꞌsa copirno Capinsoꞌ, Ipirirëꞌ noya ninicaton yaꞌhuërin. Quëmopinënpitarënta napopi. Shaꞌhuitëranquëmaso chachin Ipirisoꞌ, Quini piyapi ninin. Napoaton Sisarasoꞌ ina yaꞌhuërinquë taꞌarin. Ipiri saꞌin nëꞌmëtë pëinënquë huarëꞌ nincanin. Inasoꞌ sanapi Cairi itopi. 18Cantonpachina, inari noyasha nontërin:
—Huëquë yaꞌcointaquë imoya. Ama tëꞌhuaquësohuëꞌ, itërin. Yaꞌcoontahuachina, sahuanasaquë imotahuaton poꞌorin. 19Naporoꞌ Sisarasoꞌ, yamoroton iꞌsha natantërin. Napotohuachina inasoꞌ, ohuaca shoꞌshoiꞌ shaꞌhuëtë morsaquë taparinsoꞌ manin. Iꞌshiritahuaton taꞌpanin. Ina quëran oꞌocaso marëꞌ quëtërin. Nani oꞌopachina, imotaantarin. 20Naporoꞌ Sisarari itapon:
—Nëꞌmëtë pëinën yaꞌcoanaquë huanitaquëꞌ. Inso tëranta huëcaton: “¿Insha tëranta isëquë yaꞌhuërin? topachina: ‘Capa co yaꞌhuërinhuëꞌ,’ itëquëꞌ,” itërin. 21Sisarasoꞌ paꞌpi canotaton inaquëranchin huëꞌërin. Huëꞌëton noyá huaꞌcotërin. Ina niꞌsahuaton Cairiso panca marticho manin. Nëꞌmëtë pëi achinicaso marëꞌ tachinara paintopisonta manin. Inapita masahuaton oshaquëran paaparin. Monshorahuaton, huëratëanain pirayan nara paintopiquë paquëëtërin. Inapotërinquëranchin ahuëantaton papitërin. Ina pochin Sisara chiminin.
22Ina imaton Paraco canquihuachina, Cairiri nacapirahuaton itapon:
—Quëmapi yonisaransoꞌ, huëquë aꞌnochinquën huachi, itërin. Napotahuaton nëꞌmëtë pëinënquëꞌpaꞌ poꞌmorin. Inaquë Sisara quënanconin. Motën papitopinan chimipi tantëtëárin quënanconin. 23Inapotaton Siniorori Canaan copirno Capin itopisoꞌ atapanin. Israiro sontaroꞌsari sontaronënpita minsërin niꞌton, atapanin. 24Naporo quëran huarëꞌ israiroꞌsasoꞌ, Canaan copirno Capin itopisoꞌ, naꞌcon naꞌcon ahuëpi. Napotërapi quëran ataꞌhuantopi huachi.
Currently Selected:
Jueces 4: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.