Génesis 50

1Paꞌpin chiminpachina Cosisoꞌ, ina nonën iporin quëran naꞌnërin, apinorin, napotërin. 2Ina quëran notoronënpita camairin paꞌpincoꞌ nonën tapacaisoꞌ. Camaihuachina, ama chanatacaso marëhuëꞌ taparapi. Paꞌpincosoꞌ, Cacopo itahuatonaꞌ, Israiro itopi antaꞌ. 3Catapini shonca tahuëri quëran nonën tapapi huachi. Ina nápo tahuëri nohuantërin tapacaso marëꞌ niꞌton, ina nápo tahuëri sacatopi.

Iquipitoroꞌsasoꞌ, canchisë shonca tahuëri Cacopo marëꞌ sëtopisoꞌ imapi. 4-5Ina tahuëriꞌsa naꞌhuëhuachina, Cosisoꞌ huaraon catahuapisopita huaꞌanoꞌsaꞌ, nontërin:

—Tëhuënchachin noya niꞌpatamaco, ca marëꞌ huaraon nontooncoꞌ. Naporin Cosi: “Coꞌhuara tata chiminyátëraponhuëꞌ, camairinco Yoscoarëꞌ taꞌto natëcaꞌhuasoꞌ: ‘Nipaꞌpitaꞌhuaiso marëꞌ taparahuëquë chachin, poꞌmoontaco. Inasoꞌ, Canaan parti yaꞌhuërin,’ itërinco. Quëtoco paato tatahuë paꞌpitontaꞌi, topirahuë. Nani paꞌpitontahuato, oꞌmantarahuë tënin,” itocoꞌ, itërin. 6Shaꞌhuitohuachinara, huaraoniso huaꞌanoꞌsa itapon:

—Cosi shaꞌhuitoncoꞌ: “Paaton tatacoꞌ, paꞌpitontaquëꞌ. Shaꞌhuitërinquënso chachin nitontaquëꞌ,” itocoꞌ, itërin.

7-8Huaraoni napotohuachina, Cosisoꞌ, paꞌpin paꞌpitacaso marëꞌ paꞌnin. Yaꞌipi copirno catahuapisopita huaꞌanoꞌsa paꞌpi. Iinpitantaꞌ, quëmopinënpitarë chachin paꞌpi. Cosin partisoꞌ, huaꞌhuaroꞌsaráchin pëꞌtahuaroꞌsa aꞌpaicaiso marëꞌ patopi. 9Sontaroꞌsantaꞌ, aꞌnaquën toronanoꞌsaquë, aꞌnaquënso cahuarioroꞌsaquë, Cosi caꞌtanpi. Napoaton huaꞌhuayátërahuë piyapiꞌsa paꞌpi.

10Paꞌsápatonaꞌ, Corin-a-atatiquë canconpi. Inaquë niyontonatona panca sëtopi. Inaquë Cosi paꞌpin marëꞌ canchisë tahuëri sëtërinsoꞌ, naniantarin. (Corin-a-atatisoꞌ, trico toꞌnorapiquë) Ina noꞌpa quëransoꞌ, Cortaniiꞌ piꞌi yaꞌconinso parti acorin. 11Cananoꞌsa inaquë yaꞌhuëpisopitari, napopiso niꞌpi. Ina niꞌsahuatonaꞌ, inahua capini ninontopi: “Iquipitoroꞌsa paꞌpiapona huëcatonaꞌ, panca sëtapi,” topi. Napoaton ina noꞌpasoꞌ, aninihuanpi: Apiri-misraimo, itopi. Iquipitoroꞌsa sëtopiquë, tapon naporin. Ina noꞌpa quëransoꞌ, Cortaniiꞌ piꞌi yaꞌconinso parti acorin.

12-13Cacopo huiꞌninpitasoꞌ, paꞌpin nanpipon camaitërinso chachin yaꞌipi nipi. Canaanquë quëpantarahuatonaꞌ, Maquipiraquë nanin yaꞌhuërinquë poꞌmoontapi. Iti piyapi, Ipron itopisori, ina noꞌpasoꞌ huaꞌanëntopirinhuëꞌ, Apraani iráca nipaꞌpitacaiso marëꞌ paꞌantërin. Ina naninso noꞌparë chachin, Mamiri yaꞌhuërin quëran, piꞌi pipirinso parti quëparitërin. 14Nani paꞌpin poꞌoroquë poꞌmohuachinara, Cosisoꞌ iinpitarë chachin Iquipitoquë paꞌmantapi. Yaꞌipi caꞌtaninsopitantaꞌ, paꞌmantapi.

Cosi iinpita napopisoꞌ

15Cacopo chiminpachina Cosi iinpitasoꞌ, ina tëꞌhuatatona inahua capini ninontopi: “Iráca aparisitërëhuaso marëꞌ tapona Cosi noꞌhuitonpoa yaiꞌhuërëtápirinpoahuëꞌ,” niitopi. 16-17Ina yonquiatonaꞌ, iso pochin nontacaiso marëꞌ aꞌnapita aꞌpapi: “Coꞌhuara tata chimiyantëraponhuëꞌ, camairincoi nontaꞌhuainquënsoꞌ: ‘Iyaparinpita aparisitopirinënquënhuëꞌ, co noyahuëꞌ nicatona oshahuanpisoꞌ, Yosë marëꞌ naniantëquëꞌ,’ itocoꞌ, itërincoi. Napoaton, quiyarionta nontarainquën nanan anoyataancoiso marëꞌ. Quiyantaꞌ, tatanpoa chinotërinso Yosë chachin imarai niꞌton, inapotocoi,” itopi. Napo nontasoiꞌ, Cosiso naꞌnërarin.

18Naporo chachin iinpitantaꞌ, canquipi. Canquihuachinara, isonpi quëran noꞌpaquë huarëꞌ monshorahuatonaꞌ, moshaipi. Mosharahuatonaꞌ, itopi:

—Maꞌtana iya, yaꞌhuarai. Huaꞌanëntatoncoi yacamaihuatancoi, inapotocoi, itopi. 19Napotopirinahuëꞌ, Cosiriso itapon:

—Ama iyaroꞌsa paꞌyancosohuëꞌ. Caso piyapico niꞌto, co nanitërahuëꞌ Yosë yaꞌhuërënamën pochin nicaꞌhuasoꞌ. 20Canpitaso mini, maꞌsha onpotamacoso yonquipiramahuëꞌ, Yosëso nipirinhuëꞌ, inaporamaso anoyatërin. Ama notohuaroꞌ piyapiꞌsa taquicaiso marëhuëꞌ, inaporin. 21Napoaton ama paꞌyancosohuëꞌ. Carinquëma cosharo quëtáponquëmaꞌ. Huiꞌnamapitanta quëtapo. Naponontaton, Cosiso iinpita asanocancanin. Noyasha nontërin.

Cosi chimininsoꞌ

22Cosiso iinpitarë chachin, Iquipitoquë yaꞌhuëhuantopi huachi. Inasoꞌ, pasa shonca piꞌi icanin. 23Huaꞌqui yaꞌhuaton, Iprain huiꞌninpita niꞌnin. Inahuanta huiꞌnahuanpiso shiꞌahuainpitaquë huarëꞌ, niꞌnin. Naporahuaton Manasisi shiin Maquiri itopiso huiꞌninpitantaꞌ, macaton asoꞌsorin. Ina marëꞌ toꞌtopitënquë ahuënsëraꞌpiarin.

24Aꞌna tahuëri Cosisoꞌ, iinpita itapon: “Co huaꞌquiya quëranhuëꞌ, chiminapo huachi. Napoaponahuëꞌ, Yosëso catahuainquëmaso marëꞌ oꞌmararin. Iso noꞌpa quëran ocoiarinquëmaꞌ. Apraan, Isaco, Cacopo, inapita quëtacaso marëꞌ shaꞌhuitërinso noꞌpaquë, quëpantarinquëmaꞌ,” itërin. 25Ina quëran iinpita camairin: “Yoscoarëꞌ taꞌtomaꞌ, nohuantërahuëso nitoco,” itërin. Napotohuachina: “Yoscoarëꞌ nohuantëransoꞌ, nisarai,” itopi. Naporoꞌ Cosiri itapon: “Tëhuënchachin Yosë oꞌmararin catahuainquëmaso marëꞌ. Ina tahuëri nanihuachin, nansënëhuë isëquëran quëpanantamaso yaꞌhuërin,” itërin. 26Pasa shonca piꞌipitasoꞌ, Cosi Iquipitoquë chiminin. Chiminpachina, nonën ama chanatacaso marëhuë taparahuatonaꞌ, aꞌna atahuaroquë poꞌmopi. Ina pochin Cacopo huiꞌninpita nipi.

Currently Selected:

Génesis 50: cbt

Highlight

Copy

Compare