Éxodo 1
1
Israiroꞌsa Iquipitoquë parisitopisoꞌ
1-4Iráca Cacopo huiꞌninpitarë chachin Canaan parti yaꞌhuëpirinahuëꞌ, ina quëran Iquipito parti yaꞌhuëcaiso marëꞌ paꞌpi. Inapitasoꞌ, israiroꞌsa itopi antaꞌ. Saꞌinaꞌ, huiꞌninapitarë chachin paꞌpi. Cacopo huiꞌninpitasoꞌ, isopita: Nopino, Simion, Nihui, Cota, Isacaro, Saporono, Mincamin, Tano, Nipitari, Caro, Asiri, inapita. 5Inapitaso huiꞌninpitarë chachin, canchisë shonca yaꞌpi icanpi. Aꞌnara Cacopo huiꞌnin Cosi itopisoꞌ, naporo nani Iquipitoquë yaꞌhuërarin.
6Huaꞌqui yaꞌhuapona pochin Cosisoꞌ, iinpitarë chachin taquipi. 7Napoaponahuëꞌ, naꞌa huiꞌninapita yaꞌhuëtopi niꞌton, huaꞌqui quëran paꞌpi notohuaroꞌ naꞌapi. Yaꞌipi Iquipito noꞌpaquë yanquëatona yaꞌhuëpi.
8Huaꞌqui quëran nasha copirno Iquipitoquë huaꞌanëntërin. Cosisoꞌ, nani iráca chiminin niꞌton, naporinso co nitotërinhuëꞌ. Napoaton co israiroꞌsa nosoroatonhuëꞌ, piyapinënpita itapon: 9“Niꞌcoꞌ. Israiroꞌsaso canpoa quëran naꞌcon naꞌcon naꞌatonaꞌ, chini chiníquënoꞌsa nisapi huachi. 10Iporaso ama aquëtë naꞌacaiso marëhuëꞌ, paꞌahua maꞌsona tëranta onpotatëhua yaꞌcopiaꞌahuaꞌ. Coꞌsoꞌ inapotohuatëhuahuëꞌ, aquëtë chachin naꞌaponaꞌ. Inimicoroꞌsa yaahuëpachinënpoaꞌ, ina inahuanta catahuatohuachinaꞌ, minsëarinënpoaꞌ. Inapoatona patohuachinënpoaꞌ, co huachi piyapihuanarëhuahuëꞌ,” itërin.
11Ninapotatonaꞌ, chiníquën asacatopi. Sacato huaꞌanoꞌsa acorahuatonaꞌ, inapitari chiníquën camaipi. Huaraon copirno cosharo tapacaso marëꞌ ninanoroꞌsa aocoipi. Piton, Namisisi, inapita itopisoꞌ. 12Inapotatona aparisitopirinahuëꞌ, naꞌcon naꞌcon naꞌantapi. Napoaton iquipitoroꞌsari paꞌpi tëꞌhuatopi.
13-14Tëꞌhuatatonaꞌ, israiroꞌsa chiníquën aparisitopi. Co pahuëraponaraihuëꞌ asacatopi. Natricho nicacaiso marëꞌ noꞌpaꞌ atoꞌcapi. Iminënaquënta ahuëanaquëranchin chiníquën asacatopi. Napotopi.
Israiroaꞌhuaroꞌsa tëpacaiso marëꞌ copirno camaitërinsoꞌ
15Naporo tahuëriꞌsa Iprio#1.15 Ipriosoꞌ: Israiro tapon naporin. sanapiꞌsa huaꞌhua iquitohuachinara, cato sanapiꞌsari catahuarin. Ina sanapiꞌsasoꞌ: Poa, Sihuira, inapita itopi. Copirnori inapita përasahuaton, itapon:
16—Israironoꞌsa huaꞌhua iquitohuachinaꞌ, noya niꞌcoꞌ. Sanapiaꞌhuaya nipachin, noya nanpiꞌin. Quëmapiaꞌhuaso nipirinhuëꞌ, ¡tëpacoꞌ! itërin.
17Napotopirinhuëꞌ, inapitaso Yosë naꞌcon naꞌcon tëꞌhuatatonaꞌ, co quëmapiaꞌhuaroꞌsa tëpapihuëꞌ. 18Napohuachina, copirnori amataantarahuaton:
—¿Onpoatomata co quëmapiaꞌhuaroꞌsa tëparamahuëꞌ? itërin.
19—Coꞌta israironoꞌsasoꞌ, co iquipitoronoꞌsa pochinhuëꞌ. Chiníquënoꞌsa niꞌton, coꞌhuara quiya canshátërasocoihuëꞌ, inahuara huaipi, itopi.
20-21Inapoatona israiroꞌsasoꞌ, aquë aquëtë naꞌatona chini chiníquën nisapi. Poa, Sihuira, inapitanta Yosë natëtona noya nipi niꞌton, inari catahuarin naꞌa huaꞌhuina yaꞌhuëtopi. 22Huaraonso nipirinhuëꞌ, piyapinënpita itapon: “Israiroaꞌhuaroꞌsa quëmapiaꞌhuaya nasitohuachin, iꞌquë tëꞌyaitoco chimiichin. Sanapiaꞌhuaroꞌsaso nipirinhuëꞌ, noya nanpiꞌinaꞌ,” itërin.
Currently Selected:
Éxodo 1: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
