Esdras 6
6
Yosë chinotacaso pëiꞌ aꞌcanacaiso marëꞌ nanan yoꞌninsoꞌ
(Sacatápirinahuëꞌ, coꞌhuara aꞌcayántërasoihuëꞌ inimicoroꞌsari acopitërin. Napohuachina tananpitopirinahuëꞌ, cato pënëntonaꞌpiroꞌsari pënënin acoantacaiso marëꞌ. Sacatasoi inimicoroꞌsasoꞌ: “Iso pëi nicacasoꞌ co nanan yaꞌhuërinhuëꞌ,” itopi. Napotopirinahuëꞌ, pëinaꞌpiroꞌsarisoꞌ itaponaꞌ: “Nani iráca Pirsia copirno Siro itopiso nanan quëtërincoi niꞌton, pëiantarai,” itopi. Ina natanatonaꞌ, Tario copirno quirica aꞌpatopi nitotacaso marëꞌ.)
1Napotohuachinara, Tario copirnoso piyapinënpita camairin: “Quiricaroꞌsa naꞌcon naꞌcon nohuantërëhuasopita Papironiaquë taparëhuaꞌ. Inaquë yoníconcoꞌ,” itërin. 2Napotohuachina, yonisápatona Copirno huaꞌanëntërinso pëiquë quënanpi. Inaso pëiꞌ, Aquimita ninanoquë yaꞌhuërin. Inaso ninanoꞌ, Mitia propinciaquë yaꞌhuërin. Soꞌnanpi quiricaquë ninshitopinan quënanpi. Inaquë iso pochin nanan yaꞌhuërin:
3-4“Siro copirno yaꞌconinso piꞌiquë chachin, Yosë chinotacaso pëi nicacaiso marëꞌ nanan yoꞌnin. Inaso pëiꞌ, Quirosarinquë yaꞌhuërin. Nani iráca yaꞌhuëpirinhuëꞌ ohuatopi niꞌton, inaquë chachin acoantacaiso yaꞌhuërin. Inaquë maꞌsharoꞌsa tëpatonaꞌ, Yosë chinotacaiso marëꞌ nisapi. Iso pochin acocaiso camaitërin: Simintonën noya acorahuatonaꞌ, caniarichinaꞌ. Inaparinsosoꞌ, cato shonca canchisë mitro yaꞌhuëtarin. Pancatërinsontaꞌ, nápo chachin pancanachin. Cara panshin panca naꞌpiroꞌsa quëran acoinaꞌ. Naporahuaton aꞌna panshinaꞌ, nasha nontë quëran acoꞌinaꞌ. Ina acocaiso marëꞌ coriqui taparahuë quëran pahuërëchinaꞌ. 5Iráca Napocotonori Yosë chinotacaso pëi quëran, nisha nisha maꞌsharoꞌsa ohuarapisoꞌ ocoirin. Ocoirahuaton, Papironiaꞌpaꞌ quëparin. Inapitantaꞌ, naquëranchin Quirosarinquë quëpanantaꞌinaꞌ. Yaꞌhuërinquë chachin yaꞌhuëantacaso marëꞌ inapochinaꞌ, tënahuë,” tënin.
6-7Ina natanaton Tario copirnosoꞌ, huaꞌanoꞌsa Iopiratisiiꞌ aquëtëran yaꞌhuëpisopita quirica aꞌpatërin. Iso pochin aninshitahuaton aꞌpatërin:
“Tatinai, Sitaro-posnai, canpitaso piꞌi yaꞌconinso parti noꞌpaquë, chirinchi yaꞌconamaꞌ. Aꞌnapita chirinchiroꞌsanta inaquë yaꞌhuëpisoꞌ, yonquiato, yaꞌipinquëma ninshitaranquëmaꞌ: Iꞌhua chachin ninshitatomaco natanamaco: ‘¿Tëhuënchachin Siro copirno nanan yoꞌnin, Yosë chinotacaso pëi Quirosarinquë niantacaisoꞌ?’ itëramaco. Noꞌtëquën mini. Napoaton ipora canpitasoꞌ, ina pëi nisapisopita yaꞌhuincananpicoꞌ. Cotioroꞌsa chirinchinënaꞌ, ansianoroꞌsaꞌ, piyapinënapita inapitari Yosë chinotacaso pëi niantaꞌinaꞌ. Iráca yaꞌhuërinquë chachin acoinaꞌ. 8Ina marëꞌ canpitanta isopoamaso yaꞌhuërin: Cotio ansianoꞌsa ina pëi nisapisopita, canpitarinta catahuamaso yaꞌhuërin. Yaꞌhuërama parti camaitërahuësoꞌ, pahuërëárinaco. Ina coriqui yaꞌhuërin quëran, maꞌpitamarësona nohuantohuachinaꞌ, aꞌnaroáchin quëtocoꞌ. Ama sacatapiso tananpitacaiso marëhuëꞌ, inapotocoꞌ. 9Quirosarin corto huaꞌanoꞌsantaꞌ, maꞌsona natanpachinquëmaꞌ, shaꞌhuitërinquëmaso chachin yaꞌipi quëtamaso yaꞌhuërin. Toroaꞌhuaroꞌsaꞌ, carniroroꞌsaꞌ, carniroaꞌhuaroꞌsaꞌ, inapita topachinaꞌ, aꞌnaroáchin quëtocoꞌ. Inapitaso Yosë inápaquë yaꞌhuërinso chinotatonaꞌ, yaꞌipi ahuiquitacaiso marëꞌ nohuantopi. Trico, yamora, huino, tomaꞌ, inapitanta nani tahuëri quëtocoꞌ. 10Inapotohuatamaꞌ, Yosë inápaquë huaꞌanëntërinso noya chinotapi. Ina marëꞌ maꞌsha tëparahuatonaꞌ, ahuiquitapi. Naporahuaton ca marëntaꞌ, Yosë nontapi. Huiꞌnahuëpita marëntaꞌ, Yosë nontapi.
11Isontaꞌ, camaitërahuëso natëcoꞌ: Insosona iso camaitërahuësopita co natëtohuachinahuëꞌ, anaꞌintocoꞌ. Pëinënquë huica yaꞌhuërinso pishointocoꞌ. Inapotahuatoma ahuanicoꞌ. Ina ahuaniramaquë, inapa quëran pitacoꞌ. Inapotohuatamaꞌ, yaꞌhuarataton chiminapon. Naporahuatoma pëinëonta ohuatoco yamoraꞌin. 12Naꞌa ninanoroꞌsa isoroꞌpaquë yaꞌhuërin. Napopirinhuëꞌ, Yosëso pëinën nitacaiso marëꞌ, Quirosarin ninano huayonin. Inari chachin insosona pëinën yaataꞌhuantërinsoꞌ, anaꞌinchin. Ina nitacaisontaꞌ, noꞌhuitatona yaꞌcopitopisopita, inapochin. Copirnoroꞌsahuë nipon, nacionoꞌsahuë nipon napohuachinaꞌ, ataꞌhuantëraꞌpiaꞌin. Ca Tarioco camaitarahuë niꞌton, aꞌnaroáchin natëco, tënahuë,” tënin.
Sinioro chinotacaso pëi aꞌcanpisoꞌ
13Napotohuachina, ina huaꞌanoꞌsasoꞌ copirno Tario camaitërinso chachin yaꞌipi nipi. 14Inapoatonaꞌ, cotio huaꞌanoꞌsasoꞌ tëniaquë huarëꞌ sacatopi. Ito huiꞌnin Sacariasë pënëntonaꞌpi Sinioro nohuanton shaꞌhuirinso chachin nipi. Aquio pënëntonaꞌpintaꞌ, inachachin shaꞌhuirin. Isopita Pirsia copirnoroꞌsanta camaitopiso chachin tënipi: Siro, Tario, Artaquirquisë, inapita. 15Tario copirno yaꞌconin quëran huarëꞌ, aꞌnatërápo piꞌipi, shonca aꞌna yoqui, cara tahuëri nisahuasoꞌ, Sinioro chinotacaso pëi nisapisoꞌ, aꞌcanpi huachi. Ina yoquisoꞌ, atara#6.15 Atara yoqui canpoa marësoꞌ: Toquën yoqui itërëhuaꞌ. yoqui itopi.
16Nani aꞌcanpachinara, yaꞌipi huënantapisopita capa cancantopi. Capa cancantatona pëi tënipisoꞌ, Yosë marëꞌ acopi. 17Naporo tahuëri Sinioro chinotacaiso marëꞌ pasa toroaꞌhua, cato pasa carniro, catapini pasa carniroaꞌhua, inapita tëpapi. Shonca cato chiponta yaꞌipi israiroꞌsa oshanëna marëꞌ noyá ahuiquitopi. Shonca cato huënton yaꞌhuëpi niꞌton, aꞌnara aꞌna huënton marëꞌ nanirin. 18Ina quëran corto huaꞌanoꞌsantaꞌ, onporosona sacatacaiso acotopi. Nihuiroꞌsanta maꞌsona nicatona catahuatacaisoꞌ, acotopi. Inapoatona Sinioro marëꞌ Quirosarinquë onpo sacatacaisoꞌ shaꞌhuitopi. Moisësë iráca ninshitërinso chachin nicacaiso marëꞌ inapopi.
19Ina quëran ina yoqui niantarinquë pascoa niꞌton, ina pitanta Sinioro marëꞌ naꞌhuëpi. Shonca catapini tahuëritahuasoꞌ, caniaritopi. 20Corto huaꞌanoꞌsaꞌ, nihuiroꞌsaꞌ, inapitaso napopianachin yonquiatona nani oshanëna inquipi. Pënëntërinsoꞌ quiricaquë camaitërinso chachin nicatona inquipi. Napoaton yaꞌipi huënantapisopita marëꞌ maꞌsharoꞌsa tëpapi. Inapoatona Sinioro chinotacaiso marëꞌ napopi. Aꞌnapita corto huaꞌanoꞌsa marënta tëpapi. Inahuara marënta inapopi. 21-22Napoaton yaꞌipi huënantapisopita pascoa pitaquë cosharo nipisoꞌ caꞌpi. Aꞌnapitanta nisharoꞌsa niponaraihuëꞌ, co noyahuëꞌ nipisoꞌ aꞌporahuatonaꞌ, caꞌpatopi antaꞌ: “Sinioro chinotëramasoꞌ, quiyanta imasarai topachinara,” caꞌpatopi. Canchisë tahuëri capa cancantatona pan co ahuëpocatopinanhuë caꞌpi: “Sinioro catahuarinpoa niꞌton, ina chinotacaso pëi aꞌcanëhuaꞌ. Ina nohuanton Pirsia copirno catahuarinpoa niꞌton, tënirëhuaꞌ,” taꞌtona capa cancantopi.
Currently Selected:
Esdras 6: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
