Éxodo 16
16
Cosharo inápa quëran aꞌpaimarinsoꞌ
1Israiroꞌsa Iquipito quëran pipipisoꞌ nani aꞌna yoqui patoma nisarin. Naporoꞌ inapitasoꞌ, Irimo quëran paantarapi huachi. Paꞌsahuatonaꞌ, Sin inotëro parti canconpi. Inasoꞌ inotëroꞌ, Irimo quëran, Sinai motopiquë huarëꞌ nincanin. 2Inaquë chachin israiroꞌsaꞌ, naquëranchin Moisësë, Aaron, inapita noꞌhuiantapi: 3“Canpitaso co quëꞌyatoncoirahuëꞌ, inotëro parti tana tiquiincoiso marëꞌ quënancoi. ¡Iquipitoquë chachin Yosë tëparincoi naporini, noya noya niitonhuëꞌ! Inaquëso noya coshatatoi, natërai. Naꞌa nosha yaꞌhuërin,” itopi.
4-5Naporo Yosëri, Moisësë itapon: “Ca nohuanto cosharoꞌ, inápa quëran oꞌnan pochin anotimapon. Nani tahuëri paꞌsahuatonaꞌ, macacaiso yaꞌhuërin. Pëꞌyainpichin macaponaꞌ. Pancasomaria tahuëriso nipirinhuëꞌ, cato tahuëri marëꞌ machinaꞌinaꞌ. Inapotato inpitasona natërinacosoꞌ, inpitasona co yanatërinacosohuëꞌ, nohuitarahuë,” itërin.
6Napohuachina, Moisësë, Aaron, inapitari israiroꞌsa itaponaꞌ:
—Sinioro chachin Iquipito quëran ocoirinquëmasoꞌ, iꞌhuanahuanquë nitotaramaꞌ. 7Tashirayanta tashíramiachin Sinioro huënaráchin huënaráchin aꞌpininsoꞌ, niꞌsaramaꞌ. Pinoramasoꞌ nani nataninquëmaꞌ. Quiya mini noꞌhuipiramacoihuëꞌ, Sinioro nohuanton pipirama niꞌton, ina pinorama huachi, itopi. 8Ina quëran Moisësë taantarin:
—Iꞌhuanahuanquë Sinioro, nosha quëtarinquëma capamaso marëꞌ. Tashiramiachintaꞌ, huaꞌhuayátërahuë cosharo quëtarinquëmaꞌ. Nani nataninquëma pinoramaso niꞌton, napotarinquëmaꞌ. Quiya mini noꞌhuipiramacoihuëꞌ, Sinioro nohuanton pipirama niꞌton, ina pinorama huachi, itërin.
9Ina quëran Moisësëri Aaron itapon:
—Pinopisoꞌ nani natanin niꞌton, shaꞌhuitëquë israiroꞌsaꞌ, Sinioro niꞌtonënquë niyontoinaꞌ, itërin.
10Aaroni israiroꞌsa nontaso chachin, inotëro parti notëtopirinahuëꞌ, chitoroquë Sinioro huënaráchin huënaráchin aꞌpininsoꞌ, quënanpi. 11Naporoꞌ Yosëri Moisësë itapon: 12—Israiroꞌsa pinorinacosoꞌ nani natanahuë. Napoaton shaꞌhuitëquëꞌ: “Sinioro napotërinpoaꞌ: ‘Iꞌhuanahuanquë nosha caꞌsaramaꞌ, tashiramiachintaꞌ, cosharo yaꞌhuapon. Natëaquë huarëꞌ coshataramaꞌ. Inapotohuatënquëmaꞌ, ca Sinioroco ninahuësoꞌ nitotarama huachi, tënin,’ itëquëꞌ,” itërin.
13Naporoꞌ iꞌhuaraya chachin, nisha ocoron canquirin. Huaꞌhuayátërahuë huëcatona yaꞌhuëpiso nani chachin yaꞌsotiirin. Tahuëririnquënta tashíramiachin niꞌpirinahuëꞌ, yaꞌhuëpiso nani chachin noꞌpaꞌ imotërinsoꞌ, maꞌsha poroncayo pochin quënanpi. 14Poroncayo tomontohuachina, shipihuaninso pochin noꞌpaquë quëparitërin. 15Co nohuitatonaraihuëꞌ, israiroꞌsasoꞌ inahua capini ninatanapi: “¿Maꞌta isosoꞌ?” tosapi. Napohuachinara, Moisësëri itapon:
—Iso mini cosharo Yosë aꞌpatimarinpoasoꞌ. 16Aꞌnaya aꞌnayama capamaso marëꞌ cato quiro pochin masaramaꞌ. Co naꞌcon naꞌcon macacamaso yaꞌhuërinhuëꞌ. Ina pochin Sinioro camaitërin, itërin.
17Itohuachina, israiroꞌsaso ina inachachin nipi. Aꞌnaquën naꞌa mapi. Aꞌnaquënsoꞌ, piꞌpian mapi. 18Ina quëran tantiahuachinara, niquëtopi niꞌton, co insonta yaꞌsotërinhuëꞌ. Naporahuaton co insonta pahuantërinhuëꞌ. Napopináchin mapi huachi.
19Ina quëran Moisësëri pënëantarin:
—Cosharo manamasoꞌ, ama tashiraya marëꞌ tapacosohuëꞌ, itërin. 20Moisësëri napotopirinhuëꞌ, aꞌnaquënso co natëtatonaraihuëꞌ, cosharo mapiso tahuëririnquë capacaiso marëꞌ tapapi. Tapapirinahuëꞌ, paꞌpi notohuaroꞌ shonataton anarin huachi. Napohuachina Moisësëri, chiníquën noꞌhuirin.
21Nani tahuëri tashíramiachin, aꞌnaya aꞌnaya cosharo mapi. Nani yono piꞌirahuasoꞌ, piꞌiri piꞌcahuachina soquirin.
22Napoaponahuëꞌ, pancasomaria tahuëriso cato tahuëri marëꞌ machinapi. Catapini quiro pochin aꞌnaya aꞌnaya mapi. Inanapo mapi niꞌton, Israiro huaꞌanoꞌsasoꞌ, Moisësë shaꞌhuitapona paꞌpi. 23Shaꞌhuitohuachinara Moisësëri itapon:
—Ina mini Yosë nohuantërinsoꞌ: Tashiraya sahuato nisarin. Sinioro marëꞌ chinotacaso tahuëri. Cosharo manamasoꞌ, ipora chachin anpicoꞌ. Maꞌsona aꞌitamaso nininsopitantaꞌ, aꞌitochancoꞌ. Tashiraya marëpita inapotocoꞌ, itërin.
24Moisësë camaitërinso chachin nipachinara, tahuëririnquë capacaiso marëꞌ tapapisoꞌ, co manta shonatërinhuëꞌ. Naporahuaton co anarinhuëꞌ.
25Naporoꞌ Moisësëri itaantapon:
—Taparamasoꞌ, caꞌco huachi. Iporasoꞌ, sahuato. Sinioro marëꞌ chinotacaso tahuëri. Ipora tahuërisoꞌ, co huachi aipiran cosharo quënanaramahuëꞌ. 26Saota tahuëri nanitarama macacamasoꞌ. Canchisëinquënso nipirinhuëꞌ, sahuato niꞌton, co yaꞌhuëarinhuëꞌ, itërin. 27Inaso napopirinhuëꞌ, aꞌnaquënso naporo tahuëri cosharo macapona paꞌpi. Paꞌpirinahuëꞌ, co manta quënanpihuëꞌ. 28Napohuachina Siniorori, Moisësë itapon:
—Nani pënënpirahuëꞌ. Nani aꞌchintopirahuëꞌ. ¿Onporo huarëta natëponaco? 29Nani acotëranquëma aꞌna tahuëriraꞌ chinotamasoꞌ. Napoaton pancasomaria tahuëri nanihuachin, cato tahuëri marëꞌ cosharo quëtëranquëmaꞌ. Ina niꞌton, sahuato nanihuachin, ama yaꞌhuërama quëran pipicosohuëꞌ, itërin.
30Naporo huarëꞌ israiroꞌsaꞌ, canchisë tahuëri nanihuachina chinotopi. 31Israiroꞌsasoꞌ, cosharo mapiso nohuitatonaꞌ, “mana,” itopi. Inasoꞌ huiríchin, conantroraya pochin ninin. Naporahuaton cachita ninoiquë cayontopinan pochin cashi cashin ninin.
Piꞌpian mana tapacaso camaitërinsoꞌ
32Ina quëran Moisësëri israiroꞌsa camairin:
—Iso pochin Yosë camaitërin: “Iquipito quëran ocoirahuatënquëmaꞌ, inotëro parti quësaranquëmaꞌ. Naporoꞌ cosharo quëtëranquëmasoꞌ shiparimapitanta nohuitacaiso marëꞌ, tapacoꞌ. Cato quiro pochin yaꞌconinsoꞌ, mana masahuatoma tapacoꞌ,” tënin, itërin. 33-34Aaronta camairin:
—Cato quiro pochin mana masahuaton, yonshaquë poꞌmoquëꞌ. Ina quëran Yosërëꞌquënpoa anoyatërëhuaso caposonën notënanquë acoaran. Aꞌna tahuëri shiparinpoapita nohuitacaiso marëꞌ inaquë tapaaran, itërin.
Itohuachina, Yosëri Moisësë camairinso chachin, Aaronsoꞌ ninin.
35Catapini shonca piꞌi pochin israiroꞌsaꞌ, mana caꞌpi. Cananoꞌsa yaꞌhuëpiquë notënanquë canconai huarëꞌ manasáchin caꞌpi. 36Mana tantiacaiso marëꞌ israiroꞌsasoꞌ, comiri itopisoquë tantiapi. Inaquëso cato quiro pochin yaꞌconin. Shonca comiri quëran aꞌnara ipa itopisoꞌ icanin.
Currently Selected:
Éxodo 16: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
