Efesios 1

Imapisopita yonquiaton, ninshitërinsoꞌ

1Ca Paonoco ninshitaranquëmaꞌ, niꞌcoꞌ. ¿Noyanquëmaꞌ canpitantaꞌ? Noya cantaꞌ yaꞌhuarahuë. Yosë nohuanton, Quisocristo acorinco nanamën aꞌchinaꞌhuaso marëꞌ. Canpitantaꞌ Quisocristo noya imaramaꞌ niꞌton, Yosë noya niꞌninquëmaꞌ. Ipisoquë yaꞌhuëramasopita ninshitaranquëmaꞌ. 2Inaora nohuanton, Tata Yosë catahuainquëmaꞌ. Asanocancainquëmaꞌ. Sinioro Quisocristontaꞌ inapochachin catahuainquëmaꞌ.

Iráca quëran huarëꞌ Tata Yosë yonquirinpoasoꞌ

3Ma noyacha Tata Yosëso paya. Sinioro Quisocristo paꞌpin inasoꞌ. Inápa quëran noya noya yonquirinpoaꞌ. Quisocristo imarëhuaꞌ niꞌton, naꞌcon catahuarinpoaꞌ noya noya cancantacaso marëꞌ. Oshanënpoaꞌ inquitatonpoaꞌ, anoyacancantërinpoaꞌ. Ina quëran nani tahuëri catahuarinpoaꞌ nohuantërinso chachin nicacasoꞌ. Co inápaquë yaꞌhuëyatërarihuarahuëꞌ, inatohuaꞌ yaꞌhuëarëhuaso pochin Yosë nohuitërëhuaꞌ. Ina yonquiatëhuaꞌ, “Yosparinquën Sinioro,” itahuaꞌ. 4Coꞌhuara isoroꞌpaꞌ yaꞌhuëyátërasohuëꞌ, yonquiatonpoaꞌ, huayoninpoaꞌ nóya cancantacaso marëꞌ. Quisocristo imapatëhuaꞌ, oshanënpoaꞌ inquitatonpoaꞌ, Yosë nóya niꞌninpoaꞌ. 5Iráca quëran huarëꞌ nosoroatonpoaꞌ, acorinpoaꞌ huëntonënquë yaꞌconacasoꞌ. Quisocristo anoyacancantërinpoaꞌ niꞌton, huiꞌnin pochachin niꞌninpoaꞌ. Inaora nohuanton, noya yonquirinpoaꞌ. 6Huiꞌnin naꞌcon nosororin. Ina imapatëhuaꞌ, canpoantaꞌ naꞌcon nosoroarinpoaꞌ. Ina yonquiatëhuaꞌ, “Ma noyacha Tata Yosësoꞌ niꞌton, inaora nohuanton, nosororinpoa paya,” tosarëhuaꞌ. 7Quisocristo corosëquë chiminaton, nichaꞌërinpoaꞌ. Huënainën paꞌnin niꞌton, oshanënpoaꞌ inquitërinpoaꞌ. Inaora nohuanton, Yosë naꞌcon nosororinpoaꞌ. 8Nosoroatonpoaꞌ, naꞌcon catahuarinpoaꞌ noꞌtëquën yonquicaso marëꞌ. Yonquinën chachin anitotërinpoaꞌ. 9Inaora nohuanton, nóya yonquirinpoaꞌ. Co canpoara nitotopirëhuahuëꞌ, yonquirinpoasoꞌ anitotërinpoaꞌ. Iráca quëran huarëꞌ yonquirin Quisocristo aꞌpaimacasoꞌ. 10Ina tahuërinën nanihuachin, Quisocristo yaꞌipiya huaꞌanëntarin. Isoroꞌpaquë yaꞌhuërinsopita, inápaquë yaꞌhuërinsopita inapita huaꞌanëntarin. Aꞌna huëntoínchin pochin acoarin. Ina Yosë naꞌcon nohuantërin.

11Inaora nohuanton, acorinpoaꞌ piyapinënpita nicacaso marëꞌ. Quisocristo imapatëhuaꞌ, huiꞌnin pochin niꞌsarinpoaꞌ. Napoaton aꞌna tahuëri Yosëꞌpaꞌ noya noya acoarinpoaꞌ. Iráca chachin yonquirinpoaꞌ niꞌton, huëntonënquë ayaꞌconinpoaꞌ. 12Quiyaꞌton imarai. “Quisocristo nichaꞌësarinpoaꞌ,” taꞌtoi imarai. Noya imapatoi, aꞌnapitantaꞌ nicatonacoi, Yosë yonquiapi inahuantaꞌ: “Ma noyacha Tata Yosëso paya,” tosapi. Ina taꞌcaiso marëꞌ acorincoi. 13Canpitantaꞌ Yosë nanamën natanamaꞌ. “Quisocristo anoyacancantohuachinquëmaꞌ, nichaꞌësarinquëmaꞌ,” itërainquëmaꞌ. Natanpatamara: “Noꞌtën nanan inasoꞌ,” taꞌtomaꞌ, natëramaꞌ. Quisocristo imapatamaꞌ, huiꞌnin pochin Yosë niꞌninquëmaꞌ. Napoaton Ispirito Santo ayaꞌcoancantërinquëmaꞌ. Sichoquë marca acopiso pochin ayaꞌcoancantërinquëmaꞌ huëntonënquë ayaꞌconinquëmasoꞌ nitotacaso marëꞌ. Iráca shaꞌhuirinso chachin napotërinquëmaꞌ. 14Quisocristo imapatëhuaꞌ, Ispirito Santo yaꞌcoancantomiatërinpoaꞌ. Inaꞌton quëtërinpoaꞌ niꞌton: “Tëhuënchachin aꞌna tahuëri Yosëꞌpaꞌ quëpantarinpoaꞌ,” tënëhuaꞌ. Nani Yosë nichaꞌërinpoaꞌ niꞌton, oꞌmantacasoꞌ tahuëri nanihuachin, yaꞌhuërinꞌpaꞌ quëpantarinpoaꞌ. Inaquë noya noya yaꞌhuëcontarihuaꞌ. Ina yonquiatëhuaꞌ: “Ma noyacha Tata Yosëso yonquirinpoa paya,” tënëhuaꞌ.

Inapita marëꞌ Paonori Yosë nontërinsoꞌ

15“Quisocristo anoyacancantërinpoaꞌ,” taꞌtomaꞌ, inasáchin imaramaꞌ. Ina imatomaꞌ, yaꞌipi imaramasopita capini noya ninosoroaramaꞌ, natantërahuë. Ina natantato, nóya cancantërahuë. 16Naꞌcon canpita marëꞌ Yosë nontërahuë. “Noya imarinënquën niꞌton, ‘Yosparinquën, Sinioro,’ ” itërahuë, Yosë nontato. 17Tata Yosësoꞌ noya noya ninin. Inasáchin chinotacasoꞌ yaꞌhuërin. Quisocristo isoroꞌpaquë oꞌmaton, Yosë anohuitërinpoaꞌ. Ina yonquiato, canpita marëꞌ Yosë nontërahuë: “Catahuaquëꞌ Sinioro noꞌtëquën yonquiꞌinaꞌ. Noya noya nohuichinënquën. Noya nohuitohuachinënquën, quëma yonquiranso chachin nitotapi. 18Yaꞌipi nanamën Sinioro noyá anitotëquëꞌ. Quëma huëntonënquë chachin ayaꞌconancoi noya cancantaꞌhuaiso marëꞌ. Catahuaquëꞌ ina yonquiatonaꞌ, noya cancanchinaꞌ. Aꞌna tahuëri yaꞌhuëranquë chachin noya noya yaꞌhuëcontarai. Ina naꞌcon yonquiꞌinaꞌ. 19Quëmasoꞌ yaꞌipi nanitaparan. Natërainquën niꞌton, nani tahuëri catahuarancoi. Chini chiníquën nanantaton, nichaꞌërancoi. Catahuacoi ina yonquiatoi, chiníquën cancanchii. 20Iráca chiníquën nanantaton, Quisocristo ananpitaantaran. Inápaquë quëpantarahuaton, inchinan quëran ahuënsëran niꞌton, chini chiníquën nanantarin,” itërahuë, Yosë nontato. 21Isoroꞌpaquë nisha nisha huaꞌanoꞌsaꞌ, chirinchiroꞌsaꞌ, copirnoroꞌsaꞌ, inapita chiníquën nanantopi. Inapaquëntaꞌ chiníquën nanantopisopita yaꞌhuëpi. Quisocristoso nipirinhuëꞌ, inapita quëran chini chiníquën nanantërin. Co incari tërantaꞌ nanitërinhuëꞌ ina minsëcasoꞌ. Co onporontaꞌ aꞌnapitari ina minsëapihuëꞌ. 22Yosëri chachin Quisocristo nanan quëtërin yaꞌipi yaꞌhuërinsopita huaꞌanëntacaso marëꞌ. Naporahuaton, yaꞌipi imarëhuasopita catahuainpoaso marëꞌ acorin. Naꞌaquënpoaꞌ nipirëhuahuëꞌ, aꞌna huëntoínchin pochin ninëhuaꞌ. Inasoꞌ motënpoa pochin nicaton, yaꞌipiya huaꞌanëntarinpoaꞌ. 23Inaora nonën pochin niꞌninpoaꞌ. Napoaton naꞌcon yonquirinpoaꞌ. Nani yaꞌcoancantërinpoaꞌ noya noya imacaso marëꞌ. Noyá yaꞌcoancantohuachinpoaꞌ, yaꞌipi cancanënpoa quëran ina yonquiarihuaꞌ. Ina marëꞌ nininpoaꞌ. Inasoꞌ yaꞌipiya huaꞌanëntarin.

Currently Selected:

Efesios 1: cbt

Highlight

Copy

Compare