Deuteronomio 8
8
Yosëri nosoroaton aꞌpairinsoꞌ
1Naquëranchin Moisësë israiroꞌsa nontaantarin: “Yaꞌipi Yosë camaitërinsopita nani ipora shaꞌhuitaranquëma niꞌton, natëcoꞌ. Inapohuatamaꞌ, notohuaroꞌ naꞌasaramaꞌ. Naporahuaton, shimashonënpoa noꞌpaꞌ quëtacasoꞌ shaꞌhuitërinquë yaꞌhuëpisopita minsëaramaꞌ. 2Catapini shonca piꞌi inotëro parti paꞌtasëmaꞌ, Sinioro nohuanton nisha nisha maꞌsha onporamaꞌ. Inapotatënquëmaꞌ, natëtochináchin cancantamaso marëꞌ napotërinquëmaꞌ. Onpopinsona cancantëramasoꞌ, nitotacaso marëꞌ tënirinquëmaꞌ. Naporahuaton: ‘¿Tëhuënchachin taꞌma natërëꞌponaco to?’ taꞌton napotërinquëmaꞌ. Inaso nipirinhuëꞌ, co patërinquëmahuëꞌ. Ama ina naniantocosohuëꞌ. 3Ina nohuanton aꞌna tahuëri tana acorinquëmaꞌ. Napoaponahuëꞌ, ina piquëranso capamaso marëꞌ mana aꞌpatiimarinquëmaꞌ. Inanpi cosharoso co nohuitopiramahuëꞌ, quëtërinquëmaꞌ. Co shimashonëmapitari tëranta nohuitopihuëꞌ: ‘Co cosharoriáchin, piyapi ananpirinhuëꞌ. Yaꞌipi Yosë noninsoꞌ natëhuachin tëhuëchinsoꞌ, nanpiarin,’ taꞌcamaso marëꞌ inanpi cosharo quëtërinquëmaꞌ. 4Catapini shonca piꞌipi paꞌsápomarahuëꞌ, co aꞌmoramaso mocarinhuëꞌ. Co nantëma tëranta pomatërinhuëꞌ. 5Napoaton: ‘Siniorosoꞌ nóya niꞌton, huiꞌnanpo nosorohuatëra, pënënëso pochin, pënëninpoaꞌ,’ tocoꞌ.
6Napoaton Sinioronënpoasoꞌ Yosë niꞌton, noya nicatoma camaitërinsopita natëcoꞌ. Aꞌchintërinquëmasopitantaꞌ, ina inachachin nicoꞌ. 7Sinioro chachin noyaroꞌpaquë ichiyaꞌconapënquëmaꞌ. Inaquësoꞌ, notohuaroꞌ iꞌsharoꞌsa yaꞌhuërin. Iꞌshanaroꞌsaꞌ, huinanoꞌsaꞌ, inapitanta motopiroꞌsaquë yaꞌhuërin. Motopianaroꞌsaquëntaꞌ, yaꞌhuërin. 8Trico, sipata, inapita noya noyatërin. Oparoroꞌsaꞌ, iquiraroroꞌsaꞌ, inapita yaꞌhuërin. Cranata huayoroꞌsaꞌ, oripo nararoꞌsaꞌ, inapitanta noyatërin. Ninointa co pahuaninhuëꞌ. 9Inaquësoꞌ, co manta cosharo pahuantarinquëmahuëꞌ. Ina noꞌpaquësoꞌ, co maꞌsha tëranta pahuantarinquëmahuëꞌ. Huaꞌnamia naꞌpiroroꞌsaquë quënanaramaꞌ. Copri huaꞌnantaꞌ, motopinënpitaquë ocoiaramaꞌ. 10Napoaton nani coshatatoma natëhuatamaꞌ, Sinioro chinotocoꞌ. Chinotatomaꞌ: ‘¡Ma noyacha Yosëso niꞌton, noyaroꞌpaꞌ quëtërinpoa paya!’ tocoꞌ,” itërin.
Yosë yonquirápaiso marëꞌ pënëninsoꞌ
11Naquëranchin Moisësë israiroꞌsa nontaantarin: “Sinioronënpoasáchin Yosëso niꞌton, niꞌcona ina naniantotamaꞌ. Niꞌcona camaitërinsopita, pënëntërinsopita, inapita naniantotamaꞌ. Inapita ipora tahuëri shaꞌhuitaranquëmaꞌ. 12Inaquë yaꞌhuëapoma pochin natëaquë huarëꞌ coshataramaꞌ. Naporahuaton noya pëiroꞌsa nisarama yaꞌhuëcamaso marëꞌ. 13Ohuacanëmaꞌ, ohuicanëmaꞌ, inapita notohuaroꞌ naꞌasarin. Maꞌsha paꞌanatoma naꞌcon naꞌcon coriqui, oro, inapita canaramaꞌ. Ina quëran naꞌcon naꞌcon maꞌsha paꞌanaramaꞌ. 14Ina pochin nipatamaꞌ, niꞌcona nocantotamaꞌ. Iquipitoquë canpitasoꞌ, asacatatënënquëma aparisitërinënquëmaꞌ. Inapotápirinënquëmahuëꞌ, Sinioro inaquëran ocoirinquëmaꞌ. Napoaton ama ina naniantocosohuëꞌ.
15Paꞌpi huëhuëpiro inotëro partitaquëchin quëninpoaꞌ. Inaquë notohuaroꞌ yaꞌhuanoꞌsaꞌ, yonpincaroꞌsaꞌ, inapita yaꞌhuërin. Inaquë co manta iꞌsha yaꞌhuërinhuëꞌ. Napoaponahuëꞌ, oꞌocahuaso marëꞌ natëtë quëran, iꞌsha ocoirin. 16Ina chachin mana quëtërinpoa capacaso marëꞌ. Inaso cosharoꞌ, shiꞌmashonënpoanta co nohuitopihuëꞌ. Inapotatënquëma tënirinquëmaꞌ. Naporahuaton, natëtochináchin cancantamaso marëꞌ napotërinquëmaꞌ. 17‘Quiyaora sacatatoi yaꞌipi isopita maꞌsha canarai,’ ama tocosohuëꞌ. 18Sinioro achinirinquëma niꞌton, sacatatoma nani maꞌsha maꞌpatëramaꞌ. Shimashonënpoapitarëꞌ anoyataton, shaꞌhuitërinsoꞌ nanicaso marëꞌ catahuarinquëmaꞌ. Ama ina naniantocosohuëꞌ.
19Napotopiranquëmahuëꞌ, ina naniantatoma nisha nisha mamanshiroꞌsa moshahuatamaꞌ, iporaquëranchin shaꞌhuitaranquëmaꞌ: Tëhuënchachin naꞌcon naꞌconquëma taꞌhuantarama tënahuë. 20Noyaroꞌpaquë yaꞌconapoma pochin, Siniorori nisha nisha nacionoꞌsa ataꞌhuantërapon. Inapochachin canpitanta co ina natëhuatamahuëꞌ, ataꞌhuantarinquëmaꞌ,” itërin.
Currently Selected:
Deuteronomio 8: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
