Deuteronomio 7

Ama mamanshi moshacaiso marëhuëꞌ pënëantarinsoꞌ

1Naquëranchin Moisësëri israiroꞌsa nontaantarin: “Sinioroso Yosënënpoa niꞌton, catahuarinquëma noꞌpaꞌ quëtarinquëmaquë yaꞌconacamasoꞌ. Ina marëꞌ canchisë nacionoꞌsa aꞌpararin. Canpita quëran naꞌcon naꞌcon niꞌtona chini chiníquën nanantopirinahuëꞌ, aꞌpararin. Cananoꞌsaꞌ, itiroꞌsaꞌ, amororoꞌsaꞌ, huirisëroꞌsaꞌ, quiriquiroꞌsaꞌ, iporoꞌsaꞌ, quiposoroꞌsaꞌ, inapita itopisoꞌ aꞌpararin. 2Sinioro nohuanton inapita nacionoꞌsa canahuatamaꞌ, ataꞌhuantamaso yaꞌhuërin. Co nosoroamaso yaꞌhuërinhuëꞌ. Naporahuaton ama inapitarëꞌquëma maꞌsha marëꞌ tëranta anoyatocosohuëꞌ. 3Co inahua sanapiꞌsa macamaso yaꞌhuërinhuëꞌ. Co huiꞌnamapitanta ina sanapiꞌsa macacaiso yaꞌhuërinhuëꞌ. Nanoꞌsanta yaꞌhuëtohuachinquëmaꞌ, co inahua huiꞌnapiꞌsa acoantamaso yaꞌhuërinhuëꞌ. 4Ina pochin nimapachinasoꞌ, inahuaso co Yosë imapihuë niꞌton, huiꞌnama anishacancantarin. Sinioro aꞌpoatonaꞌ, nisha nisha mamanshi chinotapi huachi. Inapohuatamaꞌ, Sinioro noꞌhuiarinquëmaꞌ. Noꞌhuitënquëma aꞌnaromarëáchin ataꞌhuantarinquëmaꞌ. 5Mamanshi chinotacaiso marëꞌ artaroroꞌsa nipisoꞌ, ohuatamaso yaꞌhuërin. Naꞌpiroꞌsantaꞌ, nararoꞌsanta chinotai marëꞌ nipisoꞌ, noyá ataꞌhuantocoꞌ. Mamanshinënanta ahuiquitocoꞌ. 6Canpitaso nipirinhuëꞌ, Sinioroíchin chinotamaso marëꞌ nani acorinquëmaꞌ. Naꞌa nacionoꞌsa isoroꞌpaquë yaꞌhuëpirinhuëꞌ, canpitasoꞌ, ina piyapinënpita nicamaso marëꞌ huayoninquëmaꞌ,” itërin Moisësëri.

Siniorori nosoroaton huayoninsoꞌ

7Naquëranchin Moisësëri israiroꞌsa nontaantarin: “Canpitaso aꞌnapita nacionoꞌsa quëran, huaꞌhui huaꞌhuishin nacion ninamaꞌ. Napopiramahuëꞌ, Sinioro nohuantatënquëma huayoninquëmaꞌ. 8Napoaton Iquipito quëran ocoirinquëmaꞌ. Inaquë canpitasoꞌ, chiníquën sacatatoma parisitëramaꞌ. Inapoápiramahuëꞌ, Sinioro nosororinquëmaꞌ. Nosoroatënquëma chiníquën nanantaton huaraon quëran nichaꞌërinquëmaꞌ. Naporahuaton shimashonënpoapita shaꞌhuitërinsoꞌ nanicaso marëꞌ napotërinpoaꞌ. 9Naporinso marëꞌ: ‘Sinioroíchin Yosësoꞌ. Shimashonënpoapitarëꞌ anoyatërinsoꞌ, co onporonta naniantarinhuëꞌ. Ina nosoroatëhua camaitërinsopita natëhuatëhuaꞌ, co naniantarinpoahuëꞌ canpoantaꞌ,’ tocoꞌ. 10Nipirinhuëꞌ, co Sinioro nosorohuachinahuëꞌ, co huaꞌquiya quëranhuëꞌ ataꞌhuantarin. 11Napoaton yaꞌipi camaitërinsoꞌ, pënëntërinsoꞌ, inapita ipora tahuëri camairanquëmasoꞌ, natëcoꞌ,” itërin Moisësëri.

Natëhuachinara, Siniorori catahuamiatarinsoꞌ

12Naquëranchin Moisësëri israiroꞌsa nontaantarin: “Iporasoꞌ nani Sinioro camaitërinsopita shaꞌhuitëranquëmaꞌ. Ina natëtomaꞌ, ina inachachin nicoꞌ. Inapohuatamaꞌ, Sinioronënpoa canpoarëꞌ anoyatërinso yonquiarin. Ina yonquiaton noya catahuarinpoaꞌ. Nani shimashonënpoapita shaꞌhuitërin niꞌton, catahuaarinpoaꞌ. 13Nosoroatënquëma catahuaarinquëma niꞌton, ina nohuanton naꞌa huiꞌnama yaꞌhuëtarinquëmaꞌ. Huiꞌnamapitantaꞌ, inapochachin catahuamiatarin. Trico, sipata, inapita shaꞌnamasontaꞌ, noya noyatarin. Ina nohuanton huinonta oꞌocamasoꞌ, tomanta capamasoꞌ, co pahuantarinquëmahuëꞌ. Ina nohuanton ohuacanëmantaꞌ, ohuicanëmanta naꞌasarin. Shimashonënpoapita shaꞌhuitaton: ‘Caso Yosëco niꞌto, iso noꞌpaꞌ quëtaranquëmaꞌ,’ itërin. Ina niꞌton quëtarinquëmaꞌ. Inaquë yaꞌcontapamaꞌ, inapotarinquëmaꞌ. 14Canpitaso aꞌnapita nacionoꞌsa quëran, naꞌcon naꞌcon catahuamiatarinquëmaꞌ. Ina nohuanton sanapinëmanta huaꞌhuanaꞌpiráchin nisarin. Quëmapimanta huiꞌnahuanaꞌpiroꞌsaráchin nisaramaꞌ. Pëꞌtahuanëmapitanta inapochachin nisarin. 15Sinioro paꞌpoyarinquëma niꞌton, co manta canio masarinquëmahuëꞌ. Iquipitoroꞌsasoꞌ, iráca nisha nisha quëran anaꞌintërin. Nani canpita ina nitotëramaꞌ. Co canpitaso ina pochin anaꞌintarinquëmahuëꞌ. Yaꞌipi inimiconëma tëhuënchinsoꞌ ina pochin anaꞌintapon. 16Canpitaso napoaponahuëꞌ, nisha nisha piyapiroꞌsa Sinioro nohuanton minsëhuatamaꞌ, ataꞌhuantochinacaso yaꞌhuërin. Ama inapitaso nosorocosohuëꞌ. Co mamanshinëna tëranta moshacamaso yaꞌhuërinhuëꞌ. Ina moshahuatamasoꞌ, co huachi noyatatomarahuëꞌ chiminarama huachi.

17Canpitaso nimara: ‘Isopita nacionoꞌsasoꞌ, canpoa quëran naꞌcon naꞌcon yaꞌhuëpi. Ina niꞌton, co onporonta nanitarihuahuëꞌ aꞌpacasoꞌ,’ tosaramaꞌ. 18Ama inapita yonquiatoma tëꞌhuacosohuëꞌ. Sinioronënpoasoꞌ Yosë niꞌton, Iquipito copirno piyapinënpitarë chachin co oshatarinhuëꞌ minsëapon. Ina yonquicoꞌ. 19Sinioro chiníquën nanantaton Iquipito quëran nichaꞌërinquëmasoꞌ, yonquicoꞌ. Nani ina anitotërinpoa nisha nisha maꞌsha ninin quëran, chini chiníquën nanantërinsoꞌ. Iquipitoroꞌsa napotërinso chachin, tëꞌhuatëramasopita nacionoꞌsanta minsëapon. 20Canpita tëꞌhuatatënquëmaꞌ, aꞌnaquënso naꞌpiponaꞌ. Naꞌpipirinahuë tërantaꞌ, Siniorori apaꞌyamiataton tiquiapon. 21Napoaton ama tëꞌhuatatoma ropatocosohuëꞌ. Sinioronënpoasoꞌ Yosë niꞌton, chini chiníquën nanantërin. Naporahuaton paꞌpi tëꞌhuatoroꞌ. Ina chachin canpitasoꞌ catahuaarinquëmaꞌ. 22Sinioro nohuanton piꞌpian piꞌpian quëran yaꞌhuëhuanoꞌsa aꞌpararamaꞌ. Co aꞌnaromaráchin aꞌpamaso yaꞌhuërinhuëꞌ. Mapinton maꞌsharoꞌsa naꞌatona machinquëmaꞌ. 23Co aꞌnaromarëáchin aꞌpapiramahuëꞌ, nani Sinioro acorinquëma oshaquëranchin inapita minsëcasoꞌ. Inapotatoma ataꞌhuantamaso marëꞌ acorinquëmaꞌ. 24Yosë chachin nani acorinquëma copirnonënanta minsëatomaꞌ, camaicamaso marëꞌ. Canpitari minsëhuatamaꞌ, co huachi insoari tëranta isoroꞌpaquë inapita yonquiapihuëꞌ. Huiꞌninaꞌ, shiinaꞌ, inapita ataꞌhuantarama niꞌton, co yonquiapihuëꞌ. Canpita ahuëtohuatamaꞌ, co inso copirno tërantaꞌ, chinitarinquëmahuëꞌ. Napoaton minsërahuatomaꞌ, yaꞌipi ina copirnoroꞌsa tiquiaramaꞌ. 25Mamanshinëna chinotopisoꞌ, ahuiquitaramaꞌ. Aꞌnaquën mamanshi oro quëran, prata quëran ina quëranpita tanónën pashitopi. Niꞌcona ina machináchin cancantotamaꞌ. Inapohuatamasoꞌ, co Sinioro nohuantërinsohuëꞌ nisaramaꞌ. 26Inapitasoꞌ co Siniorori nohuantërinhuëꞌ niꞌton, ataꞌhuantamaso yaꞌhuërin. Napoaton ama pëinëmaquë quëpacosohuëꞌ. Quëpahuatamaꞌ, canpitanta Sinioro ataꞌhuantarinquëmaꞌ: ‘Inasoꞌ, co Siniorori nohuantërinhuëꞌ,’ tocoꞌ,” tënin Moisësë.

Currently Selected:

Deuteronomio 7: cbt

Highlight

Copy

Compare