Deuteronomio 32

1“Piꞌiroꞌtëꞌ, isoroꞌpaꞌ, canpitanta natancoꞌ.

Piyapi pochin nicatoma natanco nonsarahuë.

2Aꞌchinahuësoꞌ, oꞌnan pochin nicapon.

Nonahuësonta poroncayo pochachin nisarin.

Aca motoꞌ oꞌnani pacatoro shipitërinso pochin nicapon.

Panpatoro iꞌshaquë taꞌsatërëso pochin nisarin.

3Ca marësoꞌ: ‘Sinioro, paꞌpi nóya,’ tënahuë.

Canpitanta ina nohuitatomaꞌ: ‘Tëhuënchachin paꞌpi nóya,’ tocoꞌ.

4Inasoꞌ, nóya paꞌpoyarinpoaꞌ. Maꞌsha nipachina, co tëhuërinhuëꞌ.

Noꞌtëquënáchin nicaton nóya ninin.

Inasoꞌ Yosë, noꞌtëquënáchin nonin.

Topinansoꞌ co onporonta piyapi maꞌsha onpotërinhuëꞌ.

Noꞌtëquënáchin ninin. Inaíchin Yosësoꞌ.

5Canpitaso paꞌpi co noyanquëmahuëꞌ.

Yosë chachin nipirinhuëꞌ tëhuëtëramaꞌ.

Co huiꞌninpita pochin nicaimaso yaꞌhuërinhuëꞌ.

6¡Co napochitomahuë pora!

Napotatomaꞌ, co yonquiramahuë pochin niconamaꞌ.

¡Ina canpitaso nininquëmaꞌ!

¡Huiꞌninpita pochachin aꞌpairinquëmaꞌ!

¡Coꞌta ina acorinquëmaꞌ! ¡Ina nohuanton nacion ocoiramaꞌ!

7Tahuërëtërëso pochin nicatomaꞌ, iráca chachin naporinso yonquiricoꞌ.

Tataparima natanco shaꞌhuichinquëmaꞌ.

Mashoyaroꞌsanta natanco anitochinquëmaꞌ.

8-9Chini chiníquën nanantërinsoari, iráca piyapiꞌsa niquë niquë acorin.

Nisha nisha nacionoꞌsaquë yaꞌhuëcaiso marëꞌ, acorin.

Noꞌpaꞌ mapisoꞌ nanirinsoꞌ, acotëraꞌpiarin.

Israiroꞌsanpoaso nipirinhuëꞌ, noya noya noꞌpaꞌ acotërinpoaꞌ.

Cacopo shinpitanpoasoꞌ, huaꞌanëntiinpoaso marëꞌ huayoninpoaꞌ.

10Inotëro parti huëcasëhuaꞌ, nitotërin.

Inaquëso noꞌpaꞌ, yanirosáchin. Apira apira ihuan paꞌnin.

Napoaton iporëso pochin paꞌpoyarinpoaꞌ.

Noya aꞌchintërinpoaꞌ. Yaꞌpira paꞌpoyarëso pochin nitërinpoaꞌ.

11Panca onian yaquëpatërinsoꞌ, yonquicoꞌ.

Huaꞌhuinpita yaquëpaton yanpo yanpónantarin.

Aꞌnara tëniton atatërin.

Anotapirinhuëꞌ, naꞌhuëtëramarahuaton anpiantën quëran pancapirin.

Inapotaton quëpanantarin.

Ina pochachin Sinioronta nitatonpoaꞌ, aꞌchintërinpoaꞌ.

Nisha nisha huëhuëpiro quëran ocoirinpoa aꞌnitotiinpoaso marëꞌ.

12Sinioroíchin nipirinhuëꞌ noya quëninpoaꞌ.

¡Co inso mamanshiri tërantaꞌ, catahuacaso yaꞌhuërinhuëꞌ!

13Motopiroꞌsa parti quëninpoaꞌ.

Catahuarinpoa niꞌton, inimicoroꞌsa minsërëhuaꞌ.

Nisha nisha nitërinsopita aꞌcarinpoaꞌ.

Natëtëquë ninoiꞌ yaꞌhuërinso oꞌshitërinpoaꞌ.

Naꞌpiro nininquë oripo nararoꞌsa huanirin.

Ina quëran toma ocoiaton quëtërinpoaꞌ.

14Pëꞌtahuanënpoa quëraontaꞌ, shoꞌshoiꞌ ocoirëhuaꞌ.

Ocoiatëhua atachirotërëhuaꞌ. Noya noya carniroaꞌhuaroꞌsa caꞌnëhuaꞌ.

Carniroroꞌsaꞌ, chipo mashoroꞌsaꞌ,

inapita Pasan parti yaꞌhuërinsoꞌ, caꞌnëhuaꞌ.

Noya noya trico nininsoꞌ caꞌnëhuaꞌ.

Noya noya opa quëran huino nipisoꞌ, oꞌorëhuaꞌ.

15Noya nocomarinquëma niꞌton, israiroꞌsanquëma amonamaꞌ.

(Maꞌsha amomiataton tomapiin tomapiin nininso pochin ninamaꞌ.)

Napoaponahuëꞌ, cahuario yatoꞌtatërinso pochin,

Yosë chachin acopirinquëmahuëꞌ, aꞌporamaꞌ.

Noya paꞌpoyatënquëma nichaꞌëpirinquëmahuëꞌ, nocanamaꞌ.

16Yosëso mamanshiroꞌsa co quëꞌyapirinhuëꞌ,

canpitaso inapita moshatomaꞌ, anoꞌhuitëramaꞌ.

Inaporama niꞌton, aꞌpitatënquëma noꞌhuirinquëmaꞌ.

17Mamanshiroꞌsa marëꞌ maꞌsharoꞌsa tëparamaꞌ.

Inapoatomaꞌ, sopairoꞌsa chachin chinotëramaꞌ.

Sinioroíchin chinotacaso nipirinhuëꞌ, inapita chinotëramaꞌ.

Shimashonëmapitasoꞌ, co ina moshapirinahuëꞌ.

Canpitaso inapita ipora nohuitatomaꞌ, yamoshaconamaꞌ.

18Yosëso tatama pochachin paꞌpoyarinquëmaꞌ.

Ina nohuanton nanpipomarahuëꞌ, naniantëramaꞌ.

19Naporamaso nicaton, Yosëso noꞌhuitërin huachi.

Huiꞌninpita pochin nipiramahuëꞌ, noꞌhuirinquëmaꞌ.

20Napoaton naporin: ‘Tëhuënchachin co noyahuëꞌ nipi.

Huiꞌnahuëpita pochin niꞌpirahuëꞌ, co huachi natërahuëꞌ.

Napoaton aꞌporahuato co huachi catahuapohuëꞌ.

¿Onpoꞌina taꞌma paꞌ? tënahuë.

21Mamanshi moshapi niꞌton, aꞌpitato noꞌhuitërahuë.

Mamanshisoꞌ co máquënhuëꞌ nipirinhuëꞌ, chinotopi.

Nisha piyapiꞌsa catahuarahuë niꞌton, canpitariso aꞌpitaramaꞌ.

Inapitaso co yonquipirinacohuëꞌ, catahuarahuë.

Ina marëꞌ canpitanta noꞌhuitaramaꞌ.

22Paꞌpi anoꞌhuitëramaco niꞌton, pën huëchimitërinso pochin nisarahuë.

Acoporo partiquë huarëꞌ ahuiquitarahuë.

Yaꞌipi motopiroꞌsa achinirinsopitantaꞌ, ahuiquitarahuë.

Isoroꞌpantaꞌ, nani maꞌsha papotërinsopitarë chachin inapotarahuë.

23Pëꞌchinan camayo maꞌsha yatëpaton, inantërinso pochin nisarahuë.

Naꞌcon parisitacaso aꞌpatimaranquëmaꞌ. Nani maꞌsha quëran parisitaramaꞌ.

24Tanarotatomaꞌ, taquiaramaꞌ. Sapo quëraontaꞌ, taꞌhuantaramaꞌ.

Nisha nisha canio yaconaton, tiquiarinquëmaꞌ.

Tanan niꞌniroꞌsa aꞌpataranquëmaꞌ. Quëtëton yaꞌhuanoꞌsantaꞌ, aꞌpataranquëmaꞌ.

25Inimicoroꞌsari huiꞌnamapita cachiroꞌsaquë tëpapon.

Pëianaquënta yaꞌhuëapomarahuëꞌ, paꞌyan yatëpáponquëmaꞌ.

Huiꞌnapiꞌsaꞌ, nanoꞌsaꞌ, mashoyaroꞌsaꞌ, huaꞌhuaroꞌsaꞌ, inapitanta inimicoroꞌsari tëpapon.

26“Yaꞌipi parti israiroꞌsa ayanquëꞌi.

Tiquimiatohuato, co huachi insonta inapita yonquiarinhuëꞌ,” topirahuë.

27Inapotohuatoso nipirinhuëꞌ, inimicoroꞌsa tëhuaponaco:

“Quiyasoꞌ chini chiníquën nanantërai.

Co Sinioro nohuantopirinhuëꞌ, israiroꞌsa tiquirai.

¡Ma noyacha ninai quiyaso paya!” tosapi.

Napoaton co israiroꞌsa tiquicaisoꞌ nohuantërahuëꞌ.

28Israiroꞌsaso napoaponahuëꞌ, co noꞌtëquën yonquipihuëꞌ.

Co manta natantërëhuë pochin niconpi.

29Yonquinahuanoꞌsa nipi naporini, shaꞌhuitërahuësoꞌ yonquiꞌitonahuëꞌ.

Natëtopi naporini, co maꞌsha onpoꞌitonahuëꞌ, tënahuë.

30Napoaton israiroꞌsa napotërahuë: Tëhuënchachin mini tananpitëranquëmaꞌ.

Napoaton aꞌnaíchin inimico sontaro nipirinhuëꞌ, huarancanquëma nitaꞌatërinquëmaꞌ.

Catoyáchinta nipirinahuëꞌ, shonca huarancanquëma nitaꞌatërinquëmaꞌ.

Carinquëma aꞌpaiápiranquëmahuë tananpitëranquëma niꞌton,

ca nohuanto inimicoroꞌsa minsërinquëmaꞌ,’ itërahuë,” tënin.

31Naquëranchin Moisësë cantaton tapon: “Inimiconënpoapitanta nani nitotopi:

‘Canpoaso mamanshiroꞌsa chinotopirëhuahuëꞌ, co tëhuënchachin catahuarinpoahuëꞌ.

Israiroꞌsari chinotërinsoso nipirinhuëꞌ, tëhuënchachin catahuarin,’ topi.

32Inahuasoꞌ, oparo nitapirinso pochin nipi.

Opasoꞌ cashi cashin nipirinhuëꞌ, inahuasoꞌ, opa máin pochin nipi.

Shiꞌërin nitërinso pochin niconpi.

Paꞌpi co noyahuëꞌ nipi niꞌton, Sotomaroꞌsaꞌ, Comoraroꞌsaꞌ, inapita pochin cancantopi.

33Inahua huinonënasoꞌ, yaꞌhuan tomainën yatëparinposo pochin ninin.

Inapitasoꞌ, maquëran tëranta tëpainënpoasoꞌ yonquiapi.

34Inapita yonquiaton Yosëso tapon:

‘Co noyahuëꞌ nipirinahuëꞌ, co anaꞌintaꞌhuasoꞌ shaꞌhuitarahuëꞌ.

Paꞌton nininsoꞌ taparëso pochin taꞌcharárahuë.

35Anaꞌintaꞌhuaso tahuëri nanihuachin, naporo noꞌtëquën iꞌhuërëtarahuë.

Anotërëso pochin nipachinaꞌ, naporo huarëꞌ anaꞌintarahuë.

Nani huachi taꞌhuantacaiso tahuëri yaꞌcaritërin.

¡Nani ora naniriarin anaꞌintacasoꞌ!’ ” tënin.

36Naquëranchin Moisësë cantaton tapon:

“Canpitaso Sinioro chachin paꞌpoyarinquëmaꞌ.

Co huachi nanitëramahuëꞌ niꞌpachina, nosoroarinquëmaꞌ:

‘Piyapinëhuëpita inimiconënpitari yaminsërin.

Chiníquënoꞌsa capa niraꞌpiapi.

Sanpacharoꞌsanta capa nisapi,’ topachina, catahuaarinquëmaꞌ.

37-38Naporoꞌ inaso nontatënquëmaꞌ:

‘ “Mamanshiroꞌsa paꞌpoyarinpoaꞌ,” ¿tënama pora?

¿Intohuata inahuaso paꞌpi huachi?

¡Inapita marëꞌ maꞌsha tëpatoma tomaquën aꞌcatë pochin nitëramaꞌ!

¡Huinonta quëshitoma oꞌshitërëso pochin nitëramaꞌ!

Inapita nipachin paꞌpoyainquëmaꞌ.

Pashítatona catahuainquëma huachi.

39Casáchin Yosëco. Mamanshiroꞌsasoꞌ, co ca pochin nipihuëꞌ.

Ca nohuanto piyapiꞌsa nanpirapi, ca nohuanto chiminapi.

Ca nohuanto piyapiꞌsa maꞌsha onpopi.

Ca nohuanto chachin noyataantapi.

Anaꞌintaꞌhuaso chinotohuato, co insonta chaꞌëtarincohuëꞌ.

Chini chiníquënco niꞌto, anaꞌintarahuë.

40-41Inápaquë anquirahuato shaꞌhuitaranquëmaꞌ:

Caso yaꞌhuëmiatërahuë niꞌto, noꞌtëquën shaꞌhuitaranquëmaꞌ.

Sahuëni huënaráchin yaꞌhuëtërincoso toꞌnahuato,

noya coisë pochin nisarahuë.

Inimiconëhuëpita noꞌtëquën iꞌhuërëtarahuë. Noꞌhuirinacosopita, nanirinso chachin anaꞌintarahuë.

42Pëꞌchinan shinërëquë inimicoroꞌsa tëpahuatëra,

huënaisáchin shinërëroꞌsa acorëꞌ.

Inapochachin anaꞌintohuato co insonta chaꞌësarinhuëꞌ.

Sahuëninëhuë quëran inapita tiquiarahuë.

Acaniaꞌpitopisopita, topinan mapisopita, yaꞌipi inapita tëparahuë.

Ainëna aꞌpamapisopitaquë#32.42 Ainëna aꞌpamapisopita: Naporo tahuëriꞌsa aꞌnaquën sontaro nicasoiꞌ, ainëna aꞌpamapi. huarëꞌ tëparahuë,’ tënahuë,” tënin.

43Cantarinso tiquiapon pochin Moisësësoꞌ taantarin:

“Canpitanta nisha nisha nacionoꞌsaquë yaꞌhuëramasopita,

israiroꞌsarëꞌquëma capa cancantocoꞌ.

Piyapinënpita tëpahuachinaꞌ, Siniorori noꞌtëquën iꞌhuërëtarin.

Huaꞌanën niꞌton napotarin.

Yaꞌipi inimiconënpita anaꞌintaton iꞌhuërëtarin.

Israiroꞌsa oshanën inquitahuaton, noꞌpanëntaꞌ, tapararin,” tënin Moisësë cantaton.

Israiroꞌsa yatonitaton, Moisësë naporinsoꞌ

44-45Naporoꞌ Moisësë, Cosoi, inapitari yaꞌipi israiroꞌsa niyontonpiquë ina canta aꞌchinpi. Caniaritërin quëran, tiquiaquë huarëꞌ aꞌchinpi. 46Nani aꞌchintahuaton itapon: “Yaꞌipi ipora shaꞌhuitëranquëmasopita noya yonquicoꞌ. Ina quëran huiꞌnamaꞌ, shiparimaꞌ, inapitanta camaico yaꞌipi pënëntërinsoꞌ natëcaiso marëꞌ. 47Sinioronënpoasoꞌ Yosë niꞌton, inasáchin cancantatoma pënëntërinsopita noꞌtëquën natëcoꞌ. Ina noya natëhuatamaꞌ, huaꞌqui noya nanpiaramaꞌ. Co huaꞌquiya quëranhuëꞌ Cortaniiꞌ aquëtëran noꞌpaꞌ masaramaꞌ. Sinioro pënëntërinsoꞌ noya natëhuatamaꞌ, huaꞌqui inaquë yaꞌhuaramaꞌ,” itërin.

Moisësë noꞌpaꞌ notëcasoꞌ shaꞌhuitërinsoꞌ

48-49Naporo tahuëri chachin Siniorori, Moisësë nontaton itapon: “Aparin motopiroꞌsaquë paꞌsahuaton, Nipo motopi huiꞌnimotënꞌpaꞌ nanpëontaquëꞌ. Ina motopisoꞌ, moaporoꞌsa noꞌpanënquë yaꞌhuërin. Quirico ninano notënanquëꞌ. Ina quëran Canaan noꞌpaꞌ notëaran. Ina noꞌpaꞌ huaꞌanëntacaiso marëꞌ israiroꞌsa quëtarahuë. 50Inaquë nanpëontarahuaton chiminaran. Inapoaton shimashonënpita quënancontaran. Iya masho Aaron, Or motopiquë chiminin. Inapoaton shimashonënpita quënanconinso pochachin, quëmanta nisaran. 51Catoma chachin Sin inotëro parti, co casáchin cancantatomacohuë tëhuëtëramaco. Ina niꞌton, co israiroꞌsa naporo noya niꞌninacohuëꞌ. Miripa-Catisë iꞌshaquë naporamaꞌ. 52Napoaton aquëran israiroꞌsa noꞌpaꞌ quëtarahuësoꞌ notëaran. Co inaquë yaꞌconaranhuëꞌ,” itërin.

Currently Selected:

Deuteronomio 32: cbt

Highlight

Copy

Compare