Amós 8
8
Huayo noyá cayatërinso pochin nininsoꞌ
1Aꞌna tahuëri Sinioro huaꞌnarëso pochin aꞌnotaantarinco. Aꞌna iꞌmëquë huayo noyá cayatërin niꞌnahuë. 2Ina quëran Sinioro nataninco:
—¿Maꞌta Amosë niꞌnan? itërinco.
—Aꞌna iꞌmëquë huayo noyá cayatërin niꞌnahuë, itërahuë.
Naporoꞌ Sinioro taantarin:
—Tëhuënchachin mini. Israiroꞌsantaꞌ, nani huachi noyá cayapiso pochin nipi. Napoaton co huachi aquëtë nichaꞌësarahuëꞌ. 3Ina tahuëri nanihuachin, copirno noyápiachin pëinënquë cantayantopisoꞌ, copi tapon. Naꞌnëroꞌsa yaꞌhuërëꞌ, oshaatona noncarorantaponaꞌ. Notohuaroꞌ piyapi naporo chiminapon niꞌton, co huachi paꞌpitaponahuëꞌ. Onpopinquë tëranta topinan tëꞌyataponaꞌ. Co manta tëcaponaraihuëꞌ, tëꞌyataponaꞌ. Ca Sinioroco noꞌtëquën shaꞌhuitaranquëmaꞌ, tënin.
Israiroꞌsa anaꞌintacaso yaꞌcaritërinsoꞌ
4Aꞌnaquëmaso co panorohuanhuëꞌ nicatomaꞌ, sano piyapiroꞌsa ihuaramaꞌ. Popriyatopisopitantaꞌ, naꞌcon naꞌcon aparisitëramaꞌ. 5-6Canpitaso maꞌsha paꞌanaꞌpinquëma niꞌton: “¡Trico paꞌantacaso marëꞌ yoquiaꞌhuaraiꞌ pita, manóton naꞌhuëin! Ihuatë pëꞌtënanquë pëꞌtënatëhuaꞌ, naꞌcon naꞌcon canacaso marëꞌ ¡Sahuatontaꞌ, aꞌnaroáchin naꞌhuëin! Popriyaroꞌsa aquëtë apopriyatahuaꞌ. Inahuara chachiontaꞌ, nihuirinpoaso marëꞌ paꞌanhuaꞌ. Sapatë marëya tëranta nihuihuachinpoaꞌ, inapotahuaꞌ. Trico nitapihuachina tëꞌyatopirëhuahuëꞌ, ina tëranta paꞌantacaso yaꞌhuërin,” tënamaꞌ.
7Inaporamaso marëꞌ Sinioro tapon:
“Caso Sinioroco niꞌto, israiroꞌsanquëma chinotopiramacohuëꞌ, co onporonta naporamaso naniantarahuëꞌ.
8¡Anaꞌintohuatënquëmaꞌ, yaiꞌpi roꞌpaꞌ nacontapon!
¡Yaꞌipi piyapiroꞌsantaꞌ, naꞌnëcaisoꞌ yaꞌhuëapon!
Isoroꞌpaꞌ chachiontaꞌ, Niroiꞌ pamatërinso pochin nisarin.
Pamatërin quëran huinquintërinso pochin, nisarin antaꞌ,” tënin.
9Naquëranchin Sinioro taantarin:
“Isontaꞌ, ca Sinioroco noꞌtëquën shaꞌhuitaranquëmaꞌ:
Ina tahuëri nanihuachin, camotëchin nipirinhuëꞌ, piꞌi tacopiapon.
Yono piꞌi nipirinhuëꞌ, tashiapon.
10Pita tahuëriꞌsa naꞌhuëyantëramasoꞌ, acopitarahuë.
Pita yaꞌhuërënamën, chiminpisopita marëꞌ naꞌnëtoma oshaarápomaꞌ.
Sëtohuachinara aꞌmopisoꞌ, canpitanta aꞌmosaramaꞌ.
Co napion ancatohuachinara noyá niyaꞌitopiso pochin niyaꞌitaramaꞌ.
Aꞌnaíchin huiꞌnin yaꞌhuëtopirinhuëꞌ,
chiminpachina naꞌnëpiso pochin nisaramaꞌ.
11Co huaꞌquiya quëranhuëꞌ, tanacaiso isoroꞌpaquë aꞌpararahuë.
Napoaponahuëꞌ, co cosharo quëran tanaponahuëꞌ.
Co oꞌoi quëran yamoroaponahuëꞌ.
Ca nanamëhuë natanacaiso marëꞌ tanarëso pochin nisapi.
12Napoatona piyapiꞌsa patë patë́rantaponaꞌ.
Ca Sinioroco nonahuësoꞌ, yonitona napoaponaꞌ.
Aꞌna marë quëran aꞌna marëꞌpaꞌ,
norti parti quëran piꞌi pipirinso parti paponaꞌ.
Napopirinahuëꞌ, co nanamëhuë natanapihuëꞌ.
13Nanoꞌsa noyápiroyanchin nipirinahuëꞌ,
huiꞌnapiꞌsanta chiníquën cancantopirinahuëꞌ,
yamorotonaꞌ, tapinanpitëraponaꞌ.
14Samariaquë mamanshiroꞌsa chinotatonaꞌ:
‘Noꞌtëquën nontaranquën. Tano mamanshiantaꞌ#8.14 Tano mamanshiantaꞌ: Tano israiroꞌsa huënton mamanshi moshapisoꞌ, tapon naporin.,’ topi aꞌnaquën.
Piirsipaquënta mamanshiroꞌsa yaꞌhuërinso chinotatonaꞌ:
‘Noꞌtëquën nontaranquën. Piirsipa mamanshiantaꞌ,’ topi aꞌnaquëontaꞌ.
Napopisopitasoꞌ, ca nohuanton anotërëso pochin nipachinaꞌ,
co huachi huënsëaponahuëꞌ,” tënin Sinioro.
Currently Selected:
Amós 8: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
