Amós 2
2
1Naquëranchin Sinioro taantarin:
“Moaporoꞌsantaꞌ, paꞌpi co noyahuëꞌ nipi.
Aꞌnara Itomo copirno paꞌpitopiso nansëquën mapi.
Inapoatona yano taranaquë huarëꞌ ahuiquitopi.
Napoaton moaporoꞌsa anaꞌintaꞌhuaso yaꞌhuërin.
2Ca nohuanton Moapo parti huíquitapon.
Quirioto ninanoquë noya noyápiachin pëiroꞌsa yaꞌhuërinsoꞌ
ina pëni chachin ahuiquitapon.
Tronpitaroꞌsa pihuisoiꞌ,
niahuëatona noncarorapi quëran moaporoꞌsa chiminaponaꞌ.
3Copirnonëna osërëtarahuë.
Ina nisahuaton huaꞌanoꞌsa acorinsopitarë chachin, tëpaarahuë,” tënin.
4Naquëranchin Sinioro taantarin:
“Cota huënton israiroꞌsantaꞌ, paꞌpi co noyahuëꞌ nipi.
Aꞌchintërahuësopita nocanatonaꞌ,
pënëntërahuësopitanta co natëpihuëꞌ.
Shimashonëna moshapiso chachin inapitanta moshaantapi.
Napoaton inapitanta anaꞌintaꞌhuaso yaꞌhuërin.
5Ca nohuanton Cota huënton parti huíquitapon.
Ina pëni chachin Quirosarinquë
noya noyápiachin pëiroꞌsa yaꞌhuërinsoꞌ, ahuiquitapon,” tënin.
Israiroꞌsanta anaꞌintacaso shaꞌhuitërinsoꞌ
6Naquëranchin Sinioro taantarin:
“Israiroꞌsanta paꞌpi co noyahuëꞌ nipi.
Aꞌnaquën co manta tëhuëpirinahuëꞌ,
aꞌnapitari asacatacaiso marëꞌ paꞌanpi.
Popriyaroꞌsanta sapatë marëáchin nihuitopirinahuëꞌ, inapotopi.
Napopiso marëꞌ inapitantaꞌ, anaꞌintaꞌhuaso yaꞌhuërin.
7Inapitasoꞌ, popriyaroꞌsa aparisitatona atapanpi.
Sano piyapiroꞌsantaꞌ, co noꞌtëquën catahuapihuëꞌ.
Aꞌnaquëonta huiꞌninëꞌ, sanapi catopitopi.
Caso noyasáchin nipirahuëꞌ,
israiroꞌsa napopiso marëꞌ piyapiroꞌsa pinorinaco.
8Inapitasoꞌ mamanshi marëꞌ maꞌsha tëpapisoꞌ caꞌpatopi.
Aꞌnanpiso pahuërëtacaisoꞌ nitotai marëꞌ
aꞌmopiso maꞌpatopi.
Ina huëtohuachinara, ina aipi caꞌpatopi.
Topinan quëran apahuërëtahuatonaꞌ, coriqui maꞌpatopi.
Ina coriquiquë huino paꞌanatonaꞌ,
mamanshinëna moshapisoꞌ pëiroꞌsaquë oꞌopi,” tënin.
9Ina quëran Siniorosoꞌ, piyapinënpita itapon:
“Iráca caso shimashonëmapita isoporinquë poꞌmocaꞌhuaso marëꞌ
amororoꞌsa ataꞌhuantërahuë.
Inapitasoꞌ nonara pochin inapatopirinahuëꞌ, ataꞌhuantërahuë
nopri nara pochin chiníquënoꞌsa nipirinahuëꞌ, inapotërahuë.
10Canpitaso Iquipito quëran ocoirahuatënquëmaꞌ,
catapini shonca piꞌipi inotëro parti ichiiratëranquëmaꞌ.
Ina piquëran, inahua noꞌpanëna huaꞌanëntamaso marëꞌ
quëtëranquëmaꞌ.
11Aꞌnaquëmasoꞌ, yonquirahuëso shaꞌhuicaso marëꞌ acoranquëmaꞌ.
Aꞌnaquëmantaꞌ, ca nohuanton nasario yaꞌconamaꞌ.
Napotëranquëmasoꞌ noꞌtëquën niꞌton,
‘co napopirinhuëꞌ napoárin,’ co taꞌcamaso yaꞌhuërinhuëꞌ.
Ca Sinioroco noꞌtëquën shaꞌhuitaranquëmaꞌ,” itërin.
12Ina quëran Sinioro taantarin:
“Nasarioroꞌsa#2.12 Nasarioroꞌsa tapon naporinso yanitotohuatan Jue 13.5 notaquë nontëquëꞌ. nipirinahuëꞌ, apisápatoma huino oꞌshitëramaꞌ.
Pënëntonaꞌpiroꞌsanta pënëinquëmaso marëꞌ nanan quëtopirahuëꞌ,
noꞌhuitoma acopitëramaꞌ.
13Naporamaso marëꞌ mini,
toronanquë naꞌa trico aꞌmitëtopinan paꞌpachina,
noꞌpaꞌ niꞌpirinso pochin canpitanta nitaranquëmaꞌ.
14Chiníquën taꞌapiramahuëntaꞌ, co chaꞌësaramahuëꞌ.
Chini chiníquën nininso tëranta co huachi napoarinhuëꞌ.
Chini chiníquën cancantërinso tëranta co chaꞌësarinhuëꞌ.
15Pëꞌchinanquë míso inantopirinhuëꞌ, co huachi chiniaponhuëꞌ.
Chiníquën taꞌanaꞌpintaꞌ, co chaꞌësarinhuëꞌ.
Cahuarioquë taꞌarinsonta chiminapon.
16Ina tahuëri nanihuachin, chiníquën ahuëtonaꞌpi nicaponahuëꞌ,
ahuëtacaiso marëꞌ ohuararinsopita tëꞌyatahuaton taꞌapon.
Ca Sinioroco chachin noꞌtëquën shaꞌhuitaranquëmaꞌ,” tënin.
Currently Selected:
Amós 2: cbt
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
