Hechos 27

Nomaquë Paono aꞌpapisoꞌ

1Ina quëran Pisto yaaꞌparincoi. Aꞌnapita apiroꞌsantaꞌ yaaꞌparin. Noma copirno Itaria parti yaꞌhuërin niꞌton, Noma sontaroꞌsaꞌ capitan Orio itopisoꞌ nontërin inatohuaꞌ quëpacaiso marëꞌ. “Paono, apiroꞌsaꞌ, inapita quëpacoꞌ,” itohuachina, “Noyahuaꞌ. Quëpaꞌi nipachin,” tënin. 2Inaquë panca nancha yaꞌhuërin, Atramitio quëran huëꞌninsoꞌ. Asia parti yapaꞌsarin. Aꞌnaya aꞌnaya ninanoquë yachinpirinsoꞌ. Inaquë yaꞌconahuatoi, pipirai. Aristarcontaꞌ caꞌtanincoi. Inasoꞌ Tisaronicaquë yaꞌhuërin, Masitonia parti nininsoꞌ. 3Tahuëririnquë Sitonquë nonshirai. Inaquë Paono nosoroaton, capitani itërin: “Nipayaransopita yaꞌhuërinquë yapaꞌpatan, noya paquëꞌ,” itërin. Paꞌpatoira, pahuantërincoisopita quëtërinacoi. 4Ina quëran pipirahuatoi, Chipriquë canconai. Ihuan niquëran pitarincoi niꞌton, coninan paꞌtërai. 5Ina quëran Sirisia parti, Panpiria parti, inapita pirayan naꞌhuërai. Inapoatoi, Nisia parti canconai. Miraquë nonshiconai.

6Inaquë capitan aꞌna nancha quënanin, Aricantria quëran huëꞌninsoꞌ. Itaria parti yapaꞌsarin niꞌton, inaquë ichiyaꞌconincoi. Panca nancha inasoꞌ. 7Pipirahuatoi, sacaiꞌ paꞌnai. Oshaquëran paatoi, naꞌa tahuëri quëran Quinitoquë canconai. Ihuan nacapiatoi, panca soꞌton Crita itopisoꞌ tahuitonai. Sarmona yaꞌcariya paꞌnai. 8Inaquë yonsaiꞌ paꞌtërai. Sacaiꞌ paꞌsahuatoi, Noya Nonshinanoꞌsaꞌ itopiquë canconai. Yaꞌcariya aꞌna ninanoꞌ yaꞌhuërin. Nasia itopisoꞌ.

9Huaꞌquirai niꞌtoi, oꞌnapi tahuëriꞌsaꞌ naniriarin. Naporo quëran huarëꞌ huëhuëpiroꞌ marë paꞌtacasoꞌ. Napoaton Paonori itapon:

10—Ama siniororoꞌsaꞌ paꞌahuasohuëꞌ, maꞌsha onpohuatëhuaꞌ, tënahuë. Paꞌpatëhuaꞌ, nancha tapiarëhuaꞌ. Maꞌsharoꞌsantaꞌ aꞌpaitarihuaꞌ. Piyapinpoantaꞌ chimiitochináchin, itërin.

11Capitanso nipirinhuëꞌ co natëtërinhuëꞌ. Nancha huaꞌanën, nancha quëpanaꞌpi, inapita manorapi: “Paꞌahuaꞌ,” itohuachinara, “Noyahuaꞌ, paꞌahuaꞌ nipachin,” tënin capitan. 12“Iso nonshinanquë co noyahuëꞌ oꞌnapi naꞌhuëanatacasoꞌ. Pinisiquë tërantaꞌ canconamarëhuaꞌ. Inaquë oꞌnapi naꞌhuëanatahuaꞌ,” topi. Napoaton manorapi. Pinisisoꞌ Crita parti yaꞌhuërin. Nonshinanën quëran piꞌi pipirinso parti notëërin.

Panca ihuani maninsoꞌ

13Ihuan ahuënan quëran huisohuantahuachina, “Iporasoꞌ noya pacacasoꞌ,” topachinara, pipirai. Crita yonsaiꞌ paꞌtërai. Noya paꞌsapiraihuëꞌ, 14shiarahuaton, panca ihuan manincoi. Piꞌi pipirinso parti quëran huëcaponahuëꞌ, norti parti amasha yonsanin. 15Chiníquën mapachincoira, co nanitëraihuëꞌ noꞌtëcaꞌhuaisoꞌ. Ihuansaꞌ topinan quëpaconincoi. 16Marë huancoanaiꞌ soꞌton yaꞌhuërin, Caota itopisoꞌ. Co pancanayahuëꞌ. Inataquëchin co ihuan chiníquën paꞌninhuëꞌ niꞌton, ina yonsan yoranai. Ina paꞌtasocoi, sacaiꞌ niponahuëꞌ, poti quëparaisoꞌ aꞌsonai ama ihuani oshitëcaso marëhuëꞌ. 17Ohuararahuatonaꞌ, nanchaquë poꞌmopi. Ina quëran caporinquë nancha soꞌquëtopi ama yaꞌquirapicaso marëhuëꞌ. Ina yaꞌcariya panca saꞌmairoꞌ yaꞌhuërin. Inotërachin ninin, Sirti itopisoꞌ. Nohuitatonaꞌ, ama inaquë pacacaso marëhuëꞌ panca nëꞌmëtëꞌ ótënpisoꞌ, aꞌpamapi. Inapotohuachinara, ihuansaꞌ topinan quëpaconincoi. 18Tahuëririnquë coꞌsacairi chiníquën ayanpon yanpontárin. Chiníquën ihuaiꞌ niꞌton, pëꞌpëtoroꞌsaꞌ quëpapisoꞌ inquiitopi. 19Ina tashiraya nancha maꞌshanënpitantaꞌ inquiitopi. 20Ina quëran naꞌa tahuëri co piꞌi quënanaihuëꞌ. Tayorantaꞌ co yaꞌnorinhuëꞌ. Intohuasoꞌ quëparincoi nimara. Co nitotëraihuëꞌ. Chiníquën ihuantarin niꞌton: “Tëhuënchachin chimiitarihuaꞌ; co chaꞌësarihuahuëꞌ,” topiraihuëꞌ.

21Nani huaꞌquiꞌ co coshatëraihuëꞌ. Chiníquën ihuan manincoi niꞌton, co nanitëraihuëꞌ. Co huachi chiniraihuëꞌ. Paonosoꞌ huancánachin huanirahuaton, itapon:

—Natanco iyaroꞌsaꞌ noꞌtëquën shaꞌhuichinquëmaꞌ. Niꞌcoꞌ. Critaquë quëparitacaso marëꞌ shaꞌhuitopiranquëmahuëꞌ, co natëramacohuëꞌ niꞌton, huëꞌnëhuaꞌ. Co huëꞌnëhuahuëꞌ naporini, co maꞌsha onpoꞌitërihuahuëꞌ. Co maꞌsha ayaꞌitonhuëꞌ. 22Iporaso nipirinhuëꞌ chiníquën cancantocoꞌ. Co inquënpoa tërantaꞌ chimiitarihuahuëꞌ. Nanchasáchin ayatarihuaꞌ. 23Casoꞌ Yosë natërahuë. Inasáchin imarahuë. Ina nohuanton, achin tashiꞌ anquëninën yaꞌnotimarinco. 24Yaꞌnotimarahuatonco, itërinco: “Ama Paono tëꞌhuaquësohuëꞌ. Co chimiitaranhuëꞌ. Yosë nohuanton, aꞌna tahuëri Noma copirno yaꞌhuërinꞌpaꞌ cansaran copirno chachin nontamaso marëꞌ. Yosë nontëran niꞌton, yaꞌipi nanchaquë nisaramasopita nanpiaramaꞌ. Co aꞌnayanquëma tërantaꞌ chiminapomahuëꞌ,” itërinco anquëni. 25Napoaton iyaroꞌsaꞌ chiníquën cancantocoꞌ. Tëhuënchachin Yosë natërahuë. Co inasoꞌ nonpintërinpoahuëꞌ. Shaꞌhuitërincoso chachin co aꞌnayanpoa tërantaꞌ chimiitarihuahuëꞌ. 26Nipirinhuëꞌ, aꞌna soꞌtonquë ihuaiꞌ tëꞌyatarinpoaꞌ, itërincoi Paono.

27Nani catoꞌ simana naniriahuasoꞌ, Atriatico marëquë yanponarai. Ipora huantaꞌ ihuaiꞌ quëparárincoi. Yono tashi pochin nisahuasoꞌ: “Noꞌpaꞌ yaꞌcariarëhuaꞌ,” topi nancha quëpanaꞌpiroꞌsaꞌ. 28Napoaton caporin quëran tantiarin. “Cara shonca saota mitro anpotërinsoꞌ,” tënin. Amashamiachin paꞌsahuatoi, inapochachin tantiantarin. “Cato shonca canchisë mitroíchin anpotërinsoꞌ,” tënin. 29“Naꞌpiquë yaꞌparapihuatëhuaꞌ,” taꞌtonaꞌ, huanconën quëran catapini huaꞌna motoꞌ tëꞌyaitopi ama pacacaso marëhuëꞌ. “¿Onporohuarëcha tahuërirëꞌpoya?” taꞌtonaꞌ, moshatopi. 30Nancha quëpanaꞌpiroꞌsaso nipirinhuëꞌ yataꞌananpitonacoi: “Huiꞌnimotën quëran aꞌna huaꞌna motoꞌ tëꞌyaitahuaꞌ,” niitatonaꞌ, taꞌacaiso marëꞌ poti iꞌquë yatëꞌyatantapi. 31Napohuachinara, Paonori nicaton, capitan, sontaroꞌsaꞌ, inapita itapon:

—Isopita taꞌahuachinaꞌ, co canpitantaꞌ chaꞌëpomahuëꞌ, itërin.

32Napotohuachina, sontaroꞌsasoꞌ manorahuatonaꞌ, caporin nishitëtopi. Inapotohuachinara, poti iꞌquë anotërin huachi.

33Tahuëri yaꞌcaritohuachina, Paono itantarincoi:

—Iporasoꞌ, iyaroꞌsaꞌ, nani catoꞌ simana paꞌyanatomaꞌ, co coshatëramahuëꞌ. 34Napoaton coshatoco huachi chiniamaquëmaꞌ. Co chimiitarihuahuëꞌ. Co mantaꞌ onpoarihuahuëꞌ, itërincoi.

35Itahuatoncoi, pan manin. Yaꞌipiya niꞌtërantapaiquë, Yosë nontërin. “Yosparinquën Tata Yosë,” itahuaton, sëꞌpanin. Ina quëran coshatarin. 36Napohuachina, yaꞌipicoi chiníquën cancantatoi, coshatërai. 37Cato pasa canchisë shonca saotayaꞌpicoi nanchaquë yaꞌhuërai. 38Nani yaꞌipiya natëhuachinara, trico quëparaisoꞌ inquiitopi. Inapotohuachinara, nancha niotëintarin.

Nancha quëran chaꞌëpisoꞌ

39Tahuërihuachina, noꞌpaꞌ quënanpirinahuëꞌ, co nohuitopihuëꞌ. Coninanquë inotëꞌ quënanpi. “Nanitohuatëhuaꞌ, pasoꞌ inotëquë chinpiaꞌahuaꞌ,” nitopi. 40Napoaton huaꞌna motoꞌ nishitëtatonaꞌ, iꞌquë aꞌpaitopi huachi. Naporo chachin noꞌsoratën iꞌshiritopi. Ina quëran huiꞌnin quëran panca nëꞌmëtëꞌ inapaquë pëꞌtënpi. Ihuan quëpahuachincoira, inotëquë paꞌsarai. 41Paꞌsapiraihuëꞌ, saꞌmairoꞌ niꞌton, huiꞌnin quëran yaꞌtararin. Co huachi yapaꞌninhuëꞌ. Huanconën quëran coꞌsacairi chiníquën opotaton, nipaatërin huachi.

42“Huëcoꞌ apiroꞌsaꞌ tëpaꞌahuaꞌ, yonatonaꞌ taꞌahuachinaꞌ,” topi sontaroꞌsaꞌ. 43Capitanso nipirinhuëꞌ nohuantërin Paono chaꞌëcasoꞌ. Napoaton “Ama tëpacosohuëꞌ. Yaꞌipinpoaꞌ paꞌahuaꞌ. Nitoyonpatamaꞌ, canpitaꞌton niitatomaꞌ, yonsaiquë pacoꞌ. 44Ina quëran aꞌnaquëmantaꞌ nontëꞌ sëꞌquërahuatomaꞌ, yonsaiquë pacoꞌ. Capa nontëꞌ nipachin, nancha maꞌshanënpitaquë tërantaꞌ sëꞌquërahuatomaꞌ, paco huachi,” itërin capitani. Naporahuatoi, chaꞌërai. Yaꞌipicoi yonsaiquë canconai.

Currently Selected:

Hechos 27: cbt

Highlight

Copy

Compare