Hechos 21

Co tëꞌhuatonahuëꞌ, Quirosarinquë paantarinsoꞌ

1Imapisopita nani nontahuatoi, panca nanchaquë pipirai. Cosëquë noꞌtëërai. Tahuëririnquë Notasëquë canconai. Ina quëran Pataraquë canconahuatoi, nonshirai. 2Inaquë aꞌna nancha quënancoantarai, Pinisia parti yapaꞌsarinsoꞌ. Inaquë yaꞌconahuatoi, paantarai. 3Chipri soꞌton notërahuatoi, ahuënan quëran naꞌhuëtërai. Paꞌsahuatoi, Siria parti canconai. Tiroquë maꞌsha oshicasoꞌ niꞌton, inaquë nonshirai. 4Quisoso imapisopita quënanconahuatoi, inaquë aꞌna simana pochin yacapatonai. Ispirito Santo nohuanton, Paono pënënpi: “Ama Quirosarinquë paquësohuëꞌ, aparisitochinën,” itopirinahuëꞌ. 5Simana nanihuachina, paantarai. Yapaꞌpatëira, ninano yonsanquë huarëꞌ imarinacoi. Saꞌinarë chachin, huiꞌninpitarë chachin caꞌtaninacoi. Nonshinanquë isonconahuatoi, Yosë nontërai. 6Ina quëran imapisopita nontahuatoi, nanchaquë yaꞌcoantarai. Yaꞌhuëhuanoꞌsaso nipirinhuëꞌ yaꞌhuëpiꞌpaꞌ paantapi.

7Tiro quëran pipirahuatoi, Torimaitaquë canconai. Imapisopita nontahuatoi, aꞌna tahuëriraꞌ iꞌhuatonai. 8Tahuëririnquë pipiantarahuatoi, Sisariaquë canconai. Inaquë nonshirahuatoi, Pinipi pëinënquë yacapatonai. Inasoꞌ iráca Quirosarinquë acopi caꞌtanoꞌsaꞌ catahuacaso marëꞌ. Canchisëyaꞌpi acohuachinara, inantaꞌ acopi. Iporaso huachi noya nanan shaꞌhuirárin. 9Catapini huiꞌninpita yaꞌhuëtërin. Nanoꞌsaꞌ niponaraihuëꞌ, co soꞌyapihuëꞌ. Ispirito Santori catahuarin Yosëri anitotërinso shaꞌhuicaisoꞌ. 10Inaquë huaꞌquimiáchin yaꞌhuasocoi, aꞌna pënëntonaꞌpi Cotia parti quëran oꞌmarin, Acapo itopisoꞌ. 11Huëꞌsahuaton, Paono sintoronën ocoirahuaton, inaora tanpaquën nantënë chachin nitonporin.

—Ispirito Santo nohuanton iyasha, ninorahuë. Quirosarinquë paꞌpatan, sintoronënquë nitonporahuëso pochachin cotioroꞌsaꞌ tonpoarinënquën. Nisha piyapiꞌsaquë yoꞌcoaninënquën anaꞌintinënquënso marëꞌ, itërin. 12Natanahuatoi: “Ama Quirosarinquë paquësohuëꞌ,” itopiraihuëꞌ. Inaquë yaꞌhuëpisopitarintaꞌ inachachin napotopirinahuëꞌ, co yanatërincoihuëꞌ.

13—¿Onpoatontaꞌ naꞌnëtomaꞌ asëtaramaco? Ama huachi naꞌnëcosohuëꞌ. Inatohuaꞌ paꞌpato, yatonpoarinaco. Nipirinhuëꞌ, yapaꞌsarahuë. Sinioro Quisoso imarahuëso marëꞌ yatëpapirinacohuëntaꞌ, paꞌsarahuë, itërincoi. 14Huaꞌquiꞌ nontopiraihuëꞌ, inachachin yonquirin niꞌton:

—Noyahuaꞌ. Sinioro nohuantohuachin, paquë nipachin, itërai.

15Ina quëran maꞌshanëhuëipita taparahuatoi, Quirosarinquë paantarai. 16Paꞌpatoira, aꞌnaquën imapisopita caꞌtaninacoi. Mason pëinënquë quëparinacoi yacapataꞌhuaiso marëꞌ. Inasoꞌ Chipri quëran huëꞌnin, iráca imarinsoꞌ.

Santiaco nontërinsoꞌ

17Quirosarinquë canconpatoira, imapisopita nóya nontërinacoi. Huëꞌnaiso marëꞌ noya cancantopi. 18Tahuëririnquë Paono paꞌnin Santiaco nicapon. Quiyantaꞌ paꞌnai. Yaꞌipi ansianoꞌsaꞌ inaquë nani niyontonpi. 19“Huëꞌcama, iyaroꞌsaꞌ,” itahuaton, Paonori itantapon: “Nani huaꞌquiꞌ Quisocristo nanamën aꞌchinahuë. Nisha piyapiꞌsaꞌ aꞌchintëraꞌpiarahuë. Yosë catahuarincoi niꞌton, noya natanatonaꞌ, naꞌa imasapi huachi,” itërin. Yaꞌipi aꞌchininsoꞌ shaꞌhuitërin.

20Natanahuatonaꞌ, “Ma noyacha Yosësoꞌ niꞌton, nisha piyapiꞌsantaꞌ imasapi paya,” topi aꞌnaya aꞌnaya. Ina quëran itantapi:

—Noya iyasha nipirinhuëꞌ, isëquë naꞌa huaranca cotioroꞌsaꞌ Quisoso imaponaraihuëꞌ, Moisësë iráca pënëntërinsoꞌ yanatëpi antaꞌ. “Inantaꞌ natëcasoꞌ yaꞌhuërin,” topi. 21Inapitasoꞌ nonpin nanan natantopi. “Paono nisha piyapiꞌsaꞌ yaꞌhuërinquë paaton, cotioroꞌsaꞌ inaquë yaꞌhuëpisopita nisha aꞌchintërin. ‘Moisësë pënëntërinsoꞌ aꞌpocoꞌ. Ama huachi huiꞌnamapita marca acotocosohuëꞌ,’ tënin Paono pënëntaton. Co nohuantërinhuëꞌ iráca napopisoꞌ natëcaisoꞌ,” topi, natantopi. 22¿Maꞌtaꞌ iporasoꞌ onpoaꞌahuaꞌ nonpintopisoꞌ ama natëcaiso marëhuëꞌ? Huëꞌnansoꞌ onpopiontaꞌ piyapiꞌsaꞌ nitotaponaꞌ. 23Nani yonquirai niꞌton, natancoi shaꞌhuichinquën maꞌsona nicamasoꞌ. Catapini quëmapiꞌsaꞌ isëquë yaꞌhuëpi. Nani Yosë nontopi maꞌsha nicacaisoꞌ. 24Inapita quëparahuaton, catahuaquëꞌ iráca pënëntërinsoꞌ natëcaiso marëꞌ. Yosë chinotopiso pëiquë quëparahuaton, pahuërapitëquëꞌ maꞌsha Yosë marëꞌ tëpacaisoꞌ. Ina quëran niyaꞌirapi. Inapotohuatan, yaꞌipi piyapiꞌsaꞌ niꞌsarinënquën. “Paonontaꞌ Moisësë pënëntërinsoꞌ natërin. Nonpin nanan natantërëhuaꞌ,” tosapi. 25Nisha piyapiꞌsaso nipirinhuëꞌ nani ninshitërai. “Quisocristo imapatamaꞌ, co yaꞌipi iráca pënëntërinsoꞌ natëcamasoꞌ yaꞌhuërinhuëꞌ. Isoíchin shaꞌhuichinquëmaꞌ ama nicacamaso marëhuëꞌ. Aꞌnaquën maꞌsha tëpapi mamanshi moshacaiso marëꞌ. Ina nosha tananpitocoꞌ. Naporahuaton, aꞌnaquën maconorahuatonaꞌ, maꞌsha tëpapi. Co huënainën noya inquipirinahuëꞌ, caꞌpi. Ina noshantaꞌ ama caꞌcosohuëꞌ. Naporahuaton, ama monshihuancosohuëꞌ. Cotioroꞌsacoi pënëntëraisoꞌ naꞌcon yaꞌhuëpirinhuëꞌ, inaíchin natëcamasoꞌ yaꞌhuërin,” tënai, nisha piyapiꞌsaꞌ ninshitatoi, itërin Santiacori.

Paono mapisoꞌ

26Itohuachina, “Noyahuaꞌ. Napoꞌi nipachin,” itërin Paonori. Tahuëririnquë catapiniyaꞌpi quëparin. Iráca pënëntërinsoꞌ natërahuatonaꞌ, Yosë chinotopiso pëiquë yaꞌconpi. Yaꞌconahuatonaꞌ, corto huaꞌan shaꞌhuitopi: “Canchisë tahuëri huëꞌsápoi Yosë camaitërinsoꞌ natëtoi oshanëhuëi inquicaꞌhuaiso marëꞌ. Tahuëri nanihuachin, maꞌsha quësarai canpitari tëpatomaꞌ ahuiquitamaso marëꞌ,” itopi.

27Canchisë tahuëri naniriahuachina, Yosë chinotopiso pëiquë paantapi. Inaquë aꞌnaquën cotioroꞌsa Asia parti quëran huëꞌpisopitari quënanpi. Paono quënanahuatonaꞌ, mapi. Yaꞌipi piyapiꞌsaꞌ anoꞌhuitopi. 28“¡Huëcoꞌ iyaroꞌsaꞌ catahuacoi! Iso quëmapi yaꞌipi parti paaton, nisha aꞌchinarin. ‘Cotioroꞌsasoꞌ co noꞌtëquën aꞌchinpihuëꞌ. Moisësë pënëntërinsoꞌ aꞌpocoꞌ,’ tënin. Naporahuaton, Yosë chinotopiso pëiꞌ co huachi noya niꞌninhuëꞌ. Niꞌcochi. Crico piyapiꞌsaꞌ isëquë chachin ichiyaꞌconin niꞌton, Yosë pëinën tapiarin. Co inapitasoꞌ yaꞌconacasohuëꞌ nipirinhuëꞌ,” toconpi.

29Iꞌhua Paonori Toropimo quëparahuaton, ninanoꞌ paꞌtërin, cotioroꞌsari quënanpi. Ipisoquë yaꞌhuërin niꞌton, Crico piyapi inasoꞌ. “Nisha piyapi nipirinhuëꞌ, Yosë chinotopiso pëiquë ichiyaꞌconin,” tëcatona napopi.

30Natanahuatonaꞌ, notohuaroꞌ piyapiꞌsaꞌ noꞌhuitopi. Yosë chinotopiso pëiquë taꞌarahuatonaꞌ, Paono mapi. Masahuatonaꞌ, ocoicaiso marëꞌ ohuararachinpi. Nani ocoihuachinara, yaꞌcoana oncotopi. 31Paono yatëparapisoꞌ, capitan huaꞌansoꞌ natantërin. Yaꞌipi Quirosarinquë yaꞌhuëpisopita yaniahuërapi, natantërin. 32Natantahuaton, sontaroꞌsaꞌ, capitanoꞌsaꞌ, inapita amatahuaton, quëparin. Taꞌarahuatonaꞌ, piyapiꞌsaꞌ niyontonpiquë paꞌsapi. Sontaroꞌsaꞌ yaꞌcaritërahuachinara, cotioroꞌsari quënanahuatonaꞌ, co huachi Paono ahuëpihuëꞌ. 33Capitan huaꞌani canconahuaton, Paono maconin. “Catoꞌ catinaquë tonpotanpatëquëꞌ,” itohuachina, aꞌna sontarori nitonpotanpatërin. Aꞌna tanpain quëraontaꞌ aꞌna sontarori inapotërin. Inapotohuachinara, capitansoꞌ piyapiꞌsaꞌ natanin: “¿Maꞌnintaꞌ iso quëmapi? ¿Maꞌtaꞌ onporinsoꞌ?” tënin. 34Napoaponahuëꞌ, chiníquën nonatonaꞌ, nisha nisha shaꞌhuitopi. Noncaroapi niꞌton, co nanitërinhuëꞌ noꞌtëquën natanacasoꞌ. Napoaton: “Sontaroꞌsaꞌ yaꞌhuëpiquë quëpacoꞌ,” itërin. 35-36Quëpahuachinara, yaꞌipi piyapiꞌsari imasapi. “Tëpachinacoꞌ,” itërapi. Pëiꞌ nanpënanquë canconahuatonaꞌ, naꞌcon naꞌcon noꞌhuitonaꞌ, yaahuëpi. Napoaton sontaroꞌsari Paono inápaquë pitëtërahuatonaꞌ, quëpapi.

Noꞌhuitonaꞌpiroꞌsaꞌ nontërinsoꞌ

37Pëiquë yayaꞌconpachinara, Paonori capitan itapon:

—Sinioro capitan, piꞌpian nonchinquën topirahuëꞌ, itërin.

—¿Crico nananquë nonan ti? itërin.

—Ina nananquë mini nonahuë, itërin.

38—Iquipito piyapinquën taꞌma topirahuëꞌ. Inasoꞌ iꞌhuamiáchin copirno noꞌhuiton, catapini huaranca tirocoroꞌsaꞌ, inotëro parti quëparin, itërin.

39—Co inacohuëꞌ. Casoꞌ cotio quëmapico. Tarsoquë nasitërahuë. Inasoꞌ panca ninanoꞌ, Sirisia parti yaꞌhuërinsoꞌ. Yaꞌipi piyapiꞌsaꞌ nohuitopi. Isopita piyapiꞌsaꞌ nonchi, topirahuëꞌ, itërin.

40“Inta nipachin, nontëquëꞌ,” itërin. Paono nanpënanquë huanirahuaton, anqui anquitaꞌparin. Piyapiꞌsari niꞌsahuatonaꞌ, copica topi huachi. Napohuachinara, Paonori cotio nananquë itapon:

Currently Selected:

Hechos 21: cbt

Highlight

Copy

Compare