Hechos 20

Masitonia parti, Crisia parti, inaquëpita aꞌchiantarinsoꞌ

1Piyapiꞌsaꞌ nani yanquëëhuachinara, co huachi noꞌhuitantapihuëꞌ. Ina quëran Paono yapaantarin. Yaꞌipi imapisopita amatahuaton, achinicancanin. Ina quëran “Paꞌsarahuë huachi,” topachina, “Osharan paquëꞌ,” itohuachinara, Masitoniaquë paꞌnin. 2Masitonia parti paꞌtaton, pënënaꞌpiarin achinicancanacaso marëꞌ. Inapotaton, Crisia parti canconin. 3Inaquë cara yoqui yacapatërin. Ina quëran Siria parti yapaꞌpirinhuëꞌ. Nanchaquë yayaꞌconasoꞌ, cotioroꞌsari yatëpapisoꞌ natantërin. Napoaton co inaquë paꞌninhuëꞌ. “Masitonia parti paantarahuë,” taꞌton, ira paꞌtërin. 4Naꞌa piyapiꞌsari caꞌtanpi. Sopatiro (Pirro huiꞌnin, Piriaquë yaꞌhuërinsoꞌ), Aristarco, Siconto, (Tisaronicaquë yaꞌhuëpisoꞌ), Acayo (Tirpiquë yaꞌhuërinsoꞌ), Timotio, Tiquico, Tropimo (Asia parti yaꞌhuëpisoꞌ) inapita Paono caꞌtanpi. 5Inapitasoꞌ quëchitërahuatonaꞌ, Troasëquë ninarinacoi. 6Pita tahuëri nanihuachina, Piriposë quëran pipirai. Naporoꞌ nisha pan caꞌsapi, co ahuëpocatopisohuëꞌ. Nanchaquë yaꞌconahuatoi, marë paꞌtërai. Aꞌnatërápo tahuëri quëran Troasëquë canconahuatoi, inapita quënanconai. Inaquë aꞌna simana yaꞌhuërai.

Huiꞌnapi inapa quëran anotërinsoꞌ

7Tomio tahuëri nanihuachina, niyontonai Quisoso chimininsoꞌ yonquiatoi coshataꞌhuaiso marëꞌ. Naporoꞌ Paonori aꞌchintarin: “Tashiraya paꞌsarai,” taꞌton, yono tashiquë huarëꞌ aꞌchinin. 8Inapa pëꞌsatëꞌ pëiquë niyontonai. Inaquë naꞌa nanparin orotarin. 9Aꞌna huiꞌnapi Iotico itopisoꞌ, huintanaquë huënsëápirinhuëꞌ, Paono huaꞌquiꞌ aꞌchinpachina, inaso huëꞌëiꞌ iquitaton, iquëtërarin quëran anotërin. Cara paꞌcotë quëran anotohuachina nohuararahuatonaꞌ nimapirinahuëꞌ, chiminin quënamapi. 10Paononta nohuararahuaton, ipomarin.

—Ama paꞌyancosohuëꞌ, nanpiarin, itërin piyapiꞌsaꞌ.

11Ina quëran pëiquë nanpëonantarin. Quisoso chimininsoꞌ yonquiatonaꞌ, coshatopi. Nani coshatohuachinara, ninontatonaꞌ, tahuërianpitopi. Ina quëran paꞌnin. 12Huiꞌnapi nanpiantarinsoꞌ yaꞌhuërinquë quëpantapi. Napoaton co sëtopihuëꞌ. Noya cancantopi.

Miritoquë paꞌnaisoꞌ

13Nani Paono shaꞌhuitërincoi: “Canpitaꞌton potiquë pacoꞌ. Asoquë ninataco,” itohuachincoira, paꞌnai. Inaso nipirinhuëꞌ ira paꞌtërin. 14Asoquë canconahuatoi, ninarai. Paonontaꞌ canconpachina, nanchaquë yaꞌconahuarincoi. Ina quëran Mitiriniquë canconai. 15Tahuëririnquë Quio notënanquë naꞌhuërai. Ina tashiraya Samosëquë canconai. Ina huënihuaninquë Miritoquë nonshirai. 16“Nanitohuato, Quirosarinquë Pinticostisë tahuëri yanaꞌhuërahuë,” taꞌton, co Paono nohuantërinhuëꞌ Asia parti huaꞌquicasoꞌ. Napoaton manorahuatoi, co Ipisoquë nonshiraihuëꞌ.

Ansianoꞌsaꞌ Ipisoquë yaꞌhuëpisopita pënënahuaton, patërinsoꞌ

17Miritoquë nonshirahuaton, Ipisoquë nanan aꞌparin. “Yaꞌipi ansianoꞌsaꞌ shaꞌhuitëquëꞌ huëꞌinaꞌ,” itërin. Shaꞌhuitonpachinara, aꞌnaroáchin huëꞌpi Paono nicacaiso marëꞌ. 18Huëꞌpachinara, Paonori itapon: “Iporasoꞌ iyaroꞌsaꞌ piꞌpian nonchinquëmaꞌ, noya natanco. Yaꞌnan Asia parti canquirahuë quëran huarëꞌ nohuitëramaco. Yaꞌipi ninahuësoꞌ niꞌnamaꞌ. Yaꞌipiya nitotëramaꞌ. Co casoꞌ chirorahuëꞌ. Nani tahuëri pënënanquëmaꞌ. 19Quisocristoíchin natëto, Yosë marëꞌ sacatërahuë. Co aꞌnapita nocanahuëꞌ. ‘Casoꞌ noya noyaco,’ co tënahuëꞌ. Aꞌna tahuëri sëtato, naꞌnërahuë. Cotioroꞌsaꞌ naꞌcon chinotërinaco tëpainacoso marëꞌ. Chiníquën aparisitërinaco. 20Napotopirinacohuëꞌ, ahuantato pënënanquëmaꞌ. Co tëꞌhuato, taꞌtërahuëꞌ. Quisoso nanamën noꞌtëquën shaꞌhuitëranquëmaꞌ noya imacamaso marëꞌ. Niyontonpatamara, aꞌchintëranquëmaꞌ. Naporahuaton, aꞌnaya aꞌnaya pëinëmaquëntaꞌ paato, aꞌchintantaranquëmaꞌ. 21Co cotioroꞌsaráchin pënënahuëꞌ. Cricoroꞌsantaꞌ pënënahuë. ‘Co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. Sinioro Quisoso natëco huachi. Inasáchin anoyacancantërinpoasoꞌ,’ itëranquëmaꞌ. Yaꞌipinquëmaꞌ aꞌchintëranquëmaꞌ. 22Iporaso nipirinhuëꞌ Ispirito Santo natëto, Quirosarinquë paꞌsarahuë. Maꞌsona onpotaponaco nimara, co casoꞌ nitotërahuëꞌ. 23Nisha nisha ninanoroꞌsaquë paꞌpatora, Ispirito Santo nohuanton, shaꞌhuitëraꞌpiarinaco: ‘Quirosarinquë paꞌpatan, tashinan pëiquë poꞌmoarinënquën, chiníquën aparisitarinënquën,’ itërinaco. 24Yatëpapirinacohuëntaꞌ, co casoꞌ tëꞌhuatërahuëꞌ. Co ina yonquirahuëꞌ. Sinioro Quisoso natëaꞌhuasoáchin cancantërahuë. Iráca ina shaꞌhuitërinco aꞌchinaꞌhuaso marëꞌ. ‘Yosëri yaꞌipi piyapi nosoroaton, anoyacancantacasoꞌ nohuantërin. Ina noya nanan chachin aꞌchintonquëꞌ,’ itërinco. Napoaton paato, aꞌchintárahuë. Co chiminaꞌhuasoꞌ tëꞌhuatërahuëꞌ.

25Huaꞌquiꞌ yaꞌhuëramaquë paꞌsápato, Yosë huaꞌanëntërinpoasoꞌ aꞌchintopiranquëmahuëꞌ, apira paꞌsarahuë huachi. Co huachi quënanaramacohuëꞌ. 26-27Yaꞌipi Yosë yonquirinpoasoꞌ nani shaꞌhuitëranquëmaꞌ. Napoaton noꞌtëquën itëranquëmaꞌ. Insosona co natëhuachinahuëꞌ, ina marëꞌ co Yosë anaꞌintarincohuëꞌ. Inahuara tëhuënënaquë ninaꞌintapi. 28Canpitantaꞌ niꞌcona piꞌpian tërantaꞌ Yosë naniantotamaꞌ. Quisoso imapisopitantaꞌ noya niꞌcoꞌ. Ispirito Santo nani acorinquëmaꞌ huaꞌanën pochin nicacamaso marëꞌ. Inapitantaꞌ Yosë huëntonënquë yaꞌconpi. Quisoso chiminaton, ayaꞌconinpoaꞌ. 29Nani paꞌpato, co noyahuëꞌ quëmapiꞌsaꞌ huëꞌsapi. Canoniri maꞌsha maninso pochachin yaocoiarinënquëmaꞌ. Paꞌsápatonaꞌ, anishacancantapi. Co nosoroarinënquëmahuëꞌ. Ina nani nitotërahuë. 30Aꞌnaquëontaꞌ Quisoso imaponaraihuëꞌ, aꞌporahuatonaꞌ, nisha aꞌchinaponaꞌ. Yanonpintarinënquëmaꞌ. Inahuaꞌ imacamaso marëꞌ napotarinënquëmaꞌ. 31Napoaton iyaroꞌsaꞌ, niꞌcona nonpintochinënquëmaꞌ. Cara piꞌipi catahuaranquëmaꞌ. Tahuërirë chachin, tashirë chachin pënënanquëmaꞌ. Naꞌcon nosororanquëmaꞌ niꞌton, naꞌnëto, aꞌnaya aꞌnayanquëmaꞌ pënënanquëmaꞌ. Ina yonquiatomaꞌ, nipënëncoꞌ, nicatahuacoꞌ.

32Paꞌpato, Yosë noya aꞌpainquëmaꞌ. Quiricanën quëran nontarinquëmaꞌ. Ina quëran nosororinpoasoꞌ anitotarinpoaꞌ. Ina natëhuatamaꞌ, achinicancanarinquëmaꞌ. Oshaquëran noya noya cancantaramaꞌ. Quisocristo imarëhuaꞌ niꞌton, anoyacancantërinpoaꞌ. Ina nohuanton, aꞌna tahuëri yaꞌipi shaꞌhuitërinpoasoꞌ noya acotarinpoaꞌ. 33Aꞌchintohuatënquëmara, co aquëtëꞌ coriqui yonquirahuëꞌ. Aꞌna piyapi coriquinën co nohuantaparahuëꞌ. Co aꞌmopiso tërantaꞌ noyapatërahuëꞌ. 34Caora sacatonëhuë quëran coshatërahuë, maꞌsha pahuantërincosoꞌ paꞌanahuë. Caꞌtanincosopitantaꞌ quëtërahuë. Ina nitotëramaꞌ. 35Canpitantaꞌ nonanco. Sacatatomaꞌ, pahuantërinsopita maꞌsha quëtocoꞌ. Sinioro Quisoso noninsoꞌ yonquicoꞌ. ‘Aꞌnapita maꞌsha topinan quëtohuachinquëmaꞌ, noya cancantëramaꞌ. Nipirinhuëꞌ, canpitarintaꞌ nosoroatomaꞌ, topinan quëtohuatamaꞌ, noya noya cancantaramaꞌ,’ tënin Quisoso,” itërin Paonori.

36Ina tosahuaton, inapitarë chachin isonin. Napohuachinara, Yosë nontërin inapita catahuacaso marëꞌ. 37Naporoꞌ yaꞌipiya sëtatonaꞌ, naꞌnëpi. Paono iporahuatonaꞌ, apinopi. 38“Co huachi quënanaramacohuëꞌ,” tëninso marëꞌ naꞌcon sëtopi. Ina quëran nanchaquë huarëꞌ imapi.

Currently Selected:

Hechos 20: cbt

Highlight

Copy

Compare