Hechos 2
2
Ispirito Santo oꞌmarinsoꞌ
1Ina quëran Pinticosti tahuëri nanihuachina, Quisoso imapisopita inaquëráchin niyontonpi. 2Aꞌnanaya chiníquën irininsoꞌ natanpi. Panca ihuan pochin tënëntërimarin. Inápa quëran oꞌmarin. Yaꞌipi pëianaquë tënëanahuanin. 3Ina quëran pën nënërinso pochin nininsopita yaꞌnoimarin. Yaꞌipiya aꞌnaya aꞌnaya motoanshirainënaquë chiniimarin. 4Napohuachina, Ispirito Santori yaꞌipiya yaꞌcoancantërin. Ina quëran inari catahuarin nisha nisha nananquë nonacaiso marëꞌ. Co nitotaponaraihuëꞌ, aꞌnaroáchin nonpi huachi.
5Ina ninanoquë chachin naꞌa cotioroꞌsaꞌ yaꞌhuëapi. Nisha nisha parti quëran huëꞌpi Yosë chinotacaiso marëꞌ. Napoaton nisha nisha nananquë nonpi. 6Quisoso imapisopita nisha nisha nananquë nonsapisoꞌ natanpi. Natanahuatonaꞌ, notohuaroꞌ piyapi niyontonpi. Aꞌnaya aꞌnaya inahuara nananquë nonpisoꞌ natanahuatonaꞌ, paꞌyanpi. 7Chiníquën paꞌyanatonaꞌ, ninontopi.
—Maꞌpitataꞌ natanëhuasoꞌ. Isopitaso Cariria parti yaꞌhuëpisopitaráchin niponaraihuëꞌ, 8¿onporahuatonataꞌ canpoaꞌ nisha nisha nananquë nonëhuaso pochachin inahuantaꞌ aꞌnaroáchin nonpi? topi. 9Nisha nisha parti yaꞌhuëpisopita nani huëꞌpi. Partiaroꞌsaꞌ, miriaroꞌsaꞌ, iranoꞌsaꞌ, Misapotamiaquë yaꞌhuëpisopita, Cotia parti yaꞌhuëpisopita, capatosiaroꞌsaꞌ, pontoroꞌsaꞌ, asiaroꞌsaꞌ, inapita natanapi. 10Piriquiaroꞌsaꞌ, panpiriaroꞌsaꞌ, iquipitoroꞌsaꞌ, nipiaroꞌsaꞌ, Sirini pirayan yaꞌhuëpisopita, inapitantaꞌ nani huëꞌpi. Niꞌtoroꞌsaꞌ Noma quëran huëꞌpisopitantaꞌ natanapi. 11Aꞌnaquën cotioroꞌsaꞌ, aꞌnaquën nisha piyapiꞌsaꞌ niponaraihuëꞌ, Yosë chinotopi. Critaroꞌsaꞌ, arapiaroꞌsaꞌ, inapitantaꞌ huëcatonaꞌ, natanapi. “Nisha nishanpoaꞌ nicarihuarahuëꞌ, canpoaꞌ nanamënpoaquë chachin nontarinënpoaꞌ. Yosë paꞌyápiro nininsoꞌ shaꞌhuitarinënpoaꞌ, natanëhuaꞌ. 12Maꞌpitataꞌ napopi,” taꞌtonaꞌ, paꞌyanpi.
—¿Onporahuatonataꞌ naponontërinënpoaꞌ? topi. 13Aꞌnaquënso nipirinhuëꞌ tëhuarahuatonaꞌ:
—Noꞌpitonaꞌ, napoapi, toconpi.
Pitro pënëntërinsoꞌ
14Shonca catoꞌ caꞌtanoꞌsaso nipirinhuëꞌ, co tëꞌhuatonaraihuëꞌ huanipi. Pitrosoꞌ aꞌninquëchin huanirahuaton, chiníquën nontërin yaꞌipi piyapiꞌsaꞌ natanacaiso marëꞌ. “Noya natanco iyaroꞌsaꞌ. Yaꞌipima Quirosarinquë yaꞌhuëramasopitantaꞌ natanco onporaisona noꞌtëquën shaꞌhuichinquëmaꞌ. 15‘Isopita noꞌpipi,’ topiramahuëꞌ, co noꞌpiraihuëꞌ. Co yono piꞌiyátërarinhuëꞌ. Co tashiramiachin noꞌpirëhuëꞌ. Ispirito Santo yaꞌcoancantërincoi niꞌton, naporai. 16Iráca pënëntonaꞌpi Coiro itopisoꞌ, ninoton ninshitërin ipora niꞌsaramasoꞌ. Yosë noninso chachin ninshitaton, tapon:
17‘Aꞌna tahuëri ispiritonëhuë aꞌpamarahuë
nisha nisha piyapiꞌsaꞌ yaꞌcoancantacaso marëꞌ.
Yaꞌcoancantohuachin, huiꞌnamapita nanamëhuë shaꞌhuirapi.
Huiꞌnapiꞌsantaꞌ co huëꞌëponaraihuëꞌ, huaꞌnarëso pochin quënanapi.
Mashoroꞌsantaꞌ huaꞌnarapi.
18Naporoꞌ yaꞌipi natërinacosopita
ispiritonëhuëri yaꞌcoancantarin.
Ina nohuanton, nanamëhuë shaꞌhuirapi.
19Inápaquë nani maꞌsha acoarahuë. Piyapiꞌsaꞌ quënanpachinaꞌ, paꞌyanapi.
Isoroꞌpaquëntaꞌ, maꞌsha acoarahuë piyapiꞌsaꞌ yonquicaiso marëꞌ. Huënaiꞌ, pën, conaiꞌ tomontarinsoꞌ, inapita niꞌsapi, tënin Yosë.
20Sinioro oꞌmacasoꞌ tahuëri naꞌcon yonquicasoꞌ yaꞌhuërin.
Coꞌhuara naniyatërasohuëꞌ, nani maꞌsha onporapi. Piꞌi tashiarin.
Yoqui quëhuashin huënai pochin nisarin. Yosë yonquicaiso marëꞌ inapoarin.
21“Nichaꞌëco Sinioro,” topachinaꞌ, nichaꞌësarin.
Anoyacancantahuaton, nichaꞌësarin huachi,’ tënin Coiro iráca ninshitaton.
22Natanco iyaroꞌsaꞌ. Canpitantaꞌ israiroꞌsanquëmaꞌ niꞌton, Yosë nanamën anitotarinquëmaꞌ. Quisoso naporinsoꞌ shaꞌhuichinquëmaꞌ, nitotocoꞌ. Inasoꞌ Nasaritoquë yaꞌhuërin. Nani maꞌsha nanitaparin. Piyapi aꞌnaroáchin anoyatërin. Co ina pochin niꞌchinëhuahuëꞌ. Yosëri catahuarin niꞌton, naporin. Napoaton: ‘Tëhuënchachin Yosë quëran oꞌmarin,’ topi. Canpitantaꞌ nicatomaꞌ, nitotëramaꞌ. 23Napoaponahuëꞌ, canpitari atëpatëramaꞌ. Masahuatomaꞌ, nisha piyapiꞌsaꞌ quëtonamaꞌ corosëquë tëpacaiso marëꞌ. Co Yosë natëpihuëꞌ niꞌton, tëpapi. Iráca chachin Yosëri yonquirin huiꞌnin chiminacasoꞌ. Ina nohuanton, oshanënpoa marëꞌ chiminin. Co nohuantërinhuëꞌ naporini, co macacamasoꞌ nanichitomahuëꞌ. Canpitari atëpatopiramahuëꞌ, 24Yosëri ananpitaantarin. Chimirin quëran nichaꞌërin. Co chimirini minsërinhuëꞌ. 25Ina yonquiaton, Tapi iráca tapon:
‘Nani tahuëri Sinioro caꞌtanarinco. Inchinanëhuë quëran yaꞌhuërarin
achinicancaincoso marëꞌ. Catahuarinco niꞌton, co paꞌyanahuëꞌ.
26Napoaton noya cancantërahuë. Ma noyacha Tata Yosëso paya, tënahuë.
Co naniantarincohuëꞌ, taꞌto, co chiminaꞌhuasoꞌ tëꞌhuatërahuëꞌ.
27Yosë yonquiato, nontarahuë. Huaꞌyanëhuë, Sinioro, co chimipiroꞌsa yaꞌhuërinquë tëꞌyataranhuëꞌ.
Quëmasáchin natëranquën niꞌton,
co nohuantaranhuëꞌ nonëhuë chanatacasoꞌ.
28Quëma iranën aꞌnotëranco. Aꞌchintëranco quëma nohuitatënquën nóya nanpicaꞌhuasoꞌ.
Nani tahuëri caꞌtananco niꞌton, nóya cancantarahuë,’ tënin Tapi, iráca ninshitaton.
29Niꞌcochi iyaroꞌsaꞌ. Tata masho Tapi nani chiminin. Iráca nani paꞌpitopi. Paꞌpitopisoꞌ ipora huantaꞌ yaꞌhuërarin. 30Coꞌhuara chimiyantërasohuëꞌ, Yosëri itërin: ‘Aꞌna tahuëri quëma shiparinquën acoarahuë huaꞌanëntacaso marëꞌ. Quëma yaꞌhuërënamën huaꞌanëntarin. Casoꞌ Yosëco niꞌto, co nonpintaranquënhuëꞌ,’ itërin. Napoaton shiaꞌhuain ninoton, ninshitërin. 31Cristo nanpiantacasoꞌ ninorin. ‘Co chimipiroꞌsa yaꞌhuërinquë patarancohuëꞌ. Co nonëhuë chanatarinhuëꞌ,’ tënin iráca ninoton. 32Iporasoꞌ Quisoso chachin Yosëri ananpitaantarin. Quiyari niꞌnai. 33Ina quëran Yosëri inápaquë quëpantarin. Chiníquën nanantërin niꞌton, inchinanën quëran ahuënsërin. Inapotahuaton, shaꞌhuitërin: ‘Ispirito Santo aꞌpamaquëꞌ piyapiꞌsaꞌ yaꞌcoancanchin. Iꞌhua shaꞌhuitëranquënsoꞌ,’ itërin. Ina quëran Quisosori Ispirito Santo aꞌpaimarin, yaꞌcoancantërincoi, niꞌnamaꞌ. Napoaton nisha nisha nananquë nonai, natanamaꞌ. 34Tapi co nanpiantaton, inápaquë pantarinhuëꞌ, nitotërëhuaꞌ. Napoaponahuëꞌ, ninshitaton, tapon:
‘Yosëri Sinioronëhuë shaꞌhuitërin:
“Inchinanëhuë quëran huënsëquëꞌ
35inimiconënpita cari minsëchinquën,” itërin Yosëri,’ tënin.
36Yosë huiꞌnin chachin iyaroꞌsaꞌ, corosëquë apatanantëramaꞌ. Inapotopiramahuëꞌ, Yosëri noya noya niꞌnin. ‘Inasoꞌ Cristo, aꞌpaimarahuësoꞌ. Sinioro niꞌton, natëcasoꞌ yaꞌhuërin,’ tënin. Noꞌtëquën iyaroꞌsaꞌ nani shaꞌhuitëranquëmaꞌ,” itërin.
37Piyapiꞌsaꞌ natanahuatonaꞌ, naꞌcon sëtopi.
—Co noyahuëꞌ ninai. ¿Maꞌtaꞌ iyaroꞌsaꞌ, onpoꞌiisoꞌ? itopi caꞌtanoꞌsaꞌ.
38Napotohuachinara, Pitrori itaantarin:
—Yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. “Quisocristo imarahuë,” taꞌtomaꞌ, aporihuancoꞌ. Ina imapatamaꞌ, Yosë oshanëmaꞌ inquitarinquëmaꞌ. Ina quëran Ispirito Santo ayaꞌcoancantarinquëmaꞌ canpitantaꞌ. 39Yosë nohuanton, Ispirito Santo aꞌpatimarinpoaꞌ. Canpitantaꞌ yaꞌcoancantarinquëmaꞌ. Huiꞌnamapitantaꞌ yaꞌcoancantarin. Aꞌnaquëontaꞌ aquë yaꞌhuëpirinahuëꞌ, Yosë nohuanton, imasapi. Imapachinaꞌ, Ispirito Santori yaꞌcoancantarin inahuantaꞌ, itërin.
40Itahuaton, naꞌcon pënënin.
—Ipora yaꞌhuëpisopita co mantaꞌ Yosë yanatëpihuëꞌ. Ina marë noꞌtëquën anaꞌintarin. Canpitaso nipirinhuëꞌ ama inapita pochin cancantocosohuëꞌ. Yosë nontocoꞌ anoyacancanchinquëmaꞌ. Ina quëran chaꞌësaramaꞌ, itërin.
41Napotohuachina, naꞌa natëtopi. Naporahuatonaꞌ, iꞌquë aporihuanpi. Naporoꞌ tahuëri cara huaranca pochin piyapiꞌsaꞌ yaꞌconpi. Quisoso imasapi. 42Caꞌtanoꞌsa aꞌchinpachinara, paꞌyatopi natanacaisoꞌ. Noya natanatonaꞌ, natëpi. Noya niniꞌtonaꞌ, yaꞌhuërapi. Quisoso chimininsoꞌ yonquiatonaꞌ, coshatapatapi. Naporahuatonaꞌ, apira apira Yosë nontapi.
Quisoso imatonaꞌ, noya yaꞌhuëpisoꞌ
43Siniorori catahuahuachina, caꞌtanoꞌsaꞌ nani maꞌsha nanitapapi. Naꞌa piyapiꞌsaꞌ aꞌnaroáchin anoyatopi. Yaꞌipi piyapiꞌsari nicatonaꞌ, paꞌyanpi. “Tëhuënchachin Yosëri catahuarin,” topi. 44Yaꞌipi Quisoso imapisopita noya niniꞌtonaꞌ yaꞌhuërapi. Aꞌna huëntoíchin pochin nipi. Aꞌnaya aꞌnaya maꞌsha pahuantohuachinara, nicatahuapi. Co niapiratopihuëꞌ. 45Aꞌnaquënsoꞌ maꞌshanënapita paꞌanahuatonaꞌ, coriqui maꞌpatopi. Ina quëran aꞌnapita pahuantohuachinara, quëtopi. 46Nani tahuëri Yosë chinotopiso pëiquë niyontonpi. Quisoso chimininsoꞌ yonquiatonaꞌ, aꞌna pëiquë aꞌna pëiquë coshatapatapi. Co apiratonaraihuëꞌ, noya cancantapi. Nóya cancantatonaꞌ, coshatapatapi. 47“Ma noyacha Yosëso paya,” tosapi. Yaꞌipi piyapiꞌsari noya niꞌpi. Nani tahuëriya aꞌnapitantaꞌ imasapi niꞌton, Yosëri anoyacancantërin. Ina nohuanton, inapitantaꞌ yaꞌconpi.
Currently Selected:
Hechos 2: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.