Hechos 1
1
Quisoso nanpiantarahuaton, imapisopita yaꞌnotërinsoꞌ
1Iya Tiohuiro. Ca Nocasëco ninshitaantaranquën. ¿Noya quëmantaꞌ yaꞌhuaran? Noya cantaꞌ yaꞌhuarahuë. Aꞌna quiricaquë nani ninshitëranquën. Yaꞌipi Quisoso naporinsoꞌ shaꞌhuitëranquën. Aꞌchininsontaꞌ anitotëranquën. 2Yaꞌipi inápaquë panantaquë huarëꞌ naporinsoꞌ ninshitëranquën noꞌtëquën nitotamaso marëꞌ. Iporasoꞌ naquëranchin ninshitantaranquën. Coꞌhuara Quisoso inápaquë pantayátëraponhuëꞌ, caꞌtanoꞌsanënpita huayoninsoꞌ shaꞌhuitërin paatonaꞌ aꞌchinacaiso marëꞌ. Ispirito Santo nohuanton, shaꞌhuitërin. Inapita napopisontaꞌ nitochin, taꞌto, ninshitantaranquën. 3Quisososoꞌ tëhuënchachin chiminpirinhuëꞌ, nanpiantarin. Ina piquëran catapini shonca tahuëri isoroꞌpaquë yaꞌhuëantarin. Caꞌtanoꞌsanënpita yaꞌnotëraꞌpiarin nanpiantarinsoꞌ natëcaiso marëꞌ. Yosë huaꞌanëntërinsoꞌ aꞌchintaantarin.
4Aꞌna tahuëri inapitarëꞌ niꞌsoꞌ, shaꞌhuitërin:
—Ama aꞌnaroáchin Quirosarin quëran pipicosohuëꞌ. Isëquë ninacoꞌ Ispirito Santo oꞌmain. “Ispirito Santo aꞌpatimaranquëmaꞌ,” tënin Tata Yosë. Iꞌhua chachin shaꞌhuitëranquëmasoꞌ. 5Coanshasoꞌ iꞌquë aporintërinquëmaꞌ. Iporaso nipirinhuëꞌ Ispirito Santo ayaꞌcoancantaranquëmaꞌ catahuainquëmaso marëꞌ. Co huaꞌqui quëranhuëꞌ yaꞌcoancantarinquëmaꞌ, itërin caꞌtanoꞌsanënpita.
Quisoso inápaquë pantarinsoꞌ
6Ina quëran niyontoantarahuatonaꞌ, Quisoso natanpi:
—Iráca Sinioro israiroꞌsaꞌ pancana huaꞌanëntopirinahuëꞌ. ¿Ipora chachin chiníquën nanantaton, ina pochin acoantaran ti? itopi.
7—Tata Yosëíchin chini chiníquën nanantërin. Inaora nohuanton, maꞌsha acorin. Ma tahuërisoꞌ acoamara. Onporosona napoarinsoꞌ, co Yosë nohuantërinhuëꞌ canpita nitotacamasoꞌ. 8Iporaso nipirinhuëꞌ Ispirito Santo naꞌcon catahuarinquëmaꞌ. Yaꞌcoancantohuachinquëmaꞌ, nóya pënëntaramaꞌ. Ina nohuanton, nani maꞌsha nanitaparamaꞌ. Yaꞌipi naporahuësoꞌ niꞌnamaꞌ, nani nitotëramaꞌ. Aꞌnapitantaꞌ shaꞌhuitocoꞌ. Quirosarinquë chachin shaꞌhuitocoꞌ. Ina quëran yaꞌipi Cotia parti paatomaꞌ, shaꞌhuitoncoꞌ. Samaria partintaꞌ shaꞌhuitoncoꞌ. Yaꞌipi parti paatomaꞌ, shaꞌhuitëraꞌpiacoꞌ, itërin Quisosori.
9Ina topachina, Yosëri inápaquë quëpantarin. Caꞌtanoꞌsanënpitari nicasoiꞌ, inápaquë pantarin. Nëꞌpërápirinahuëꞌ, chitorori imotërin. Co huachi quënanpihuëꞌ. 10Inápaquë pantaquëyaꞌ, nëꞌpërápirinahuëꞌ, aꞌnanaya catoyaꞌpiri yaꞌnotiimarin, huiríton aꞌmopisoꞌ.
11—¿Maꞌmarëtaꞌ caririaroꞌsanquëmaꞌ inápaquë nëꞌpëtëramaꞌ? Quisoso nani pantarin. Yosëri inápaquë quëpantapirinhuëꞌ, ina chachin oꞌmantararin. Inápaquë paꞌninso pochachin aꞌna tahuëri oꞌmantararin, itërin.
Cotasë yaꞌhuërënamën Matiasë acopisoꞌ
12Ina natanahuatonaꞌ, Oriposë panën quëran nohuaramarahuatonaꞌ, Quirosarinquë paantapi. Co aquëyahuëꞌ. Aꞌna quiromitro pochin aquërinsoꞌ. 13Canconahuatonaꞌ, aꞌna pëiquë paꞌpi. Inapa pëꞌsatëꞌ pëiꞌ niꞌton, nanpëpi. Inaquë naporoꞌ yacapatapi. Pitro, Coansha, Santiaco, Antërisë, Pinipi, Tomasë, Partoromi, Matio, inapita yaꞌhuërapi. Aꞌnantaꞌ Santiaco. Arpio huiꞌnin inasoꞌ. Aꞌna Simontaꞌ yaꞌhuërin. Inasoꞌ copirno noꞌhuinaꞌpiroꞌsaꞌ imapirinhuëꞌ, inantaꞌ Quisoso imarin. Aꞌna Cotasëntaꞌ yaꞌhuërin. Santiaco huiꞌnin inasoꞌ. 14Inapitasoꞌ nani tahuëri niyontonatonaꞌ, Yosë nontápi. Quisoso iinpitantaꞌ huëꞌpi Yosë nontacaiso marëꞌ. Sanapiꞌsantaꞌ inaquë huëꞌpi. Aꞌnasoꞌ Maria. Quisoso aꞌshin inasoꞌ. Napopianachin yonquiatonaꞌ, inaquë naꞌcon Yosë nontápi.
15Ina quëran naꞌa Quisoso imapisopita niyontonpi. Pasa cato shonca piyapiꞌsa pochin yaꞌhuëpi. Pitrori huancánachin huanirahuaton, itërin:
16-17“Shonca catoyaꞌpicoi iyaroꞌsaꞌ Quisoso nani acorincoi aꞌnapita aꞌchintaꞌhuaiso marëꞌ. Cotasëntaꞌ acorin niꞌton, quiyapitarëꞌ Quisoso caꞌtanpirinhuëꞌ, inimiconënpitari yamapachina, shaꞌhuirapirin. Aꞌnotonpachina, mapi. Iráca Ispirito Santo nohuanton, Cotasë napocasoꞌ ninorin. Tapiri ninoton, Yosë quiricanënquë ninshitërin. Iráca ninorinso chachin naporin. 18Shaꞌhuirapirinso marëꞌ coriqui quëtopi. Ina coriquinënquë noꞌpaꞌ paꞌanpi. Cotasësoꞌ nitëparahuaton, noꞌpaquë anotaton, yaꞌpoirin. Chiꞌchirinamën pipirin. 19Yaꞌipi Quirosarinquë yaꞌhuëpisopita natantopi. Natantahuatonaꞌ, ina noꞌpaꞌ apoyatopi. Inahuara nananquë Aquirama itopi. Aquiramasoꞌ, ‘Huënaiꞌ Noꞌpaꞌ,’ tapon naporin. 20Yosë quiricanënquë ninoton, ninshitërin:
‘Ama insontaꞌ pëinënquë yaꞌhuëꞌinsohuëꞌ.
Noꞌpanëontaꞌ, tanahuantërarin quëran pantachin,’ tënin.
Ina quëran tantarin:
‘Ina yaꞌhuërënamën aꞌna acoantaquëꞌ,’ tënin antaꞌ Sarmo quiricaquë.
21-22Napoaton iyaroꞌsaꞌ aꞌna quëmapi acoantaꞌahuaꞌ Cotasë yaꞌhuërëtacaso marëꞌ. Iráca Coansha aporintasoꞌ, Sinioro Quisoso caniaririn aꞌchinacasoꞌ. Naporoꞌ naꞌa miachincoi Quisoso imarai. Nani tahuëri caꞌtanai. Inápaquë panantaquë huarëꞌ caꞌtanai. Aꞌnaraꞌ Quisoso caꞌtaninso chachin acoantaꞌahuaꞌ. ‘Quisoso nanpiantarin. Cantaꞌ niꞌnahuë,’ taꞌcaso marëꞌ acoaꞌahuaꞌ,” tënin.
23Ina marëꞌ catoyaꞌpi huayonpi. Aꞌnasoꞌ Matiasë. Aꞌnantaꞌ Cosi Parsapa. Costo itopi antaꞌ. 24Ina quëran Yosë nontopi. “Quëmasáchin Sinioro, yaꞌipi cancanëhuëi quëran yonquiraisoꞌ nitotëran. ¿Insotaꞌ nohuantëran acoaꞌhuaisoꞌ, 25inantaꞌ paaton, aꞌnapita aꞌchintacaso marëꞌ? Cotasë co huachi nanitërinhuëꞌ. Nani aꞌporinquën niꞌton, parisitopiquë paꞌnin,” itopi.
26Ina quëran catoꞌ yaꞌpi nininënpita catoꞌ naꞌpitëaꞌhuayaquë ninshitopi. Yontëraꞌhuayaquë poꞌmorahuatonaꞌ, paꞌtan paꞌtantohuachinara, Matiasë nininën pipirin. Shonca aꞌnaraꞌ caꞌtanoꞌsanënpita yaꞌhuëpirinahuëꞌ, iporaso huachi shonca catoꞌ caꞌtanoꞌsanënpita yaꞌhuantapi.
Currently Selected:
Hechos 1: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.