Hechos 18

Corintoquë Paono aꞌchininsoꞌ

1Ina quëran Paono pipirahuaton, Corintoquë paꞌnin. 2Inaquë aꞌna cotio quëmapi Aquiro itopisoꞌ quënanconin. Inasoꞌ Pontoquë nasitërin. Saꞌinsoꞌ Pirisira itopi. Iꞌhuamiáchin Itaria parti yaꞌhuëpi. Nomaquë chachin yaꞌhuëpirinahuëꞌ, copirno Craotiori camaitohuachina, yaꞌipi cotioroꞌsaꞌ pipipi. Aquirosoꞌ ina quëran pipirahuaton, Corintoquë huëꞌnin. Ina pëinënquë Paono paꞌnin niꞌtapon. 3Paonosoꞌ nëꞌmëtëꞌ pëiroꞌsaꞌ ninaꞌpi. Aquirontaꞌ inaquë chachin sacatërin niꞌton, inaquë yacapatërin nicatahuacaiso marëꞌ. 4Nani chinoto tahuëri cotioroꞌsaꞌ niyontonpiso pëiquë paꞌsahuaton, cotioroꞌsaꞌ aꞌchintërin. Cricoroꞌsantaꞌ aꞌchintaton: “Quisoso natëcoꞌ canpitantaꞌ,” itërin.

5Ina quëran Sirasë Timotiorë chachin Masitonia parti quëran canquipi. Canquihuachinara, Paono naꞌcon naꞌcon aꞌchinarin quënaimapi. Nani tahuëri cotioroꞌsa Quisoso nanamën aꞌchintárin. “Inaso Cristo, Yosëri aꞌpaimarinsoꞌ,” itaton naꞌcon pënënin. 6Inapitaso nipirinhuëꞌ noꞌhuitonaꞌ, Paono pinopi. Napoaton tananpitërin.

—Tëhuënchachin Yosë anaꞌintarinquëmaꞌ. Nani yaꞌipi aꞌchintopiranquëmahuëꞌ, co yanatëramahuëꞌ niꞌton, canpitaora tëhuënëmaquë ninaꞌintaramaꞌ. Iporaso nisha piyapiꞌsaꞌ aꞌchintarahuë huachi, tënin Paono.

7Ina quëran co huachi cotioroꞌsaꞌ niyontonpiso pëiquë aꞌchintërinhuëꞌ. Pipirahuaton, Tisio Costo pëinënquë paꞌnin. Inasoꞌ nisha piyapi niponahuëꞌ, Yosë chinotërin. Niyontonpiso pëiꞌ pirayan yaꞌhuërin. Ina pëinënquë paꞌnin aꞌchinacaso marëꞌ. 8Cotio niyontonpiso pëiꞌ huaꞌaontaꞌ natanahuaton, natërin, Crispo itopisoꞌ. Ina pëinënquë yaꞌhuëpisopitantaꞌ Quisoso imasapi. Naꞌa yaꞌhuëhuanoꞌsaꞌ Quisoso nanamën natanahuatonaꞌ, natëpi. Natëhuachinara, aporihuanpi. 9Aꞌna tashiꞌ Yosë nohuanton, Paono huaꞌnarëso pochin niantarin. Siniorori chachin itapon: “Ama tëꞌhuaton, copitëquësohuëꞌ. Aꞌchináquëꞌ. 10Carinquën catahuaranquën. Aꞌnaquën noꞌhuipirinënquëontaꞌ, noya aꞌpaiaranquën. Co insontaꞌ nanitapaponhuëꞌ maꞌsha onpotinquënsoꞌ. Naꞌa piyapiꞌsaꞌ isëquë yaimarinaco. Napoaton aꞌchintáquëꞌ,” itërin. 11Napotohuachina, inaquë aꞌna piꞌipi miria yaꞌhuaton, Yosë nanamën aꞌchinárin.

12Ina quëran Cariono Acaya parti huaꞌanëntohuachina, cotioroꞌsari Paono noꞌhuitonaꞌ, niyontonpi. Ina masahuatonaꞌ, huaꞌanoꞌsataquë quëpapi anaꞌintacaiso marëꞌ.

13—Moisësë iráca pënënincoiso pochin Yosë chinotërai. Iso quëmapiso nipirinhuëꞌ nisha aꞌchinarin. Piyapiꞌsaꞌ anishacancantarin, itopi.

14Paonori yanontapirinhuëꞌ, huaꞌani itapon:

—Canpita cotioroꞌsanquëmaꞌ co yanatananquëmahuëꞌ. Pasoꞌ quëmapi co noyahuëꞌ ninin naporini, nataꞌintohuëꞌ. Ihuatërin, ahuëtërin, inaporin naporini tëhuënchinsoꞌ, natanacasoꞌ yaꞌhuëꞌitonhuëꞌ. 15Nipirinhuëꞌ, nisha nisha nanan cotioroꞌsanquëmaꞌ yaꞌhuëtërinquëmaꞌ. Nipënënamasoꞌ quiricantaꞌ yaꞌhuëtërinquëmaꞌ. Co casoꞌ nohuantërahuëꞌ ina yonquicaꞌhuasoꞌ. Canpita capini anoyatocoꞌ, itërin.

16Itahuaton, aꞌparin. 17Naꞌa piyapiꞌsari niꞌsapi. Niꞌsahuatonaꞌ, cotio niyontonpiso pëiꞌ huaꞌan mapi, Sostinisë itopisoꞌ. Masahuatonaꞌ, inaquë chachin ahuëpi. Carionori nicaponahuëꞌ, co mantaꞌ tëninhuëꞌ. Co ina yonquirinhuëꞌ.

Antioquiaquë paantapisoꞌ

18Huaꞌquiꞌ Paono inaquë yaꞌhuantarin. Ina quëran Quisoso imapisopita nontahuaton, paꞌnin huachi. Aquiro saꞌinë chachin paꞌpi antaꞌ. Nanchaquë Siria parti yapantapirinahuëꞌ. Sincriaquë canconahuaton, Paono noyá niyaꞌitërin. Yosë shaꞌhuitërinsoꞌ nanirin niꞌton, naporin. Ina quëran nanchaquë yaꞌconpi. 19Ipisoquë canconpachinara, nonshipi. Aquirosoꞌ saꞌinë chachin inaquë quëparitërin. Paonosoꞌ yapaantahuachina, cotio niyontonpiso pëiquë yaꞌconahuaton, aꞌchintërin. Cotioroꞌsarëꞌ ninontopi. 20“Huaꞌquiꞌ yaꞌhuaton, aꞌchintaantacoi,” itopirinahuëꞌ, co nanitërinhuëꞌ. 21“Aꞌna tahuëri Yosë nohuantohuachin, huëantarahuë,” tënin.

Ina quëran nanchaquë yaꞌcoantarahuaton, paantarin. 22Sisariaquë nonshiconahuaton, Quirosarinquë paꞌnin. Yaꞌipi Quisoso imapisopita inaquë yaꞌhuëpisoꞌ nontërin. Ina quëran Antioquiaquë paantarin. 23Huaꞌquimiáchin inaquë yaꞌhuërin. Ina quëran naquëranchin yonquirin paaton nasha imapisopita nicacaso marëꞌ. Carasia parti paꞌsahuaton, pënënaꞌpiarin. Naporahuaton, Piriquia partintaꞌ paꞌsahuaton, pënënaꞌpiarin. Aꞌnaya aꞌnaya ninanoroꞌsaquë Quisoso imapisopita achinicancanaꞌpiarin. Achinicancanpachina, noya noya imasapi.

Aporosë Ipisoquë pënëntërinsoꞌ

24Naporoꞌ tahuëriꞌsaꞌ aꞌna cotio quëmapi Ipisoquë paꞌnin, Aporosë itopisoꞌ. Aricantriaquë nasitërin. Noyá nitotërin aꞌchinacasoꞌ. Yosë quiricanën iráca ninshitopisontaꞌ noya nitotërin. 25Sinioro iranën anitotopi niꞌton, aꞌninquëchin nanamën aꞌchintarin. Yaꞌipi cancanën quëran aꞌchinin. Quisoso naporinsoꞌ noꞌtëquën aꞌchinaponahuëꞌ, Coansha aporintërinsoráchin nitotërin. 26Cotioroꞌsaꞌ niyontonpiso pëiquë yaꞌconahuaton, chiníquën cancantaton, aꞌchinpirinhuëꞌ. Pirisira, Aquiro, inapitari natanahuatonaꞌ: “Co yaꞌipi Quisoso nanamën nitochátërarinhuëꞌ,” taꞌtonaꞌ, pëinënquë quëpapi. Inaquë yaꞌipi Quisoso nanamën aꞌchintopi noꞌtëquën nitotaton, Yosë iranën paꞌtacaso marëꞌ. Ina natanahuaton, natërin. 27Ina quëran Acaya parti yapaꞌsarin aꞌchinacaso marëꞌ. “Acaya parti aꞌchinchi, topirahuëꞌ,” topachina: “Noya iyasha. Noya paquëꞌ,” itopi Quisoso imapisopitari. Naporahuatonaꞌ, quirica ninshitopi quëtontacaiso marëꞌ. “Iꞌhuata, iyaroꞌsaꞌ. Aporosë huëꞌpachin, noya nontocoꞌ. Inantaꞌ Quisoso imarin niꞌton, noya natancoꞌ,” itopi ninshitatonaꞌ. Quirica maꞌpatahuaton, Acaya parti paꞌnin. Inaquë Quisoso imapisopita quënanconin. Yosëri catahuarin niꞌton, Quisoso imapi. Inapita quënanconahuaton, noya aꞌchintaton, achinicancanarin. 28Piyapiꞌsaꞌ niyontonpachinara, Yosë quiricanën aꞌchinárin. “Iráca quëran huarëꞌ Cristo oꞌmacasoꞌ ninopi. Iporasoꞌ nani oꞌmarin. Inasoꞌ Quisoso,” tënin. Quiricanën quëran anitotërin. Noya noya aꞌchinin niꞌton, cotioroꞌsaꞌ co nanitopihuëꞌ: “Nonpiánin” taꞌcaisoꞌ.

Currently Selected:

Hechos 18: cbt

Highlight

Copy

Compare