Hechos 16

Timotiontaꞌ imatërinsoꞌ

1Ina quëran Tirpiquë paꞌpi. Inaquë aꞌchinahuatonaꞌ, paantapi. Paantarahuatonaꞌ, Nistraquë canconpi. Inaquë aꞌna huiꞌnapi quënanconpi, Timotio itopisoꞌ. Inantaꞌ Quisoso imarin. Aꞌshinsoꞌ cotio sanapi. Quisoso imarin antaꞌ. Paꞌpinso nipirinhuëꞌ Crico piyapi.

2“Timotio nóya quëmapi,” topi yaꞌipi Quisoso imapisopita. Nistraquë yaꞌhuëpisopita, Iconioquë yaꞌhuëpisopitantaꞌ napopi. 3“Huëquëꞌ api imaquico,” itërin Paonori.

“Noyahuaꞌ, paꞌi cantaꞌ,” tënin antaꞌ. Inaquë naꞌa cotioroꞌsaꞌ yaꞌhuëpi niꞌton, Paonori shaꞌhuitohuachina, marca acotopi. Paꞌpinsoꞌ Crico quëmapi niꞌton, napopi. 4Aꞌna ninanoquë, aꞌna ninanoquë paꞌsahuatonaꞌ, pënënaꞌpiapi. Caꞌtanoꞌsaꞌ, ansianoꞌsaꞌ, inapita Quirosarinquë yaꞌhuëpisopita ninshitopisoꞌ shaꞌhuirapi imacaiso marëꞌ. 5Napohuachina, Quisoso huëntonënquë yaꞌconpisopita natëtonaꞌ, noya noya imasapi. Naporahuaton aquë aquëtë naꞌasapi.

Ispirito Santo nohuanton, huaꞌnarinsoꞌ

6Asia parti Yosë nanamën yashaꞌhuipirinahuëꞌ, Ispirito Santo co nohuantërinhuëꞌ inaquë aꞌchinacaisoꞌ. Napoaton Piriquia parti, Carasia parti inapita naꞌhuëtopi. 7Misia parti yaꞌcaritonahuatonaꞌ, Pitinia parti yapaꞌsapirinahuëꞌ. Naquëranchin Ispirito Santori yaꞌcopirin. “Co Quisoso nohuantërinhuëꞌ inaquë aꞌchinaꞌhuaisoꞌ,” taꞌtonaꞌ, co inatohuaꞌ paꞌpihuëꞌ. 8Napoaton Misia parti naꞌhuërahuatonaꞌ, Toroasëquë canconpi. 9Inaquë Yosë nohuanton, tashiꞌ Paono huaꞌnarëso pochin quënanin. Masitonia piyapi huaniarin, quënanin. “Huëquëꞌ isëquë. Nosoroatoncoi, catahuacoi,” itërin. 10Ina natanahuaton, “Yosë nohuantërincoi inatohuaꞌ noya nanan shaꞌhuicaꞌhuaisoꞌ,” taꞌtoi, manorai inatohuaꞌ pacaꞌhuaisoꞌ.

Piriposëquë aꞌchinpisoꞌ

11Marë yonsanquë yaꞌhuërai niꞌton, nanchaquë yaꞌconai pacaꞌhuaiso marëꞌ. Yaꞌconahuatoi, pipirai. Panca soꞌton huancoanaiꞌ nininquë canconai, Samotrasia itopisoꞌ. Inaquë huëꞌëpatërai. Tahuëririnquë pantarahuatoi, Niaporisëquë canconai. Inaquë nonshirai. 12Nani Masitonia parti canconpatoira, ira paꞌtatoi, Piriposëquë canconai. Inasoꞌ panca ninanoꞌ. Copirnori acorinsoꞌ niꞌton, inaquë naꞌa Nomaroꞌsaꞌ yaꞌhuëpi. Huaꞌquimiáchin inaquë yaꞌhuërai. 13Chinoto tahuëri nanihuachina, ninano quëran pipirahuatoi, iiꞌ yonsanquë paꞌnai. “Inaquë Yosë chinotapi,” taꞌtoi, inaquë paꞌnai. Sanapiꞌsaꞌ nani niyontonpi, quënanconai. Inaquë huënsërahuatoi, aꞌchintërai. 14Aꞌna sanapi inaquë Yosë chinotërin, Niria itopisoꞌ. Tiatira quëran huëꞌnin. Inasoꞌ tintahuan. Maꞌmaroꞌ nëꞌmëtëꞌ paꞌton nininsoꞌ paꞌanin. Inasoꞌ nisha piyapi niponahuëꞌ, Yosë chinotërin niꞌton, Paonori aꞌchintohuachina, nóya natanin. Yosë nohuanton, aꞌnaroáchin cancanën quëran huarëꞌ yaimarin. 15Quisocristo imarin niꞌton, aporintërin. Pëinënquë yaꞌhuëpisopitarë chachin aporihuanpi.

—Cantaꞌ Sinioro imarahuë niꞌton, huëcoꞌ pëinëhuëquë yacapacoi, itërincoi. Naꞌcon shaꞌhuitohuachincoira, inaquë huachi yacaparai.

16Aꞌna tahuëri yonsanquë paantarai Yosë chinotaꞌhuaiso marëꞌ. Paasocoi, aꞌna nanon quënanconai. Sopairi yaꞌcoancantërin niꞌton, ninotërin. Ina sanapisoꞌ aꞌnapitari paꞌanpi asacatacaiso marëꞌ. Ninorinso marëꞌ huaꞌanënpitasoꞌ, naꞌcon canapi. 17Nanonsoꞌ quënanahuatoncoi, imaquiarincoi. Imaritoncoi, chiníquën nonsarin yaꞌipi piyapiꞌsaꞌ natanacaiso marëꞌ.

—Isopita quëmapiꞌsasoꞌ Yosë piyapinënpita. Yosë chini chiníquën nanantërinsoꞌ nohuitatonaꞌ, natëpi. Aꞌchintarinënquëmaꞌ canpitantaꞌ nitotatomaꞌ chaꞌëcamaso marëꞌ, itë́riarin.

18Naꞌa tahuëri imatoncoi, naporárin. Pinatanaton, Paonosoꞌ noꞌhuitëriporin. Tahuërëtahuaton, sopai itapon:

—Quisocristo nanan quëtërinco niꞌton, aꞌpaaranquën. ¡Iso sanapi quëran pipimiatëquëꞌ! itërin. Naporo chachin pipimiatërin.

19Huaꞌanënpitaso nipirinhuëꞌ noꞌhuitopi. “Co huachi ninorinhuëꞌ niꞌton, co huachi canarëhuahuëꞌ,” taꞌtonaꞌ, Paono, Sirasërë chachin masahuatonaꞌ, cachiquë quëpapi ninano huaꞌanoꞌsaꞌ nontacaiso marëꞌ. 20Inaquë quëparahuatonaꞌ, coisëroꞌsaꞌ itaponaꞌ:

—Isopita quëmapiꞌsasoꞌ cotioroꞌsaꞌ niꞌton, aꞌchinatonaꞌ, ninanoꞌ tapiapi. Nisha aꞌchintohuachinara, yaꞌipi piyapiꞌsaꞌ nisha nisha yonquipi. 21Canpoaso nipirinhuëꞌ Noma piyapinpoaꞌ niꞌton, co inachintopisoꞌ natëcasoꞌ yaꞌhuërinhuëꞌ, itopi.

22Huanipapisopitantaꞌ noꞌhuitatonaꞌ, Paono, Sirasë inapita ahuëpi. Coisëroꞌsarintaꞌ camaipi. “Aiꞌnanpiratahuatomaꞌ, naraquë ahuëpicoꞌ,” itopi. Napohuachina inapotopi. 23Chiníquën ahuëpitonaꞌ, tashinan pëiquë poꞌmopi. Poꞌmohuachinara, tashinan pëiꞌ huaꞌan itaponaꞌ: “Noya aꞌpaiquëꞌ, taꞌahuachinaꞌ,” itopi. 24Ina natanahuaton, huancánachin poꞌmorin. Nantënaꞌ nontëquë acatëntahuaton, catinaquë niahuitërin.

25Yono tashiꞌ nisahuasoꞌ, parisitaponaraihuëꞌ, co sëtopihuëꞌ. Cato chachin Yosë nontápi. Yosë chinotatonaꞌ, cantarapi. Apiroꞌsaꞌ natantapi. 26Aꞌnanaya panca ocohua paꞌnin. Tashinan pëiꞌ achinicaso marë acotopiquë huarëꞌ, nacon nacontarin. Naporoꞌ Yosë nohuanton, yaꞌcoanaroꞌsaꞌ niiꞌsoatëraꞌpiapi. Yaꞌipi apiroꞌsaꞌ catinanënaꞌ niiꞌquiritopi. 27Tashinan pëiꞌ huaꞌan capayatohuachina. Yaꞌcoanaroꞌsaꞌ niiꞌsoatopinan niꞌnin. “Yaꞌipi apiroꞌsaꞌ capa, nani taꞌapi,” taꞌton, sahuëninën ocoirahuaton, yanitëparin. 28Paonoriso nipirinhuëꞌ aꞌnaroáchin nontërin:

—¡Ama iyasha nitëpaquësohuëꞌ! ¡Co taꞌaraihuëꞌ! itërin chiníquën nontaton.

29Ina natanahuaton: “¿Naporin ti?” tosahuaton, paꞌyanin. “Nanparin quëshico niꞌi,” itohuachina, piyapinënpitari quëpatopi. Manorahuaton, yaꞌconin. Paꞌyanaton, ropa ropátarin. Paono pirayan isonahuaton, mosharin. 30Ina quëran cato chachin ocoirahuaton:

—¿Maꞌtaꞌ iyaroꞌsaꞌ onpoꞌi chaꞌëcaꞌhuaso marëꞌ? itërin.

31—Quisocristoíchin nichaꞌërinpoaꞌ. Ina natëhuatan, chaꞌësaran. Saꞌan, huiꞌnanpita inapitarëꞌquën chachin chaꞌësaran. 32Ina tosahuaton, Quisocristo nanamën aꞌchintërin. Yaꞌipi pëinënquë yaꞌhuëpisopita natanpi. 33Tashinan pëiꞌ huaꞌansoꞌ noya natanahuaton, natërin. Tashiꞌ nipirinhuëꞌ, quëparahuaton, nicarotopisoꞌ paꞌmopirin. Napohuachina, Quisoso imapi huachi niꞌton, yaꞌipiya aporintërin. 34Nani aporihuanpachinara, pëinënquë quëparin. Inaquë aꞌcarin. Yosë natëtonaꞌ, yaꞌipiya noya cancantopi.

35Coisëroꞌsasoꞌ nipirinhuëꞌ co nitotopihuëꞌ. Tahuërihuachina, sontaroꞌsaꞌ amatahuatonaꞌ, itopi: “Tashinan pëiꞌ huaꞌan shaꞌhuitoncoꞌ catoyaꞌpi iꞌhuara poꞌmoraisoꞌ ocoiꞌin paꞌinaꞌ,” itohuachinara, paꞌpi shaꞌhuitaponaꞌ. 36Ina natanahuaton, Paono itapon:

—Coisëroꞌsaꞌ nanan aꞌpatërinaco ocoiaꞌhuainquëmaso marëꞌ. Napoaton noya pipicoꞌ, itërin huaꞌani.

37Paonoso nipirinhuëꞌ sontaroꞌsaꞌ itërin:

—Co poꞌoana quëran paꞌsaraihuëꞌ. Quiyasoꞌ Noma piyapicoi nipiraihuëꞌ, naraquë huiꞌtonpirinacoi. Co coisëquë shaꞌhuirapiponaracoihuëꞌ, cachiquë chachin napotërinacoi. Ina quëran tashinan pëiquë poꞌmorinacoi. Noma piyapicoi niꞌtoi, co topinan anaꞌintinacoisohuëꞌ nipirinhuëꞌ. ¿Iporasoꞌ poꞌoana quëran yaocoiantarinacoi ti? ¡Coꞌchi nohuantëraihuë paya! Shaꞌhuitëquëꞌ inahuara chachin huëꞌinaꞌ. Aꞌninquëchin ocoiꞌinacoi, itërin.

38Sontaroꞌsaꞌ paantarahuatonaꞌ, coisëroꞌsaꞌ shaꞌhuitonpi: “Inapitasoꞌ Noma piyapiꞌsaꞌ,” topachinara, paꞌyanpi. Co topinan quëran Noma piyapi ahuëcasohuëꞌ nipirinhuëꞌ, ahuëpi. 39Napoaton tashinan pëiquë paꞌsahuatonaꞌ, noya nontopi. “¿Canpitantaꞌ Noma piyapinquëmaꞌ ti?” itohuachina, “Inacoi mini,” tënin Paono. “Coꞌchi nitotëraihuë paya. Co nitotatoihuëꞌ ahuërainquëmaꞌ, co ahuëcaꞌhuainquëmasohuëꞌ nipirinhuëꞌ,” itërin. Ina quëran noya ocoirahuatonaꞌ, “Aꞌna parti pacoꞌ,” itopi. 40Napotohuachinara, tashinan pëi quëran pipipi. Pipirahuatonaꞌ, Niria pëinënquë paantapi. Quisoso imapisopita niyontonpachinara, piꞌpian pënëantapi: “Chiníquën cancantatomaꞌ, imamiatocoꞌ,” itopi. Ina quëran paꞌpi huachi.

Currently Selected:

Hechos 16: cbt

Highlight

Copy

Compare