2 Juan 1
1
Noꞌtën nanan imarëhuasoꞌ
1Ca ansianoco iso quirica ninshitaranquëmaꞌ ¿Noya canpitantaꞌ yaꞌhuaramaꞌ? Cantaꞌ noya isëquë yaꞌhuarahuë. Yosë nohuanton, canpitantaꞌ huëntonënquë nani yaꞌconamaꞌ. Noꞌtën nanan imaramaꞌ niꞌton, tëhuënchachin nosororanquëmaꞌ. Yaꞌipi Quisoso imapisopita noya nicatënënquëmaꞌ, nosororinënquëmaꞌ. Yaꞌipinquëmaꞌ yonquiatënquëmaꞌ, ninshitaranquëmaꞌ. 2Quisocristo noꞌtëquën aꞌchintërinpoaꞌ. Noꞌtën nanan imamiatatëhuaꞌ, ninosoroarëhuaꞌ. 3Inaora nohuanton, Tata Yosë naꞌcon catahuainquëmaꞌ. Nani tahuëri nosoroꞌinquëmaꞌ. Asanocancainquëmaꞌ. Quisocristontaꞌ inachachin catahuainquëmaꞌ. Inasoꞌ Yosë huiꞌnin chachin. Catahuahuachinpoaꞌ, noꞌtëquën yonquiarihuaꞌ. Ina quëran noya ninosoroarihuaꞌ.
4Aꞌnaquën yaꞌhuëramaquë noya imasapi quënanconahuë. Tata Yosë pënëninpoasoꞌ noꞌtëquën natëapi. Ina marëꞌ nóya cancantërahuë. 5Iporasoꞌ yaꞌipinpoaꞌ noya ninosoroaꞌahuaꞌ, tënahuë. Co nasha nanan ninshitaranquëmahuëꞌ. Iráca quëra huarëꞌ Yosë shaꞌhuitërinpoaꞌ ninosorocasoꞌ. 6Yosë nosorohuatëhuaꞌ, natëarihuaꞌ. “Yaꞌipi piyapiꞌsaꞌ nosorocoꞌ,” itërinpoaꞌ. Yaꞌnan imarama quëra huarëꞌ ina natanamaꞌ.
Nonpin nanan aꞌchinaꞌpiroꞌsaꞌ
7Aꞌnaquënso nipirinhuëꞌ piyapiꞌsaꞌ yanonpintatonaꞌ, nisha aꞌchinapi. Yaꞌipi parti paꞌsápi nonpin nanan shaꞌhuicaiso marëꞌ. “Quisocristosoꞌ Yosë huiꞌnin niponahuëꞌ, co piyapi chachin nininhuëꞌ. Co canpoa pochin nonën yaꞌhuëtërinhuëꞌ,” topi. Co noꞌtëquën aꞌchinpihuëꞌ. Insosona ina pochin aꞌchinpachina, nonpinarin. Inasoꞌ Quisocristo inimiconën, tënahuë. 8Niꞌcona nonpintochinënquëmaꞌ. Nani huaꞌqui Yosë imatomaꞌ, ina marëꞌ sacatopiramahuëꞌ. Inapita pochin cancantohuatamaꞌ, topinan quëran imapomaꞌ. Co Yosëꞌpaꞌ acanaarinquëmahuëꞌ. Nipirinhuëꞌ, yaꞌipi cancanëma quëran imapatamaꞌ, inatohuaꞌ Yosë noya noya nohuitatomaꞌ, yaꞌhuëmiataramaꞌ.
9Aꞌnaquën co Quisocristo nanamënáchin imapihuëꞌ. “Quiyasoꞌ naꞌcon naꞌcon nitotërai,” toconpi. Inapitasoꞌ co Tata Yosë nohuitapihuëꞌ. Quisocristo nanamën imapatëhuaꞌ, Tata Yosë nohuitarihuaꞌ. Huiꞌniontaꞌ nohuitarihuaꞌ. 10Aꞌna piyapi huëꞌpachin: “Carinquëmaꞌ aꞌchinchinquëmaꞌ,” itohuachinquëmaꞌ, ama aꞌnaroáchin natëcosohuëꞌ. Co Quisocristo nanamën aꞌchintohuachinquëmahuëꞌ: “Inca. Co yanatanainquënhuëꞌ,” itocoꞌ. Ama yaꞌhuëramaquë ayaꞌconcosohuëꞌ. “Yosë catahuainquën,” ama itocosohuëꞌ. 11Co Quisocristo natëtonahuëꞌ, co noyahuëꞌ nipi. Ama piꞌpian tërantaꞌ natanacamasoꞌ nohuantocosohuëꞌ. Canpitataquë nisha nanan aꞌchintohuachinquëmaꞌ, aꞌnaquën nonpin nanan imaponaꞌ nimara. Imapachinaꞌ, ina marëꞌ canpitantaꞌ oshahuanaramaꞌ.
Nicapon yapaꞌninsoꞌ
12Naꞌcon naꞌcon yashaꞌhuitopiranquëmahuëꞌ, co aquëtëꞌ yaninshitëranquëmahuëꞌ. Co huaꞌquiya quëranhuëꞌ nicaponquëmaꞌ paꞌsarahuë topirahuëꞌ. Canconpato, ninontohuatëhuaꞌ, noya noya cancantarihuaꞌ. 13Isëquë Quisocristo imapisopita yonquiarinënquëmaꞌ. Yosë nohuanton, huëntonënquë yaꞌconpi antaꞌ. Inapitantaꞌ saludos aꞌpatarinënquëmaꞌ. Nani huachi.
Currently Selected:
2 Juan 1: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.